ورود شائكة

البارت الاخير

ان تتغير لاجل من تحب جيد...لكن يجب ان يكون التغيير لماهو خاطئ فيك ..
يجب ان يكون لانك ترى التغيير لصالحك...
وليس لان شريكك يرغب في تغييرك...
همس ليل

_شجابج
هاي كلمة وحدة بس حسيتها هدتني...
بقيت مخنوكة لا اكدر احجي ولا اكدر اخلي دمعتي
تنزل...
مامتعودة ابجي كدام احد...
عمري ماسويتها ونزلت دمعتي حتى كدام امي
الشخص الوحيد الي باجية كدامه جانت نور...
بلعت ريكي بصعوبة اريد اجاوبه
بدون ما يبين علية...
بس يمكن عيوني بين عليها
لان شفت نظرة عينه تغيرت وهو يباوعلي
_اجيت لان اني بنت اصول ما اعوف زوجي وابو جهالي بدون ما أطمن عليه
جنت احجي بس احس الغصة راح تخنكني اذا ما طلعتها...
_عندك العافية
جنت بعدني واكفة وشايلة علي...
عفته وطلعت واني اسمع هوسة بالهول...
ما بقيت اعرف شكو ...
اسمع صوت امه يلعلع...
لكن الي بية مكفيني وخلاني مفصولة عن الي يصير حولي
من وصلت للمطبخ سمعته صاح على امه
_يمة كافي عاد...راح اطلعيني من طوري
ام كرار جانت لازمة عمر ونور...
من شافوني اجو علية...
طلعت بدون ما اسلم...
جانت ام كرار تمشي وراي...
_هاجر اوكفي خية...بس دقيقة
ماسمعت لها...اريد بس اوصل للشارع
احس اكو شي وكف على صدري يريد
يخنكني...
من طلعت من الباب شفت كرار يشرب جكارة
من شافني شمرها وداس عليها
_اوصلج للبيت ام عمر...
ماجاوبته...
جريت جهالي ومشيت...
بس بعدت خطوتين ..
كامن الدموع تجري...
عيوني غوشن وعثرت بطريقي...
عدلت نفسي ورفعت ايدي امسح عيوني...
حسيت الطريق للبيت صار شطوله...
مو خطوتين...
دفعت الباب الخارجي....
دخلت للبيت ...خليت علي بكريكوته..
ورحت كعدت على الكرسي بالمطبخ...
لميت رجلي لصدري وشبكتهن
وخليت راسي عليهن...
وطلعت شو شهكة بصدري....
كلشي توقعت الا ردت فعل احمد...
حسيت بلحظتها شكد وحيدة اني...
وينج امي ليش عفتيني وحدي...
واصلا ليش جبتيني...
حسيت ايدين صغار شبكن رجلية
رفعت راسي شفت عمر شابكني وبعيونه خوف
_شبيج ماما
نزلت رجلي بالكاع وجريته صعدته بحظني
_مابية شي ماما
_ليش تبجين
_مشتاقة لامي
_اني هم مشتاق ليوم ولنانا
امي جان يصيحلها يوم...
شبكته واني اكوله ياماما حالك من حالي
لا اب بيه خير ولا وضع زين لامك
خالد بطل حتى يسأل عليه...
بس عمه بين فترة وفترة يخلي ام فهد تخابر تسال
ومرات يجي ياخذه ساعة...
شوية وكامت نور اتجر بية
_اني...اني
_تعاي وكيحة انتي هم
صعدتها على رجلي الثانية..
وجريت حسرة...
انتو لي بهالدنيا....
_تريدون غدة
_اي
كمت هستوتي داخلي لهم غدة على الميز واكعدهم
سمعت صوت ام كرار
_ام عمر
_تفصلي ام كرار
دخلت واني دانطي الخاشوكة لنور
_شو عايفة الباب مفتوح مال البرة
_نسيته..
تفضلي اكعدي
_لا خيتي...بس جيت اكولج الولد راح يجيبون
احمد حضري الغرفة
_ما افتهمت...مو على اساس يظل هناك
_لا ماقبل وتعارك وية امي لان ماتقبل يجي
وعفت الولد يصعدوه بالسيارة
سمعت صوت...دخلت للغرفة مال الجهال...
لبست عباية على جتفي وشال...
