" لماذا اقتربت "

البارت الخامس عشر

مسك :بعد المحادثة الدارت بيناتنة اتاكدت من مشاعري اتجاهه وتاكدت من حبي اله والطريقة الاجاني بيها كلش حلوة الحبيته اكثر انو زوجته متوفية من خمس سنوات والحد الان ما مرتبط وبنته مربيها وحده ، اتذكرت كل خوفي عليه وشگد بچيت من حسيت بنفسي احبه چنت رافضة فكرة الحب لان باعتقادي هو متزوج وما اريد اخرب حياته وحياة بنته  بس ايضاً چنت مترددة هسة تگولون ليش مترددة ، لان الوقت الاجاني بيه مو مناسب يعني وفاة امي ماصارلها شهرين وكل مشاعري هوسة ، وفوگ هذا هو عنده بنية اذا صرت زوجة اله يجوز ماراح اكون ام مثالية الها
فكرت انو راح اكون زوجة اب الها ، وراح اكون ذيج زوجة الاب الي بنظر كل الناس مو خوش انسانة وتعامل بنت زوجها بشكل سيء حتى لو هي العكس ، خفت من القادم ويا ترى اگدر اتحمل المسؤلية ! ما نسيت وجود اخوي علي معقولة اتزوج و اعوفه وحده منو اله بالبيت , واني ماريد علاقة حب وي استاذ احمد وابقى حبيبة اله الحد ما يتزوج علي مستحيل
بعد محادثتنة المدة عشر ايام اني ما متواصلة وياه نهائياً هاي العشر ايام اخذتها بس افكر بيه وبعلاقتنا الي حتى بعدها ماصايرة لازم انطيه جواب خوما اخليه معلگ بهل عشر ايام رجعن زينة واسراء البيتهن وعلي صعد للدوام بقيت وحدي بالبيت طبعاً منطقتنا چانت امان بس بنية وحدها بالبيت اكيد صعبة ! من ابقى وحدي بالبيت افتقد امي هواي ابچي عليها على حضنها على صوتها الچان مالي البيت مافكرت ارجع للدوام نهائياً بقيت بالبيت اقرا قران واصلي الامي بكل وقت
هذا اليوم گعدت الصبح دزيت رسالة الاحمد :
مسك : صباح الخير
احمد : صباح النور هلا مسك
مسك : اسفة عل ازعاج بس اعتقد تنتظر مني خبر
احمد : تقصدين انتظر منج ابشارة
مسك : ايٍ كان يصير نلتقي اليوم
احمد : يوم عيد اكيد
مسك : وين اگدر اشوفك
احمد: بكيفج انتي حددي حتى اذا تردين اجي اخذج من البيت
مسك : لا شكراً بالمطعم الگعدنة بي ذيج المرة ساعة ٤ العصر
احمد : عشر ايام اني لا شايف رسالة منها ولا سامع صوتها ولا لامح وجهها بس كل الي اعرفه متاكد من حبها الي وما اعتقد الانسان يگدر يتخلى عن حبه انطيتها مطلق الوقت حتى تفكر وما تتندم اذا اخذت قرارها الحد ما راسلتني فرحت حيل وگالت نلتقي وسع صدري وگلبي حسيته ينبض الها الها هي وبس
اليوم التقي بحبيبتي الگاع ما وسعتني من الفرحة الله يعلم شگد مشتاقلها ، لبست واتانقت عبالك رايح اخطب مو التقي بيها صعدت السيارة رحت للمطعم لگيتها گاعدة منتظرتني ابتسمتلها من الباب ودخلت هي وگفت سلمت عليها بدون مصافحة بس السلام عليكم وگعدنة ..
مسك : خابرت علي اخذت اذن منه گلتله راح اطلع للسوگ اشتري وارجع وهو ما اعترض بس وصاني على نفسي وما اتاخر
لبست فستان اسود جوة الركبة بشبرين وسترة جلد سودة قصيرة و بوت اسود وشال اسود الجو جان كلش بارد اخذت تكسي وصلت للمطعم لگيته بعده ماجاي انتظرته دقايق ودخل ابتسملي من بعيد دخيل ربه شگد هيبة  عيوني تلگته اول ما دخل منظره يجذب الكل لابس قميص رصاصي غامق وبنطرون اسود  من وصل يمي وسلم باوعت بوجهه يممممة يفهي الوحدة والله اللهم صبرك اجيت اگله انت ما تبرد لابس بس القميص بس سكتت ورديت عليه السلام گعدنة عل طاولة
احمد : شفتها والفرحة البية ما تنوصف احس حتى ماريدها تحجي اريد ابقى صافن عليها گلتلها :
احمد : شلونج مسك مشتاقلج
مسك : الحمد لله استاذ انت شلونك
احمد : بشوفتج صرت زين
مسك :الوالدة ، مينة شلونهم
احمد : والله الوالدة بخير بس مينة على طول تسال عليج وتگلي بابا شوكت تجيبها يمي انت مو گلت اجيبها هههههه
مسك : ههههههه ليش مامل الطفلة
احمد :من گالت هيج عدلت گعدتي وگلتلها بابتسامة ،شلون ؟
مسك : استاذ اني اليوم هنا حتى اگلك قراري انت انطيتني مهلة للتفكير واني اتاكدت من قراري
احمد : اكون سعيد جداً اذ قرارچ يكون ايجابي
مسك : مدري شلون جاي اسوي هيج واني احچي وياه گلبي ينزف دم حسيت جاي اضيعه من ايدي بدون سبب حسيت جاي اتخلى عن اول حب بحياتي فقط علمود مصلحتي  گلت:
مسك : انت تعرف حياتي قبل وفاة امي شلون كل وقتي الها ومتحملة مسؤلية كلش چبيرة بس چنت مرتاحة حبل بوجودها وهسة حالتي كلش تعبانة صدگني استاذ انت عندك بنت واني اخاف ماكون گد مسؤليتها ، مو بس اخاف اني اشوف نفسي حالياً اضعف من انو ادخل بعلاقة حب او اتزوج مو گد مسؤلية الزوجة واخوي ماعنده غيري ولا متزوج كل هاي الاشياء على عاتقي اضف الى ذلك اني نفسيتي جداً تعبانة  صدگني
احمد : مسك اني اساعدج واكون عون الج لا تگولين نفسيتي تعبانة
مسك : استاذ جچيت هواي مو بس نفسيتي
احمد : اعرف كلشي وحچيچ كله مو عذر
مسك : ما اگدر استاذ اسفة
احمد : افهم من كلامج رافضتني !!!
مسك : مو رافضتك انما مالنة نصيب سوة
احمد :بس انتي تحبيني مسك شجاي تسوين !
مسك : اسفة ما اگدر والله
احمد : ضربت عل طاولة وكمت باوعت عليها وچانت اخر نظرة گلتلها : مسك لا تخلين اعذار كل الحچيتيه هو المصلحتج فقط ما فكرتي بية ولا فكرتي بحبي الج ولا جبتيله طاري وگفتي بفاتحة امج مو علمود علي چانت علمودج حتى اشوفج حتى المحج حتى اطمان عليج كلشي ماوگف بعينج يامسك كلشي ما وگف ، اخذت التلفون من  الميز وطلعت ، النار تارسة گلبي حسيت الحرارة تطلع من عيوني طلعت من المطعم صعدت السيارة واني العنها بگلبي ياريتني لو ما عرفتها ولا عرفت انانيتها گلت متميزة  وحبابة وهادئة الحد ما طعنت گلبي جيتها واني كلي امل رجعتني واني كلي قهر