ورود شائكة

البارت الخامس

يسعد يومكم...شكري الجزيل لتمنياتكم...
جنت ناوية ما اكمل القصة لان متعبة نفسيا وجسديا...بس ابد ما احب اعلق متابع...
اتمنى تعذروني اذا صار اي تأخير راح اكتب حسب ظروفي...الي مايحب ينتظر يخليها تخلص ويقراها...تحياتي
همس ليل
لا يغرنكم الفوز في معركة تمس مشاعر الاخرين...
قد تدور الايام وتصبح مكانه....

...تصرفات بعض الاشخاص
خلاني اتحذر بشرح ظرفي...
حتى لو كنت مقتنعة بان وضعي مابي شي...
هيج فسرت لخالد من شفته تعصب ...
_امج لا اول مطلقة ولا اخر وحدة...
مدام زواج على سنة الله ومعلن مو بالسر مابي اي عيب...
كل عقلج مستعرة من هيج وضع
_لا فهمت الموضوع خطا...اني مامستعرة من امي
ولا فد يوم اكون هيج...
بس للاسف هواي تفكيرهم سطحي....
ويدورن مظاهر وخاصة هالوكت كلها ادور عشاير
وعمك وخالك منو...
_المهم الشخص نفسه....شتفيد العشيرة اذا الانسان طلع مو خوش لو اخلاقه موزينة
من كال هيج كلش اعجبت بيه...
صراحة اول مرة الكة نقطة تثير اعجابي بيه ...
رغم هو مو قاصر من ناحية الشكل والمظهر...
_عموما نهاية الاسبوع تجي امي ومرت اخوية
ام فهد واحجوا بالتفاصيل..
هسة لازم اروح عندي موعد وية صديقي
_لحظة اصيح ماما ...
طلعت صحت امي...
_ها خالة بعد وكت ...
_لا ...ماعرف شكولج شو صعبة خالة...
غمزلي...
وماما ضحكت لحجايته...
_عموما خالة ان شاء الله مثل ماكلت لهاجر...
نهاية الاسبوع الحجية يمكم...
كولولها شروطكم وطلباتكم...
_المهم عدنا تحافظ عليها والماديات لا تودي ولا تجيب...
سلم على ماما والتفت علية مبتسم...
_نشاوف باجر
راح...ودخلنا للمطبخ واني وماما
_شفتي مو كل البشر نفس الشي...
وانتي خبصتي الدنيا
_اي صح...
صعدت لغرفتي وعفت امي تحجي لبيبتي التفاصيل
من دخلت للغرفة لكيت نور تبجي
اجيت كعدت يمها على الجرباية...
_ها حبي....شكو هالمرة
مسحت عيونها عبالك طفلة ...
_لج هاجر تعبت...تعبني طبعه...
كلش نحس...مرات ماافهم شيريد بالضبط
_نور انتي مامجبورة على هالوضع..
ترة الحب مو كلشي بالحياة...
التوافق اهم شي...وانتو هالشي مفقود بينكم
رفعت عيونها لي...ليش اتكولين هالشي
جريت نفس وخليت ايدي على جتفها
_انتي لان تحبيه مغمضة عيونج عن الباقي...
هواي فروقات بينكم...
اولها هو شخص متسلط ويحب يفرض نفسه
وما يقبل نقاش من احد
عكسج انتي ...شلون نكول...مسالمة جدا
وماعندج قابلية المواجهة
ثاني شي....انتي متحررة ..صح لبسج مابي شي
بس هو متدين ويحب وحدة ملتزمة...
والاهم من هذا ...وهية نقطة اختلافكم
_شنو هية
_ليش اهله مايقبلون...لان طائفيين
_لا هاجر ابد مو هيج اهله
_شنو مو هيج...ليش رافضيج لان من غير مذهب
_همة بس عدهم رد فعل لان ابنهم انكتل بالطائفية
_واخوج هم انكتل بنفس الطريقة...
بس ما عدنا نفس ردة الفعل...
افهمي نور...مادام رافضيج لهذا السبب...
مستحيل راح تعيشين سعيدة وياه
_مو ذنبه
_لج بابا انتي ثولة لو شنو...
هو رجال يكدر يفرض رأيه عليهم لو رايد صدك
_عوفج من موضوعي...سويتي وية خالد
_كله تمام
_هاجر خايفة عليج من هاللعبة
_بابا يا لعبة...خلصت وراحت ودخلنا بالجد
_انتي مامبين عليج تحبيه
كمت من يمها وكفت انزع شالي
_مو كتلج مو كلشي الحب بالزواج...
