" لماذا اقتربت "

البارت الحادي عشر

مسك : شنو هاي ياعديم ذوق ماد ايده هيج ، رفعت راسي باوعت عليه ! مصطفى نظرتله نظرة استصغار خليت اوريد اروح واعترض طريقي
مصطفى : ايييي ست مسك لقائات وگعدات وكذا الظاهر متفقين تجون من الصبح حتى تتشاوفون
مسك : يحچي ويغمز ويسوي حركات سخيفة بحلگه ماردت اترادد وياه ادري ماعنده اخلاق وخرت على صفحة اريد اروح صار بوجهي ما يخليني اروح وكال
مصطفى : مسك لا تحاولين تدرين بية احبج وانتي الي مو الغيري
مسك : گال هيج و وخر من طريقي لعبت نفسي منه حيل رحت عل سريع بدت المحاضرات طول المحاضرات مصطفى يباوع اتجاهلته الابعد درجة بجيث وجهي ما اديره على الصفحة الگاعد بيها
خلص الدوام و رجعت للبيت فتحت الباب اريد افوت للبيت دخلت اريد اسد الباب و الباب اندفع حيل شوية نضربت براسي باوعت هذا امجد جرني من ايدي حيل وظل يصيح : تفترين ابنطرونج بالكليات واني فلس ماعندي والقران اذا ما تبيعون البيت وتنطوني الورث احرگ البيت على روسكم
يجر بايدي وي جرته كل جسمي يتحرك ايدي انخلعت والله العظيم
ظل يصيح :وين امج خل تطلع وينها اخوج ذاك ابو قاط وينه
على صياحه اجت امي و زينة وگامن يجرن بيه من يمه يردن يخلصني من ايده ، اني طول ما هو يصيح ما حچيت كلمة
اخر شي استجمعت كل قوتي ، ونكتت ايدي من يمه بقوة ايدي انهدلت لزمت متني بايدي الثانية باوعت عليه
وتفلت بالگاع وگلت : تف على رجولتك التخليك تتهجم على اخواتك وامك يا ناقص شرف
هو ظل يهد علية ويريد يلزمني ويصيح : هاي الصاقطة هاي تربيتج تتفل علية اليوم انهيها
مسك : امي واگفة وبس تبچي وتتوسله وجهها صار اصفر
وزينة واگفة گباله وتتوسل بيه حتى يروح
باوعت على امي حالها ابد مو طبيعي تتنفس بسرعة وجهها اصفر خليت ايدي على گلبها نبضها ضعيف
لزمتها من ايدها وخلتها جوة گلتلها لا تخافين ماما ماكو شي هسة اجيچ ، رجعت طلعت للحوش وهو واگف بعده يهد وينثني
وخرت زينة من گدامه وگفت گباله  گلتله:
امجد شتريد ! انت بشر لو لا امي بسببك يوم عن يوم حالتها تسوء
ست الاف مرة گلنالك تعال عيش ويانة انت وجهالك وخل نعيش عائلة وحدة بهذا البيت ، جاي احچي وصاح بصوت عالي: بالله بلا هذا حچيي المسلسلات اريد حصتي
مسك : منين انجيبلك اذا بعنة البيت وين نروح ماتفكر باختك بامك!
امجد : والله مو مشكلتي راتب ابوية كله الج و الامج عيشن بيه
مسك : انطيني مهلة شهر واحنة ندبرلك حصتك من البيت بدون مانبيعه
امجد : وليش انتظر شهر بيت ابوي والي حق بيه هسة تعرضونه للبيع
مسك : درت وجهي صفح واستغفرت الله اريد اوصل الحل وياه
گلتله : امجد شهر وندبرلك الفلوس انطينة وقت
امجد : شهر مو اكثر بعدها ما تلومين الا نفسج
