دوامة سوداء

البارت 10

البارت_العاشر.
دوامة _سوداء.
جنت اني وسيف محظرين عذر مسبق وهو انو احنه تزوجنا تحت ظروف معينة جبرتنا على هذا الزواج وبالحقيقة احنه محابين بعض لا هي تريدني ولا اني اريده والدليل صارلنه اسبوع وهسه سمحلنا الوقت انو نطلك.. جان هذا الكلام الي كاله سيف للقاضي
التفت عليه القاضي وسألني..
-بنتي صحيح كلامه؟ احجي كولي اذا مهددج او مهدديكم او أي سبب ثاني بس كولو.. حتى نتصرف.
-لا عمي هو هذا سبب انفصالنا فعلا.. وابتسمت كذبا حتى أأكد كلامي..
وتطلقنا.. وانتهت كل احلامنا
سنين الحب نتهت مع بقايا من الامل مالها أصل ولا أمل على لاشيئ.. باوعت بعينه ولكيته يباوعلي بنظرة ألم ووجع حالنه مثل الي يردون يعدمو وايده مفتوحة بس مايكدر يدافع عن نفسه هو يكدر يقتل الي يعدمه وينهزم وبنفس الوقت مايكدر!
كلام صعب فهمه لان اله تشعبات واسباب فرعية هواي.. انتهى كل الي عشناه بنظرة بهاي اللحظات مرت ايامنه كلها كبالي مثل الفلم السريع!
من جنت صغيرة وابجي بالليل ويجي يواسيني من ياخذني للمدرسة ويرجعني شقانا لعبنا مشاكلنا من احنه صغار لحد هل لحظه ماسيطرت على دموعي ابد وكوه حابسه شهكاتي.. شفت عيونه مدمعه ومدنك بس مانزلت منه دمعه ابتسملي وكال لا تأيسين اكو امل.. صار هو يدعمني بالأمل عكس حالتنه قبل لا ندخل المحكمة جنت اني الي اشجعه وانطيه الامل.. كأنما جاي نتناوب على بث الامل..
انتهت سعادتي ضحكاتي طعم الحياة من اجه ابويه بوجهه الجامد الي مابيه ذرة رحمه اجه لحتى ياخذني من شفت تعابير وجه ابويه لا بقه تفائل لا امل بلعت ريكي وكلت بكلبي ايسي يا ريام وارضي بالمقسوم لان ماكو امل... تقدم ابويه وباوعلي بنظرة تخوف.. تعرفون شنو شعوري؟ مثل شعور واحد منطيه امانه عند مجرم وكايليله لا تقتله هيج بالضبط.. اجه سيف وجان مبين عليه مخنوك وكوه يحجي كال لابويه..
-عمي.. ريام امانه عندك طلكتها مثل متريد حفاظا على سلامتها ماريد تتأذه...
ابويه باوعله من فوك ليجوه وكله امشيي لك ولله بطران هه..
دار وجهه بنظرة يأس وباوعلي بتركيز شديد كأنما يريد يحفظ كل تفاصيلي وكال اشوفك بخير ريام..اني دموعي تكت مثل المطر حتى من البجي راسي يوجعني كلي بصوت هامس لتبجين.. ابويه جرني من ايدي حيل قطرة دم ماظلت بيه نسيت سيف وفراقنا ونظرته والحزن كل الي بالي هسه شراح يصير بيه بيد ابويه بعد الي سويته وهو من دون كلشي كارهني.. يجرني ويمشي بسرعه او شبه يركض وكل شويه ارد اوكع على وجهي امشي واتعثر وصلنه لسيارة شمرني شمر ليوره وصعد بسرعه وحرك السياره الطريق كله ماحجه شي ولا حتى باوعلي بس كال مره وحده اني اعلمج بسيطه جسمي يرجف احس روحي غريبه ومالي احد بهل الدنيا ماكو امل انتظره واصبر روحي بيه خلص خلص هذا كل الي بقه من عمري يم ابويه... من كثر التفكير والخوف ماحسيت بالطريق اله واحنه واصلين بلعت ريكي ناشف اريد مي متت عطش دخلت للبيت جان جبير ولأول مره اشوفه وحديقه بيه كلش حلو بس بنائه قديم.. سحلني ابويه من شالي وجنت مامسويته عدل بسرعه وكع وكملها بشعري يجر واني اصيح وانتظر امل من لاشيئ اني على منصة الإعدام بدوون امل لايمي امي تدافعلي ولا انتظر اهل حبيبي يجيبون عشايرهم ويجون ولا خواتي الي لاحول ولاقوه اذا دخلن ينعلسن ويايه.. ولااا حتى صديقه يهمها امري... صاح بصوت عالي اسماااء تعالي بسررعه اجت مره متوسطة بالعمر تطلع نهاية الثلاثينات شافتني اخترعت وصاحت يااا هاي منو...
