" لماذا اقتربت "

البارت الاول

مسك : الساعة 10 ونص الصبح بعد ما خلصت المحاظرة قررت ارجع للبيت واخذ علاج السكر الامي اليوم محد يمها ولازم ارجع للبيت من وقت ، ياربي شكم محاظرة راح تفوتني بلية هاي و هاي اني الاسبوع الفات ضربت خمس محاظرات الله كريم...
بطريقي للبيت مريت للصيدلية اخذت علاج امي وطلعت
يم الصيدلية اكو صبات باوعت بنية صغيرة واگعة ورجلها متعورة
وتبچي محد يمها عمرها يجي  5سنوات ، رحت يمها ركض ...

مسك: اسم الله حبيبتي شبيچ وين اهلج ليش هيج وضعچ
البنية: تبچي تناشغ ما ترد
مسك: شلتها دخلتها للصيدلية ابو الصيدلية من شافني شايلتها ركضلي اخذها من ايدي وگال:
شبيها تبچي شنو صاير شتصيرين منها
مسك: اخوية هسة شفتها واگعة بالگاع يم الصبات وتبجي متعورة برجلها مثل ما تشوف
الصيدلاني : سهلة سهلة هسة اداوي جرحها ونوديها للجامع ينادي باسمها لان الظاهر متيهة اهلها
مسك: راح يجيب الديتول والشاش واني گعدت يم الطفلة احاول اهديها وگلت : اسم الله عمري لا تبجين الله عليج بس گولي شتريدين واني اسويلج طيب بس احجي ويامن طالعة انتي ليش وحدج..
الطفلة : بابا ... بابا اريد بابا عفية خالة ماريد شي وديني البابا
مسك :بگلبي گلت (شلون بابا حريص متيه بته بهيج منطقة )
رجعت گلتلها گلبي نوديج اله والله لا تبجين كافي اهدائي هسة يجي عمو يداوي جرحج ونوديج البابا ، شوية هدت وسكتت اجة الصيدلاني عالج رجلها وهي بجت شوية بس سكتت كمل رجلها
اني باوعت على ساعتي ١١ الا خمسة گلت للصيدلاني :
اخي تاخذها انت للجامع لان والله اني تاخرت وبالبيت ينتظروني
الصيدلاني: لا والله اختي عذريني ما اگدر تشوفين ما اگدر اعوف الصيدلية ...
مسك: عليك يا الله ، اخذت الطفلة گلتلها تگدرين تمشين لو اشيلج گالت اي اگدر امشي  عرفت اسمها مينة ، كلش حبيتها لابسة بدلة قصيرة وردية وهي بيضة وحذائها شگدوته وشعرها شلون امشط فدوة ، اخذتها وطلعنة من الصيدلية مشينة بطريقنة للجامع واني طول الطريق اسولف وياها حچيها يخبل مرينة من محل گلتلها خل اشتريلج شي تاكليه هزت راسها بمعنى اي
دخلت للمحل اشتريتلها كيك وعصير وطلعنة هي تمشي وياي وتشرب بالعصير بقت مسافة قليلة و نوصل للجامع ..
فجئة سمعت صوت قوي كلش صاح ...
مينننننننننننننننننننة
التفتت ليورة ولازمة ايد مينة شفت رجال جاي بتجاهنة وجهه احمر من بعيد يجي عمره تلاثينات اجة جر مينة من ايدي شالها وحضنها وعيونه تباوعلي بغضب وگال :
شسويتي البنتي رجلها متعورة وين ماخذتها قسماً بلعباس احاسبج وادخلج السجن بتهمة خطف...
مسك : شلون بهاي العطلات من الصبح ، اباوعله واني متفاجئة قاطعته گلت:
اگلك لو تحترم نفسك وما تهدد وتنتبه البنتك و ما تتيها بالشارع احسن الك من ما تعارك الناس مو مشكلتي اذا انت ما عندك مسؤلية اتجاه بنتك فهمت لو لا ، اجة يحچي بس اجت مرة چبيرة لابسة عباية فحطانة ومبينة باجية گالت :
ها يمة احمد لگيت بنيتك يمة مينة گلبي راح عليج
احمد : اي يمة لگيتها لو ما اني اجيت واخذتها من هاي چان هسة ما ادري شصار بيها
مسك: خالة انتي ام هذا الهمجي ،ونعم التربية خالة فوگ عدم مسؤليته اجة يتجاوز علية ، بتكم لگيتها واگعة وحالتها حالة وهسة ماخذتها للجامع ينادون باسمها وبتكم تكمل الباقي
ام احمد : خالة اعذرينه الله يستر عليج ويوفقج
مسك : الاماية تحچي وياي وهذا ابنها الوقح اخذ بنته دار وجهه حاضنها ويمشي شطولة چنة نخلة گلت الامه : ولا يهمج خاله بس انتبهو الاطفالكم مرة ثانية وتفضلي هاي جنطة مينة ، مع السلامة
مسك : رجعت للبيت واني افكر هذا اليوم بدايته هيج نهايته شلون دخلت البيتنة ولگيت امي طابخة بوستها من راسها وگلت ماماتي روحي شلونج اليوم ؟
امي: هلة الله يساعدج يمة جاية من وقت اليوم ليش تعوفين محاضراتج وتجين علمودي يا يمة والله تعبتي نفسج
مسك: يمة لا تحچين هيج شعندي غيرج ، وليش طابخة ها چان تانيتيني اجي و اطبخ محد عدنة بالبيت بس اني وانتي و علي اخوي اليوم خفر ما يجي يالله يمة راح ابدل واصلي واني اصب الغدة انتي ارتاحي