ومن طلعت سمعت صوتهم ديخلوه بالغرفة
ام كرار...تعاي خية ماكو احد غريب
بس ابو حسين وابو سامر...
طلعوا من الغرفة سلموا علية...
ابو حسين...اذا احتاجيتوا شي بس دكي علية
طلعوا وطلعت وراهم اوصل ام كرار
_ام عمر...لا تزعلين خية رجلج بشدة هسة
وترة اني ردتج مادخلين الا يطلعون من يمه
لان كرار جان موجود...
وادري بيه يتنحس منه
_الله كريم
بوستني وراحت...
دخلت واني مترددة شحجي وياه
بس سمعت صوت نور تكمز على الجرباية
وهو يصيح عليها
_لج انزلي راح توكعين
دخلت راسا نزلته...واحس نظراته تتبعني
سمعت عمر كله
_حمد لله على سلامتك بابا
_الله يسلمك حبيبي...
جره باسه...
طلعتهم من يمه
_عمر اخذ اختك بالغرفة هسة اجيكم
فتحت شباك المبردة وشغلتها...
واني اتجنب اباوع عليه
_عدليلي المخدة ورة ظهري
اجيت اعدلها جلب بيدي
_هاجر...اعرف بيج بنت اصول
ماقصدت غير هالشي...
واني وصيت ام كرار ماتجين
وتبهذلين الجهال
_ليش ...هيج ماتريد تشوفني..
جنت واكفة يم راسه...
جرني وكعدني يمه...
_تبقين مخبلة...
ماردت تتصادمين وية امي...
وهم هوسة زلم
_منو ...همة اخوتك وزواج اخواتك
وشايفتهم...
واذا على كرار...
خزرني من كلت اسمه...بس كملت
لان عرفت هو علموده
ترة جان كدامي واني الي عفته
_بالضبط انتي مو هوة
يعني ماتعرفين داخله
_زين ليش رحت لاهلك
_امي جلبت واخوتي هم كالوا تريد واحد يعينك
واني شفتها صح...
انتي عندج الجهال كافي خابصيج
_هذا مو عذر...
اني مرتك ستر وغطى عليك...
ولازم اني الي اشيلك...
كل هذا احاجيه وما اباوع عليه
_باعيلي
رفعت عيني عليه
_لا تنسين حجايتج هاي
تبسمت...
جرني باس كصتي...
_تتغدى
_اكلت..بس اريد جاي وانطيني دواي
سويتله جاي...وانطيته علاجه
جان بي مسكن ...اخذه وراد ينام
عفته ورحت للجهال نومتهم...
وفتحت كماط علي وغيرتله ورضعته نام
سمعت ونة...
رحت للغرفة شفت احمد نايم بس يون
نقهرت بس شبيدي عليه...
شوية وكعد من الالم...بس ما اشتكى
رحت جبت خاولي صغير...
وسطل مي وصابونة...
من دخلت
_شسوين بيها....
_اغسلك
_شنو...
ضحكت على تعبير وجهه...
طفيت المبردة وطلعت جرجف...
اجيت يمه...ساعدني
سند ظهره وفرشت الجرجف جواه
_صدك تحجين...
_ترتاح من وسخ المستشفى...
جريت دشداشته نزعته وفانيلا...
بقى بس بالشورت...
وغسلت الخاولي بالصابونة...
وبديت امسح صدره....ورجعت ظهره هم
ومسحهتن بالمي...
ورجعت على رجليه...
جان يتألم من احركه لان جسمه رضوض...
ويحاول يساعدني من احركه...
هو ثكيل هم...
لحد ماخصلت نشفته..
وغيرت ملابسه وسحبت الجرجف من جواه...
طلعت الاغراض
_مشكورة صدك ارتاحيت
بهالاثناء اندكت الباب...
_هذا ابو سامر جاب المضمد...حجى احمد
طلعت فتحت الباب ودخلتهم عليه
اسمع اخوه يكله...هاي شنو شوكت غسلت
مو كلك مايصير يلوحها مي
_شيوديني للحمام حتى اغسل
كمل المضمد وطلعوا...
اني سويت جاي...ودائما احمد يجيب كليجة من وحدة تشتغلهن بالبيت
خليت بالصينية وديته له
_ابو سامر عباله غاسل
غمزلي واني اخلي الصينية يمه
_شكو بيها اذا غسلت
_لا عباله غير شي...
