" لماذا اقتربت "

البارت التاسع

احمد : اااااااااااااااخ
باوعت امي ومينة كلهن هلع وخوف علية حاولت احجي وگلت مابية شي وامي مستمرة تصيح وتصرخ يمة يمممممة ابني
راح يروح من ايدي
دقيقتين وسكت الاطلاق الناري  الرؤية عندي كلش غوشت ما عاد حسيت بشي يمي
مسك : خلصت دراسة وبالليل قبل لا انام اتذكرت كلشي حچيناه اليوم اسئلة الاستاذ الي مو بوقتها ولا لم ضحكت يبووووو شگد فشلة
تذكرت كلشي ابتسمت ونمت
ثاني يوم الصبح بدلت و رحت للجامعة
دخلت المحاضرات وصلت محاضرة استاذ احمد بس ما اجة
تفاجئت مو من عوايده ما اچذب
ضجت تعودت كل يوم محاضرته وهم كل يوم تصير صدفة ونحچي
شعجب ما اجة
رجعت من الجامعة للبيت الكل موجود سلمت ومثل الروتين اليومي
لليل اجة رجل اسراء اخذها وراحت بقت بس زينة
ضلينة نسولف اني وياها بغرفة امي
جان تكعد امي من النوم وتصيح علينة
هَيييي ما تستحن ما تگولن امنا نايمة صارلجن ساعتين
لغلغلغلغلغ
اباوع على زينة سكرت من الضحك
غطينة روسنة بالبطانية ومتنة ضحك الحد ما نمنة
ثاني يوم صادف جمعة
خلصت الجمعة والسبت واجة الدوام
گعدت الصبح الجو بارد بشكل حلو
حضرت غراضي بدلت ولبست فستان شتائي قصير بس مو كلش يعني جوة الركبة بشبر لونه كحلي وربع بوت فلات لون جوزي وشال جوزي رحت للجامعة وصلت سلمت على صديقاتي
اخذت محاضرة وطلعنة استراحة اني و حوراء وزينب
امشي بالممرات بس مفتقدة شي
عيوني تدور بوجوه الناس
رجعة للمحاضرة وهل محاضرة لازم ياخذنا استاذ احمد
فاتت عشر دقايق من المحاضرة وهو ماكو
عرفت ما جاي ، بقيت صافنة ليش ما اجة
معقولة صاير شي او يجوز اجازة ما ادري الغايب عذره وياه ان شاء الله يكون بخير
اعترف بهاي اليومين حسيت نقص بالجامعة حتى بالبيت حسيت روحي ضايجة انتهى الدوام
جاي امشي بالممر وسمعت صوت استاذ حيدر وهو يخابر وبصفه استاذ محمد :
لاااااا ما يستاهل والله لا حول ولا قوة الا بالله
شلون صار هيج
ان شاء ان شاء الله اكيد نجي للمستشفى هو اخونة صدمتني والله
الله وياك مع السلامة الله وياك
مسك : سمعته يحجي وگفت شوية مدري شنو الخلاني اوگف واتسنط الحديثه
بعد ما خلص مكالمته حاچاه استاذ محمد وگال :
خير استاذ حيدر شصاير
رد عليه : والله يا استاذ محمد شگولك
المعيد استاذ احمد متعرض الاطلاق ناري وحالته مو زينة
مسك : هنا گمت بعد ما اسمع شيحچون ما اعرف شلون اوصف جان احساس كلش بشع واحس غلط انو اشعر بهل احساس
بقيت اباوع بصدمة كلشي حولي ما اسمعه شلون وشصار بيه معقولة يموت ؟ ليش منو وين هو هسة
ما حس الا زينب صديقتي تهزني من ايدي
زينب : مسك مسك لج شبيج بابا وين صافنة
مسك : باوعت عليها بدون ماحس كلتلها زينب سوة حادث
زينب : شبيج عمري منو سوة شكو ؟
مسك : درت وجهي منها ومشيت بسرعة باتجاه الحمامات ضلت تصيح وراي دخلت للحمامات
فتحت شالي خليته مفتوح وطالع نص شعري من گدام
واغسل وجهي بالمي بشكل فوضوي اذب مي على وجهي اريد بس احس براحة اختنگت حيل حسيت النفس كوة ينجر ضليت الهث واذب مي على وجهي حتى وگفت گدام المراية
عيوني حمر بس ما بجيت ابد صوت يكلي مسك ليش خايفة هلكد
بس الصوت الاقوى يكلي خاف بيه شي
بصوت مسموع حچيت وي نفسي
لا لا مسك معليج انتي ما لازم تخافين عليه
هو اصلاً راح يكون بخير بس انتي مالج علاقة
الاخر مرة ذبيت المي على وجهي بقوة اخذت نفس قوي
دخيلك يا الله دخيلك
نشفت وجهي رجعت لفيت الشال
طلعت التلفون علي اكثر من مكالمة داك علية
خابرته
علي : الو مسك وينج كلها طلعت صارلي ساعة منتظر
مسك: جاية باي
رحت طلعت واحس كلشي ثگيل الهوة ثگيل الخطوة ثگيلة
لگيت سيارة علي فتحت الباب وصعدت
مسك : الله يساعدك علي كعدت بالصدر وتجيت راسي عل كرسي
علي : هلا مسمس شبيج ؟!
