Bujang Selanggang completed

Bujang selanggang

Ensera bujang selanggang

Tusun 15

Aaaaarrhhh!!!!!
"Tu baru kenyang "pia ko aki antu raya teraie.Darah ka malut gelegar dilat iya ambis dilat iya lengis datai nadai dipeda bekau darah .Udah tembu nilat bekau darah ba mulut iya dia aki antu raya nya pen pulai mai perut iya ka ranung ranung kenyang makai anak mensia .Nyau rigang rigang iya bejalai mai tungkat niki punjung umai .Iya meh aki antu raya udah ngelebus dia Selanggang pen datai ba langkau umai

********************

Udah tembu ngumpul kayu rangkai umbas iya dikena seduai menyadi iya nunu kunchit iya pen pulai ka langkau .Datai ba langkau Selanggang pen lalu niki tang iya nadai meda Rirang ijit madik iya pen agi tubah ga ba endur ka dipeda iya tadi tang tubuh madik iya nadai dipeda.
"Ujang ....ni nuan ...??"ko iya ngangau mata iya nyau ginau ginau merening genap sukut langkau .Semua utai dia agi sebaka meruan baka selama .
"Rirang ..tu aku udah datai mai kayu dini nuan belalai ?"pia ko Selanggang ngiga adik iya engka bisi belalai .Meda adik iya nadai nyaut dia Selanggang pansut ari langkau ngangau baru nadai ga Rirang nyaut .Meda nadai adik iya nyaut dia Selanggang nurun ka tanah meling langkau peda iya babas rebah kayu rebah .Ati iya mupuk enda nyamai nyau ketap ketap peluh nyau baka leka marik pansut ari kening Selanggang .Kepuas nyidi utai sebelah langkau dia iya meda bekau kaki besai agi ari bekau kaki anak mensia ..

"Parai meh adik aku !!!"pia ko Selanggang nyau gesah gesah pendiau .Ati iya ka kesal ketap ketap nyau majak balat mangka ka kedap kandang lempuang sukut atau . Selanggang ngiga baru sambil iya rangau rangau ngangau ka Rirang tama iya baruh langkau engka bisi madik iya belalai tang nadai meda ayas menyadi iya nyau kepuas iya ba ba baruh langkau nyabak rangau rangau dia mata iya meda tekang darah mesai takang sirih .Tulang iya berasai lemi runding iya nyau ingat ka indai iya .Selanggang lalu pulai belanda naka ulih iya enggau sabak sabak ambis utai dirunding iya ..kati enti indai iya nanya ..nama disaut iya ...ngenang nya Selanggang pen ngetu enda nemu iya dini ka ngiga menyadi iya.Antu nadai ga ngidup ka menyadi iya Selanggang lalu nyandih nyabak nyau teduduk .Maya iya ka duduk nukung nyabak dia iya nyepi bau iya ditegu urang.

"Tu pua kumbu  kena nuan ucu ngidup ka madik nuan ..(cekur enggau jerangau pulai ) tu dikansar nuan begulai enggau tekang darah adik bakatu sampi nuan
'Nya tu (cekur pulai jerangau pulai) ambi nuan pulai semengat menyadi aku ngambi iya tau idup baka selama ..udah nya bap nuan enggau pua kumbu tegah nuan munyi tu 'nya idup menyadi aku ...pulai baru menyadi aku'...pia ko nuan besampi .....dani nuan igat jampat nuan ngidup ka iya ..udah iya idup pagila bunuh anang enda seduai napat ka antu raya nya laban iya deka napat ka nuan "pia ko Apai tuai nya tinggi besai ngasuh iya dani .Selanggang lalu dani meda diri agi nyandih ba pun kayu ..cekur jerangau enggau pua dikerendut iya agi dipegai jari iya .Meda mimpi tak ngengala endar dia Selanggang enda masau awak iya berumban pulai ka langkau baru .

Datai iya ba langkau dia iya lalu ngambi tekang darah menyadi iya lalu bai iya ka tanju.Cekur enggau enggau jerangau pulai lalu ditenchang iya batu lalu dikempuk iya begulai engkah iya ba chapan .Chapan lalu dibap iya enggau pua kumbu .Maya iya negah pua kumbu dia deh baka bisi urang kebul kebul ba dalam pua nya .Meda bakanya Selanggang lalu nyilak ka pua nya meda Rirang lalu angkat merap iya .
"Asai ka tinduk jenak aku aka ...enda ngadang diri tau lela ditinjak antu raya ."pia ko Rirang nusi ka Selanggang .Aka iya lalu nyau labuh ai mata asaika diambik mimpi meda menyadi iya tau pulai baru .
"Pulai tua ujang legi ngiga indai .Pagila tua munuh antu raya nya ila iya ensepi iya "pia ko Selanggang madah ka madi iya .

"Apuu jera aku ka aka legi tua parai empa antu nya "pia ko Rirang enda setuju enggau buah runding aka iya .
"Enda ujang enti tua enda munuh iya alu tua enggau kitai sebilik ka ngundang langkau tu meh diempa iya ila "pia ko Selanggang bejaku .
"Barang ko nuan meh aka "pia ko Rirang ninga jaku aka iya betul .
"Pagila tua ngiga akal kena munuh antu raya nya ..diatu pulai dulu tua enggai ka Indai nganti tua ba rumah ."pia ko Selanggang mai Rirang pulai .
"Bai ijit enggau sumpit tua nya mupuk tua "pia ko Selanggang ngansak adik iya .
"Bah aram meh aka"ko iya nyaut aka iya .
"Anang madah ka Indai tua kitu baru pagila tentu iya enda ngasuh tua bejalai agi ."pia ko Selanggang mekat adik iya .Rirang mina nagun ka pala aja ninga jaku aka iya .

Datai seduai iya ba rumah dia seduai iya nusi nama utai nyadi ba langkau umai ninga utai tusi anak iya dia Merai nyau nyabak merap anak iya nasit antu agi pabu nemu mandung anak iya .Diberap disium iya anak bujang iya ka besapit nya .Jauh ba lubuk ati iya ingat ka laki iya ti semina ngudang iya dalam mimpi berasai enda betah ati iya ba anak meh iya mantup ka ati rindu ati lelengau enggau badu .Maya ati enggai rindang anak iya meh nyadi ka sakang badu beraie .
"Badu mindah ka bukai seduai ila lusa ..udah manah antu bisi nulung seduai anang enda jera ka dua kali ninga seduai "ko indai iya murus belakang seduai iya .Nyau asaika disiuh penyanyau iya ka anak bujang iya dua iku nya .
"Aok indai "ko seduai iya nyaut seretai sambil seduai iya nyium kuyu karung kerubung tangkai mengandai .

*****besambung*******