-هاي ريام الي كتلج عليها خليها بالغرفه الفوك لتراويني خلقتها..
-سوده عليه ماماتي تعالي...
تعجبت من اسلوبه واستغربت اكثر منها منو هاي؟؟ بس لا مرت ابويه لاا كملت السبحه جنها نهايتي وهذا يومي... اكيد دتمثل كدام ابويه لو لا اصلا سواء عاملتني بقساوة او بهدوء بالحالتين ابويه ميهمه...
اخذتني لغرفه عاديه اثاثه قديم بس مرتبه بس شافته دمعت عيونه حالته غريبه كلتلي دخلي بنيتي.. للحظه شكيت انو هاي خادمه وهيج تعاطفت وياي.. اني من كثر البجي الي بجيته مالي خلك حتى اسئلها انتي منو.. بس ارجف ومن خوفي كتلها بصوت يرجف عليج الله بداعت عزيز كلبج لتخلين ابويه يوصلي فدوه فدوه..
هي ابتسمت وحضنتني كلتلي تذكريني ب خلود.بنتي وكامت تبجي بالزايد وكالت هم هيج جانت تخاف من ابوج وأكثر.. ابوج ظاالم ماخله واحد بحاله اووف الله يساعد امج شلون جانت عايشه وياه...
بإستغراب واندهاش اكثر سألته انتي منووو... باوعتلي وكالت حقك متعرفيني اووف يماما سالفتي طويله..
تجاوبت وياه وكملت..
-عادي احجيلي
ابتسمت وكالت ولله ياحبيبتي اني مرت ابوج اسمي أسماء اخذني ابوج عن حب جنت كلش احبه حتى قبل لايتزوج امج اني على علاقه وياه بس من تزوج امج كلش نهاريت واعتبرته خيانه بس هو قشمرني بدموعه وكلامه وكال انو مجبور يتزوجه علمود امه لان رايدته ويخاف على امه مريضه اقتعنت رغم السالفه متصدك بس الحب أعمى مثل ميكولون... وانتظرته يطلك امج بأقرب فرصه مثل ماوعدني امج من جابت اختج الجبيره تخبلت كتله مو علساس تطلكها شو صار طفل
كال بالغلط صار واني اصلا مرايده وانطيه لامه واطلكه هذا الحجي مر سنه على زواجه من امج اني جان عندي امل لان مصدكته ادري غباء بس شسوي المهم مرت سنه لخ وامج هم جابت بديت افقد الامل مرت سنه ثالثه وهم جابت وطبعا بديت انسحب تدريجيا لان فقدت الامل نهائيا تحطمت تحطيم نفسي وهم جان ياهو اليجي يخطبني ارفضه وكلهم يوكفون بوجهي ويكولون كبرتي وكبرتي والى متى بس مافد يوم واحد جبرني... المهم مره خطبني صديق اخويه معلم ابتدائية واكبر مني ب 6 سنوات قبلت بيه حتى احرك كلبه لابوج وهم حتى انسه وابدي حياتي بس الي صار خبلني ابوج لاحجه ولا كال هناا ايست فعلا وعرفت شكد جنت غبيه ومخدوعه بيه كل هل سنين المهم اختصرلج السالفه طويله تزوجت بس ماصار عندي جهال اله وره سنتين جبت بنيه سميته وعود.. كلش فرحت بيه وعشت حياتي بخير إلى أن مات زوجي بطلقه اجت بكصته من عرس قريب علينه تخبلت تخبلت تهسرت خابرت أخوه وكتله وصارت كعدت عشاير واخذو منه فصل 20 مليون.. همه سكتو بالفلوس بس اني شيسكت ظيم كلبي ظليت بلا زواج إلى أن بيوم خطبني ابوج وكال غصبن عليج توافقين وحياة بنتج بالتهديد وتعرفيني اني شنو وكته اخويه هم جبرني كال انتي مو صغيره وبنتج منو يربيها ومن هل حجي وافقت مجبره وجابني ابوج لهنا خلود جانت كلش هادئه وعاقله هم خلاها بهاي الغرفه مره من المرات وجان اسمع صريخ من غرفته رحت ركض وشفت إبراهيم الي هو ابوج جارها من شعره ويركع راسه بالحايط وجهه يجري دم رحت صرخت بوجهه ودفعته بدون شعور وكتله بأي حق هيج تتعامل ويه بنتي.. صفك بيده وكال بنتج تحب وتتمعشك وكاعده تخابر وانتي نايمه على اذنج باوعت على وعود بصدمه واحتقار وهي تتوسلني ارحمه...