مسك : ان شاء الله بس اترجاك بهذا الشهر خل امي ترتاح لا تجي تصيح ولا تضغط علينة لان امي مريضة
حچيت هيج وهو دار ضهره وراح ورگع الباب وراه
درت وجهي اريد ادخل جوة
زينة : لججججج انتي شسويتي مسك كل عقلج
منين اندبرله حصته خلال شهر
مسك : زينة ماعندي حل ثاني امي جاي تضيع خليت ورحت من يمها رحت يم امي نايمة على القنفة گعدت بالگاع بوست ايدها وگلتلها ماما ماكو شي بعد ارتاحي امجد مايريد شي گالت :
شلون يمه مايريد شي وهو يومية هاد علينة
گلتلها : معليج حبيبتي اني قنعته بوست ايدها وصعدت الغرفتي
خابرت علي
مسك : الو علي شلونك
علي : هلا مسك الحمد لله وانتي
مسك : علاوي اريد اگلك شي
علي : گولي
مسك : تگدر تسحب سلفة على راتبك ؟
علي : اي اگدر بس ما تطلع بسرعة اقل شي تلث اشهر
مسك : علي اليوم اجة امجد بس يصيح ويغلط واريد حصتي وامي تخربطت بس هسة زينة
علي : اخخخخ يا امجد بعلي مال اذبه بالحبس واخلي يخيس هناك
مسك : گلتله شهر وننطيك حصتك يالله راح
علي : ومنين تجيبيله انتي هم تطبرين صفح
مسك : گلت تسحب سلفة على راتبك
علي : صعب مسك والسلفة ما اعتقد تطلع بنفس الشهر بس هم احاول والكاتبه الله يصير
مسك : يالله روح خاف عندك شغل
علي : اي والله يالله مع السلامة
مسك : علي علي
علي : هااا ولچ شتردين لزگتي
مسك : عابت شبيك ردت اگلك شوكت تجي
علي : باجر الظهر
مسك : خوش تعال طلعني من الكلية عود يالله باي
علي : ميخالف اجيچ يالله مع السلامة
مسك : مرت الايام على هذا الحال امجد خلال هل شهر ما ازعجنة وبالجامعة نظرات مصطفى مثلها ،وگلبي بعده يدگ من يشوف استاذ احمد بس ادوس عليه صرت حتى اذا اقابله بالممرات ويبتسم الي اتجاهله ولا اصبح عليه اذا شفته واگف بممر ما ابقى واگفة اذا اجت محاضرته ابد ما ارفع راسي و اخلي عيوني بعيونه
زينب و حوراء على طول يگللي الاستاذ يباوع عليج رفعي راسج شوفي بس اغلس ، حتى مرة گاعدة بالكافتريا اجة گعد يمي بدون مقدمات گال : مسك بيج شي ، گلتله لا استاذ
رجع گلي سامعة عني شي وماخذة موقف مني ؟!
گلتله لا استاذ انت مثل اخوية الچبير واحترمك عن اذنك خليت ورحت وهو بعد ما حاچاني ظل بس يباوع بنظراته
مرة بالليل اريد انام غمضت عيوني واجت صورته براسي من شفته بالمستشفى اتذكرت كل تفاصيل وجهه
تذكرت متزوج وعنده بنية نزلت دمعة على خدودي عضيت شفايفي وصرت ابجي حتى اطلع العبرة البداخلي لعنت گلبي الف مرة لعنت هذا الشعور الي ما اريده ولا اريد احس بيه اتجاه رجل مثل احمد گلبي حسيته يحترگ احس مشتاقتله مشتاقه احچي وياه واشوفه او اباوعله بنظرة طويلة دموعي چانت تنزل ، حسيت بگلبي يگول
احبه احبه هواي احبه ، هنا دموعي تنزل اكثر بس گلبي ارتاح احسه هدأ مسحت دموعي و استغفرت الله ونمت وعدت نفسي ما اتقرب منه وابتعد قدر الامكان عنه

