زمن القلوب الحقيرة

البارت السادس والعشرون

زمن القلوب الحقيرة
علي البدر
البارت السادس والعشرون
....
....
خابرنه عله عمامي وصار غصبا ماعليهم يجون....
بعد مايكدرون يتعذرون هذا اخوهم ومات ....
....
...
وره نص ساعه....
اجو عمامي وجان مامبين حزن عليهم ولا متأثرين بشي....
وكل حجيهم كلامهم يحرك الكلب...
مايكلفون عله نفسهم ويكولون ...شيلوا ابو زينه او ارفعوه ....
لا جانوا يكولون ارفعوا الجثة ودنوا الجثة.....
ولاكأنما هاي جثة اخوهم ....
حقدت عليهم اكثر واكثر
....
....
اخذوا  ابوي للمغيسل وجنت اصرخ وابجي واسمعهم كالو فاتحته ببيت عمي الجبير ....
لان احنه جدد بلمنطقه ومحد يعرفنه... 
....
رحنه لبيت عمي هناك وجنه ننتظر يجيبون ابوي نودعه ونسلم عليه .....
جنت ناوية افتح الجفن واشمه واعتذرله عن الحقد اللي جان بكلبي عليه....
بس من كثر حقد عمامي علينه اخذوه من المغيسل كبل عالمكبرة ودفنوه.....
جنت كل شوية اطلع اشوف بلكت سيارة التابوت تجي وأيست وعرفت عمامي كلهم حقد ومستحيل راح يسامحون ابوي ...
....
....

استمرت فاتحة ابوي ببيت عمي وكل يوم تجي الملايه تقرأ ......وتنعى ذاك النعي يهد حيل الكلب
وامي تلطم بلنص ومتحزمه وتدك وتصيح بعالي صوتهة  ماتقبل تكعد ولاتاكل ولاتشرب
....
....
جانت تصيح ...ولك ابو زينه ياهو لبناتك عدمن خليتهن
....
ولك ابو زينه لا الوكت يرحم ولا الناس ترحم يابو زينه
....
...
خلصت فاتحه ابوي وقررنه نرجع لبيتنه لان العالم كلها جانت شايله بكلوبها علينه واحنه مانطيق نضراتهم السامه وحجيهم وتبسمرهم.....
.....
خلص يوم الثالث وامي كالت خل نرجع لبيتنه
....
....
المغرب طلعنه  من بيت عمي وسلمنه عالكل
....
...
ومن ردنه نطلع ...
...
عمامي  اجو  لامي ووكفوا وياها بالباب ...
....
حاجاها عمي ها وين ام زينه ..
....
...
كالت اله امي
واالله خلصت الفاتحه وراجعه وي بناتي لبيتنه شنو ضلتنه هنا بعد
....
....

حاجاها عمي بكل حقد....
ومنو كلج ضلي هنا احنه نريد فلوس الفاتحه ....
لو هم تريدونه نسوي فاتحه لابوكم ونتعطل عن اشغالنه وفوكاها ندفع من جيوبنه
....
....
ردت عليه امي ..
بس هذا اخوكم دمكم ولحمكم وفاتحته واجب عليكم لو تبريتو منه بهالسرعه
. .
...
رد عمي علاء ابو سجاد
....
...
لا ام زينه احنه ماتبرينه منه بس هوه اجه هنا وصيح علينه وكال متبري منكم وماريد اطيكم بناتي .....وحته لو اموت لا تمشون بجنازتي....
بس احنه مشينه بجنازته وسويناله فاتحه رنانه ....
بس احنه مامجبورين نخسر شي من جيبنه...
....
ردت امي وشكد رايدين مني ...
.....
....
مليون وسبعميه وخمسين الف هذي خساير فاتحة رجلج كاللهة واحد من عمامي الجلاب...
...
....
واذا تريدينهن بذمة المرحوم بكيفج
...
...
...
كالت الهم خل ارجع للبيت وان شاءلله ادبرهن وماخلي درهم بذمة ابو زينه....
خلص عمره كله يركض علمودنه وهلك جسمه وهو شايلنه عله جتافه واخلي شي بذمته....

....
....
لا والله وانه ام زينه لو اعرف اجدي واوفيكم....
....
....
طلعنه من البيت ومشوا عمامي ...التفتت وتفلت بضهر عمي علاء من غير ميحس وصارت تفلتي بذيل دشداشته ....
كلت ابوي يعرفكم جلاب وكواويد ومابيكم نخوة وراح ابقه طول عمري اترحم لابوي خلصني منكم ...
....
....
طلعنه نمشي بلشارع امي كالت شلون نرجع ماعدنه كروه ضلت تبجي وتلطم ...وتدعي....
....
.....
الهي انت اعلم بالحال يارب العالمين ...هذوله يتامه ياربي سلط علينه من يرحمنه ياارحم الراحمين
....
....
وكفنه  بالشارع واجرنه تكسي ...
....
امي حاجت الولد ابو التكسي كالتله هذولي  ايتام....
....
وتوها خلصت فاتحة ابوهم وماشايلين افلوس...
....
ومحتارة بأكلهم وشربهم والله متبهذلين يايمه
...
...
كال الها حجيه اصعدي شالقصه تكاطعت العالم 
...
...
...
جنه هواي انه واخواتي والتكسي زغيرة صعدنه واتراصفنه ومشت السيارة...
....
...
وصلنه للبيت اول مادخلت امي للبيت ضلت تبجي وتنعى
...
...
البيت اظلم يبو زينه بدونك حته الحيطان مقهورة يابو زينه ....
واحنه واخواتي المتزوجات بجينه وحاولنه نصبرها .....بس مانفع