مسك : مابية
علي : وجهچ اصفر شكو صاير شي
مسك: لا بس تعبانة اريد انام
علي : مادام هيج خوش
مسك : الطريق كله على نفس الكعدة متچية راسي عل كرسي وصلنة البيت سلمت وصعدت فوگ
بدلت ملابسي شمرت روحي عل افراش القلق والخوف غمضت عيوني بدون نوم لشوية اندك الباب
اجت زينة كالت : مسك شبيج
علي يكول مريضة
مسك : مابية بس اريد انام
زينة : ماشي على راحتج حبيبتي
بقيت بفراشي طول اليوم ، مشكلتي جانت مو بس انو استاذي بالمستشفى وخايفة عليه لا والله بس الموتني اكثر ليش اني خايفة عليه ليش جاي احس بشعور ماريده
صار الليل واني مانزلت جوة كلساع علي لو زينة يصعدولي
بالليل كعدت بالكاع گرفصت وخليت  راسي بين رجلية
اتذكرت اول يوم من عاركني اتذكرت من رسبني من فشلني
اتذكرت من اجة يگلي ادخلي للمحاضرات من دافع علية من مصطفى من وگف بوجه اخواني من غبت وانطاني محاضراتي من تشكرني مرتين
كمت اتنفس بسرعة وايدي على گلبي
لا لا يا گلبي شبيك شتريد تسوي
اشهگ واگول لا لا گلبي مابيه شي
واخيراً ادموعي المحبوسات طلعن نمت بالكاع واني ابجي ابجي وما احبس العبرة بصدري بقيت نايمة عل ارض  الصبح حسيت على نفسي گعدت راسي يريد ينفجر  ياذيني بشكل تذكرت كلشي گلبي انعصر كمت عل سريع بدلت لبست جينز اسود ووكعب اسود وبلوز حياكة اسود وشال اسود بيه ورد احمر
طلعت من البيت للجامعة
وصلت الجامعة شگد احسها فاهية شگد كرهتها
دخلت للمحاضرات وحدة ورى الثانية 
خلصت المحاضرة الثانية اتصل علية علي گلي اجي اخذج بالطريق اني ليش مداومة ، اتفقنة يجي ياخذني
وگفت بالممر اريد اخطي خطوة لكن ما اعرف اذا صح او خطا
عقلي يگلي لا تسوينها وگلبي يگلي لازم تسوينها
اخر شي مشيت ورى گلبي ...
