" لماذا اقتربت "

البارت الثالث عشر

مسك : ما صحيت الا على روحي واني بنص بغرفة امي واخواتي وخالاتي يمي ما شوف وجوههن بس اشوف السواد يبچن ويمرخن بادية وبجسمي ويذبن علية مي حتى اصحى وضحت عندي الصورة شفت اسراء وزينة لابسات اسود ويبچن يمي گعدت وردت اصرخ بس صوتي غدرني صوت ماعندي گوة ينسمع مبحوح ضليت اصيح : امممي وينهاااا اسراء زينة وين امممي فدوة گللي وينها يممممممممة اخذيني وياج فدوة لا تعوفيني منو الي بعدج يمة منو الي ااااااااااخ يا گلبي اسراء گلبي راح ينشلع شسوي فدوة
ولللج يمة الحگيلي اني بنتج مدللتچ ليش عفتيني يمة ليش عفتيني بشنو قصرت وياج وخليتيني ورحتي شنو قصرت وياج
بقيت اصرخ وانحب الحد ما انتبهت بعدني بالملابس الالوان
گومتني زينة گالتلي : حبيبتي گومي بدلي امي تستاهل نلبس اسود ونحزن عليها كومي بعد ورانة ضيم يابو ضيم  ، الكل طلع من الغرفة كمت واني گوة اخطي الخطوة البنات مخلياتلي دشداشة سودة وشال اسود بدلت ولبستهن گعدت بالغرفة يم فراش امي خليت راسي بين رجلية وضليت انحب عليها بدون صوت صوتي مايطلع
لشوية اجن خالاتي خالتي نسمة وخالتي زهرة
زهرة : گومي يوم يا بنت الغالية شبيدي عليج  راحت العزيزة من يمنة راحت اختي وصاحبتي
مسك : لا فدوة خالة لا تگولين هيج لا تگولين راحت والله ما رديها تعوفني انا ما عندي غيرها اااااااااخ يمة حبيبتي وينج
نسمة : كافي بعد خالتج بعدنا اليوم الاول ما مخلصينة وصوتح راح بعد ورانة بچي ولطم شدي حيلچ بتي  راح يجيبون تابوتها للبيت انوب يدفنوها 
مسك : من سمعت حچي خالتي نسمة عرفت ماكو مفر هاهية حياتي اتدمرت وامي راحت من ايدي لازم اخضع للامر الواقع
گمت وياهن نزلت جوة  الاستقبال كلها نسوان لابسات اسود وكاعدات الصالة مليانة اطفال اول ماردت ادخل للاستقبال گامت اسراء جرتني من ايدي وگالت تعاي حبيبتي تعاي گعدي يمي كلها تسال عليج  ، گعدت يم اسراء  عدلتلي حجابي ونمت على رجلها ودموعي تصب ما سكتن ابد وكلساع جاية مرة تبوسني وتگلي شدي حيلج هذا امر الله ومن هذا الحچي  الحد ما جابو التابوت دخلو على الاستقبال حتى ما شفت منو شايله اول مادخلوا گمت على حيلي خلو التابوت بالگاع  وخلوه عل قبلة ما جنت اشوف شي غير تابوتها  صرخت عليه الحد ما الله گلي بس شگد گلت راح تطلعلي وتحاچيني بس ماكو گلتلها ، يمة من چنتي بالمستشفى گلتلج ماريد شي منج بس ابقي وياي هذا كل الردته ما ردت هواي احچي وانحب على تابوتها
واعاتبها بس ماكو لاجواب ولا رد الحد ما علي گعد يمي وحضنني گالي كافي ياروح اخوج كافي شدي حيلج مابيدنة شي هذا امر الله
حضنته حيل وصرت اصرخ وابچي  شوية و شالو التابوت وراحو للنجف يدفنون اني ماخذوني بحجة شابة بقيت بالبيت يجن كلساع يجن نسوان ونظل نلطم  انوب نعي وبواچي
بالليل كلش رجعو الدفانة اخواتي ما عافني ابد طول ايام الفاتحة اخواتي وعلي كل اهتمامهم بية ما ادري ليش يمكن لان يدرون اكثر وقتي يم امي ابد ما عافوني على كل وجبة اكل يجي يگلي اكلي
خلصت تلث ايام الفاتحة  وخلصت روحي وياها ما ظل بية حيل ولا ظل عندي صوت حتى الدموع خلصن الحسرة ضلت بگلبي شگد احاول اطلعها ما اگدر لا عيوني يقبلن ينزلن دمع ولا صوتي يرضى يطلع  چان موت بس بغير طريقة  بعد ما خلصن التلث ايام كلمن راح البيته بقوا بس الاقارب حتى حوراء وزينب چانن وياي يجن كل يوم بس بعد الثالث ما اجن
احمد :  من  دريت بالفاتحة  رحت للبيت لبست دشداشة سودة واخذت كرار رحنة للمستشفى بقينة واگفين وي علي ونساعده بكل الاجراءات الحد ما استلمنة الجثة علي جانت حالته حاله مكسور كلش على امه  طول الوقت افكر بمسك بعدها زغيرة شلون تتحمل  اني  متاذي وگلبي معصور عليها هسة شحالها ياريت لو اگدر اشوفها واگللها اني يمج كلها تروح واني ابقى يمچ
اخخ يا گلبي شگد نوجع عليها 
كرار كلش صديق علي   واني عندي علاقة بيه بس مو كلش قوية لذلك اني وكرار بقينة وي علي كل الوقت حتى بالمستشفى اجو اخوة مسك الاثنين يبچون بس علي طردهم ما دري ليش بس بقوا واگفين
التابوت من شلنا ودخلنا للبيت شاله علي واني وكرار وثنين ولد من عمامهم من دخلنة لاستقبالهم عيني اجت على مسك گبل نايمة بحضن مرية بس من شافت التابوت گامت ضلت تبچي
ادموعي نحبسن بعيني من شفتها صوتها ماكو مبحوح رايح شصاير بيها لو عيونها  استغفرت ربي ودرت وجهي منها طلعت برا انوب صاحني كرار گال راح نطلع التابوت يالله تعال دخلت للاستقبال لگيت اخوها حاضنها ويبوس براسها  تحركت بروحي مشاعر ما ادري شسميها يمكن غيرة او ضوجة والله ما ادري بس ما ارتاحيت