ورود شائكة

البارت الثالث

همس ليل
هناك اشخاص موجودين في حياتنا يحاولون التعبير بشتى الوسائل عن اهتمامهم بنا...
ولكن الانسان احيانا يصبو لماهو بعيد عن متناول يده...
هاي حالنا بالدائرة رغم هبة شكد حاولت تبين وتثبت لخالد اهتمامها ...
وهو يلاحظ هالشي بس من راد باوع لشخص اخر
وبنفس الوقت جان طرف ثالث يحاول يبين لهبة اهتمامه بس جانت غافلة عنه...
علي رغم جان يوميا يمر على كل الغرف حتى يصبح قبل مايصعد لغرفته بالطابق الثاني...
بس جان له وكفة يحاول اتكون طويلة وهو يشاقة وية ام حيدر وعبير لان خطيب عبير صديقه
جنت الاحظ نظراته لهبة ...
وماجان يهمني الموضوع...
هسة صار لازم اقربه منها ...
اليوم عزمته على كهوة...وهبة اخذت فنجان لخالد...
ام حيدر جانت بغرفة ثانية...
بقيت بس اني وعبير وعلي ويانة...
شفته عقج وجه من طلعت هبة...
غمزت لعبير...
هاجر...ترة تكدر اتكوللها
باوع علية متسائل....
ابتسمت.... نظراتك فاضحتك
علي...شنو الفائدة...عينها على غيري
هاجر...مالك علاقة بالظاهر...
ماتعرف داخل الانسان شنو...
عبير...صح حجي هاجر...حاول وشوف اذا نيتك صادقة
صفن على حجينا...
هاجر....اهم شي وضح اهتمامك...
احنة النسوان نحب واحد يهتم بينا
عبير...هبة خوش بنية مالك علاقة بصوتها العالي ولسانها...
اذا نيتك خير توكل ...
صفن علينا صح ماحجى بس حسيته ديفكر بحجينا
بيومها ماشفت خالد بس على كد سلام الصباح
ثاني يوم تفاجأنا بعبير قدمت اجازة زواج
عبير...شلون اكيد ماتقبل ست سحر
ام حيدر...احنة بشهر الثالث لازم نكمل الحسابات الختامية وانتي عندج سجل غير تكملين مطابقة له
عبير...شسوي ام حيدر صار كم مرة نحدد ويصير شي ونأجل
وهالمرة عمه حيل مريض اذا اجلنا نبقى سنة لازم
ام حيدر...بيش مفاولة الرجال
عبير...هو رجال جبير حيل...عفية هاجر ادري هواي تحملتيني...
بس بلكت تكملين انتي
هاجر...اني ماعندي مشكلة اساعدج...
بس مو مال اطابق كله وحدي ..
ام حيدر...عبير ترة هاجر هم عدها سجل...
عبير...شلون لعد
ام حيدر...شوفي ست سحر تنسب احد واحنة نساعده
راحت عبير لرئيسة القسم وتاخرت بس من رجعت جانت تبجي...
ام حيدر....ها شبيج
عبير...مقبلت اتكول ماكو احد فارغ هسة  ياخذ مكانج
ومن كلت لاياد تخبل كال ما اجل عوفي الدوام
هاجر...شلون تعوفين الدوام...هاي وظيفتج ضمان لج
ظلت تبجي...
ام حيدر...خلونا نساعد على سجلها
دخلت هبة....سجل منو
شرحت ام حيدر لهبة الوضع
هبة...لا عيني اني خارج المعادلة...مالحك
ام حيدر...قصدج مايبقى عندج وكت للسوالف
ماجاوبت وراحت كعدت ورة ميزها...
هاجر...مو مشكلة اني وياج ام حيدر نكمله
عبير...اشكركم بس ست سحر قافلة ماتقبل
غمزت لها...وطلعت...
رحت على غرفة خالد...دكيت الباب وفتت
خالد...اهلا ست هاجر
هاجر...استاذ جايتك بطلب
خالد...أمري
هاجر...تسلم استاذ ماتقصر...
