Bujang Selanggang completed

Ensera Bujang Selanggang

Ensera Bujang Selanggang enggau Bujang Rirang .

Tusun 7

Pengudah anak Merai ada iya Merai ngelekat ka nama anak iya ketuai Selanggang nyadi ka biak nya diberi iya nama Rirang nitih ka pekat laki iya .Lebuh maya Merai udah beranak dia bisi ga sida serumah ngandak meda penempa anak Merai .Kedua iya nyau betelai telai meda salai pama nyau bejagang penuh kerungan laban nya dikena indu bepenti beranak kelia .Kelimpah ari salai pama buah empasa lia daun babai paku keru tang enda tau mayuh enggai ka b'au enti makai lauk kalu mayuh .
"Ohh waii dini seduai bulih pama ngemayuh nya wai nyau ngining aku meda salai pama nuan nya "ko Julan laban ka bela udah beranak mit baka Merai nyau nitik liur iya meda salai pama ba para .
"Ulih aku meh nya ngelamatu ngambi ka bisi dikelauk iya maya beranak ."pia ko Chaluk nyaut Julan ninga Julan nanya .
"Nyamai nuan Merai nadai laki bisi indai bekeradai ngiga lauk ka nuan ...aku bisi laki ..ngining nuan ka nadai laki makai lauk "pia ko Julan nyaut Merai enda memunyi ninga sebana Julan bakih iya .

************************

Anak Merai nyau mansang besai seberai iya meh datai ba umur anak iya dua iku nya umbas iya pemesai kira umur tujuh taun kitai maya ari diatu dia pengidup seduai madi iya nyau baka ka lenyau siang ditelan malam nyau petang tegayam baka malam lenyau tarang bulan .Maya Merai pulai ari umai dia inek iya Chaluk manjung meda Merai tak tebah luput duduk buti ulih ngeleka ka uyut di ma iya .
"Apuuuuu anak ..."tubuh Merai digusak iya nyau chelap ngelinan .Ati Chaluk asai ka ditenchang meda Merai nyau baka ladik taya mulut pucat nyemaram .
"Selanggang ....!!!!Rirang !!!!ni seduai madik nuan ucu ..!!"ko inek iya ngangau ngiga ucu iya .Mua chaluk nyau bengit bengit ngiga urang ka dikangauka iya .
"Ohhhh Selanggang ni seduai ucu "iya ngangau baru meda ucu iya nadai nyaut .

Chaluk laban ka sikal dia iya lalu ngeleka Merai ngiga ucu iya enda lama .
"Selanggang !!!!!!Rirang !!!!!!ni seduai ....!!!!"ko Inek iya ngangau ka seduai menyadi iya tang nadai ga nyaut .
Ati inek iya nyau kesit kesit ga nyau gegetar asai ka lemi tulang meda pendiau Merai .Meda ucu iya nadai dia Chaluk lalu belanda ka rumah panjai ngambi manang merubat Merai .Gaih manang nya bisi dia nyau berumban mega manang nya mai lupung ninga Chaluk enggau sabak sabak nyabak ngambi iya kia .
"Bah aram meh indai ucu enti ucu raya "ko iya ngerumban sambil ka belanda uduk .Ati indai Merai berasai enda nyamai pia iya nati ka ucu iya ka alu bedau datai enda temu penunga tadi .

Datai dia manang nya lalu ngambi ubat mabut diri dikena iya ngama Merai.Lebuh iya ka negu tubuh Merai dia iya ngasai ka Merai raya amat nyau sandik kandik baka abi telih .Meda Merai raya amat manang pen belian ngambi sememgat enda ga ulih nyau terengkah ba lubang pampat meda bakanya manang pen berayun ka ngambi semengat tang enda ulih baru ka berayun Indai iya Chaluk nyau nyerauh nyabak meda Merai mutus ka seput .
"Kasih anak akuu indaiii nyau jauh bejalai ,kasih tajau ku indaii lenyau lelang nadai dedinggai ...."Parai mih tudah Merai lesi ngengali ari danjan nengilah bulan melakangka remang rarat .Dinga ko nyawa bunsu bubut nyau munyi tebah tawak melandai nyabak meda anak mensia enggai dibai iya niki ke rumah .

**************

Selanggang enggau Rirang ka agi nyumpit begulai enggau urang siku ka enda dikelala seduai iya .Gamal urang nya sigat kering besai mai seduai menyadi iya nyumpit .
"Pulai kitai tiga "ko Urang nya mai seduai madi iya pulai ..
"Lubah meh aya ...agi ka kami duai aka nyimpit burung "pia ko Rirang rindang ngelila ka burung .Laki nya merening seduai madi nya nyau labuh ai mata berumban iya nguing kebukai ngendas ai mata iya ka labuh .
"Pulai kitai nganti indai enggau inek seduai ba rumah din ."pia ko iya agi ngumbuk Rirang pulai .
"Pulai meh tua adi legi ngiga indai tua legi "pia ko Selanggang mai adi iya pulai .
"Aok ga aok ga ...pagila nyumpit baru kitai aya ...gaga amat Indai belauk ka burung tu "pia ko Rirang bayam bangkai burung ba dalam igit mit iya .

************besambung******
Tau like komen n share