زمن القلوب الحقيرة

البارت العاشر

زمن القلوب الحقيرة
علي البدر
البارت العاشر
....
....
...

بدت اوضاعنه كلش تتازم واخوي صافي يشتغل ويكد ليل ونهار ويسوك للبيت وكل احتياجات البيت عله راسه....
بس المصرف جان قليل كلش يعني كوه يسد احتياج البيت اليومي وجانت امي تقلل علينه بلمسواك لان الوضع مايتحمل التبذير..  
.....
....

جنه كاعدين بالغرفه وابوي صاح عله امي وراحتله.....
رجعت كالتنه انه رايحه اجيبله مسواك يريد دجاج وسمج ولحم .....

ردت عليها نغم.....
هذا هم تسمينه اب ماتشوفينه احنه حسرة علينه اللكمة وهو ياكل ويتنعم  ....

....
...
جنت مأيدة كلام نغم الف بالمية لان جنه نمر بضرف صعب وجوع فضيع نكوم من الغدة لو العشه واحنه جوعانات ....اما ابوي من باع المحل صارعنده اهواي افلوس وظل يصرف وياكل ويتهنه براحته يجيب سمج ولحم ودجاج وفواكه وجانت امي تجيبهن وتطبخهن اله بوحده وتصبله الاكل بالدوانية جنه نروح نكعد كباله وهو ياكل نكول بلكت يحن كلبه علينه  لان والله تمر ايام نتشكك من الجوع ونشتهي الاكل الياكله وجان ياكل ويمطك بالاكل علمود يقهرنه واحنه نباوع بعيونه ونشتهي ناكل مثله..  لان جان كل وجبةياكلها تكون دسمة وببها لو لحم لو دجاج جنه ننقهر من نشوفه هيج ....ليش مو كل ابو يكولون يغص باللكمه اذا اطفاله جوعانين....هو يدري احنه نتكطع من الجوع ويدري ماكو اكل ....بس هوه كال راح اعذبكم نفسيا ونجح بهالشي صدك......
خلص غده ورحنه للغرفه وجنت حيل ضايجه.....اجت نغم يمي حضنتني وباستني.....
شفتي حنين شلون ابونه يعاملنه وتحجون عليه من احقد عليه واكرها والله حرام يتسمه ابو هذا وحرام واحد يعطف عليه وهسه يجي يوم يوكع وحته الماي يصير حسرة عليه.....
ميخالف نغم حبيبتي نصبر شتسوي هذا حظنا....جنت احجي وانه بكلبي حقد وكره عليه

....
...
شوية وسمعت ابوي يصيح....
حنين...حنين ...تعالي وين انتي....
رحتله وكتله...ها بوية...
كال هاج روحي للمحل ....جيبيلي حامض حلو وتمرالهند وموطا ام العود وبسكت شمائل وحلقوم......
رحت للمحل وانه بدمعتي بعيني لان انه متاكدة ماراح بنطي احد منهن ولا يكدر واحد يحجي وياه ويطلب .....اشتريتله واجيت ...
انطيته علاكة الحلويات وجان يحط بين كل بسكتين حلقومه  ويكعد ياكلهن ويمزمز ويضحك واحنه بس مقهورين وضايجين وكلنه نحجي عليه بكلوبنه ...وحقدت عليه كلش وكتله بكلبي سم الهاري ان شاء الله...
....
....
رحت للعابتي وحجيتلها كلشي وضحكت ونمت ونومتها بحضني وحسيت براحه وي لعابتي لان بجينه سوه انه وياها
....
....
مشت الايام وتحسنت اوضاع صافي وبده يتعلم للشغل ويعينه ومحله صار معروف وبدت تجمعات شباب يمه وعرف شلون يدير الشغل وجان وضع صافي يزعج ابوي كلش لان جان يكره صافي ومن يشوفه يشوف دم ضروسه....
.....
اما ابويه بدت تخلص افلوسه لان جان يصرف ويبذر باسراف وبقه معاند وعازل روحه بلديوانيه وبقه مايحاجي احد ومسخر الكل بخدمته ومايختلط ويانه ولا حته وي امي .