عبوده جوله
وصلت للبيت لكيت اخويه حمودي واكف بلباب من شافني اجيت ركظ عليه من وصل كلي عبود لتطب للبيت
ليش ولك شكو
ابوي ولك متحلفلك
لا بلله ليش شسويت
ولك مو عباس ابن عمي اليوم اجه من البصره وجاب النتائج
اي وشلوني
ولك غير صاقط
لابلله جاشلون
والله ما ادري امي تكول روح نام بيت صديقك قصي اليوم
ها خوش ديلله ارجع للبيت وكل لمي ليظل بالهه عليه
يلله خوش
اكلك حمودي ونتو جاب نتائجكم
اي
بشر
طبعا ناجحين
ههههههههههه والله هاي فرحه هسه كلكم ناجحين اله اني هم انجح
ههههههههههه لا ميصير تنجح انته لازم تصقط حته محد يحسدنه ههههههههههه
اي والله صدك
يلله خيي الله وياك
رجعت بلطريق الي اجيت بيه وجان تلاكيني رباب لابسه تنوره وقميص وشعرهه فاتحته طويل حد خصرهه وتمشي ويه ولد من شافتني ظحكت ودنكت مرت من يمي وحس كلبي شعوط عليهه مبين هاذا اليمشي وياهه اخوهه لان تمشي وراه كملت مشي وصلت للسوك ظليت افتر بعدين رحت شتريت لفات وظليت امشي اخذتني رجليه يم بيت ام ابراهيم
دكيت الباب طلعت ام ابراهيم كالت ها يمه عبود شعندك ليش ما رجعت لبيتكم
خاله اكدر ابات يمج اليوم
يا كل الهله بيك يمه عبودي تفظل
دخلت للبيت وتذكرت الجن ههههههههههه كمت ارجف
شافتني الحجيه ظحكت كالت ها عبوده شبيك
ها لا مابيه شي بس
بس تذكرت الجني مو ههههههههههه
اي والله خاله
لتخاف يمه ذوله اليمي كلهم مسلمين مينخاف منهم
بس انته شعندك ما رجعت لهلك لازم متحلفين بيك ههههههههههه
ههههههههههه شمدريج
ولك يمه اني اقره الجن انته ما اقراك
ههههههههههه اي والله خاله اليوم اني من المغظوب عليهم
ههههههههههه ابوك مو
اي والله
ميخالف يمه يبقه ابوك لو جار عليك بس انته شمسوي حته شحتك من البيت
تردين الصدك اني محد شحتني بس اني شردت حته مطبيت للبيت
ليش سولفلي
من وصلت للبيت لاكيت اخوي بلباب كلي طلعت النتائج وانته صاقط والوالد متحلف بيك فاني درت وجهي ورجعت
ليش يمه التعليم حلو
خاله والله مالي واهس بلقرايه
ميخالف يمه دكوم غسل راح تصير الصلاة وبعدين نتعشه والله كريم
كمت توظيت وصليت والحجيه هم صلت وره شويه ندك الباب
جان تصيح الحجيه عبود افتح الباب هاي خيريه جابت العشه
رحت فتحت الباب لكيت بنيه شكد ما اكول حلوه قليله عليهه العيون زرك الشعر خيوط ذهب والحلك احمر مثل الكرز هيه شافتني جان تصيح بوجهي وشمرت الجدر بلكاع وشردت
صرخت خيريه وشمرت الجدر وشردت ظليت اصيح يمعوده شبيج ماكو دنكت عل جدر لكيته واكع بلكاع متطشر جان بيه دولمه
شويه وسمع الحجيه تكلي
الله الله ليش يمه وكعت العشه
خاله والله مو اني هاي البنيه الجابت العشه من فتحت الباب كامت تصيح وشمرت الجدر وشردت
ههههههههههه هاي سوالف فخريه
خاله شبيهه خبله هاي
لا يمه هاي مثل الورده بس هيه تخاف لان قبل فتره باتت يمي وشافت الجن كاعدين بلمطبخ ومن يومهه كل متشوف واحد يمي عبالهه جني ههههههههههه