رحت بخطوات مترددة دگيت الباب على استاذ محمد لان هو مايدرسنة وما يعرفني
كال تفضل
مسك : السلام عليكم
الاستاذ : وعليكم السلام تفضلي بنتي
مسك : استاذ ، الاستاذ احمد حدد النة امتحان وگالي اذا صار اي ضرف روحي الاستاذ احمد هو يمتحنكم وهو صار ايام ممداوم
الاستاذ : وانتي ممثلة الشعبة
مسك : ها اي انعم استاذ اني لذلك اجيتك
الاستاذ : اووووف اوووف يا احمد والله يت بنتي حالياً ما اكدر اكولج شي لان الاستاذ مريض كلش وحالياً ما اكدر احاجيه بهل امور
مسك : من گال هيج گلبي انقبض بي ما باليد حيلة لازم اخذ حجاية منه گلتله اهااا وهسة شلونه
الاستاذ : والله اليوم چنت يمه بمستشفى*** نفس حالته
مسك : اها اسفة عل ازعاج عن اذنك خليت وطلعت
الحمد لله الحمد لله عرفت المستشفى
طلعت انتظر علي اجة صعدت وياه
علي : ترى رايحين للطبيب
مسك : لا علي فدوة مابية شي والله
انت عندك شغل ؟
علي : اي والله عندي شغل بس اوصلج للبيت ارجع للدوام
مسك : اوك والله مابية شي
علي : اكيد
مسك : اي
وصلنة للبيت علي بس وصل بدل وراح للدوام
بقينة اني وزينة و امي للبيت
كعدنة سوة
زينة : مسك اليوم موعد امي يم الطبيب
مسك : اي ناخذها اني وياج
الام : مسك يوم لا تجين نروح اني و اختج
مسك : لا يمة اني اريد اروح وياكم وهم اريد امر للمستشفى ابو صديقتي مريض كلش اريد اشوف البنية خاف تحتاج شي
الام : هااا ميخالف الله كريم
احمد : بعد الحادثة الي صارت ما فتحت عيوني الا واني بالمستشفى
جسمي كله مكسر والرؤية مو واضحة عندي باوعت چتفي ملفوف
تذكرت كلشي صار بس ما اتذكر منو جابني وشلون وصلت
لشوية دخل علية اخواني كرار و جعفر وجواد و اختي رنا وامي وياهم الكل يتحمد بالسلامة
باوعت گلتلهم وين بنتي گالو بالبيت نجيبها الك
امي تبوس بية وتبچي
سالت كرار : منو وصلني لهنا
كرار : خوية اني وصلت للبيت ورى الحادث بعشر دقايق ولگيت امي تصرخ وتصيح ومينة بس تبچي يبجن عليك من شفتك هيج عبالي ميت وعلي دخلت وهم كمت اصرخ لما ادنيت منك بيك نفس شلتك بسيارتي واخذتك للمستشفى
احمد : ما قصرت خوية
ماعرفتوا منو الرمة على بيتنا ؟
كرار : لا والله بعد بس وداعتك الا اعرفهم بس گلي انت عندك عداوة شي ؟
احمد : اسكت كرار مالي خلگ سربتك
الكل گام يضحك
جواد : خوية ما دام هيج حچيك معناها كلشي مابيك
چا شمالك سويت عدنة تدرر صارلك تلث ايام نايم
احمد : ارد اشوف معزتي
جعفر : لا تحاول احمد ابقى انا اعز واحد حتى لو تموت انت
ام احمد : تف لا بارك الله بيك بيش مفاوله
احمد : الكل گام يضحك بس انا والله نار شابة بجسمي صوابي يوجعني جسمي كله متاذي
اجة الدكتور طلعهم كالهم لازم يبقى وحده
اتذكرت مينة صفنت لو صاير بية شي بنتي وين تروح
مجرد غمضت عيوني اجت صورة مسك براسي
ابتسمت بقيت اتذكرها واتذكر من گمنة نضحك بالمطعم
ياترى هم تتذكرني مثل ما اتذكرها !
مسك : صارت دنية العصر بدلت لبست كعب ماروني وفستان تسعين قماشه اسود ومورد بماروني وشال مثل قماش الفستان تقريباً وسترة كابوي ثلجي  اجرنة تكسي بالبداية رحنة العيادة الطبيب بالكرادة امي هي وزينة بقن ينتظرن سراهن بالدكتور گعدت يمهن شوية  وكلت لامي : يمة رايحة للمستشفى مثل ما گلتلج
الام : بس لا تتاخرين
مسك : لا ما اتاخر يالله مع السلامة
الاحلى المستشفى هم بالكرادة يعني المسافة مو كلش طويلة
اخذت تكسي گتله المستشفى ****
وصلنة يمها نزلت من السيارة وگفت باوعت بعدني بي تردد
فتت الداخل المستشفى
صفنت ! مسك شعندج هنا
استغفر الله خل اكمل الجاية عليه و اروح
سالت عن حالته وعن اسمه انطوني رقم الغرفة والطابق
صعدت بالمصعد طبعاً چان بالطابق السابع
نزلت بالطابق السابع مشيت بالممر امشي واگول هسة شجايني احس بروحي جاي اسوي مصيبة !
وصلت الغرفته ما جان اكو شباك حتى اشوف منه
ما جان اكو احد يمها خليت اذني على الباب خاف احد جوة واذا دخلت شيگولون علية
اتاكدت جوة هدوء
فتحت الباب دخلت الغرفة بهدوء والكعب يطلع صوت رفعت راسي شفته نايم وصدره ملفوف عرفته نايم
تقربت شوية منه واحاول قدر الاماكان ما اطلع صوت ..