Star Love (II)

Chapter ( 25 )

Unicode

************

ပတ်ဝန်းကျင်တစ်ခွင်လုံး ပိန်းပိန်းပိတ်အောင် မိုက်မှောင်နေလျက် ရှိသည်။

တိတ်ဆိတ်ငြိမ်သက်နေသည့် ပတ်ဝန်းကျင်မှ ဖြိုခွင်းဖောက်ထွက်လေတိုးသံတစ်ချို့မှ ကျန်တာ အသက်ကင်းမဲ့လျက်ရှိသည်။

ဂျူလီယန် ခြေလှမ်းတွေကို တစ်လှမ်းပြီး တစ်လှမ်းသာ လှမ်းနေသော်ငြား မည်သည့်အရပ်ကို ဦးတည်ရမယ်မှန်းမသိ ။ ဘာလုပ်လို့ လုပ်နေမိမှန်းမသိ။ သို့သော် ဂျူလီယန် အခုလက်ရှိရောက်နေသော နေရာသည် မည်သည့်နေရာဖြစ်သည်ဆိုတာကို သေချာ သိနေသလို ဘာကြောင့်ရောက်နေသည်ဆိုတာကိုလည်း ဂျူလီယန်သိနေပါသည်။

ထို့ကြောင့် ကြောက်ရွံ့ခြင်း ထိတ်လန့်ခြင်း လုံးဝမရှိ။ စိုးရိမ်စိတ်လည်းမရှိ။

ဂျူလီယန်၏ ခန္ဓာကိုယ်မှ စက္ကူပြား တစ်ရွက်လိုပင် အလေးချိန်မရှိတော့သကဲ့သို့ ပေါ့ပါးနေသည်။ မိမိကိုယ်မိမိ လမ်းလျှောက်နေသည်ဟု ထင်မှတ်ထားသော်ငြား အမှန်တကယ်တော့ ခန္ဓာကိုယ်က အလိုအလျောက် မိမိသွားချင်သည့်နေရာကို ရွေ့လျားပေးနေသလို ခံစားနေရသည်။

ရုတ်တရတ်မည်းမှောင်နေသည့် ပတ်ဝန်းကျင်ကြားမှ အကွာအဝေးခန့်မှန်းနိုင်းခြင်းမရှိသော အရှေ့တွင် ခရမ်းရောင်သမ်းသည့် ခပ်ပျပျ အလင်းရောင်တစ်ချို့ကို မြင်လိုက်ရသည်။ ဗလာနတ္ထိ ပတ်ဝန်းကျင်တွင် လှမ်းမြင်နေရသော ထိုအလင်းရောင်သည်သာ ဂျူလီယန် ဦးတည်နေရသည့် အရာဟု ဂျူလီယန် သတ်မှတ်လိုက်သည်။

ထိုနေရာက ဂျူလီယန်ကို လာပါဟု လက်ယပ်ခေါ်နေသယောင် ။

ဂျူလီယန် ထိုနေရာကို ဦးတည်ကာ သွားဖို့ဆုံးဖြတ်လိုက်မိသည်။ ထိုနေရာသည်သာ ဂျူလီယန်သွားရမည့်နေရာဟု တွေးထင်လိုက်မိသည်။

စိတ်က ဆုံးဖြတ်လိုက်သည်နှင့် ခြေလှမ်းတို့ မစတင်ရသေးခင်မှာပင် ခန္ဓာကိုယ်က ထိုနေရာသို့ ရွေ့လျားခြင်းတို့ စတင်လေသည်။

လေပြည်တို့ အနီးနားမှ ရွေ့လျားဖြတ်သန်းသွားခြင်းနှင့်အတူ ဂျူလီယန်သည်လည်း ထိုအလင်းရောင်နှင့် တဖြေးဖြေးချင်းနီးကပ်လာသည်။