ورود شائكة

البارت الاول

همس ليل
في كثير من الاحيان تمر الايام علينا باهتة دون طعم او لون....
لا نشعر بشي فيها...روتين قاتل يعاد يوميا ويتكرر
حتى يصل الى حد الملل....
هكذا ايام تجعلك تشعر بالمرارة ...رغم لا يوجد مايعكر حياتك...
وفي نفس الوقت لا يوجد اي تغيير يذكر...
هكذا هي حياتي...
الصبح اروح لدوامي ...اشتغل محاسبة بدائرة حكومية...
شغلنا مايخلص اول مانطب للقسم لحد مانطلع
واصلا اني هم قليلة الاختلاط...
ما احب ثرثرت النسوان والقيل والقال...
وداشوف كدامي المشاكل الي تصير من تناقل الحجي...
وهم ما احب كثرة الاسئلة وتدخلهم بحياة غيرهم...
يخلص الدوام  ارجع بالخط للبيت....
اسبح وانزل اتغدى وية عائلتي الي متكونة من
بيبتي وامي وخالتي...
اي احنة عائلة بس نسوان...عندي خال انكتل بالطائفية جان بعده مامزوج...
وخالي الثاني من شاف اخوه انكتل كدامه هج للخارج وبعد كم سنة حصل اقامة ودز على زوجته
واطفاله وعلى امه الي هية بيبتي..
بس ماقبلت تروح لان فكرت بخالتي الصغيرة...
هية مو صغيرة سن بس اخر اولادها وعمرها تلاثين ومامزوجة وتشتغل مدرسة...
طبعا هية تكدر تسحبها وياهة هناك...
واحنة نعرف هية تحجج بيها بس علمود تبقى اتزور كبر خالي....
ونجي على امي...
امي مواليد ستينات واكبر اخوتها خلصت دورة معلمين بعد السادس بوقتها جانت ست اشهر وتعينت ادرس محو امية وشافها ابوية...
وظل يخطب بيها من اهلها وماينطوها لان مزوج وعنده اطفال
لحد مانغصبوا وزوجوها له وجان عمرها ٢٠ سنة...
لان ابوية جان له سلطة بذاك الوقت...
المهم بعد زواجهم بسنة اجيت للدنيا...
١٩٨٦...وابوية ماراد بعد اطفال لان عنده ومكتفي من زوجته الاول....
ومن صار السقوط...اخذ عائلته الاصلية وهج
اني مو صغيرة من عافنا عمري ١٧...
بقيت فترة طويلة انتظر يذكرني واتأمل يدز علينا
وفعلا ذكرنا من دز لامي ورقة طلاكها...
ومن عدها لحد الان ما اعرف عنه شي...
واحنة حاليا بسنة ٢٠١٠ ...
طبيت للغرفة المشتركة بيها وية خالتي...
طبعا خالتي اسمها نور جابتها بيبيتي على كبر وهية اكبر مني بست سنوات....
اني اسمي هاجر ..
_ها ولج طبعا بخت دوامكم لل١٢ ومدرستج هيناهة
مثل حظي لل٣ دوامي ودائرتي بنص بغداد
_اهوو...هم حطيتي عينج .
وج بابا بس اوكفيلج نص ساعة بالصف وشوفي سطرت الراس
_خفي علينا انشتاين...
اول شي تدرسين متوسطة يعني كبار
ثاني شي انتو ليش هم تقروهم مثل الاوادم
_لعد ليش شكايليلج عنا نسخط
_لو ادرسون صدك جان ماحتاجوا الاهالي لمدرسيين خصوصيين
_همة الطلاب صايرين مهملين
عوجت حلكي...اي صح الي مايعرف يركص
جنت احجي وياهة واني ابدل واشمر ملابسي على الجرباية...
وهية متمددة على جربايتها وتكلب بالتلفون...
اول ماصار النت احنة عدنا بس على الحاسبة
_هاجر لمي ملابسج وعلكيها لا تبقين مهوسة
_انتي شعليج شامرتهن على جربايتي
عود لا تشيليهن
_لج بابة ليش مامرتبة انتي ...