مين ياحسرة شو خلصتها تصبيرات
وتالي كلشي ماحصلت
جنت ادري بيه يتقصد ...
_وهسة لازم تكعد عاقل على هذا وضع
_هو راح نخلص العمر عقال
بقى تلث اسابيع مجبسة رجله...
بس بمرور الوقت الرضوض خفت..
اني كلش تعبت لان جنت على استعداد طول اليوم
بين الجهال وبينه...
والرجل من يتمرض اتعس من الطفل يصير متطلب كلش...
غير الخطار الي يبلش العصر يجي...
جانوا اخوته يجون يسندوه حتى يكعد بالصالة...
والحمام كله اني...
بالبداية جان محرج بس بعدين من شافني عادي
خف...
بس النحاسية جانت عالية عنده لان مايكدر يطب ويطلع ومعتمد على غيره...
رغم بالاسبوع الثاني كام يكدر يستخدم العوجية ويستند عليها....
جنت اغلب الوقت ابقي علي يمه على الجرباية
حتى اكدر اكمل شغلي...
يكدر يشيله ويسكته لحد ما اجي...
نهاية الاسبوع الثاني...
جان علي يمه واني انيم الجهال
اجيت عليه...اخذت علي انيمه...
صعدت يمه وكعدت ارضع علي...
_تعبتي هالاسبوعين
_تعبك راحة المهم اتكوم بالسلامة
_شكد حلو وانتي هادية
التفت عليه جنت متربعة على الجرباية
وهو متجي على تاج مال الجرباية...
_يعني اذا واحد ايدوس ابطنك ماتحجي
_حجي عن حجي يفرق...
اكو حجي يجرح المقابيل...
واكو حجي يضيع حقج...
ماجاوبته...بس شفت حجيه صح
خاصة من كال على نور لو من كال شجابج
كلش بوقتها جرحتني الحجايتين وبقت ادك بگلبي
_هذا الحجي يشملك هم
_اني احاول اوزن حجيي بس مرات المقابل يوصلك
تفقد صبرك واعصابك
_لا عاد كلشي ولا اعصابك... على طول  فايرة
_لا ترة مو عصبي لهدرجة
_شنو لعد اني هيج اثير اعصابك
ضحك وغمزلي...
كمت خليت علي بكريكوته.
_تعاي
مد ذراعه...صعدت يمه ونمت على ايده
وثناها وكام يمسد شعري...
بس نظره لكدام...اني جنت نايمة صفح وجهي له
_بشنو تفكر
_بهالدنيا
_صدك شلون سويت الحادث...
سياقتك زينة
_تريد اتصير...وابو السايبة طلع صفح...
ردت اتجنب ابو ستوتة كدامي صعدت الرصيف
كلها لحظات..
_هاجر
_نعم
_مين تصرفين
_من المحفظة غير
خلال الاسبوعين من يجي المضمد...
او اخوته يجيبون مسواك..علاجه
جان مايقبل الا يدفع فلوسهن
يكولي طلعي من المحفظة...
كم يوم شفت المحفظة فرغت...
كمت اطلع مني وانطيهم...
_ليش المحفظة تفرخ
ضحكت...يجوز محفظتك اي
_مين لج فلوس
_ليش وراتبي وين راح
انتة مامخليني اصرف منه شي
_بس استلم راتب انطيجياهم
مديت ايدي وسديت حلكه
_هو شنو فرق بينا...
باس باطن ايدي الي جانت على حلكه
والتفت علية....
_شلون نبقى هيج
_غير رجلك لازم ماتحركه
_مو الا احركها
_لعد
جرني فوكه...
_هيج....
ابتسمت بوجهه...
_اذا تريد شي كلشي يصير سهل عندك
شفايفه جاوبن عنه ...
جانت مهمة غسله صعبة...
لان لازم نجيس الجبس..وحاولت اكعده بالحمام على كرسي....
وكلما اشد الجيس ينفتح....
خلصناها ضحك وهو يسوي وج صوتج لا يكعدون الجهال...
خلال الاسبوعين امه ما اجت...
