زمن القلوب الحقيرة

البارت الثاني

زمن القلوب الحقيرة
البارت الثاني
علي البدر
...
...
جنت احب العابي واموت عليهن اكعد اسولف وياهن واكلهن شفتن ابوي شلون يطكني ويبسطني ويريدني ماالعب وياجن ...جنت الاعبهن وابجي بطفولتي وبرائتي انومهن وياي بفراشي المركع الف ركعه ووبطانيتي العسكرية وجنت من انام احلم بابوي يضربني ويبسطني ويصبح الصبح وانه ادعي ربي كون اليوم ما انبسط
....

جنت احب العب بره وي جوارينه وي الاطفال لان اني طفله ماريد اضل محصورة ...
فديوم جنت العب بشارع اني وجهال بكد عمري جهال جوارينه وفرحانين واني اضحك واكمز مره اشمر مي مر اشمر حجارة ....
فبدون قصد ضربت ابنهم وطلع من راسه دم .
انه شفت الدم تبسمرت بمجاني وتذكرت شراح يصير بيه ....
ركض لولد واشتكه لامه وهيه قريب بيتهم علينه .واني شردت محتارة وين اروح ...
دخلت وكفت بباب المطبخ لان جان الباب ع الحوش ومقابيلي يصير باب الشارع
.....
....
جان ابوية موجود ومايدري بيه العب بره جان ملتهي بشغل البيت وادعي من ربي كون ماتجي والله اذا اجت تقوم قيامتي .....
شويه وشفتهااجت ع ابويه وهي معصبه وحته ماسلمت عليه وكالتله
ابو زينه شوف ابني عموري انطر راسه طر من وره عمايل بتك....
..ماتعرف تلزمها شوف مطلعه الدم من راس ابني .
صارت عيون ابوي براسه ووجهه انكلب اسود ودخن وصاح منو منهن كليلي اليوم الا اشرب من دمها....
كالتله بتك حنين ام الطلايب منو غيرها...

تعذر منها ابوي وسد الباب وراها وحسيت من قوة دفعة الباب انشلع من مكانه اني شفته صار عصبي شردت من المطبخ و ركضت كل قوتي لدرج واني اتعثر كوه صعدت فوك السطح وكلبي يريد يوكف من الخوف احس رجليه رجفت ودموعي نزلت وادعي يارب كون مايصيحني ومايضربني يارب فدوة اروحلك كون مايطكني....
سمعته صاح بعالي صوته
حنين بت الجلب اليوم احرك عشيرتج وينج
من سمعته صاح بأسمي تبولت لا اراديا ع نفسي والرجفه بيدت حيلي.
اوج حنين وينج تعاي انزلي صايرة ملاكمه تعاركين وتطكين ابن الوادم وطلعين دمه اليوم اله اسكطج .تسكط وانعل شيب ابو اصلج
اني اسمعه يصيح وماكدرت انزل خايفه وارجف ومحد يكدر يخلصني منه وجنت اناشك وابجي وارتعش
.صعد صفاء اخوي الي وكالي حنين ليش هيجي مسويه( بعموري )ابن الجيران
رديت عليه
:والله صفاوي مادري بيه جنه نلعب سويه ماجنت ادري وطكيته والله
عفيه صفاوي حاجي ابوي لايكتلني. اخيتك انه...
جنت اشوف اختي طفله صغيرة ترجف وتبجي وادري ابوي ماراح يرحمها هالمرة واي شخص يتدخل راح ينسحك سحك وهيه تحبني وكل شي تناديني صفاوي صفاوي ...
قررت ماخلي ابوي يضربها وادافع عنها ...
طمنتها وكتلها :تعاي يمعوده تعاي ماخلي يكتلج
حسيت اشوية امان وي اخوي صفاوي وحسيت ايده حنينه جلبت بيها وكلت بكلبي ليش ابوي مو بحنية صفاوي...