هية شيردلها
_اكولج لا تسطرين راسي...
يومية نفس القوانة...
لبست التراك واقتربت منها ..
_شنو تباوعين
دنكت على تلفونها...
ثول اي الله...ماشبعين من رسايله
_هو اكو واحد يشبع من الحب
كعدت يمها على الجرباية...وهية سحبت رجليها وتربعت...
_اكولج كل عقلج صار خمس سنوات تنتظريه...
باوعت علية...لعد ليش مادام يحبني وشاريني
_هذا ياحب...هو لو شاريج جان كدر يقنع اهله
تاليتها يروح يخطب على مرام امه ويخليج تبورين
_انتي ليش دائما كلامج دبش..
شنو ابور ...وبعدين احمد مايسويها
_افتهمي دماغ البشة عمرج ٣٠ فرصتج بمرور الوقت تقل...
وهو شكد مايكبر راح يزوج بنت العشرين..
وانتي تظلين تاكلين باصابيعج ندم ...
_شو كومي من يمي
ضربتني بالمخدة واني اركض للباب وبنفس اللحظة دك تلفونها...فتحته وجاوبت
_هلو حبيبي شلونك
_حبيبي غمة عليج وعليه
غميتها وطلعت ادردم عليها...
دنزل على الدرج تلكتني امي...
_شبيج ادردمين وية نفسج
_احجي على اختج الثولة ...
ماتفهم شكد ما احاجيها
_لج عيب خالتج
_ياخالة هاي دماغها دماغ بشة
_تعاي تعاي اتغدي احسن
_شمسوين غدة
_دولمة
دخلت للمطبخ كعدت كدام الميز انتظر امي اصبلي
ماما بالبيت حيل مدللتني...
كل شغلي بس اغسل مواعين العشى...
وتقريبا من اني صغيرة معتمدة بكلشي على ماما
يعني ما اهتم اغسل ملابسي اعرف هية وراي ادور بيهن وتغسلهن...
ولا اهتم اشيل ماعون من اتغدى او اكعد اسوي ريوك
خلت ماعون الدولمة كدامي وسلطة وخضرة وخبز
_اليوم ليش متغدين قبلي
_بيت اهل باجي ماجدة جانوا هنا واتغدوا
_ها شلونهم
_زينين
طبعا باجي ماجدة تصير مرت خالي خالد المسافر
ومن سافروا لسة بين فترة واخرى اهلها خوش ناس
يجون على بيبي يتفكدوها...
_بيبي وين
_نايمة
_هو اكو واحد بالربعة العصر وشتى ينام
_شوف منو يحجي...هسة اصعدين تنامين
_اي اني كاعدة قبل الستة ولسة فد كعدة غير التقيد بالدوام وبنفس اللبس
_اني وخالتج مو وياج
_انتو نص دوام لل١٢ وترجعون
الحمد لله...عاشت ايدج ماما
كمت داغسل...
_وين رايحة ماتريدين جاي
_لا من اكعد المخدة تناديني
غسلت وصعدت لغرفتي...لكيت نور بعدها تحجي بالتلفون...
_باعي لج اريد انام اطلعي انتي والمصخم مالتج برة سولفي...
اني احجي وهية تأشري باصبعها على حلكها بمعنى صوتج لا يسمعج
_يابة ديلا واذا سمع سبع البرومة على كولة المصريين...
دفعت ملابسي من على الجرباية...وجريت البطانية
وبلحظات رحت بسابع نومة...
ماكعدت الا نور تهز بيه
_كومي تنبل مال نوم الساعة بالستة...حتى صلاة المغرب فاتتج
_اووو...دوخري هو هيج الي يكعد احد
_صار ساعة اكعد بيج وانتي عبالك قتيلة
كوة جريت نفسي من الفراش ونزلت جوة تلكتني بيبي
وهية وسبحتها بيدها
_يابيبي يومية اكولج لا تنامين المغرب موزين
_بيبي اني اوصل للبيت بالربعة الا ربع شوكت انام
_حاولي تصبرين نفسج لليل ونامي من وكت
_على الجايات
هذا روتيني اليومي اكعد بستة ونص واشرب جاي واضرب اوتي لملابسي لباجر
اكعد شوية وية ماما وبيبي وبعدين اصعد اظل اسولف وية نور ...
