Bujang Selanggang completed

Ensera Bujang Selanggang

Tusun 6

Udah bekau ka bemimpi tengahari nya dia indai iya nemu laki Merai nya ukai urang pia .Ati iya bisi nyamai mimit laban bisi urang ngemata ka seduai menyanak iya ari jauh tajapen enda begulai enggau seduai iya .Ngenang ka Engkiung uduk ka ditemu seduai iya suba uduk nya enda ditemu penatai minta makai  lalu diibun seduai iya enggau seduai iya nguan langkau umai .Engkiung disangka seduai uduk urang tesat laban enda temu sapa ka ngempu uduk nya .Engkiung mega uduk ti penyalak sereta bulih selalu Engkiung bulih anak babi enggau jelu mit dikelauk seduai iya .Nya baru chaluk badu tatuk nanya sapa ga enda tatuk tumu pagi meda salai lauk salai jelu ukai bisi urang enggau seduai begulai .

Bulan abis bulan nyau besai agi ka kandung tudah Merai .Perut uduk iya ka benama Engkiung mega nyau besai bendar nganti ka deka beranak laban uduk ngandung enda lama enda baka kandung kitai anak mensia .Iya meh dini ari dia Indai Merai ninga anak uduk nyabak tak berumban iya angkat laban ingat ka pekat dipadahka laki Merai .Iya meh Chaluk pansut ka tanju dia meda Engkiung gali beranak tang anak Engkiung enda mayuh tak siku gelik gelik .Ka iya ngambi temuni nya ati iya kakang bendar sereta takut laban uduk ka udah tembu beranak cukup beranak anang ka ditegu damping pen di ngengang lalu ngetup .Engkiung nyau sengu sengu baka ka ngasuh iya datai kia .

Maya iya mai sempun api meda Engkiung beranak dia uduk nya baka ka ngasuh iya damping nyau kuit kuit iku iya baka ka minta dipegaga meda uduk nya tak nelap endar dipeda iya dia iya ngambi semilu buluh ti tajam baka lungka dikena nyayat temuni uduk nya .Udah Chaluk ngambi temuni nya dia Engkiung lalu nilat jari Chaluk ka agi bau darah iya.maya chaluk ka murus pala Engkiung dia temuni ka dipegai iya nya pen bebali nyadi batu .Meda bakanya berumban tudah Chaluk tama ka langkau naruh batu uduk nya enggai ka dipegai anak iya.Ati Chaluk berasai gaga bendar laban meda perut anak iya besai amat baka ka ngundan anak besapit .

Maya ka damping bulan Merai ka deka beranak dia Merai nyau tusah deka mindah .Chaluk mega enda ngasuh Merai enggau iya bejalai sebelah tanah tauka ngiga lauk meda tudah kaki tudah Merai nyau meatung atung kembai .
"Kandung ibun enggau nuan tu anak peda kaki nuan majak sup nyerumba kandung nuan ."ko Chaluk murus betih Merai .
"Enti surut kembai tu ila beranak nuan endu .Enti meda kandung nuan tu baka ka laki anak nuan kandung bediri"pia ko Indai iya Chaluk madah ka iya maya seduai iya udah tembu makai lemai .Tambah mega selampandai suah endar didinga iya mah ka ruai memunyi enti mah ka dapur selampandai memunyi indu anak iya pia ko urang tuai .

Iya meh datai ba ari Merai ka beranak dini ari .
"Indai indai ...pedis amat perut aku muat kala enda deka beranak aku tu "pia ko Merai nyau kepuas ka ngenat ka perut iya muat ari tengah malam iya dini ari nya pisit muat disepi iya .
"Apu kala enda deka beranak nuan nya endu "pia ko indai iya lalu angkat ngambi tikat dikena anak iya beranak .Lebuh maya Merai angkat dia punggung iya asaika putus nya semetup papan punggung peda ko tak ngua ai pansut masah ka kain iya .
"Apu ka beranak nuan tu anak "ko indai nya nyau kesal ati .Iya pen ngali ka Merai batu uduk ka ditaruh iya pen dikirah iya .

Maya tudah Merai ka beranak ari pen belabuh kudi dini ari ribut begemung mangka ka kayu .Guntur beduru kilat pen nyabung penyabung ngelambai petang .Ujan nyau munyi ka diruruk naka pemangat nadai didinga auh nyawa
Merai ka neranka anak iya ti deka ada nyau peluh mampuh .Iya meh perut iya muat tak teran ka iya peda ada ku iya iya laki alu kela kela nyawa iya nyabak
"Siku da anak aku indai sambut nuan "Ninga jaku Merai nyau seput seput baka ka neran baru indai iya pen lalu malut ucu iya enggau gari kain lalu diengkah ka ke tisi ngimbai Merai .Udah nya Merau pen neran baru peda ko anak laki baru ga anak Merai ada .Indai iya naka pengaga nadai jaku deka dipansutka iya meda gamal ucu iya dua iku nya .

<besambung>
#tau like komen n share ..