اتندمينه وأيسينه وابتعدنه💫
ابعيد لاچن طيفهم ضل يعتنينة💔

احمد : مضت فترة اقل من الشهر بهاي الفترة مسك مو نفسها جنت احس بمشاعرها اتجاهي بس هسة لا چانت تبتسم اذا تشوفني هسة لا كلش تغيرت حسيتها تتجنبني كلش خفت بيها شي او سامعة عني شي بقيت استرق النظر الها بكل فرصة بس ما ضايقتها  على طول اكون قريب بس ما تنتبه چنت اترقب مصطفى ونظراته الها وهو بس يشوفني قريب يشرد  صرت كل ما انام اتذكر وجهها ضحكتها قبل اتمنى اعرف ليش تغيرت ماعادت مثل قبل
اني اتاكدت من روحي وگعت وگلبي وگع بحبها احس براحة من اشوفها لو المحها ومن اشوفها ضايجة اضوج
حبيتها بس ماريد حبي الها ياثر عليها لو على دراستها او حتى سمعتها بالجامعة ، بس كل الي اعرفه بالاخير اعترفلها بكلشي
مرة وگفت گبال المراية باوعت بوجهي گلت معقولة وجهي ما عاجبها وابتعدت بس مسك ادري ما تهمها المظاهر
خليت اصابعي بشعري  باوعت اكو شيب براسي معقولة بسبب الشيب تشوفني چبير عليها ابتسمت ونفضت عقلي من الافكار

البارحه اول مرة أخجل
جي شفت شيب أعله شعري
وامنت عمري جبير
ويا حسافه الراح مني وانت ماكو
كون أرد اردود وبكدك اصير

مسك : خلص الشهر الانطانياه امجد مهلة وعلي ما دبر السلفة الي على راتبه  دريت راح يسوي مصيبة  امي وضعها مو زين متدهور ساعة ينخفض سكرها ساعة يرتفع واني محتارة وياها زينة رجعت لعيالها ذاك اليوم گاعدين اني و امي بالاستقبال نتفرج تلفزيون بالليل وحدة علي بالدوام  ماحس الا الباب تفلش  من الدگ گمت ركض  الباب اندفر وانكسر القفل دخل امجد و صادق سوة وگفت بوجههم گلتلهم وين امي مريضة عدكم حچي احچوا وياي دفعني صادق حيل ضهري انصدم بالحايط وكعت بس گمت بسرعة ركضت وراهم راحو يم امي ويصيحون ويغلطون واحد يگول انتو حرامية تردون تقفصون علينة حقنة انتي وبنتج وابنتج متعاونين علينة
امي ما تحچي بس تبجي اخر شي گالوا گدامكم خمس ايام اذا ما ناخذ حصتنة نرفع دعوة قضائية والمحاكم بيناتنة راحو اني گبل حظنت اني وابچي و اهون عليها اريدها بس ترتاح ادري ما تتحمل كل هذا اعتنيت بيها الحد ما نامت بغرفتها نمت يمها وخابرت علي گال اني جاي اوصلكم حتى لو نص الليل اجة ساعة ٢ بالليل حچيتله كلشي گال اني اتصرف وراح نام اني نمت يم امي  كعدت الصبح اريد اروح للدوام امي تبقى نايمة ما تگعد من الصبح سبحت وبدلت لبست فستنان نيلي شتائي قصير شوية جوة الركبة وجواه ستريج خفيف ونص بوت اسود وشال اسود ردت اطلع من الباب بس رجعت لامي  ما ادري شنو رجعني الها بس گلبي گلي روحي شوفيها رجعت عليها فتحت باب غرفتها تقربت نايمة صفح على وجهها ردت اگعدها ما جاوبتني حركت راسها بايدي  شفتها طالع مي ابيض من حلگها صرخت باعلى صوت عندي
علييييييييييي الحگلي وينك امي على مدري شبيها ......

.
.
اعرف البارت نزل من وقت ، بس بالليل هم انزللكم بارت وتتدللون
محبات 🖤🌸