Bujang Selanggang completed

Ensera Bujang Selanggang

Ensera Bujang Selanggang Enggau Bujang Rirang

Tusun 2

Perut Merai mansang besai nyadi iya ka betubuh bisi nya mega dpansutka urang enggau tebah terantang tawak laban ngandung anak nadai apai .

Nyelang enggau bini iya Chaluk naban ka Merai ngagai langkau umai laban malu ningga jaku urang bejai anak iya ngampang nadai apai .

Bai mulut iban ti enda nemu enggai bejaku kiba kanan ngenyai ka rita tudah Merai dia apai iya tusah endar ati ngujung ka iya enggai makai kelalu malu dikutuk sida serumah iya .

Pengerai Nyelang mansang enda pengerai ngujung ka iya enda dapat lalu nadai .Dipelian ka manang enda ga ulih datai ka manang nyau berayun ngambi semengat iya ba liang pampat enda ga ulih .

Pemerinsa seduai mindai iya majak nambah seduai iya diburu kaban belayan apai iya laban anak dikandungka Merai mai sial sereta ditenah ka sida serumah iya alah ayu ngalahka tuai bilik .

Jaku sindir jaku seliri jaku tuang jaku jai ke asi seduai mindai iya belama makai semampai belaukka ai mata .Enti baka enda ngenang diri ka betubuh bisi singin ati iya ka nubai diri .

"Empa asi nuan endu umbas nuan nyabak maya makai mali .Kasih ka anak nuan nya anang sekali menyati diri engka iya ila tau ngenang ka nuan maya iya besai iya ."pia ko Chaluk bejaku enggau anak iya maya makai lemai .

"Asi asaika tajam ditelan Indai enggai ufu nyawa tu makai ."pia ko Merai nyaut sambil iya ka malit ai mata ti naya nerusur kuyu iya .

"Pansar meh asi sigi baka iya aku suba bakanya meh maya lega ka nuan suba ..iya kandung nyau besai agi badu nyawa bakanya "ko indai iya tucum ngenang diri ka betubuh bisi suba .

Seduai mindai iya diau ka diri digaga ka urang langkau enda jauh ari rumah panjai enda betampung enggau sida serumah iya .

Bumai mega kediri seduai iya enda beduruk enggau urang laban bala mah ka apai Merai agi nyalah ka Merai ketegal menyadi sida iya parai .

Merai seduai indai iya dikeji dikumbai mai penyial .Maya turun ba umai dia Merai bemalam kediri ba langkau umai laban maya nya padi nyau murai .

"Indai Indai .."ko Merai ngerandau indai iya maya ngetu merarau tengahari .
"Nama nya asie "ko Chaluk nyaut .

"Nuan pagila pulai ka rumah ngambi kain aku serambar nyau keru kain aku tu dibasu belama nadai dikena aku besili "ko Merai madah ka Indai iya .

"Endai anak kati nuan ngasuh aku pulai ..enti pulai bela pulai ga tua enggai meh aku ninggal ka nuan kediri ditu "pia ko Indai iya enda setuju enggau jaku anak iya ka nyengali pulai .

"Ukai nya ngawa aku ka kediri ditu deh "pia ko Merai ngenyamai ka ati indai iya .
"Baik nuan enda lama semalam aja "ko Merai bejaku baru .Indai iya enggai nyaut laban nemu anak iya ka temil .

Amat ga gari kain tudah Merai nyau kebuchai carik nyau keru meh .Bakani ati iya ka ninggal ka anak iya kediri ukai nya tubuh rumpas .

Anang agi diatu musim padi murai munsuh suah endar ngaga kayau anak maya musim bumai .

Iya meh pagi siti tumu Indai iya mulai ka diri ka rumah tumu datai tumu ga mulai ka diri enti nadai utai nekul ba rumah din.

Kira baru ngelebus indai Merai bejalai dia munyi bekau kaki beterus aja ngindik dan rangkai nyengkilun ka seduai mindai iya .

************************

Rengut rengut api munsuh nunu pemakai dalam kampung ti enda jauh ari seduai mindai iya bumai iya ga enda betimpai umai enggau urang laban apai iya suba udu berimba kampung pama bumai .

Enti baka bumai kerukuh nyamai meh mayuh tanah damping ka begulai umai enggau urang .

"Malam legi iya ensepi iya kala nadai urang enggau iya begulai "pia ko jaku munsuh betunga nunga unggun api .
Nyau tekinyik munyi duku diansah sida iya tubuh sepuluh

Benung iya penyenak urang ka tinduk urung iya tengah malam dia Merai nyepi diri digerak urang .

***********besambung *******
#tau like komen n share.

#tag kaban belayan suku ruju kita aok sharing is caring