Bujang Selanggang completed

Bujang selanggang

Ensera Bujang Selanggang

Tusun 14

Tiga taun udah ka beberita idup baru dia bala mah ka apai iya nyau bebulah enda baka ka udah ..aya enggau aki iya mega nyau berubah laban malu ka pengenyai diri .Idup kitai mensia nemu berubah enti kitai kelalu dipenyai sereta dikepapas ka sama iban amat jaku sempama tuai antu baruh dagu petara semampai ngemata indah lubuk nemu nyadi lansar ,lansar mega nemu nyadi lubuk ..tiap iku kitai mensia enda ulih nyagam nasib idup ba dunya ..pengenyai dibalas enggau penulah.Aki enggau Aya iya sebilik nyau kusil kusil bumai enda bulih padi berumpang kampung puang enda ga nyadi tanah nyau kusi padi ditanam enggai nyadi suah beampa jauh ka berisi.
Enti nyema leka padi manah mayuh agi ka diempa jelu.Makai suah pungkang padi enda penuh setibang jauh ka melumpa anak benda ngasuh majak puang ka ngumbai antu rukuk enda dipedara tang asi enda bedian diempa ..tubuh nadai mayuh tang padi enda kala datai bumai taun siti suah agi ka bekelimat ka berau nyadi kebubur ..ka ngambi sanda suah enda ka enda dibalas .Suah mega sida iya minta beras ba Merai seduai indai iya taja pen seduai ukai urang ka menyana tang meruan bisi belama .Diatu Merai nyau baka tekang mau tuchi dipeda sida serumah iya .

***********
Bujang Selanggang enggau Bujang Rirang nya baru berangkat bujang kira iya baka manuk baru lanjau lebuh maya seduai menyadi iya nyumpit burung sebelah kampung dia ari ujan nyala .
"Pulai tua adik ..ujan nyala ari "pia ko Selanggang mai adik iya pulai .
"Lubah aka nyin burung kuncit kemali "dia Rirang lalu ngesuh ka ipuh peda ko lalu labuh ka tanah burung kuncit .Meda burung nya labuh berumban iya ngambi kuncit nya lalu nepu dalam ijit.Ujan kapa nyebut nyau be'nyang nyang ngemisai tengahari raya .
"Bangat endar ujan tu aka ..kini tua ngenduh deh .."pia ko Rirang nyepi diri nyau jempuk pala .
"Pulai ka langkau tua baik mansa jalai umai .Ujan ngetu legi tua pulai ka rumah."pia ko Selanggang nyaut adik iya .Bejalai meh seduai ngelaban ujan nyala iya meh datai ba langkau seduai iya pen niki ngenduh .

"Aka aka ...manah tua ngidup ka api dikena nunu burung tu nyau ngeraus bayak aku tu bai lepi "pia ko Rirang mantai ka burung kuncit ka ulih iya nyumpit tadi ari ijit .Malik Selanggang ba para dapur meda agang rangkai dua iti da bedau .Ninga adik iya lapar nyau sinu ga ati iya .
"Kayu tu enda ga cukup dikena tua nunu iya adik ...ari tu baru udah ujan .Kala ka bisi kayu rangkai deh "ko Selanggang bejaku sambil iya ngerunding dini ngaga kayu laban iya empu pen lapar mega laban seduai iya ka enda mai bekal nurun ka tanah .
"Nganti ditu dulu ga nuan aku ngiga kayu rangkai ga kala ari nyau ngetu ujan "ko  Selanggang lalu mai duku angkat deka nurun ka tanah .
"Nuan nganti aku ditu anang bejalai ka bukai nuan legi datai aku pulai ngiga kayu "pia ko pekat Selanggang madah ka adik iya .
"Aok aka "pia ko Rirang nyaut Selanggang .

Iya meh Selanggang udah ngelebus dia Rirang ka ba langkau ninga urang ngangau ba pala tangga .
"Tau tiki langkau kita tu ucu "pia ko nyawa urang nyau rabau nyapa tudah Rirang ari tanah .Ninga nyawa urang nanya ka penyadi rumah dia Rirang  lalu nyaut .
"Tau aki tau niki meh "pia ko Rirang nyenguk ka pala .Ati iya tekenyit bendar meda urang nya tak antu raya .Pala iya nyau mesai baka rangkar tubuh iya nyau mesai iban tubuh dua .
"Parai meh aku tu legi "pia ko Rirang bejaku meda antu ba pala tangga langkau iya .
"Dini engkah tungkat tu ucu "pia ko aki antu raya nya nanya Rirang .
"Sandih ka lalau aki "pia ko saut Rirang .Iya meh antu raya nya nyandih ka tungkat ba lalu peda rebah ga lalau .Meda lalau nyau rebah dia antu raya nanya iya baru ga. ..
"Rebah ucu ucu "ko antu raya nya nyaut .
"Sandih ba pun kayu aki "ko Rirang nyaut baru .Disandih ba pun kayu abis ga pun kayu rebah .Meda bakanya dia Rirang ngasuh ka iya nyandih ka tungkat ba lalang baru tungkat aki antu raya enda rebah .

"Ni urang deh ucu "ko antu raya nya nanya .
"Baru udah bejalai menyadi aku aki "pia ko Rirang .
"Enti bakanya ngiga kutu tua ucu "pia ko aki antu raya nya mai Rirang ngiga kutu .
"Ehhhh nadai kutu aku aki nadai kutu ..."pia Rirang berumban nyaut iya .
"Enda ucu nuan ngiga kutu aku ,legi tua beduruk ngiga kutu ..gatal endar pala aku tu "pia ko aki antu raya nya ngansak Rirang ngiga kutu .
"Aok meh aki "ko Rirang nyaut iya pen lalu ngiga kutu antu raya nya .Lebuh iya nyila ka pala antu raya nya dia iya tak nyerauh .
"Apuuuuuuuu aki kala "pia ko Rirang manjung .
"Gelam ucu "Ninga munyi nya Rirang pen lalu ngelam kala .Udah nya Rirang pen nyilah ka buk aki antu raya nya baru .
"Nyelipan aki "ko iya ngelalara nyelipan ba buk antu raya .
"Gelam ucu "
"Kutu aki !!!!"
"Gelam"

Iya meh udah abis kutu aki antu raya nya digiga iya Rirang pen madah .
"Abis kutu nuan aki "pia ko Rirang madah.
"Enti bakanya aku ngiga kutu nuan ucu "pia ko aki antu raya nya nyaut Rirang .
"Nadai kutu aku aki ..nadai kutu "pia ko Rirang nyaut tang antu raya nya tetap maut pala Rirang.Antu nya pen nyilak penyilak pala ngiga kutu .
"Nadai kutu ucu "ko aki antu raya nya madah .Jari iya pen mindah ka punjung pala iya meh datai ba punjung aji aki antu raya pen lalu ngelam semengat Rirang .Rirang lalu rebah parai meda Rirang udah parai aki antu raya pen lalu ketawa .
"Hahahahahahhaha nya sepi nuan anak mensia "ko iya Rirang pen lalu diempa peda nyau chinang chinang leka mata iya  pala iya pen nyau besai agi ari baka .Nyau tekerup munyi tulang Rirang diempa iya udah iya makai Rirang iya pen nilat darah ka melayau ngemasah gelegar .Naka pengenyang aki antu  nyau ranung ranung perut iya mulai ka diri lalu mai tungkat .

******besambung*******