المهم التفاهم والاحترام...
الحب يخليج ضعيفة وبسهولة يسيطر عليج الرجال
_شلون منطق...يعني ماراح تحبينه من تزوجون
التفت عليها واني افتح بدكم قميصي
_اكيد اذا طلع خوش انسان ...
بس هذا حب يختلف
_شلون يعني.
_باعي من تحبيه مثل وضعج هسة وية احمد...
مشاعرج هية تتحكم بيج...
يعني اذا قهرج لو جاوز عليج مثلا...
كلبج ماينطيج تظلين زعلانة منه لحد ماتاخذين حقج منه...
وبسهولة تسامحيه...
وتحاولين دائما ترضيه...
قاطعتني...لو انتي فاهمة الحب غلط...
لو اني مافاهمتج ...
ضحكت...يجوز...
عفتها بعد ماخلصت تبديل ونزلت تعشيت...
وصعدت بجربايتي اتمدد افكر شلون اقنع خالد مانحجي عن الخطوبة لحد مانعقد مهر...
زين اني ماعرفت هواي عن اهله...
وليش يدز مرت اخوه وية امه مو وحدة من اخواته
وهو عنده اربع اخوات....
ما اريد اسأله بصورة مباشرة...بعدني ماعرف نوع علاقته وية اهله...
ثاني يوم تفاجات هو مامداوم....
وبقى يومين بعدها ماداوم...
واجت الجمعة والسبت وماكو لا حس ولا نفس...
وامي وبيبتي كل شوي يسألوني...
وماعرف شجاوب...بالدائرة ماكدرت اسأل...
وهو المفروض يدز خبر ...عنده رقمي على الاقل مسج ..
الا اللهم غير رأيه...او اهله ماقبلوا...ظلت فكرة توديني وفكرة اتجيبني...
نور...هاجر خاف صار شي ليش ما ادزيله مسج
_لا طبعا...هسة عباله كاتلة نفسي عليه
_بكيفج
بس القلق كتلني لحد يوم الاحد...
شفت باب غرفته مفتوحة...عرفته مداوم
من فتت من يمه صبحت بثكل وطلعت كبل...
هبة لكيتها مخبوصة لان مداوم ورايحة جاية
ام حيدر...اثكلي عاد...الولد صار كم يوم مجاز عنده هواي بريد لا تظلين تحوصين
هبة...شبيج ام حيدر ...ترة عندي شغل...
بالج راح لبعيد...
ام حيدر...لا بالي ما راح لبعيد...
لل١١ دك التلفون الارضي...عدنا بدالة داخلية
جاوبت ام حيدر...اي استاذ موجودة...
سكتت شوية...صار هسة اكولها
سدته والتفت علية...هاجر استاذ خالد يكول خلي تجيني...
_ما كال شيريد
_لا ماحجى
طلعت ومن وصلت لغرفته دكيت الباب ودخلت
_صباح الخير
رفع راسه عن الاوراق الي كدامه...
وظل يباوع علية بدون مايجاوبني
ضجت...تفضل استاذ رايد شي
رفع تك حاجب...رايد هواي...
حسيت حجايته بيها مغزى اخر...
_يعني بالجذب اسألي ...كولي وين راح
ليش ما اجى ماخابر
_ما حبيت اضغط عليك...
انطيتك فرصة تفكر...
شفته عصب...وكام من مكانه...
اقترب مني ...صار بصفي...
ما حسيته الا جر ايدي بعصبية...
ضغطها حيل ...مو زعطوط ...انطيتج حجاية
وهد ايدي ...
الحركة سواها بسرعة...بحيث مالحكت يكون لي رد فعل...
بس هاي اكثر من مرة اشوفه من يعصب ينسى
مكانه وين...
_خالد رجاء...لا تنسى احنة بمكان شغل...
وما اريد حجاية تجيني
_عن قريب محد.يكدر يحجي
_عود بساعتها من اتصير مو هية مجرد حجي
رجع كعد بمكانه...وفر الكرسي بحيث صار مقابيلي
_تعرفين هاجر...نفسي الزمج هسة واطلع كل ناري بيج
_نسيت نفسك الظاهر...
ردت اطلع ...صاح علية
_وين رايحة
_طالعة...لان اليوم انتة مو طبيعي
_ماتريدين تعرفين وين جنت
_اعيد عليك...ما اضغط عليك...وما احب كثرة الحجي
اريد فعل...