عدنا عبير المفروض زواجها خلال عشر ايام
وست سحر ماتقبل تنطيها اجازة
_حقها...مو عدها سجل لازم تخلص مطابقة
_نتعاون عليه اني وام حيدر
_ماتلحكون وتتعبون هم
_ميخالف استاذ
_خلي يأجلوها هالعشر ايام
_.ابتسمت...استاذ رجلهم خضرة من انخطبوا لسة طيروا نص العشيرة وهسة عمه لازم سرة
_ياستار...عموما لخاطر جيتج وقليل.ماتسويها واطلبين راح احجي وية ست سحر
_.ممنونة استاذ
رجعت لغرفتي بس ما حجيت شي...
نص ساعة ودخلت ست سحر وياهة خالد
سحر...السلام عليكم...استاذ خالد كال ام حيدر وهاجر يتكفلون بسجل عبير...
بس تتعهدون كدامي ماوحدة تجيني تشتكي ويخلص وية الوكت
ام حيدر...ست احنة ابد مامأخرين شغلنا...
وهاي حالة طارئة
سحر...المهم تكملون شغلكم وانت محاسبين كدامي
اني ماجاوبت لان واكف خالد
وفعلا انطتها اجازة وراحت بس الي ماصار بالحسبان
ام حيدر بعد يومين عمتها ماتت...
واضطرت تاخذ اجازة...الشغل نام براسي..
حاولت ست سحر ادزلي  بنات من باقي القسم
بس الي ادزهم مايعرفن والباقيات ملتهين هم عدهم شغل...
هبة جانت تشتغل صفحة صفحتين وتتحجج بسجلها
بقيت يومين تعبت كلش وحتى موضوع خالد نسيت
خالد...صباح الخير
رفعت راسي باوعت عليه وهو يدخل الغرفة
ورجعت دنكت على السجل...صباح النور
_شنو شو ماكو احد
جريت نفس وبداخلي شلون وكيل ماتعرف شكو ماكو
_عبير تعرف مجازة...وام حيدر عدها حالة وفاة
_لا اله الا الله...ماجنت اعرف صار يومين مجاز
لان والدتي مريضة
_عدها العافية
جنت اجاوب واني اشتغل...اعصابي كلش تعبانة
_شبيج ست هاجر...شو مبينة ضايجة
باوعت عليه...استاذ عندي سجلين لازم اطابقهن وارجع اطابق الحسابات لام حيدر وباقي اسبوع
شلون تريدني اكون
_اعصابج...ليش ماكلتي لست سحر اجيب وياج وحدة من البنات
خليت القلم على السجل ورجعت بظهري استند على الكرسي
_جابت الي ماعدهم سجل او شغل ثابت...
بس يريد واحد يعلمهن...يعني لازم ارجع اجيك شغلهن
_حقج...لحظة واكون وياج
مافهمت شيقصد...رجعت لشغلي...
بس تفاجأت من رجع بعد ربع ساعة...
وجايب بريده...كعد بمكان ام حيدر ...
ومشى بريده وبدة بشغلها يمشي...
فرحت بداخلي...فرصة يساعدني بالشغل وبنفس الوقت اتقرب منه بصورة غير مباشرة...
رب صدفة خير من الف ميعاد...
دخلت هبة وشافته كيفت وبعد ماعافت الغرفة...
بس هم مو كلش الموقف صار بصالحي...
اولا لان هبة كامت ماتطلع من الغرفة...
وثانيا لان هواي مراجعين يريدون يوقع لهم..
وهبة كل شوي...استاذ شلون اشتغل هاي
مر يومين كلش ملتهين جنة...
ثالث يوم الظهر...
خالد ...شنو ست هاجر ما نستاهل فنجان كهوة
هاجر...والله استاذ تستاهل ونص بس لان جنة مشغولين
كمت سويت كهوة ...
هبة...استاذ يعني باجر تعوفنا
خالد...ليش اعوفكم
هبة...ام حيدر راح اداوم
خالد...ها على الخير...الله يساعدكم شغلكم متعب
خليت فنجان كهوة كدامه من رفع راسه ابتسمت
بشكل معبر..هو ظلت عينه علية...
طلعت هبة واني جنت اشتغل
هاجر...استاذ خالد ممكن بس اتشوف هاي الصفحة
اجى وكف قريب مني...
