" لماذا اقتربت "

البارت الثاني عشر

مسك بقيت اصيح على علي وارفع بجسم امي رفعت راسها وخليته بحضني جست نبضها خفيف كلش وتتنفس
صحت عليييييييييي ، اجاني يركض ابجامة النوم فتح الباب وصاح : شبيها امي مسسسك ، اني بس دموعي تصب عليها محتارة شسوي
علي صاح : تحححركي ولج جيبي عبايتها ، گمت مفزوعة اريد اجيب عبايتها ملازمي تطشرت بالگاع رحت ركض على كنتور طلعتلها عباية وحجاب لبستها شالها علي بثنين اديه خلاها ليورة واني صعدت يمها وهو صعد يسوق
طول الطريق ابچي و اون عليها و احاول اگعدها بس ماكو الخوف بكل جسمي كل چنت ارجف ارجف لان خايفة اخسرها ماريد اخسر امي ما عندي غيرها ، صحت : علييييي عل سريع امي راح تروح من ادينا
علي : گولي يا الله راح نوصل ما بيها مابيها شي
مسك : وصلنة للمستشفى اول ما وصلنة اجو ممرضين خلو امي بكرسي متحرك واخذوها من رحنة وراهم اني وعلي دخلوها الغرفة
الخنگة موتتني دموعي تصب باوعت العلي حالته حالة شعره مخربط وملابسه مال نوم وعيونه حمر گوة حابس الدموع خلة ايده على ضهري وگلي لا تبچين مسك شدي حيلج الحد ما امي تگوم بالسلامة گعدني على كرسي وگعد يمي مسحت دموعي  وگعدت خليت ادية على راسي وصفنت بالگاع باوعت على علي كتله
علي روح للبيت غير ملابسك وتعال
علي : اي اروح بس خل تجي اسراء و زينة خابرت عليهن
مسك : ماشي دقايق واجة والدكتور كمت راساً وگفت علي ساله گاله بشرنة !
الدكتور : متعرضة الضغط قوي يا ابني وصاير عدها جلطة قوية كلش ان شاء الله تگوم سلامات  وخلة وراح
علي التفت علية حضنته حيل وگمت گام يگول : اششش اشش لا تبچين راح ترجعلنة بالسلامة 
ماحس الا سمعت صوت اسراء وهي تبچي اجت حضنتني حيل وتبچي گعدنة اني وياهة عل كراسي گلت العلي روح يالله بدل ملابسك گال اي رايح ما اتاخر
گعدت اسراء تسال بية
اسراء : شلون صار هيج شلون جلطة قوية شصار بيها
مسك : البارحة اجو امجد وصادق وذالك الصياح والغلط والتهديد اني نامت مقهورة گعدت الصبح لگيتها فاقدة
اسراء : الله لا يوفقكم ساعت السودة الحملتكم امي ابطنها
مسك :شوية واجت زينة  نفس الحالة حضنتنا وگامت تبچي حيل ونفس الاسئلة واني الكلمة گوة تطلع من حلگي
الطبيب سمح ندخللها
دخلت يمها لزمت ايدها وخليت خدي عليها گلتلها بالحرف الواحد
(كلشي ماريد بس لا تعوفيني )
طبن اخواني هم شافنها وطلعن انوب اجة علي
بقينة گاعدين نفس الگعدة ونفس القلق
اجو امجد وصادق ما حركت ساكن من شفتهم ولا هزيت طولي
علي گبل صار بوجهم
علي : شعدكم هنا الغرفة غرفة امي وممنوع الغربة يدخلون
امجد : هاه صرنة غربة
صادق : لان داعينة بالحگ
علي : ما احجي شي هسة بس وروح ابوي اذا ما تطلعون هسة اگلب الدنية فوگ راسكم
مسك : من سمعوا حچي علي داروا وجوههم وراحو بدون حچي شكد ما عدهم كرامة ولا مستحة
لليل رجعت زينة واسراء للبيت علمود جهالهن واني وعلي بقينة نمنة بالمستشفى بدون غطى وعلى نفس الوكفة كلنة امل انو امي تكعد وطلع الصبح و امي ما گعدت
اجن زينة واسراء من الصبح واجو ولد عمي وخالاتي
علي : مسك نرجع اني وياج للبيت ارتاحي اسبحي من البارحة الصبح نفس الملابس