غمز بعينه..اكيد الفعل احسن...
عفته وطلعت...هذا شبيه...عبالك.شارب شي
شو يوم عن يوم احسه اجرء...
رجعت للبيت وبين ما ماما صبت غدة اني بدلت ملابسي نزلت...
ام مصعب...ها بيبي شخبار الولد
_ياولد
_الي اجى خطبج
_ما اعرف بيبي...يجوز عنده ظرف
سلوى...يعني داوم...ما اعتذر ...كال شي
_كال عندي ظروف...واني مالحيت
سلوى...غير تسأليه
_اهووو شلون ماما اظل الح عليه ليش ما اجيت
عفت الاكل وكمت..
صعدت لفيت راسي ونمت...كعدت على رجة تلفوني خالته هزاز بس صامت...
اباوع المتصل خالد...
فركت عيني وفتحت خط
_ألو
_اويلي ....الو كلها نعاس
_خالد.شبيك ...ليش متصل...
_نايمة لو كاعدة
_كعدني اتصالك
_يعني بعدج بالفراش...اخ يابة لو يمج هسة
_اكيد تخبلت ...راح اسد التلفون
_شبيج...شكد جدية...
امي وام فهد راح يجون هسة...
عدلت نفسي بالفراش...
_هسة
_اي هسة...ومقدما ماكو خطوبة طويلة...لان باين عليج راح تشلعين گلبي...
يلا حبي استعدي لهم...باي
صلاهن الكلمات ومانطاني مجال احجي...
بقيت بمكاني صافنة...بعدين انتبهت ...
كمزت اصبح....ماما...بيبي
ونزلت ركض على الدرج
سلوى...شبيج ماما لا توكعين...شصار
_خالد خابر...امه جاية بالطريق...
_هسة...غير ينطي خبر قبل فترة
ام مصعب...وشعندج...تريدين ترحين للصالون
بدلي وفضيها
سلوى...وج اصعدي بدلي ورتبي نفسج
نور حبي اركضي رتبينا ضيافة بين مانبدل
صعدت ركض اكلب بكنتوري...
اني جسمي حلو ومرتب شلبس يلوكلي...
وشعري على طبيعته اسود ابد ماصابغته
لبست فستان اسود نيلي وياخته بيضة...
ومن جوة كلوش وحافته هم بيضة ...
جوة الركبة بشوية...
حذاء نيلي وفتحت شعري هو يوصل جوة جتفي بشوية يعني مو طويل هواي...
مكياج ماطوخته شي بسيط...
بعدني واكفة كدام المراية وسمعت جرس الباب
شوية وصعدت نور...
_ماشاء الله...حلوة طالعة...
اجوي الجماعة...
_يلا بدلي ونزلي
_اني شكو...امج وبيبتج يمهم...
وحضرت عصاير وهمزين مسوية كيكة
اقتربت وبستها من خدها...يوم لج حياتي...
نزلت ودخلت للمطبخ وجنت متوترة ...
ماعرف قلق على خوف ...
شوية وسمعت ماما صاحتلي...
دخلت صينية الضيافة...سلمت...
وقدمت لهم...خليت الصينية...
بس لاحظت امه ماكامت بس مرت اخوه
ترددت ادنك ابوسها لو لا...
بس تقدمت عليها لان مرة جبيرة...
ولابسة جبة سودة وحجاب ...
مرت اخوه تطلع مواليد سبعينات...
من كعدت مقابيلهم...
امه حجت...ما شاء الله....الله يحفظج
شوفي يمة....اني احب اوضح كلشي من البداية
انتي تعرفين وضعنا اكيد شارحلج
_لا خالة ما اعرف
ام فهد...شعجب دائرة وحدة ....غير متفقين سوة
حسيتها تضرب بسمار
_صح دائرة وحدة بس يجمعنا الشغل ...ماكاعدة وياه وحاجين
جاوبتني امه...المهم يمة...اني ربيت ولدي وبناتي بمايرضي الله وحدي ...
ابوهم عافهم صغار اكبر واحد ابو فهد عمره جان ١٤ سنة واصغرهم خالد جان عمره اربع سنوات
وعفتهم براحتهم يختارون زوجاتهم...
ام فهد بنت خالهم...بس هو اختارهة مو اني
جاوبتهة بيبي...الله ينطيج الصحة وتشوفين احفاده
ام خالد...يسلمج الله حجية....
مثل ماكلت لكم نوضح كلشي...
البنات اربعتهم مزوجات...وصار سنة من بنينا بالحديقة مشتمل صغير ونقنع بخالد يزوج...
