Bujang Selanggang completed

Ensera Bujang Selanggang

Ensera Bujang Selanggang Enggau Bujang Rirang

Tusun ke satu

Ribut begemung biau balai mangka ka menua Lepung selanjing tikar abis tekesai belah ruai .

"Sapa meh bangat ngudi menua kitai tu "pia ko nyawa bala iban mucau udah sebulan tu menua sida iya kudi enda menuku .

Chapan pemansai tangi tikai sengang nyau ketepak labuh ari pemanggai nyau keliti atab kedua iya .

Ruai nyau chapuh laban bala iban beambika keresa ka terebai .

Pun kayu nyau silai babas tinggi nyau palai dipangka ka ribut biau balai .

Ba tengan rumah dalam bilik tuai rumah Nyelang mata Nyelang kuring merening mua Merai anak andai anak asi enda sagi.

Merai dara  jawai tampun puji  kumang indu bantang kunci ari .

"Sapa apai  anak dalam perut nuan nya Merai .."ko Nyelang agi nanya anak dara iya .Indai Merai benama Chaluk sikuk sikuk nyabak ngenang nasib anak iya .

"Padah anak padah asi sapa apai anak nuan .anang nuan nangi ..urang dini laki nya anak sapa ?"

Tang jaku indai iya nya ngasuh Merai dui dui nyabak abis beburul insak .Apai iya Nyelang bisi kasih bisi ga sinu bisi ga ringat .
Malu ukai enda malu meh enti urang nemu .Indu ka mereti pandai nyaga ulah tau ngenyaika nama iya dini iya engka mua dikena mampul pemalu .

"Urang dini laki ka selalu ngayap nuan Merai ..padah ka aku enti iya ukai urang bujang rumah tu padah ka manah rumah ni iya anak sapa aku ngasuh iya jadi enggau nuan ."pia ko apai iya nukik tang Merai majak ka nyabak aja pala iya digilik kiba gilik kanan enda tepansut ka jaku diri .

"Eeenddaa enda nemu aku apai ngelamatu iya ngayap aku enda kala madah ka asal menua "ko Merai nyaut enggau sabak sabak sambil ngilik ka pala.

"Aku empu pen enda nemu ari ni penatai iya apai "ko Merai enggau sabak sabak .

"Kelimpah ari urang laki nya bisi urang laki kitai serumah kala ngayap nuan anak "ko Indai iya nanya tang Merai mina ngilik ka pala aja ari ka bejaku .

************
Mulaika pun baru ...

Pengudah ka betemu enggau siku anak temuai ba gawai sandau ari dia Merai selalu digayap urang laki enda temu penatai .

Merai begulai enggau laki nya udah ngayap Merai nyentuk ka seduai iya telanjur begulai tubuh .

"Kemaya tua dibai nuan jadi ...Kemaya nuan mai apai seduai indai nuan nanya  aku "pia ko  Merai nanya laki enggau iya gali nya .

"Tumbuh bulan baru ila aku ngemai apai seduai indai aku nanya nuan "ko iya megai jari  sambil nyium kuyu Merai .

Udah Merai jenak tinduk dia laki lalu angkat sebedau iya pulai dia iya nyium kening Merai tanda pengerindu iya ka Merai .

Baka selama mega penani Merai maya mata iya enchelak laki ka selalu ngayap iya nya sigi udah pulai .

Genap sebulan laki nya ngayap Merai dia laki nya nyau nadai agi ngundang iya .

Pendiau Merai mega berupai mamau makai nyau enggai suah agi ka dipeda enda pengerai selalu tabin enda menuku.

"Irau ati aku meda pendiau endu Merai nya apai endu ..tak enda baka selama enda meruan makai enti aku nyumai asi enggai nyium bau asi "pia ko Chaluk mantai ka temuku ba kandang lempuang karung dada ...

"Aku pen irau meh indai endu enti enda salah mata aku baka pendiau urang ka baru lega endu nya "pia ko Nyelang mega baka ati bini iya .

"Uji nuan nukik iya indai endu... endu nya tak jarai bejaku betunga enggau tua seminggu tu suah madah ngelu pala tabin enda nyamai isi belama."ko Nyelang nampung jaku iya baru maya seduai iya ka deka belabuh tinduk .

*********
Lebuh maya dani pagi dia Merai nyepi rekung iya engkual deka temutah tang ditagang iya enggaika dinga apai seduai indai iya .

"Anang anang aku tu ribat ...udah sebulan tu aku nadai datai indu "ko Merai betelai ka diri pala iya mega udu ka bungau sereta engkual pama dibai angkat ngenyit .

Nyawa iya mega suah tetenguk ka buah masam buah gentu gulai empaung buah senggang buah ridan buah entimau .

*********besambung***********

#tau like komen n share ..

Ang semina maca aja tang tag kita sebilik maca iya ...sharing is caring ...