زمن القلوب الحقيرة

البارت الرابع

زمن القلوب الحقيرة
علي البدر
البارت الرابع
....
....
صار ابوية مايطيق وجود صفاء بلبيت ابدا بحيث من يمر يشوفه نايم او ياكل او كاعد يتفل بضهره ويكول ...

طيح الله حظك وحظ الساعه السودة الشفتك بيها وجابتك امك بيها....

وانه كل يوم يزيد استغرابي من افعال ابوي ويانه وبالاخص اني وصافي اخوي بس محد يكدر يحجي ويفك لسانه وي ابوي لان راح ياكله بسطه معدلة......

وكل هذا اليصير وصافي لابس الوضعيه ويكول عادي نتحمل حنونه شنسوي ماتكليلي هذا ابونه وخايف علينه....وواجب نحترمه

كتله صافي ماكو هيج خوف هذا معيشنه رعب

وحياتنه كلها وياه مأساة بمأساة .....انت صافي بلذات  تتذكرلك يوم حلو وي ابوي لو كله دك وبسط واهانات.....

ضحك صافي وكال ......
حنونه الحلوة صايرة تسطر حجي حلو وتعاتب ...فديتها يبعد عيون اخوها....

ضحكت وي اخوية صافي وجانت حته هاي الضحكات اذا يشوفها ابوي يفتح تحقيق ويسال ليش تضحكون وشنو المناسبة.....
......
.....
جانت بيوتنه بكركوك عبارة عن افرع ودرابين بس الفرع يصير جبير وكل فرع مايتجاوز السبع بيوت والبيت الواحد اكثر من ٢٠٠ متر وكل الواجهات بيها حدايق ....منطقتنه حلوة ونضيفه ....ودايما اطلع اكعد بالباب لو اكنس البرة لان احب النضافه هواي
....
....
مره من المرات واكفه بالباب داباعوع واكنس بالبره وطلع صافي ....
ها حنونه اني طالع يم صديقي ..ميلاد ...
محتاجه شي
لا صفاوووي حبيبي سلامتك مودع بالله...
....
....
بيت ميلاد صديق صفاء اخويه  يصير قريب علينه يعني بالفرع اللي ورانه مسافة دقايق بيناتنه
ابتعد صفاوي شويه شويه.....
وماحس الا ابوي طلع لازمله صخره بديه اثنينهن وراح يركض وشمرها عله صفاء ....
صرخت بعالي صوتي صفااااوي دنك راسك دير بالك....

وصدك دنك وعدت سلامات ورجع ابوي ضايج ومدخن ويتحسر لان ماطك صفاء ومالاحه ...
تفل بوجهي وشتمني ودخل للحوش....

رجع صفاء والشغله عادي عنده وكالي ....
حنون لو ماصايحتلي جان صار راسي طشار ....ضحك ودخل للبيت...

وانه ضليت صافنه ومصدومه شبيه ابوي وي صفاء شنو هالكره اللي بكلبه ودخلت لصفاء وحجيت وياه....
صفاوي احجيلي ابوي شبيه وياك ممكن اتكلي ....
والله ياحنونه ماعندي شي وياه وهاي انتي تشوفين شلون مكرهنه بالدنية...
اكلك صفاء اني اكرهته وماحبه ابد وحاقده عليه ليوم الدين...

رد عليه مبتسم...
لا حنونه عوفيه ابوي عصبي وهذا ضيم الجيش هيج سوه بيه لازم نتحمله ياحبيبتي حنونه....
......
......
بيوم من ايام الصيف الحارة وجان الجو كلش غثيث حر وكهرباء مكطوعه وابوي خابص الجو بس يعارك ....ويغلط ويشتم ...شويه هدأ الصياح وضاع الحس مال ابوي واختفه ....