الام : خوش يالله اني هم اريد اصلي
مسك: رحت سبحت وبدلت وصليت صبيت الغدة الامي وتغدينة ثنينة وانطيتها العلاج وعل غدة سولفتلها كلشي صار وياي اليوم
وعلى احمد الوقح قليل التربية وامي گالت نصاً:
يمة مسك تلگينه گلبه محروگ على بنته وهيج حچة الانسان يفقد اذا يشوف ضناه بخطر يفقد اعصابه
مسك : والله ما ادري شگول يا يمة
مضى اليوم عادي درست واتصلت على صديقتي حوراء وسولفنا درست وكملت صارت ساعة ١٠ بالليل اتصلت على علي
مسك : الو هلو علاوي شلونك
علي :هلى مسمس شلونج بيش الساعة رجعتي اليوم
مسك: لك وصلت للبيت ساعة ١٢ الا ثلث ما عفت امي وحدها
علي: عفية بعد اخوج مو مثل اخوانج الثنين امجد و صادق ما بيهم نفع الامي و لا الج گاعدين يم نسوانهم و ساكتين
مسك : ما نحتاجهم ان شاء الله علاوي هم عافونة وعزلو لا يسئلون ولا شي خليهم يعيشون بعيد عنة اني و ياك و امي ان شاء الله نعيش احلى عائلة
علي: اي عمي انتي مسمس تعادلين عشر اخوان وعشر اخوات هههههه يالله ولج خل اروح للواجب
مسك :الله وياك ياعمري
مع السلامة
مع السلامة
بدلت لبست تراك اسود حتى انام باجر هم دوام
طبعاً خل احچيلكم شوية عني وعن عائلتي
اسمي مسك عمري ٢٠ سنة مرحلة ثانية كلية اللغات
والدي متوفي من چان عمري ٣ سنوات
عندي تلث اخوان امجد الچبير وصادق اصغر منه وعلي اخوي الصغير بس اكبر مني عمره ٢٥
امجد وصادق تزوجو وعزلو من يمنة ما يجونة بس بالمناسبات وامي مع ذلك تحبهم وتسال عنهم
اخواتي اسراء و زينة ثنين تزوجن من چان عمري ١٣ سنة
اني من سكنة بغداد ، امي مريضة بمرض السكري
دائماً يرتفع عدها وتتخربط لذلك ما نعوفها
لو اني لو علي يمها
علي ضابط شرطة ويصير عنده دوام خفر
مو دائماً يبقى يمها بس هو ما مقصر ويانة ابد
هاي اني و عائلتي ..
ثاني يوم
مسك: گعدت الصبح عل سريع بدلت لبست فستان طويل صيفي مورد ولبست سترة كابوي ثلجي  وحذاء بوتين ابيض طبعاً ما خلي مكياج بس مسكارة ومرطب شفة لان بشرتي الحمد لله صافية اخذت الملازم والكتب والجنطة نزلت امي بعدها ما گاعدة علي يجي بعد شوية ،طلعت للكلية اخذت تكسي و صلت لاگتني صديقتي حوراء
حوراء: هلة مسمس شهل جمال من الصبح
مسك: عمري حوري مو مثل جمالج لج يالله خل نلحگ عل محاظرة
رحنة دخلنة المحاظرة اخذنة محاظرتين بعدها طلعنة ورحنة للكافتريا گعدنة اني و حوراء وبعد صديقاتنا هواي سوالف وضحك
مسك : بنات راح اروح اگعد على هذيج الطاولة وحدي بس انقل المحاظرة من دفتر حوراء واجي ...
رحت گعدت واني انقل المحاظرة
حسيت شخص وگف على راسي رفعت راسي ..
باوعت رجال لابس قميص ابيض و بنطرون اسود ومرتب وشعره مرتب چني شايفته
مسك : تفضل اخي محتاج شي ؟
الرجال : اسمعي الي راح اگوله
مسك :من سمعت صوته عرفته هو هذا الوقح الاسمه احمد عاااااا خرررررب هذا شجايه هنا لا ياربي شوف شلون شكله متغير
طبعاً صارت عركة بداخلي ..
احمد : البارحة تجاوزتي وحالتي چانت ما تسمح ارد عليج
بس خليها ابالج مو انا الينغلط علية واسكت
ولو ما انتي سويتي فضل وي بنتي چان الي غير تصرف وياچ
مسك: حچة هذا الحچي واني منصدمة من القباحة فوگ هذا خلة ٢٥ الف عل طاولة وگال هاي حق العلاج مال مينة ودار ظهره وراح ...
بقيت مصدومة الكلام ما يطلع من شفايفي
وصارت عركة اسئلة بعقلي
منو هذا؟
شجابه للكلية ؟
ما معقولة طالب لان لو طالب جان عنده شوية ادب وهو چبير؟
معقولة استاذ بهاي الجامعة؟ لا عيع شنو الجامعة ما تلفي هيج شكول
هذا الهمجي لا ويخلي فلوس على طاولتي ؟؟؟!!!!
مسك: انتفظت واخذت الفلوس من الطاولة ومشيت وراه واني كلي غضب واعصاب وصدمة بنفس الوقت رحت مشيت وراح دخل بممر
صحت وراه يا همجي ....
دار وجهه عليه ومعالم التعجب كلهن بوجهه
تقربت منه والمسافة بيناتنة متر
مسك: اعتقد اسمك احمد للاسف ما تستاهل اسم نبينا  (ص)
شخص همجي مثلك ما يستحق هيج اسم وهاي الفلوس (احچي واني اشگگ بيها گدامه) هاي الفلوس خليهن الك اعتقد انت بحاجة للفلوس حتى تدفعهن الطبيب نفسي يعالجك من مرضك ...
احمد :....