هالمشتمل لكم حصته من البيت...
والبيت يبقى لابو فهد...هو جبيرهم...
سلوى...حجية هاي شي يخصكم...
قاطعتها...لا يمة هم يخصكم ...من البداية اتكونون على بينة...
واني هم كاعدة يم ابو فهد...
ومثل ماتشوفين مابية حيل لا سوك ولا طلعة...
والبنات ملتهيات ببيوتهن...
يعني ننطيكم الفلوس وانتو جهزوا براحتكم الي يناسبكم...
امي ظلت تباوع لبيبتي...واني ضجت...
عبالك تريد تخصمها وجاية من ورة خشمها...
ام مصعب...هاي شغلات سهلة ...بس خلي اتم خطبة رسمية
ام خالد...حقكم بس اني عرفت من خالد ماعدها احد هنا...ابوها مسافر وعمامها هم
سلوى...صح...بس الاصول لازم خطبة زلم
وخوالي موجودين وولدهم بطولهم هم ...
ام خالد...مادام هيج اخذولنا موعد حتى نفض الشغلة
اني كاعدة على نار...
ماعجبني ابد الاسلوب....بس احترمت ماما وبيبتي
جانوا يحجون وياهة...
التفت على ام فهد...الي جانت طول الكعدة تتأملني
يلا ام فهد خابري خالد يجي...
ورجعت التفت على بيبتي...حجية المقدم والمؤخر
اتفقوا وية خالد
بيبتي ماجاوبت...
سلوى..تفضلي حجية اشربي عصيرج...وانتي ام فهد
ام فهد رفعت العصير وشربت مجاملة...
بس امه ابد...
_تعذروني عندي سكر وضغط
سمعنا هورن بالباب...راسا كامت امه...
_هذا خالد...نترخص ...
طلعوا وامي وراهم...
ام مصعب...شنو بيبي خويلد هذا جايبهم غصب
هاجر...ما اعرف والله بيبي...
ماحاجيلي عن وضعه
سلوى....ماكالت شي المرة...بالعكس من الزينات مشتمل وحده...ومنطيها على مرامهة التجهيز
باوعت على امي فقيرة ماتعرف تحكم على الناس
بس اني من نظرات ام فهد عرفت السيطرة بيدها
رغم امه مو قاصرة هم كوية...
وديت الصينية للمطبخ...وصعدت فوك واني اسمع
بيبتي تتفق وية ماما يخابرون خوالها...
نور...شبيج شو شكلج ضايج
وكفت مقابل المراية ارفع شعري بالقراصة
وبديت انزع ملابسي...
_ماعرف شكولج....بس وضع اهله ماطمني
_شلون يعني
_عبالك غصب جايين...
_يجوز لذلك تأخر ذيج الايام ماقابلين وقنعهم
_ماعرف...مادام وحدي كاعدة شأريد منهم
_احجيلي شتفقتوا
حجيتلها بس جنت احس نور مو كلش فرحانة
_نور شو احسج باردة من ناحية الموضوع
باوعت علية...ليش انتي مو باردة...تصرفج جامد كلش...مو عبالك بنية راح يخطبها واحد رايدته
اجيت كعدت مقابيلها على الجرباية
_مو جامد...بداخلي قلقة ومرتبكة...
بس اني يمكن عكسكم مااظهر كل الي اخفيك
_حبيبتي نفسي اكولج فرحانة لج....
_ليش مو فرحانة
_خايفة من لعبتج
_نور لا تخبصيني يا لعبة...مو كلنا انتهت وصار وكت الجد...
ولا تخافين محضرة نفسي لكلشي
كمت من يمها من سمعت صوت تلفوني دك
باوعت خالد...اشرت لها هذا هوة...هية كامت
_جاوبي براحتج
طلعت وفتحت خط
_الو...شلونك خالد
_عيونه لخالد...ان شاء الله كلشي تمام
فكرت اساله اهلك ماقابلين بعدين تراجعت شعلية مادام قانعهم هو وياهم يتفاصلون
_تمام ...بس بقى خطبة الزلم
_حددوا موعد واحنة حاضرين
_بيبي راح تتفق وياهم واردلك خبر...
بس بقى عندي طلب
_أمري
_ما اريد احد يعرف بالدائرة ليوم العقد
_ليش
_احسن ...استعينوا على قضاء حوائجكم بالكتمان
_يجرالج...بس مو تيبسيها علينا
_شلون يعني
ضحك...بعدين افهمج...مع السلامة
لنهاية الاسبوع ...بالدائرة نفس اسلوبنا ماتغيير
بس بالبيت بالليل يخابرني...
