زمن القلوب الحقيرة

البارت الاول

زمن القلوب الحقيرة
البارت الاول
علي البدر
....
....
ولج حنين اني مو كايلج اذا تنامين وي هاي اللعاب احرك اهلج .....وشنو هاي البطانية مال الجيش المتغطيه بيها ....
دوشكج مركع بت الفكر .....شبيج دومج مرعبله ومخربطه
وهاي اللعاب اذا اشوفها بعد احركج انتي وياها فهمتي لو لا ....
بقيت ساكته ومن الخوف من صياح ابوي ماسيطرت عله نفسي وتبولت بمجاني وجانت هاي الحاله مستمرة وياي كلما يصيح ابوي ماسيطر عله نفسي....
بده ابويه يضرب بيه ويصيح بعصبيه ويتفل عله وجهي وشبعني دفرات ومشه .....

ضليت ابجي جوه فراشي وارجف واكول ليش هيج ابوي يعصب كل يوميه عليه شنو مسويتله اني.....
ماحسيت الا ايد اخوي صفاء وخر البطانية ومسح دموعي وكالي ...
حنونه بعد كلبي لاتبجين تعودنه كل يوم لازم ننبسط بسبب وبدون سبب...
....
...احنه بيتنه الاصل من البصرة   امي وابويه بصراويين بس اني ولادتي كركوك .
عائلتي  اب وام واخ وخمس خوات
اختي الجبيره زينه ووراها صفاء وبعدين  نغم ونورس واني حنين واخلاص الزغيرة

امي جانت علاقتها كولش قويه بصفاء جانت علاقتهم مثل الاصدقاء ماجانت ترفضله طلب وتحبه لان وحيدها من الولد واحنه البنات تعاملنه معامله حلوه بس طبعا مومثل صفاء
........
........
يمه انتي ماجاي تشوفين ابوي شلون يتصرف وي اخواتي والله انه ينكسر كلبي عليهن بس يدك ويضرب بيهن شنو هالقساوة يعني يكض الوحده يكفر بيها كفر ....لان ضحكت لو لعبت تره ماكو هيج...
...
...
يمه صفا انت ماتعرف ابوك مثلي.....
ابوك عصبي جدا ونار وداويه وهاي عصبيته كلها من وره ضغط الشغل وضيم الجيش يايمه....تره ابوكم لو مايخاف عليكم ماييسوي هيج بيكم بس من خوفه عليكم.....

بهالاثناء دخل ابوي هايج ومعصب وينفخ و سمع حجي صفاء وي امي وكبل بدون تفاهم نزل دك عله صفاء وشتايم وسب ...

ابن الجلب ابن الحيوان مطي ابن المطي جاي تتشكه يم امك والله اليوم الا اسوي بيك عمل اسود وكام وطك صفاء براسه وشكه شك بالحديدة ....

جنت خايفه ولابدة جوه الدرج وصاح ...
حنين ....حنين بت الجلب تعاي الا ابسطج كدامه واشوقه شلون يقك حلكه بعد....
مجرد ماسمعت صوت ابوي تبولت لا اراديا .

....ردت اكوم ماكدرت جرني من شعري وضل يضربني عله راسي وعله ضهري .....
عمت عيني عله اخويه صفاء شمر نفسه فوكاي وصار يضرب عليه لحد ماتعب ابوي من الدك علينه وطلع ....
....
....
بقيت ابجي وارجف واتنشك بصوتي خاف يطلع ويسمعني ابوي....وكلما يبسطنه جان يطك امي ويتفل عليها ويكلها تف عليج وعله هالخلفه الطايح حظها
سالت امي عن ابويه وسبب عصبيته ..

.تكلنه كل هذا بسبب الجيش وضيمه وبسبب العيشه الصعبه .....
رديت عليها ...
كتلها يمه هذا مو ابونه الابو مايسوي هيج بعايلته وضليت ابجي وخايفه من ابوي اي لحظه يدخل.....
.......
ابوي جان عصبي كلش محد يتصور عصبيته ومحد يتصور شدته وصياحه ....جان جسم وسمين ومحد يكدر يرده لو يشرد من ايده ....جان كلش قاسي ومايتحمل ابد جان يضرب ويغلط ويفشر  بسبب وبدون سبب واكثر وحده جانت تنضرب بالبيت اني ونغم وصفاء احنه علينا لعنة الالهه ....
بس الغريب بالموضوع امي تكلي اكثر وحده فرح بولادتها هي انتي ياحنين ودايما هو يكلي هالشي بس ممبين عليه واني بسبب تصرفاته بديت اكرهها وماريد اشوفه ....كل هذا الضيم الشفته منه وانه عمري ماتجاوز الست سنوات....
اشوف البنات تبدل وتلبس وتلعب وانه ملابس ابقه بيهن سنوات حته اخواتي نغم ونورس نفس حالتي نلبس الثوب اسود نذبه لونه كالب احمر....
....
....
جنت اطلع العب بالشارع وي زعاطيط المنطقه بالبوكه لان ابوي اذا لزمني بره يسوي فلك ....جنت اضوج اذا يجي الليل لان راح يجي ابوي ومن يجي ابوي يعني راح يجي الضيم والقهر ويجي الدك والبسط بدون سبب....
اني جنت مشاكسه بره البيت اضرب هذا وافشخ ذاك واتعارك وي ذاك بس كلها ايام طفوله ....
كل هاي تصرفاتي جنت اتعاقب عليها اشد عقوبات....
جنت افكر واكول ابوي شكو عقوبه بالجيش سواها بينه دك وبسط وزوبه وجوي كلهن شفتهن من ابوي .....ضليت من اتنفس كون اتنفس سكته خاف يعله صوتي ويسمعني ويبسطني ......صرت اتمنه حنيته واحساسه بيه بدل هالضيم هذا كله ..... معقوله كل البنات تعاني مثلي ....اطلع مرات اشوف بنات بكدي حاضنهم ابوهم وملبسهم اخر لبس .....انه ماريد لبس ولا اكل اريد بس حنيته ومايبسطني ...راضيه بتراكي الكالب اللي من كثر الغسل حته الورده البيه راحت .....جنت ابجي واكول اريد ابو يحسسني
بالحنية مو ابو قاسي وظالم جنت احجي بين نفسي بطفولة وبراءة.....
يتبع