ريام... اووف ليش تعاملون الي تحب كمجرمة وخارجة عن الدين ولله حررام..

أسماء.. الظاهر انتي هم نفس السالفه المهم خليني اكمل...

ريام.. كملي..

أسماء.. باليوم الثاني من هاي الحادثة ابوج جاب عريس وكال اسبوع وتزوج واخلص منها اني اعترضت وكتله مو بكيفك بنتي واني اتصرف وياه ضربني راشدي نضربت بالحايط وحتى الترجيه وكعت كال حجايه وحده اخلي طلقه براسج وبراسه حتى لو كلفني هذا أخسر حياتي... تمام... سكتت وجنت مقيدة بدون أي رد فعل رحت حتى اواسيها لوعود واحجي وياك اجيت لكيته حاطه الموس على ايده وتريد تنتحر صرخت بوجهه وكتله ولج ماما حرام انتي مو اول وحده تنجبر ع الزواج حراام تخسرين الدنيا والآخرة كامت تبجي بالزايد وكالت ماما ماريده صبرتها وكتله لو مقسوم الج محد يكدر يمنعج منه لا ابوج ولا عشره مثله ماقتنعت بكلامي بس شسويله كلشي مابيدي.تزوجت ونكطعت اخباره ولهسه اذكر دموعه بيوم العرس صاحت يمه لتعوفيني ولله اموت. كسرت كلبي وردت اروح وراه بس لزمتني اختي كالت عيب شنو هل تصرفات ميصير.. اووف وره شهرين من زواجه جابوها بتابوت كالو ماتت وهي حامل لان زوجها متعصب وضربها ووكع جدر مي حار عليها ومن كثر النزيف ماتت... راحت بنتي بعمر 19 سنه بدون ذنب مجرد ضحيه لظلم ابوج...
ريام...
ظليت ابجي قصتها تقهر.. اني حالي مو احسن من حاله بس على الاقل عندي امل ماتزوجت لهسه كتله..
الله يرحمه ويجعل مثواه الجنه بنفس عمر اختي المتوفيه هم 😢..
-منو اختج المتوفيه اني اعرف كل خواتج..
-خديجه 😢
-هاي ام عيون الزرك..
-ايي ماتت بالانفجار ذاك اليوم...
-ياا حبيبتي سوده عليه متستاهل ورده مال الله صح متشبه وعود خديجه احلى ملكة جمال بس جانن نفس الهدوء اوووف يروحي شنسوي هو هذا ابوج...
-حبابه لتخليه يجي لغرفتي ولله يموتني..
-لا ميجي هو هسه نايم اذا يكعد يروح لياسمين وميرجع اله وره اسبوع من يجي انتي ابقي بالغرفه لاطلعين ابد...
-منو ياسمين
-زوجته الثالثه..
-هااا مو بعيده لو جايب الرابعه..
-خايبه خلي يجيب عشره شلي غرض بيه ميهمني ابدد اني مو أسماء بت ال 20 سنه الغبية الي جانت عميه بحبه...
-حشاج خاله.. من اخلاصج حبيتيه مو ذنبج اذا هو خاين..
-اووف الله كريم... يله حبيبتي روحي بدلي واني اسوي الغده.. اي شي تحتاجي صيحيلي.. تمام
-تمام شكرا خاله..
رتاحيت من شفته حبابه ومتفهمة عبالي مثل كل زوجات الأب قاسيات بس يمكن لان متحبه متعاديني😂لا لا ليش اسيئ الظن بيه هي حبابه.. المهم رحت بدلت من ملابس بنته المرحومة كل غراضه موجوده بالغرفة.. مامتغير شي.. ملابسه تصير عليه اني وياه نفس الطول بس ضيكه كلش مو اني سمينه لا لا بس هي ضعيفه كلش اذا اني وزني 58 ومتصير عليه لعد هي شكد ضعيفه 😳. نزلت تغديت وكتله عدكم شبكة اريد الرمز
-اي اكو شبكة بس مامفعلين اني راح اكول لابوج يفعله..
-اوك. اكلج خاله هذا البيت جبير ماشاء الله معقولة من يروح ابويه لزوجته اسبوع تبقين وحدج
-لا الخدامة تبات هنا خطيه بيتهم قديم وصغير وهي مره جبيره تختنك خليته بوحده من الغرف متشوفين ماشاء الله هواي غرف زايده عدنه.
-ها تمام اني راح اصعد للغرفة اذا احتاجيتيني صيحيلي
-اخذي راحتج حبيبتي
صعدت للغرفة طلعت مبايلي مابيه شحن اووف عود ردت اتصل على سيف
............
مراح اكول اسفه ع التأخير لا اني مو اسفه لان تفاعلكم ميساعد اصلا مادري شلون كتبتها لو كل واحد يقره ينطي تصويت ع الاقل مو اله تعليق اكملها بكل حب واحترام.... بس بهيج حاله اكتب براحتي...