Poems For The Heart

Maling Akala

Sa isang paraiso ika'y nakita

Sa unang pagkakataon

Puso ko'y tumalon

Muntik na ngang lumabas

Buti at napigilan

Ako'y iyong nginitian

Ngiting kay ganda, mula sa puso at tunay talaga

Paa ko'y tila nalusaw

Pakpak ay biglang lumitaw

Tanging naririnig pagheleng kay ganda

Oras ay tila ba bumagal

Sa iyong paglapit ako'y nanginginig

Di maipaliwanag kabang aking nadarama

Bangong kay sarap sa pakiramdam

Buhok na tila ba sumasayaw

Kasabay ng alon sa dagat na asul

Ika'y malapit na

Ngiti ko'y di maitago

Sobrang kinikilig sa nilalang na gwapo

Ngiti kong kay tamis

Biglang naglaho

Nang ako'y lampasan

Ng lalaking sinisinta

Katagpo mo pala ay sya,

Sya na aking kapatid

O kay saklap, akala ko ako'y nginitian

Ngiting kay tamis

Para sa kapatid ko pala.