بس ام كرار من جانت تجي اتكول تبجي عليه تريد اتشوفه
كتله روح عليهم ماقبل...كال خلي تجي لبيتي
وفعلا ام كرار اجت كالت امي تريد تجي على احمد
افتهمت الي تريده يوصل...
واني اصلا ما اريد اشوفها...
دخلت لغرفة الجهال من اجت وية ابو سامر...
بس سمعته صاحني
_هاجر سوي جاي...
من خلصت الجاي ...اجيت لباب الصالة اريد ادخله
سمعته تحاجيه
_هاي تاليتها يمة اسبوعين ماتوصلني
_داتشوفين رجلي كوة امشي على العوجية
اني ثكيل واذا ادوس عليها زيادة ترجع تنكسر
_جان بقيت يمي
_ليش مو ابيتي
_هسة صار هذا بيتك
_يمة سدي هالموضوع
_طبعا ماتقبل احجي على الخانم
_البنية لا يمج ولا حواليج شتريدن منها
_لافت راسك ام لسان...
_لا الفقيرة والساكتة رضيتي بيها
ولا ام لسان...شتريدين يايمة
_لا عمي راية الله على خالتها...
على الاقل ماقبلت بيك الا من رحنا خطبناها
مو مثل الخانم من ورانا
_هو شنو الي من وراكم يمة...اني خطبتها بحظور عمامي وخوالي...
وانتي تدرين...يعني مامزوج البنية بالسر
وهية الي ماقبلت بزفة لو حفلة لخاطر خالتها
_مبين محترمة خالتها من اخذت رجلها
ابو سامر...يمة مو وكت هذا الحجي
ماردت اسمع اكثر دكيت الباب...
كام ابو سامر فتحه...
انطيته الصينية ورجعت للمطبخ..
من راحوا ...حسيته جان ضايج كلش
ما حاجيته كلت ما اثير موضوع ...
ركضت الايام بنفس المنوال وراح فتح الجبس...
بيومها من رجع شوية يعرج ...
_الدكتور كال ما اذب ثقلي عليها هالايام
اريد اسبح...
دخل للحمام...واني عشيت الجهال ونيمتهم
من طلع للغرفة...
دخلت وراه...
_نعيما
_اشكرج...وين الجهال
_ناموا
_ما شفتهم اليوم
_سطروا راسي يمعود خليهم ينامون
_نور حيل صايرة حركة...
_وكحة مثل ابوهة...
جنت واكفة اعدل بميز التواليت...
ماحسيت الا واحد جرني من خصري
_اليوم اشوفج الوكاحة شلونها
_هههه...بعدك هسة فتحت الجبس
_خلي اطلع حق التصبيرات والجفاف
_على كيفك ماجانت كلش جفاف
ماخلاني اكمل اخذ شفايفي بشفايفه
وجرني للجرباية...
بعد ساعة خليت راسي على صدره نعسانة
وهو حاوطني بيده...
_هاجر
_عيونها
_تدرين شكد قهرتيني من كلتي جنت احسبك سندي
قاطعته
_وانتة سندي وكل اهلي...
ساعة عصبية مامقصودة
نمت على هاي الكلمة...
مر شهرين حياتنا مستقرة...
احمد حصل مشتمل صغير...
قرر ياخذه...وبيت اهلي
دائما نروح نظفه....بعدين خالي دز وكالة
لاحمد حتى يبيعه...
بعنا اثاثه وفرغناه ...
وعرضه للبيع...بيوم ما بعت الاثاث
رجعت الدمعة بطارف عيني...
جنت متأملة بلكت امي ترجع...
بس مادام راح يبيعوه يعني خلاص مابي امل بعد
بدت المدارس وعمر سجل اول...
واول يوم دياخذه احمد ظليت اباوع عليه وهو يبتعد
جنت فرحانة ومقهورة...
فرحانة كبر ابني...ومقهورة لان حسيته ابتعد عني
يوم جمعة احمد كال خلي نطلع صار هواي ما طالعين
واحنة بالمطعم...
شفت شكل مو غريب دخل للمطعم...
جان يتلفت وياه وحدة...
راسا درت وجهي...هسة هذا شجابه
باوعت على عمر ونور جانوا يلعبون بالحديقة
هو المطعم عبارة عن حديقة ...