لزمني من ايدي ونزلت الدرج وانه ميته من الخوف وكلبي يريد يوكف
جنت اباوع عله ابوي صار كدامي واني انزل من الدرج تمنيت الدرج يطول ولا اوصل يم ابوي ك شفت غضب ابوي بعيونه ونار تطلع منهن وجانت امي واكفه ماتكدر تدخل ولا يسمح الها تتدخل وماسمعتها فتحت حلكها .او حاجته لان اذا حاجته بذيج الساعه يمكن ينتحر بيها....
جان الكل صافن ومنتظر شيحجي ابوي وشيكول بس ابوي ماحجه اي شي
وهجم عليه مثل الثور الهايج وجان يصيح ويغلط
بنت الكلب انعل ابوج لابو الرباج لابو حته تربيتج وبده يملخ بشعري وضربني ودفرني برجله
فجأه تدخل صفاوي وراد يطلعني من جوه ابويه وصفاء راد يفكنه ماكدر لان ابويه جان سمين وجسمه ثكيل
فسحبني صفاوي من جوه ابوي وجان معصب ودفع ابوي
وصاح بابوي شبيك انت شنو شسوت هيه حته هيج تضربها....حنين ماتدري بي طكته وطلع دم خو ما مات ولي العهد وكلهم اطفال ويلعبون شنو تريد تموت حنونه وهي طفله علمود فشخه
هنا ابوي وكف عله طوله وعدل هدومه وحس بالاهانه كدامنه كلنه واستنكف شلون صفاء يصيح عليه وكاله....
الاها صافي تعلي صوتك عليه تعال اخذلك راشدي مني بعد ....خوش والله عال العال اخليك انت تربيهن وانه اتنوعلك حته تصير خري مري ....
وهسه راح اعلمك شلون تعلي صوتك يبن الجراب
تعال انته بمكانها اسكطك اسكط وانعل صيرك لامصيرك
هنا امي حاولت تتدخل...
وكالتله...
عوفهم فدوه لطولك انه ...
والله خطيه عوفهم....حرام تدك عليهم
رد عليها بصياح
انتي انجبي واسكتي لا اطبكج وياه واليلحكني الا احركه حرك والله
....
....
رادت امي من ابويه يعوف صفاء ماعافه ولا فادت تواسيله ....
جانت تحب صفاوي حيل وهو يعتبرها صديقته ويحجيلها كلشي وهي ماترضه صفاوي ينغث لو ينضرب بس ماتكدر عله ابويه....
شفنه ابوي اخذ صفاوي لبره وضربه راشدي من قوة الضربه وكع عالكاع خطيه
عمت عيني عليه حسيت من صوت الراشدي اذني انفرت اخذتني رجلي للحوش اريد اشوف صفاء ماتحمل اشوفه ينضرب بسببي
وخواتي كلهن لبدن بالغرفه لان شكو وحده تتدخل يصير حالها حال صفاء تاخذ عقابها ومحد يكدر يرحمها ويفكها من ابوي
....
...

طلع ابوي يجر بصفاء ويكله...
اليوم اكصه هذا لسانك صاير تتجاوز وترادد اليوم اريد اعاقبك عقوبه مال واحد كاره وحاقد فكام ابويه وربطه بشجره جانت ببيتنه وجان عدنه واير اسود مال مولد وبده يطك بيه ويجلده عله ضهره وهو مربوط بالشجره طكه اكثر من ٢٠ مره خله جسمه احمر وازرك
....
....
كلت بنفسي مستحيل هذا يكون اب هذا مجرم وزاد كرهي وحقدي عله ابوية واقسمت ما احترمه بعد ابدا ....
عليمن يضرب ويطك اخونه لان يدافع عنه ...خته لو كاتل واحد موت هم ماينضرب هيج
بقيت بس ابجي عله صفاوي مربوط عالشجره وابوي يدك عليه و ماكدر ادخل وافكه لان انربط وياه ويعلكني بلشجره مثل ماعلك صفاء....

اشوف امي بس تبجي لاحول ولاقوة وتبوس رجلين ابوي وتحرمص
فدوة اروحلك ابو زينه انت مو عاقبته فكه من النخلة...
والله مافكه واليهده مايلوم الا نفسه وهنا راح انام كباله هالجلب واريد اشوف ياهو يفكه ويفتحه ...الا والله اطبكه وياه ....
وصدك نام ابوي وبقه صفاوي مربوط للصبح وانه ما اخذت عيني نوم وامي ضلت كاعده عمت عيني كل شويه تريد تطلع وتخاف من ابوي ....
وابوي نام ولا كأنما شي صاير ولا حته عنده احساس اتجاه ابنه وزاد احتقاري لبوي ...
يتبع....