Bujang Selanggang completed

Ensera Bujang Selanggang

Ensera Bujang Selanggang enggau Bujang Rirang

Tusun ke 5

Lebuh ka tama ka dalam langkau dia indai Merai meda dua iku salai pama tedai empa tudah Merai .

"Dini nuan bulih salai pama nya endu "pia ko indai iya nanya tetengok ga Indai iya meda sekumbang apai iya ka udah ditelan bulan nyengali ari  nyau nadai urang meh ngiga ka seduai iya lauk .

"Empa meh indai enti nuan deka makai iya "ko Merai nyaut indai iya tang iya enda nyaut nyentuk utai ko indai iya .

Chaluk enda memunyi taja ati majak deka nemu dini anak iya bulih salai nya .
Merai lalu ngintu undai ka dipansai iya tadi .

Anak ikan meh nya anak gerama memegup meh gulai undai sumai iya enggau upa tepus daun riang tucung ligun ...

Seraya ka nganti nya  lauk masau dia iya nesap sumbuk tubu dikena ngulai daun sabung dikelauk seduai mindai iya tengahari negi .

Indai Merai nadai  nunga iya dia laban ka nyempi padi ba tanju awak ka padi tuai ngambi nyamai ka ditutuk iya legi laban berau seduai menyanak iya tak nyau deka abis .

Maya ka nyumai lauk dia Merai ingat ka mimpi iya damping iya ka dani pagi tadi .

"Pulai dulu aku Merai malam legi aku datai baru ngabas seduai .Enti nuan deka makai sera anang nuan irau Merai sebut aja utai deka diempa nuan sigi dianjung aku ba para enti nuan bisi meda utai nyelai anang mayuh jaku Merai nya pengawa aku .Mupuk ku Merai "pia ko nyawa laki iya dinga Merai dalam mimpi .

"Endu!!!ohh endu ...padi tua peda dulu aku ka nyauk ai dulu "pia nyawa Indai iya ngangau ari tanju .

"Aok indai aok "pia ko iya nyaut Merai lalu ka tanju ngemata ka padi enggai ka empa manuk .

Sual lalu diambi iya meda bala manuk ka ditupi seduai iya nyau udah inggap ba raga nganti urang ka ilap alai sida iya makai padi .

"Hooo hoooo ...pama pama manuk tu baka ka enda diberi makai "pia ko Merai muru bala manuk .

***************
Udah ka tembu makai tengahari nya dia indai Merai lalu lelap tinduk duduk .

Maya ka bemimpi dia iya baka tadi dunga dunga ngelila ka padi .

Benung iya ka muat padi dia iya meda  urang laki sigat sigat iya kering tubuh tegap niki tucum merening iya .

Chaluk nyau ngenung meda urang nya niki .

"Aku tu indai laki Merai .Aku meh ka selalu ngemata ka seduai ngelamatu ..Enti nuan meda utai lauk ba para nya utai kelauk seduai meh nya ."ko laki nya empegal madah taja Chaluk enda nanya enda ngasuh duduk .

Laki nya mega madah ka nama diri sereta ari ni penatai iya .

"Nyadi indai Engkiung ka enggau seduai nya ..anak uduk aku indai maya diatu benung ngandung engkiung nya enti iya beranak ila temuni anak iya ambi nuan dikena Merai beranak ila "ko laki nya bejaku enggau iya .

Chaluk nyau enda nemu ka bejaku nyaut menantu iya nyau genung genung aja ..

"Indai !!!!!indaiii !!!"ko nyawa Merai megai bau Indai iya meda manuk nyau mantuk pemantuk makai padi .

"Hooo !!!hoooo!!!!!hoooo"pia ko Merai muru manuk ..

"Indai !!!ohhh indaiii manuk makai padi tua arr " ko Merai ngerak indai iya .Ninga nyawa Merai nyaring ngerak iya .Indai iya lalu engkajat tekenyit ari ka tinduk tadi .

"Hooo hooo hooo "Merai ka meda indai iya ka engkajat nya lalu lekik lekik ketawa.

"Huuuhhh ni manuk deh " ko Chaluk ngiga manuk nyepi diri asai ka dikeduan Merai .

"Dehhh indai nadai manuk nya nguan diri minta palu nuan enggau sual arrr ..dulu sida iya merejuk ka tanah ."ko Merai agi engkikik ketawa meda ulah indai iya baka ka ngigau.Indai iya lalu bela ketawa sambil ngaru pala .

********Besambung**********