_هاجر
التفت على احمد
_وين بالج
_ليش
_سألتج ماجاوبتي
_مادري جنت اباوع للجهال
_تريدين كهوة
_ماكو احسن منها تسوي كهوة
اجى اكثر صوت اكره بالعالم
رفع راسه احمد عليه وراسا نعقج وجهه
جان واكف يم ميزنا...
_شلونج ام عمر
باوعت عليه ورجعت باوعت على احمد الي شفت
عيونه تريد تطلع من مكانها
_احسن لحضرتك تمشي منة...حجى احمد
_ليش استاذ ...مو من الاصول ترد  السلام
وبعدين هاجر...اقصد ست هاجر ام ابني
ردت اجاوب بس عفت الجواب لاحمد
_وهسة على ذمة رجال غيرك..
وماعندك حق تحجي وياهة
_ها هيج صارت...
سبحان الله جانت تتراهن علية
بعده ما كمل كام احمد لزمه من خوانيكه
_تلم لسانك لو اخليك تبلعه
اني كمت من مكاني...
والمرية الي وية خالد لزمته من ذراعه
واجو العمال ادخلوا
_رجاء استاذ المكان مو مال عركة
_احمد عوفه
دفعه وكالي
_جيبي الجهال...
جبت الجهال وهو دفع علي الي جان بالعربانة
وخالد سحبوه العمال على صفحة
اخذلنا تكسي لان سيارته تفلشت بالحادثة وباعها...
الحمد لله بالتكسي مايكدر يحجي...
بس احسه بركان ويريد ينفجر...
دخلت الجهال للغرفة بدلت لهم وصعدتهم بجرابيهم
وعلي نام بالطريق...
ردت اخر دخلتي للغرفة...
بقيت علي بغرفة اخوته...
خفت لا يكعد اذا طلع صوتنا...
دخلت للغرفة لكيته بعده ما مبدل وكاعد على الجرباية...
ومن هزة رجله عرفته بعده يفور...
فتت للغرفة ورحت للكنتور اريد ابدل
وهستوني نزعت جبتي...
سمعت صوته يحجي بحدة
_اريد افهم وين جان عقلج...
معقولة بنية جبيرة محترمة تتراهن على رجال
جنت افتح بدكم البنطرون من سمعت حجايته
تفاجأت....
مين عرف معقولة نور حاجيتله
_شنو
وكف ومشى بحيث وكف مقابيلي...
_عبالج ماعرف...
لا ادري كل زين...
هم حاسبته هذا رجال
ماجان عندي جواب له...
فعلا وين جان عقلي...
نزعت البنطرون واني مدنكة حجايته خلتني اتعدل واباوع عليه
_واني وين عقلي عرفت بكل هذا وقبلت بيه
رفعت عيني له
_حقك انتة بيها صحح خطأك
جريت دشداشة لبستها وطلعت من الغرفة...
طبيت للحمام ...وكفت اغسل وجهي
اذب مي عليه وارجع ليورة اريد بس ماتنزل دموعي
ومافاد بقت الدموع المحبوسة تقاتل لحد مانزلت
لزمت المغسلة بقوة واني اكتم شهكتي...
شلون خالد كابوس يظل ملاحكني...
طلعت من الحمام سمعت صوت احمد
_هاجر
جان واكف اباب الغرفة مشيت مسافة
_كلت سابقا اكو كلمات تجرح المقابل
ياريت هذا الحجي اتكوله لنفسك
ردت امشي بس لزمني من ايدي
_وكلت بلحظة عصبية...
لا تاخذين حجيي ضدي...
ماجاوبته...دارني عليه
_هاجر باعيلي
جنت مدنكة ما اريده يشوف ادموعي
خلى ايدي حول وجهي ورفع وجهي له
_ماقصدت والله...
انتي احلى شي بحياتي...
نزلت دموعي...ليش احمد ماكو انسان معصوم
يمكن جان خطا الي سويته...
بس اخذت اعداله عقاب...
دنك باس دموعي...
_اعرف ....ما كدرت اتحمل حجيه
جرني لحظنه....ما اريد اشوف ادموعج علمود هيج شخص نكس...
تعاي لغرفتج ...
من جرني للغرفة فتح مجر وطلع علبة
انطانياها....
_هاي شنو
_ماجبتلج نيشان وانتي ما طلبتي...
