وبيوم اني كاعد بلمحل وجان تجيني مره
شلونك يوليد
هله خاله تفظلي
كالت اريد المكتوب بهاي الورقه وطتني الورقه
قريتهن لكيت بيهن شغلات مال سحر
كتلهه خاله هاي الغراظ الج
لا والله يمه ذني المرت ابني
زين مرت ابنج شتسوي بيهن
يمه تكول تعجنهن ويه الحنه
ها هاي هيه تكلج مو
اي والله يمه خطيه مكروده لا تطلع ولا تطب
باوعت للمره شفتهه مره فقيره ومتعرف شي
كتلهه خاله جمعتلهه شغلات مو يم الغراظ الراتهن وطيتهيا وراحت
جمعتلهه غراظ غلط وطيتهياه خذتهن الحجيه وراحت
وره ساعه رجعت الحجيه كالت
يمه تكول جنتي ذني مو الغراظ الردتهن
ها حجيه اكلج ابنج شيشتغل
يمه عنده بصطيه مال مخظر بسوك المخظر
زين حجيه هوه صحته شلونهه
والله يمه صحته مو هلكد ودومه مصدع ومعدته توجعه
هنا اني تاكدت من شكوكي
كتلهه حجيه هوه من زمان مريظ لو ستوهه
لا يمه جان مثل الورده بس صارله فتره من تمرظ
ها جا حجيه تمرظ وره ماتزوج لو قبل
ها والله يمه شكلك يمكن وره عرسه ها اي اي والله وره العرس بشهر كام يشكي من معدته
حجيه تعاي كعدي هنا وخليني اسولف وياج
ها يمه شكو ابنيي بي شي
شوفي حجيه مرت ابنج كرايبج لو غريبه
لا والله يمه غريبه بت ام حسين الدلاله
ههههههههههه واني وين اعرفهه
المهم حجيه تره ابنج مشرب
يا يمه عزه العزاج نوريه صدك يمه
اي والله والمشربته مرته
يا يا يا سوده بوجهج نوريه شلون عرفت انته
يمه الشغلات الطلبتهن جنتج مال سحر ونتي كلتي ابنج معدته توجعه ويصدع يعني مشرب
اي والله حته اليوم ظل يذب من راسه
شفتي خاله وذا ما عالجنا تره يتاذه
يمه رحمه للبطن الشالتك كلي شلون اطيب وليدي
حجيه اريدج تحاجينه وخليه يجيني
ها اكله علمرته
اي خاله
اشوف المره تكوم وتكعد وتباوعلي
يعني اني اكله مرتك مسويتلك عمل
اي لازم حته يجيني واني اطيبه
ها اخاف
اخاف ياذيني
شلون حجيه ياذيج
ها مو مو
حجيع احجي الصدك ابنج يظربج
ها مو مو والله هوه ما جان هيج بس
بس شني حجيه سولفيلي
يمه هوه جان مثل الورد ما ياكل اله وياي ومايكعد عل سفره اذا مو اني ويا بس من تزوج لسه بعد مايطيقني وكل ما احاجيه يظربني
وكامت عيونهه احسهن يصبن دم مو دمع
اي خاله تره منوره العمل المسويته جنتج اله تره مو بيده هوه
ها يعني اذا اجاك يطيب ويرجع مثل اول
انشالله حجيه بس كون يجيني واني احاجيه
جا خوش راح احاجيه بس هاي شكلهه عل غراظ
كليلهه لكيته معزل رايح يجيب غراظ
خوش اني رايحه وباجر اجيك
راحت المره واني ظليت افكر خطيه هاي خاف يظربهه ابنهه وهوه مو بواعيته
رجعت للبيت نمت وخليت عمار يبات اليوم ثاني يوم رحت فتحت المحل وظليت منتظر الحجيه
للظهر ما جتي للعصر هم ماكو ظليت الوب كلت الباجر اذا ما جتي اروح لبنهه وحاجيه صدك لليل ماكو عزلت ورحت للبيت من الصبح طلعت للمحل وشوف الحجيه كاعده باب المحل
هله حجيه ليش ماجيتي امس احجي واني افتح بلمحل
ها مو ما كدرت اجي تحجي ومغطيه وجهه
نتبهت عليه تحجي ومدنكه ومغطيه وجهه
كتلهه حجيه تعاي هنا بلمحل خلي احاجيج
طبت كتلهه شو وخري عباتج خلي اشوفج
كالت ها لا مو اني مريظه
لا حجيه انتي مو مريظه ابنج انتي كلتي لبنج
اي كتله
اي وشكلج
ها ماصدكني
اني راسن شلت العبايه من وجهه وشوف وجهه ازرك
صحت لا اله الا الله هاي شني هاذا ابنج هيج سوه
ها والله يمه ما ادري شكلك وكامت تشهك وتبجي
كالت كتله يمه مرتك مسويتلك عمل ونته مرظك منهه ما حس اله ملخني وظل يظرب ويصيح عليه
لايا ناقص عل هلعمله
جا هسه شلون لازم يجيني حته يطيب
والله ما ادري يمه اني بعد ما اكله
صفنت وكتلهه ولا يهمج حجيه روحي هسه انتي واني اتصرف بس كليلي ابنج شسمه
اسمه علي
خوش روحي انتي وبعد معليج خليهه وره الله وراي
يمه الله ينصرك ويحفظك لهلك
راحت الحجيه واني كعدت افكر شلون اقنعه يجيني
يتبع.....