اليوم من وصلت للدوام شفتهم مخبوصين ..
قبل فترة رئيسة قسمنا طلعت تقاعد...
وصعدت بمكانها الوكيلة...
وهسة جابولنا واحد من الوزارة وكيل....
دخلت صبحت واكو تلاثة وياي بالغرفة
وحدة بس قريبة نوعا ما مني اسمها ام حيدر مزوجة واكبر مني بالتلاثينات
واثنين بالعشرينات وحدة مخطوبة لولد ويانة اسمها عبير...
والثانية اسمها هبة...مامزوجة
بس هبة عينها على لبسي....وعلى كل تصرفاتي
طلعت اغسل كلاصي من رجعت سمعتها تحجي
_ادري شكو لابسة الحجاب...
ام حيدر...ترة عادي لبسها البنية
باوعت لبسي اني ماملتزمة بحجابي...
عادي البس بناطير وعليها بلوز يدوب مغطي الورك
وياه سترة...
بس ماينطيها الحق تنتقد لان هية هم ماملتزمة
وهذا حال اغلب البنات الي ويانة...
دخلت وسويت نفسي ماسمعتها...
دائما اتجاوزها....وهالشي يغثها زيادة
ام حيدر...هاجر من طلعتي ماسمعتي شي عن الوكيل الجديد
_لا ما سألت
_ليش
_اكولج ام حيدر شعلينا بيه...
علينا نسوي شغلنا وهاي هية
عبير....شلون شعلينا شغلنا وياه
اذا طلع عصبي ومايتحاجى لو مو خوش يعم علينا
هاجر....مادام مامسوين غلط مايكدر يحاجينة
بس كولي خوفجن لا يطلع ماينطي اجايز
ام حيدر...اي والله امتحانات نص سنة قريبة
شلون بالجهال
عبير...اني هم اريد اجهز مابقى شي لزواجنا
هبة...هلا هلا واحنة شنو تعوفن علينا الشغل
هاجر...شكو بيها المساعدة مطلوبة
هبة...احجي عن نفسج اني يدوب الحك اكمل شغلي
ام حيدر...الله لا يعوز احد لج
هبة ..ام حيدوري مو قصدي بس تعرفين نهاية سنة والشغل متراكم
باوعت ام حيدر عليها بنظرة معبرة ...اروح اشوف اخبار الوكيل الجديد احسن
طلعت ام حيدر واني بلشت بشغلي...
من رجعت بعد نص ساعة...ولكم الحكوا اجى
عبير...منو
ام حيدر ...الوكيل الجديد....بوية بوية راح اتصير ضجة بالقسم
رفعت راسي...ليش عود
هبة...تحجي ام حيدر شبيه الوكيل
ام حيدر وهية تدخل تتمشى بالغرفة وتعدد على اصابعها...
اولا...الوكيل شاب عمره بداية الثلاثين
ثانيا..وسيم ومرتب كلش
ثالثا ...شخصية وثكيل مبين
رابعا والاهم مامزوج
كالت الاخيرة وهية تلعب بحواجبها
هاجر....ههههه...صدك راح تصير ضجة
هبة وبتكبر...عليمن قابل بس هو شاب بالدائرة
عبير...صح هواي بس الي مامزوجين ينعدون على الاصابع
ام حيدر...خلي نشوف منو الشاطرة الي توكعه بشباكها
هبة...اصلا لو اريد مايأخذ بيدي غلة على كولة ابو المثل
هاجر....ايباه على كيفج ويانة مارلين مونرو
ام حيدر....خلي انشوف انتو كم وحدة بالقسم بعدكم صغار...
