الشقراء و الجشعة 👱×👩 { باللهجة الجزائرية😍}

بارت اضافي ♥

اول شيء و قبل ما نبدا حبيت نقللكم هاد البارت معندوش علاقة بالحكاية هاد البارت فيه حكاية نتمنى تقراوها لانو قصيرة و هاد الحكاية حقيقة صرات لوحدة قريبة بزاف ليا و حبت تدي اراء الناس فيها و تنصحوها نتمنى متحشمونيش هههههه......

ملاحظة : الاسماء غير حقيقية

بداية 

انا فتاة عادية جدا مثل اي فتاة في هاد العالم اسمي انفال  عايشة نورمال  والديا كانو مزيرين ملي كنت صغيرة بصح مين كبرت راني عرفت بلي كان عندهم الحق كليا لانو انا طفلة شابة الله يابرك و من صغري عندي لاطاي شابة كانو يخافو عليا كي هما كي خاوتي الكبار و مرات كانت تديقلي بصح دك عرفت بلي كلشي كان لمصلحتى .... المهم انا نقرا عادي و قرايتي اعز عفسة عندي نسمح فكلش غير هي لا لانو عبالي هي لي راح تسلكني فالاخير .... لمهم نحكيلكم حكايتي هههه و لازم نرجعو 6 سنين للوراء يعني لسنة 2013 كان اول عام ليا فالليسي بعدما جبت البيام تاعي بعلامة مشرفة فرحت والديا و عائلتي ....و كملت سيونتيفيك .. كنت ميتة بالفرحة كيما اي فتاة حابة تنجح فحياتها....

المهم الليسي كان عاجبني بزاف و الاساتدة هايلين و مع انا مهبولة و تع هدات و مصايب بسلامتي صافيك نقدر ندير صداقات بسرعة و قاع يحبوني ههههه خموس عليا ....المهم كنت قاعدة مع صحبتي و كان مورانا قاعد صديقي الانتيم اسمو محمد كان انتيم بزاف ليا و راكو تعرفو دراري تع بكري نية و رجلة مشي كيما تع دك دراري صغار قاع حنا كنا رجال و نساء حتى فالتخمام و هادا كنت متأكدة انو مرح يحبني ما والو لانو صح كان كيما خويا و قصرتنا غير تمهبيل و كنا نحبو نقراو صافيك كنا واحد يعاون لوخر و كان معانا ولد اخر اسمو عادل كان قريب بزاف تان لمهم داك العام كان قاعد مع محمد ولد وحدوخر اسمو بلال .... السيد كان عكسنا كليا حنا ماسينات تع الهدر و الضحك و تمهبيل بصح هو راسه ميرفدوش كان عافل بزااااف لدرحة كنت نحسو بهلول بصح نن هو كان مربي و لوكان متهدريش معاه والله مينطق زيد كان قاري ... المهم جازو اليامات و بما انو انا نحب ندير الصداقات و تجيني سهلة بديت انا نهد مع هدا بلال  خاصة كان قاري بزاف علينا كل خطرة منفهمش عفسة ولا ندور ليه و هو مسكين عمرو ما بخل عليا و لا قالي لا ... جازو اليامات و رجعنا حنا الربعة دايمن كيف كيف تع الصح كانو كيما خاوتي الحمدالله ربي رزقني بعباد صالحين بلاك دراري خير من بنات غيورات ولا حسادات ... ايا كيما قتلكم الايام تجوز و انا و بلال غير نتقربو كثر و كثر حتى راحتلو شوية هديك الحشمة مينداك نكونو قاعدين يقولي ادا مفهمتش حاجة ولا و عمرو ما بخل عليا بعفسة و يكون وش يكون .... نشفا خطرة كان عندنا فرض فيزياء و انا برك شفتو تفرفشت و التمرين الاول لي عليه بزاف نقاط جاني بزاف صعيب و معرفت فيه والو خلاص رجعت خايفة قلبي رجع يخبط بسرع الضوء و مفقتش حتى صبت روحي نبكي... اييه نبكي قتلكم قرايتي اعز شيء ليا  و انا نبكي حتى يعيطلي بلال درت ليه  قالي وشبيك بلعقل  درتلو بيدي واحد معنتها التمرين الاول  و درت لبلاصتي و خلاص استسلمت بيت فالتمرين الثاني ..... جازت نص ساعة مالفرض حتى نشوف بلال ناض و حط  ورقتو وي ناض حطلي ورقة انا تشوكيت كيفاش فرض تع ساعة و نص كملو في نص ساعة لمهم فتحت الورقة و صبت الحل تاع التمرين انا كتبتو كامل و مت بلفرحة .... جا النتهار لي تردنا فيه الشيخة الفروض و ديت انا 14  و هو 12 ايييه تالمون كنت بهلولة و نية رحت قتلو اييه انا ديت خير منك بصح هو مسكين ما قال والو بلعكس ضحك و فرح و قالي الحمدالله راكي هايلة ههه