عرفت منه اخواته اثنين مزوجات اخوان ام فهد
واثنين اقاربهم ...
اخوه الجبير مقاول بناء...وعنده تلث ولد وبنية اكبرهم فهد بالاعدادية والبنية والولد بالمتوسطة واصغرهم ولد بالابتدائية...
ابو فهد مقام ابوهم...مرته شايلة البيت كله
كلامه اكدلي مرت اخوه لها سيطرة بالبيت
والجمعة تمت كعدة الزلم بحضور خوال امي
وهو هم جام خواله وعمامه بحيث سدوا الشارع بسياراتهم...
بس الغريب ما اجت مرية وياهم...
السبت اجاني وحده مثل ما اتفقنا وطلعنا للمنصور
ماما راحت وياي حتى نشتري النيشان...
ومن خلصنا عزمنا بمطعم ...
من دخلنا سحب لامي الكرسي حتى تكعد...
وخلة كعدته يمي...
من كعدنا وظل يسولف وية امي ايده من جوة الميز مدها على ايدي الي جنت مخليتها على فخذي
سحبت ايدي...
صارت ايده على فخذي...
هو ولا كأنما يسولف وية ماما...
دفعت ايده ...سحبها شوي...
وهو يلتفت علية مبتسم...
من خلصنا غدة وراحت ماما للحمامات..
مد يده ولزم يدي على الميز...
حاولت اسحبها...جلب حيل بيها وضغط عليها
_هاجر...قرينا الفاتحة وانتي هسة خطيبتي
_بس بعدنا ماعاقدين
_يعني من نعقد اخذ راحتي..
ما جاوبته لان اي كلمة ياخذها ضدي بعدين
_شو سكتي
_تتوقف على معنى كلمة راحتك
ضحك... مو من السهولة واحد يغلبج...
غمزلي بعينه...
رجعت للبيت.....واني احجي لنور كلشي
_مبين عليه مو سهل...شلون وكعتيه
_مو شغلة سهولة وصعوبة...هو بس جريء
بوقتها اتفقنا نبلش معاملة عقد الاحد....
خابرت ام حيدر اخذتلي اجازة ...
واجاني الصبح رحنا للمستشفى نسوي تحاليل...
من خلصنا وطلعنا...
_زين ماخفتي من سحبوا دم منج
_لا مو جبانة
فتحلي باب السيارة...ورجع صعد من ديسوق
_بعد وكت شنو رأيج نروح نشوف المشتمل
باوعت عليه مبتسمة...اعرف نيته
_شنو رأيك ترجعني للبيت...
باوع علية مقطب حواجبه...ليش مايعجبج تكملين اليوم وياي
_طبعا يعجبني ...بس ادري بنيتك
ضحك...هسة على الاقل اظاهري ماتعرفين...
ابتسمت ...ما احب اظاهر...
_اذا وعدت اكعد عاقل
باوعت عليه....خليها من نكمل العقد عيب ادخل هسة حتى حلقات مالبسنا
مد ايده وكمش ايدي ...حقج...
بس من نعقد ثاني يوم تلبسين الحلقة بالدوام
_اوكي
وصلني للبيت وراح....
داومت الاثنين بس ما كلت اي شي...
بس من افوت من يمه يغمزلي...
الاربعاء كملت معاملة العقد ورحنا للمحكمة نعقد
اول مرة التقي اخوه الجبير...
اجى هو ومرته ...مو مثل ما توقعته...
ولا يشبه خالد...متوسط الطول...وصاحب كرش
بس ملامحه كلش حنونة...
اخذني بلسانه...ورحب كلش بماما...
من وصل سرانا حتى ندخل لغرفة القاضي...
حسيت رجلي ثكلت...وصار عندي تردد من الخطوة
وطبينا وطلعنا ولا دريت شحجيت ...
تلكتنا ام فهد هلاهل وطشت الجكليت...
وابو فهد عزمنا على الغدة الجمعة...
بس تفاجات شكد ماجان خالد ملهوف على العقد...
بالمحكمة شاورني
_البسي الحلقة باجر بالدائرة....
ووصلنا لبيت وراح...
جنت كلش خايفة بداخلي من مواجهة باجر...
ورغم جنت مستعدة لكلشي...
بس الي صار من داومت ثاني يوم مامحسبتله حساب....
....وللحكاية بقية