عبير...اني عديتهم اربع بنات عدنا
كالتها وهية تبتسم
هاجر...ليش اربعة ...صفنت واني اعد البنات الي من كدي...بس تلاثة
ام حيدر...وانتي ماحاسبة نفسج بنية
هبة...يجوز تعرف نفسها مو كدها
هاجر...لا حبي مو شغلة مو كدها بس اني ما ازوج بهيج طريقة ارسم عليه...
اريده هو من ذاته يختارني
ام حيدر...يجوز هو من ذاته يختارج
عبير...والله اذا كلهن ناويات مثل هبة ما اعتقد
هبة...اصلا محد تكدر تنافسني وهسة اتشوفن
ام حيدر....ليش هاجر ماقاصرة بس هية ماديرة بال لهاي الامور
جنت اشتغل واتابع نقاشهم وبداخلي اضحك عليهم
هبة...ماكو بنية مادير بال خاصة بعمرنا بس يجوز تخاف من المنافسة...
باعت عليه بنظرة جانبية...
عبير...شو ساكتة هاجر
هاجر...اذا عبالكم تحرضوني لا تعبون نفسكم
ام حيدر...ليش يولي
هاجر....ادري هسة الولد بعدكم لا شفتوه ولا عرفتوا مايه شنو ...وجاي تتراهنن وتتفقن بكيفجن
ام حيدر...ولج اني شفته
هبة ...خلي اروح القي نظرة
طلعت ورجعت اني اشتغل...اقل ربع ساعة واجت تركض
هبة...ولكم حجزته اني
عبير...هم كالت حجزته...بابا اكو غيرج
هبة...محد عدها فرصة مثلي
طبعا هبة حلوة طويلة بجسم مربوب وبيضة وعيونها عسلي ولبسها كله كشخة...بس من نوع الشايف نفسه
وسليطة لسان لذلك مو هلكد الولد يرغبوها بالدائرة
ام حيدر...ليش محد عدها فرصة...هاجر اذا رادت اطلعج خارج الملعب
هاجر...رفعت راسي مبتسمة...اي اي اني فاندام
ورفعت ذراعي ...شوفوا عضلاتي
هبة...خاصة هاجر ماعدها اي فرصة...
وضحكت باستهزاء
غثتني ضحكتها وطريقة تصغيرها من شأني
هاجر...والله حبيبتي لو نويت انتي ماعندج فرصة
ضحكت بقوة...لو نويتي....لو صدك عندج هيج مقدرة جان ماسكتي....
بس تدرين نفسج مو كدها
ام حيدر....عيب هبة...ترة كله شقة لا تكلبيها دراما
هبة...وليش شقة الحجي بينا احنة الاربعة...
واذا طلع اكيد وحدة منا واحجي صدك والايام تثبت
عبير...حتى لو ناوية بالعافية عليج وربي يسهل لج بس لا تجرحين غيرج
هبة ...ما داجرح احد هية كالت تكدر واني كتلها اثبتي مو بس كلام...
ضجت كلش من كلامها...جانت واكفة بنص الغرفة
واحنة كل وحدة ورة مكتبها...
مشت وكعدت ورة مكتبها وهية تكلب بالاوراق...
هبة ...شكلتي هاجر
هاجر...شنو
هبة...كد المنافسة لو تنسحبين
عبير...شنو المشكلة هاجر...ماتخسرين شي
ام حيدر...اي شكو بيها بس باصول
هبة...يعني شنو
ام حيدر...يعني بدون طعن وحدة بالثانية وتوصيل كلام مو حلو
هاجر...على كيفكم ترة ما كلت موافقة
هبة...مو كتلكم مو كدها....
تدري بنفسها خسرانة
هاجر....بلحظة غضب واستفزاز...لا كدها وخلي الايام تثبتلج
هبة...ضحكت...اتفقنا...
وانسد الموضوع بلشنا بشغلنا...
بس بقت الحجاية ادور ابالي...