ههههههههههه خطيه خاله هيه شتصير منج
هاي بت ابني
ها لعد انتي ليش متكعدين وياهم
يمه عدهم زعاطيط هواي واني مالي خلكهم
ههههههههههه خاله تتحملين الجن ومتتحملين الزعاطيط
ههههههههههه والله عبود عندك سوالف دكوم خلي نروح نسوي عشه مدام هلمكموعه طشرت عشانه
يلله خاله
دخلنه للمطبخ وطلعت بيظ وطماطه سوينه وتعشينه وفرشتلي بلصاله
وطول الليل الحجيه مانامت بس تشتغل وتسولف هههه واني لو تذبحني متلكه بيهه قطرة دم هسه لو ظال يم ابوي ومحصلي كتله احسلي هههههههه
ثاني يوم كعدت الصبح لكيت الحجيه مخدره جاي ولابسه عباتهه
صباح الخير حجيه
صباح العافيه يمه
ها وين رايحه
رايحه لبيت ابني اجيبلي خبزات
هوه وين بيتهم
هاذا البيت كبالنه الباب الابيظ
ها اروح اني
خاف ازحمك
لا خاله اني اروح
طلعت شفت بيت كبال بيت الحجيه بابه ابيظ دكيت الباب اول دكه وثاني دكه فات من يمي رجال سلم اني دكيت الباب ودرت وجهي رديت عليه السلام وباوعت للبيت ولكه خيريه واكفه تظحك
اني صفنت عل ظحكتهه كلتلهه خير شبيج
ههههههههههه عبالي جني
ههههههههههه جني يركبج
ههههههههههه اسفه البارحه خفت منك عبالي طلعلي جني لان ممتعوده واحد يطلعلي غير بيبيتي
اي مو اني العصر اجيت
انته منو
اني عبود اشتغل ويه بيبيتج
ها يعني هم مصادق جني
لا يمعوده اني البارحه اليل كله منمته من وره الجني
ههههههههههه شلون نمت والله لو اموت ما انام يمهه
والله شسوي غير غصبن عليه
ليش انته اهلك وين
اني هنا بلفلوجه
لعد ليش بايت هنا
مو
ها مو ءءءء
شبيك
اكلج شو طيني خبز اريد اروح
ها اسفه اخرتك
هاك واليوم راح اعوظك علغده
هههه مشكوره
في امان الله
الله وياك
رجعت للبيت تريكنه وطلعت للشغل لان الحجيه كالت اليوم عدنه جلسه العصر
رحت للسوق شتغلت شويه ورجعت للبيت تلكتني الحجيه الله يساعدك يمه
تسلمين خاله يلله يمه غسل وصلي وتعال نروح نتغده يم بيت ابني عازمينه
حجيه خاف زحمه
لا ولك بلعكس همه اكدو عليه اجيبك وياي
ها جا خوش يلله
صليت ورحت
دخلنه للبيت جان بيت جبير وحلو ومرتب
جان تتلكانه مره بعدهه شباب كالت هله هله عمه شلونج
هله يمه جاسم هنانه اي يمه موجود تفظلي
تعال يمه طب لتستحي وج سعاد هاذا عبود خوش وليد ابن اوادم هاي سعاد ام خيريه
شلونج خاله هله يمه انته الخرعتك خيريه ههههههه
اي والله خلتنه بلا عشه
سوده عليه خاله والله هلبنيه حبابه بس هيه تخاف من بيت جده متروح بس البارحه اني جنت مو هنا هلراحت هيه ودت العشه
يلله خاله مصار شي
كعدنه بلهول جان جبير ومرتب ومشغلين مبرده بارد يخبل نعست بس كعدت ما حس اله صوت بذني
ططططططططوووووووووططططططط
يتبع.....
اذا يبقه هيج التفاعل قليل اوكف القصه لحد يتفاعلون بيهه يلا اكمل نشر ممكن تسون تاكات لاصدقائكم