_وينها
_هاي...ماعرف وين الخطأ يطلع عندي فرق بالمبلغ
دنك على الارقام وصار كلش قريب مني وجر الحاسبة يجمع بالارقام...
هو جان يجمع واني اتامل بملامحه...
من باوع علية صفح وشافني اباوعله حسيته ارتبك خاصة من شافني مبتسمة له...
انسحب لمكانه...بعد ماصحح المبلغ...
_شوكت تحجيلي
_عن شنو
_عن هاجر نفسها
_يجوز مايعجبك الي تسمعه
_ليش
_مو كل واحد يتقبل الموضوع
_احجي وشوفي
ماجنت اريد احجيله الا من اتاكد منه...
وبعدين الغموض يزيده رغبة يتقرب اكثر ويكتشف
شنو ورة هاي البنية...
_حاليا ما اكدر...
_ليش
_الحجي يرادله وكت...وهسة احنة مشغولين
_وعد تحجيلي
_رغم مامسويتها وما احب ادخل شخص بحياتي
بس اكول ان شاء الله
_واني انتظر تنفذين وعدج
_شلون صارت الحجية
_الحمد لله احسن...تدلل علينة
_الله يحفظها...همة الخير والبركة
_صح....الحجية جانت ام واب لنا
_ليش والدك وين
_ماذكر منه شي جان عمري اربع سنوات من استشهد
بحرب ايران....جان ضابط
_الله يرحمه
_يرحم والديج...
_صعبة ربتكم بذاك الوقت...
_فعلا
_عندك اخوان
_اكبر واحد مواليد ٧٠ وراه اربع بنات واني الاخير
_يا...انتة بزر الكعدة
طك ضحك....اي اخر العنكود
دخلت هبة سكت هو...
ثاني يوم داومت ام حيدر....
ورجع هو لغرفته...وعلي بلش ينط هواي لنا
ويحاول يتقرب من هبة...
هبة صح جانت ما صده بس اتضوج...
ام حيدر....شبيج عاقجة وجهج
هبة...ماتشوفين هذا الغثيث
ام حيدر...منو
هبة...علي
هاجر...شبيه غثيث...خوش ولد وحباب...هواي تمنن يباوعلهن
هبة...اخذي انتي لعد
هاجر...يباوع لغيري..
ام حيدر...والله مثل.ماكالت هاجر خوش ولد
بس مالج بالطيب نصيب
هبة...اهووو...وعافتنا وطلعت
دخل خالد...صباح الخير...خلصتوا لو بعد
ام حيدر....صباح النور...تقريبا كمنا نخلص
خالد...تحتاجون مساعدة...حتى تسلمون من وكت
ام حيدر....ياريت باجر السبعة مال عمتي واريد اجازة...
خالد...اني اسد بمكانج وهسة اخلص بريدي واجي اساعدكم
وفعلا شوي واجى ويانة...
وثاني يوم من الصبح كان ويانة حتى نسلم ويةونهاية الدوام
من خلصنا...
خالد...اطلبكم عزومة...
هبة...تدلل استاذ بس أمر
هاجر...تدلل بس مال شنو
خالد...صار اسبوع وياكم واساعدكم وتالي
تستحسفوه بية غدوة...
هبة...لا استاذ من كال
هاجر....هو شغل دائرة استاذ...
حسيته ضاج من حجايتي وطلع...
وية بداية الاسبوع خليت امي تسوي دولمة ومقبلات
وللظهر صبيته هبة تفاجأت
هبة...ليش ماكلتي جان سوينا شي وياج
هاجر...مو مشكلة سويلنا فد  يوم انتي غدة هم
وصحنا خالد وست سحر...وهاي اخذت ماعونها وطلعت
خالد...شنو هالريحة الطيبة
ام حيدر...تفضل ذوك الطعم بعد اطيب
خالد...شنو المناسبة
هاجر...حبينا نشكرك على تعبك ويانة
تبسم....مو هذا شغل دائرة
هاجر...استاذ لا تجلب بالحجاية
هبة...هية هاجر غدرتنا ومانطت خبر حتى نشارك وياهة..
خالد...اعتبروها واصل...
الخميس عرس وائل وعبير...منو يجي
هبة...اني اجي
ام حيدر....اني ماكدر لان حزانة
باوع علية...