مسك : اي والله اريد اغير ملابسي وارجع
رجعنة للبيت دخلت للحمام سبحت وبدلت علي گال جوعان طلعتله مرگة لحم حميتها وسويت تشريب
علي : تعاي اكلي شنو انتي بشر روبورت تعاي اكلي من البارحة ماداخل شي ابطنج
مسك : ماريد علي ماريد
صعدت بدلت ونزلت العلي گلتله يالله گال بعدني كلشي مامسوي خل اسبح شي لشوية كمل وطلعنة للمستشفى
وامي ماكو ردة فعل منها نفس النومة كلشي بية چان مهدم كلشي بية يبجي بس عيوني ساكتات گدام الناس استمرينة على هل حال خمس ايام نتناوب ما بتت ولا يوم بالبيت وعلي وياية ارجع الظهر ابدل وارجع ،اكل ما جان يدخل بطني شي بس العصير والچاي بالليل والگهوة حتى ابقى گاعدة خالاتي وعماتي يواسني ويگللي لازم تاكلين ومن هل حچي بس اني ويني و وين حچيهن
الجامعة ما ادري هسة شنو الوضع
باليوم الرابع گلي علي لازم اخذج للجامعة حتى نرتب الوضع وناخذلچ اجازة واني هم امر للمركز هم اخذ اجازة
مسك : علي باجر نرجع الصبح للبيت ابدل ذبني على جامعة وارجع اخذني لا تتاخر علية
ثاني يوم الصبح رجعت للبيت اني وعلي سبحت بدلت لبست  تنورة سودة وتوب قماشه خفيف زهري وشال اسود وحذاء بوتين زهري
علي هم بدل طلعنة ذبني يم الجامعة
علي :انتبهي على نفسج ما اتاخر عليج
مسك : الله وياك
احمد : اربع ايام اداوم بالجامعة ما شوفها گلت خاف هي ما تدخل محاضراتي اروح للكافتريا اكول بلكي اشوفها بس ماكو خمس ايام مختفية بالممرات من امشي عيوني تدور بلكي المحها وصلت بية سالت صديقتها القريبة منها گلتلها ما تعرفين شي عنها ليش غايبة بس جانت كلشي ما تعرف اتگول اتصل بس ما تجاوب گلتلها اذا صار وشفتيها واني ما ادري خل تمر المكتبي
اذتني هاي البنية حيل يومية بالليل اتذكرها يالله انام وين اختفت وراحت
مسك : دخلت للجامعة اول ما دخلت للكافتريا گعدت بطاولة وحدي شربت گهوة لان بعد الجامعة محد بيها اجن زينب وحوراء حضنني واني گاعدة سالني وين مختفية وشرحتلهن كلشي
حوراء : مسك استاذ احمد سال عليج وكال اذا داومت خل تمر المكتبي
مسك : اني بيا حال فدوة و امر عليه اريد اقدم حالتي للمدير واخذ اجازة
زينب : امتحنة هواي امتحانات واستاذ احمد هم امتحنة لازم ترتبين وي الاساتذة مسك
مسك : كافي فدوة الله كريم
بدت المحاضرات طبعاً ما دخلت بوجهي رحت اخذت اجازة
بعدين رحتت للاساتذة وگلتلهم عندي ظرف وماگدرت امتحن
انطوني العذر خابرت علي گال ساعة واجيچ
بقيت گاعدة بالكافتريا اشرب گهوة الكافتريا مليانة طلاب
ماحس الا صوت احمد واگف وگال السلام عليكم
رفعت راسي عليه : گلتله وعليكم السلام من رفعت راسي مثل النصدم و تفاجاء گال بصوت مثل المعصب ، دقيقتين الگاج بالمكتب
خلة دار ظهره وراح مني , صفنت شوية بالوضع  گمت رحت المكتبه دگيت الباب گال تفضل دخلت وچان گاعد على كرسي المكتب من شافني دخلت وگف بسرعة واجة وگف قريب مني اني مدنگة عيني ما باوعت  گلتله  استاذ طلبتني تفضل
خله اصبعه السبابة جوة حنچي ورفع راسي گال : بالله باوعيلي
باوعت بعينه مدري ليش العبرة خنگتني واني يمه
احمد : شبيج ليش هيچ وجهچ تعبان وضعفانة ما اسالج ليش غايبة صار اسبوع بس اكلج ليش هلگد تعبانة مسك جاوبيني !