هاي قبل فترة اشتريتها لج
فتحتها جانت حلقة وسوار
جر الحلقة...ولبسها بيدي
_اكو وحدة مزوجة بدون حلقة
_هسة يلا انتبهت مالابسة حلقة
_انتبهت من زمان....
وكفت على طارف رجلية وبسته بخده
_تعرف شكد احبك...
لزمني من اجتافي
_صدك هاجر
_عمري ما حبيت غيرك...اول انسان انتة
شبكني بقوة...
_ما اكدر اكولج نفس الشي...
اني حبيت قبل...
بس حبج غير شكل....
بعد فترة تالي الليل بعد لحظات حلوة جمعتنا
نمت على صدره ...
_احمد
_عيونه
_ممكن اسالك وجاوب بصراحة
_كولي
_كلت سابقا شبه غريب
_شوكت
_من كلت انتو مثل الورد بس كلكم شوك
_اتركي هالموضوع
_واذا كتلك لخاطري
_ما اريد احجي بالموضوع...احتراما للذكرها
بس اريد تعرفين شي...
سكت شوية...
ترة اني ماجنت ادري بحالتها خطرة...
ما حجت وكالت لازم تسوي العملية بسرعة
كالت بوقتها الدكتورة بيها مجال ابقى يومين وتلاثة
_بس امك تدري وهية الي ماخذتها للقابلة
_هية الله يرحمها جانت تريد ترضي امي حتى
لو على حسابها
رفعت وجهي بحيث صرت مقابيله
_يعني شلون
_مو كتلج سدي الموضوع...
دار ظهره ونام على صفحته
خليت حنجي على جتفه...
_لازم تحجي...اذا تريد نكمل حياتنا بدون
مشاكل...
وما ابقى اتسائل عن الي صار
كعد وظهره لي...
_ماراح تعوفين الموضوع مو
_لا....احجيلي
حجى بحدة
_شوفي نور جانت مطيعة زيادة عن اللزوم
ماكدر اكول جانت مقصرة وياي
تقصيرها جان بحق نفسها...
وبالتالي صارت تعكس هالشي علية
_شلون
_جانت تبعد نفسها عني...
اغلب سنوات زواجنا من تصير مشكلة تحجج
وفترة حملها كلها جانت تنام بعيد عني
خلى راسه بين ايديه...
وحسيت اني دست على جرحه
خليت ايدي على ظهره...
عافني وكام...
من رجع سويت نفسي نايمة
جانت هاي اخر مرة افتح وياه الموضوع...
مرت الايام وانتقلنا للمشتمل ..
جان بشارع اخته ام كرار...
نفس منطقة اهله بس بعد كم فرع...
تقوت علاقتي بام كرار...
وبدت تحجيلي عن نور...
الي عرفته نور جانت تسوي كلشي حتى ترضي ام احمد...
وبنفس الوقت ماجانت تحجي لاحمد اي شي
ومن ربطت وية حجي احمد...
افتهمت جانت لا اراديا تعكس تعبها وية عمتها عليه
وتبعد نفسها...
حياتي وية احمد حلوة بظل اطفالنا التلاثة...
ماتخلى من المشاحنات....
بس مانكدر نسميها مشاكل....
خلصت اجازتي وصار عمر علي سنة وشهرين
وداومت...
عمر بالمدرسة يوصله احمد بطريقه
وياخذ نور للروضة وعلي اخذه للحضانة وياي
واحمد مامقصر وياي يحاول مايضغط علية بالبيت
امي استقرت وية بيبتي يم خالي...
واتصل بيها باستمرار واجت قبل اشهر شافتنا
بوقتها كالت لو باقية يمج جان ما استقريتي
جان بقيتي ادورين حولي...
اهل احمد تواصلت وية اخوته وزوجاتهم بس امه
لسة بعيدة عنها...
وهو ماحاول بعد يجمعني بيها...
ابوية ابد ماعرفت شي عنه ولا حاول يتصل بية
بس ربنا عوضني باحمد
رجال بمعنى الكلمة....اول رجال حبيته بكل مشاعري
وهو صار اهل وسند لي...
صح ادري ماحبني مثل نور...
بس يكفيني حبه بطريقته ...
كافي هالطريقة بيها احترام والفة ودفو ووفاء...
وشتريد المرة اكثر هيج...