قبل نهاية الدوام وبيومها جان الشغل حيل ازدحام بحيث مالحكت اطلع خارج الغرفة
دخلت رئيسة قسمنا ست سحر علينا وياهة شاب طويل اسمر فاتح
ست سحر...السلام عليكم
والولد هم سلم...ردينا عليهم
ست سحر...بنات اقدملكم استاذ وليد وكيل القسم الجديد
استاذ وليد اقدملك ام حيدر وهبة وعبير وهاجر شعبة الميزانية
احنة نفس كعدتنا وهم واكفين بنص الغرفة
سمعت صوته جهوري وبيه بحة
...طبعا من اهم الشعب شعبة الميزانية
باوعت عليه...عيون سود وساع ولحية محددة وخفيفة...واكف بثقة وعيونه ادور علينا وتتفحصنا
بجراءة...واتبعت تفاصيل هندامه سترة سبورت على بنطلون جينز وياها قميص فاتح اول دكمتين
من هاي هبة تخبلت صدك يسوة بس يجوز بس قشرة خارجية حلوة...
ويطلع داخل هالقشرة فراغ ماكو اي محتوى...
لو يجوز داخلها فاسد وعفن...هواي اكو هيج
انتبهت على ام حيدر حاجتني لان هية مسؤولة الشعبة وجانت تشرحله توزيع الشغل علينا ...
باوعت عليه رفع تك حاجب...
احمر وجهي وعرفت هو عرف اني جنت اتفحصه
الله لا ينطيج هبة خليتني بموقف محرج...
طلعوا لغير غرفة...
هبة...ها اشو وجهج احمر وصفر بس شفتي
هاجر...ليش شكو شصار حتى يحمر
هبة...هههه...والله اكلتي بعيونج...شفتج شلون تباوعيله
ام حيدر...كافي عاد سدوا الموضوع وكملن شغلجن
ضجت كلش من نفسي...
اصلا مو من نوع اهتم للزلم ولا اركز وياهم...
احسهم مو محل ثقة...
رجعت للبيت بيومها واني مسطور راسي...
بدلت وغسلت وتغديت بدون تركيز...
صعدت تمددت على جرباتي وعيوني للسكف
سمعت صوت فتحت الباب بس ماالتفت
نور...لا هاي اسجلها بالتاريخ...هاجر بعدها مانايمة
_ما تحلين عني مالي خلك لج
اقتربت من جربايتي وكعدت يمي
_شصاير اليوم
_ماصاير شي
_متأكدة
_اي
_لعد ليش ماسمعنا صوتج واحنةنسولف ..
وليش لسة مانايمة ...
عدلت كعدتي اكول نور هم فد يوم واحد استفزج وخلاج تسوين شي مامقتنعة بيه
_مافهمت قصدج...ليش ماتحجيلي شصاير احسن
حجيتلها كلشي
_واني الي اكول محد يكدر يستفزج واضرب المثل ابرود اعصابج
_لج ظلت تقلل من شأني ...
وعلى اساس هية فد شي واني يمها ولا شي
_جان اجاوزتيها وخلص..
بعدين ماتخافون يطلع الحجي برة غرفتكم
ويوصله شنو موقفج بلحظتها...
_هو هذا الي دافكر بيه...
_عموما باجر حاجيهم وكليلهم جنت اشاقة
_لا ليش...
_شنو ليش
_يعني دخلت المنافسة والتحدي اكملها..
اني مو اقل منها
_صدك تحجين
_طبعا
_لا هاجر هاي لعبة خطرة ويجوز تنقلب ضدج
_لا تخافين اعرف حدودي
_والله الي داشوفه راح تلعبين بالنار...
ياخوفي تحركين اصابيعج..
_غنيها احسن....
شو كومي من يمي اريد انام...
بقت صافنة شوية علية واني ادفع بيها برجلي حتى اتكوم...
_براحتج بس اذكرج بعدين..
_عود لا تكعدين تخابرين الفندي وتزعجيني...
سدي الباب وراج...
خليت راسي على المخدة واني افكر شلون راح ابدي خطتي....
وللحكاية تكملة