مسك : بقيت اباوع بوجهه وما رديت
احمد : گوليلي شبيج لا تخبليني اكثر تدرين الايام الما شفتج بيها اكلني الخوف والقلق عليچ گولي شنو صاير وياج منو وياج مسك
مسك : باوعت بعيونه ودموعي نزلن گلتله امي
احمد : ياروحي شبيها امج
مسك : ضليت اباوع عليه ودموعي ينزلن بحرية گلتله امي مريضة حيل وبالمستشفى حالتها خطرة
احمد : من شفت ضعفها نصدمت وجهها متغير حيل حچيت وياها من خلت عيونها بعيوني رعشة سرت بكل جسمي دموعها خنگني والله خنگني حيل عيونها الحلوات صايرات حمر والتعب مبين عليهن من بچت وكالت امي درتلها ضهري ومسحت وجهي بدية اريد احضنها ما ادري شبية اريد تطلع حزنها وبچيها بحضني ادري بيها كاتمة هواي بگلبها احس حضني راح يساعدها  شلون اواسيها هسة شلون اخفف عليها بس اريد طريقة حتى اساعدها شلون !مسحت وجهي وبقيت استغفر الله رجعت انداريت عليها گلتلها :مسك انتي بالنسبة الي وردة هاي الجامعة اترجاچ لا تذبلين خليچ قوية مثل ما عرفتج خلي السانج حاد مثل اول لقاء النا هنا هي ابتسمت گلتلها شوفي هاي ابتسامتج حتى وانتي تعبانة ابتسامتج وطن
ادري شگد ما احچي ماراح اگدر اساعدج بس صدگيني حسيت بوجعچ من شفتج بهذا الضعف تاذيت كلش  خليچ قوية اترجاچ
مسك : بعد ما سمعت كلامه مسحت دموعي وگلتله ان شاء الله استاذ  دگ تلفوني علي يتصل ، جابوته
مسك : الو علي شو اتصلت
علي : اني بالممر نتظرج
مسك : مو گلت ساعة
علي : اي خلصت من وقت تعاي بسرعك
مسك : علي اكو شي
علي : لا يالله انتظرج
احمد : ها منو مسك
مسك : علي اخوية اجة ياخذني ينتظرني بالممر
احمد : مثل ما وصيتچ طالبتي المميزة
مسك : ان شاء الله
يالله خل اوصلج  امشي واني وراج
مسك : بس الامتحان
احمد : معليج كل امور الامتحانات لا تهتمين الها
مسك : طلعت والاستاذ يمشي وراي
رحت يم علي شفته ظهره من بعيد
وگفت وراه گلتله ها علي ؟
دار وجهه علية روحي اصطكت عيونه حمممر حيل ومورمات وجهه تعبان مبين باچي  اندار علية واني بقيت صافنة عليه گلي يالله امشي  ما مشيت رجع علية گال امشي مسك
گلتله : علي امي !
ما جاوبني بقى ساكت  رجعت كرر علي امي شبيها !
خله ايده على چتفي وكال امشي خل نطلع ماكو شي ودموعه نزلت
مسك : علي گلي امي ما بيها شي
خلة اديه ثنينهن على چتفي وگال : البگة براسچ خوية
مسك : صرخت بصوت هز الجامعة هز لااااااااااااااااااااااااااا
لاااااااا علي لااااااا  ما ماتت لا تچذب لاااااااااااا
ما عافتني والله مااااااا عافتني  ما تعوفني هااااي امي والله ما تعوفني كلها تعوفني بس هي لا  فدوةةة ابوس ايدك ابوس ايدك گول ما ماتت
گول هسة اروح للمستشفى والگاها گاعدة مابيهة شي اترجااااك
چنت اصرخ والزم بعلي بلحظة بعد ما حسيت باي شي  كلشي هدأ وچني بعد مو بالحياة

انـة المحترگ للراس يم ماي
ولاواحد من اهل الرحم  يماي
نست روحي وصحت بالبيت يمااي
ولا واحد ييمة يرد علية 💔

احمد : مشيت وراها الحد ما  راحت الاخوها  من دار وجهه عليها عرفته ! معقولة هذا الضابط علي صديق كرار التعرفت عليه ذاك اليوم ، هي بقت واگفة ما مشت لحظات وسمعت صرختها
وهي تگول امي ماتعوفني يمكن اني انصدمت اكثر منها صوتها شگ گلبي شگ  بقيت واگف من بعيد عيوني حرگني باوعت وگعت واخوها سندها من شفتها وگعت جسمي انتفض اريد اروحلها بس ما گدرت عيب من اخوها  شالها وطلع بيها من باب ثاني
رحت الغرفتي مصدوم من كلشي بعدني ما متهني بحبي الها وجهي شر عليها هسة شلون راح تكون حالتها
اخذت تلفوني من جيبي خابرت كرار
احمد : الو كرار
كرار : هلا احمد شلونك
احمد : كرار الولد علي صديقك امه توفت
كرار : لا حول ولا قوة الا بالله  انا لله وانا اليه راجعون شلون عرفت
احمد : حضر نفسك اني جاي للبيت نبدل ونروح  مع السلامة