هبة...وانتي هاجر
هاجر...الله كريم
هو صار عنده ندوة بالوزارة لمدة ثلاث ايام
والاربعاء من داوم...
مريت وصبحت عليه...
_هاجر...
رجعت من سمعته صاحني
_خير استاذ
_باجر تجين
_اكيد ما اخذت اجازة
_اقصد للعرس
_اتمنى...بس ما اكدر
_ليش
_ماعندي احد يوصلني
_ليش ابوج او اخوج يوصلوج ومن تريدين ترجعين خابريهم
_ماعندي لا اخ ولا اب
_يعني شلون مافهمت
_لا ادوخ راسك...اخذولنا صور نشوف العرس
دخل واحد للغرفة واني ترخصت وطلعت
لليل اجاني مسج استغربته...
بعدين كتب اني خالد جاوبيني...
حاجيته على الفايبر
_تفضل استاذ خالد...بس بدون زحمة مين لك تلفوني
_كدرت احصله
_مين
_الي ناسي...بس تعرفين لو طالب رقم تلفون وزير الداخلية اسهل لي
ضحكت بداخلي...ترة اكدر بسهولة اعرف من انطاك الرقم
_طبعا تكدرين لان الي عدهم رقمج ينعدون على الاصابع...
بس اريد اعرف شنو هالغموض...
تلفون قليل يعرفوه...حياة شخصية محد يعرف عنها شي...
_ليش هيج دايخ...
اني ما احب احشر نفسي وية الاخرين لذلك محد يحشر نفسه وياي
_بس مو لهدرجة ...
_ماعرفت استاذ ليش متصل علية
طول يلا جاوبني....كلتي حجاية حيرتني
_شنو هية
_ابوج وين متوفي
_تكدر تعتبره هيج
_يعني شلون اكدر اعتبره...زين اخوان ماعندج
_اني وحيدة امي
_هم الغاز...عموما اذا ماعندج احد يجيبج للعرس اني مستعد اجي اخذج انتي والحجية
_مشكور استاذ بس ما اعتقد ترهم
_ليش شكو بيها...الا اذا اكو عذر ثاني يمنعج من الجية
سكتت واني افكر ليش ما اروح على الاقل اغير  جو
_ماعرف خلي اشوف ماما
_بيها الخير...اسف للازعاج
_خير للجميع...ماكو اي ازعاج
نزلت لكيت ماما وبيبي ونور كاعدين يتفرجون على المسلسل
كعدت يمهم...اكول ماما باجر عرس عبير البنية الي حجيتلج عنها...نكدر نروح
_اي شكو بيها روحي انتي ونور
_نور شنو
نور...لج لسانج
هاجر...لا صدك دائرة تلث ارباعهم جايين اخذلي وحدة بكدي شيكولون علينا بنات وحدنا
تعاي ماما والله ضوجة صار شكد ماطالعين
نور...اصلا اني ما اجي حتى لو تتوسلين
هاجر...طبعا ماتجين اكو أوامر من جهات علية
خنزرت علية بمعنى انتبهي...
ما اهتميت لها...هاشكلتي ماما
ام هاجر...وين هية الحفلة
هاجر...قاعة بالجدارية يعني هيانها
ام مصعب بيبتي...روحي سلوى شكو بيها
سلوى..نروح بس مانطول
كمزت من مكاني...فديت احلى سلوى...شبكتها وبستها
صعدت لغرفتي ادندن وراي نور...
نور...عصافيرج مزقزقة...شكو
هاجر...ماكو شي
نور...اكيد...زين انتي شلون تحجين هيج كدامهم
هاجر...دروحي....شلون تحجين هيج...جذبت قابل
اذا ماينطيج الفندي موافقة ترحين
سكتت...
_بابا العمر يجري كافي تنتظرين شوكت تفتهمين هالشي
_رجعنا لنفس الموال
هزيت ايدي ورحت نمت...ثاني يوم داومت...
بس ماشفت خالد لان طالع للوزارة...
وطلعت من وكت قبل رجعته...ردت الحك احضر نفسي
لبست فستان مكسم اسود وبيه ورد اسود ناعم
وخليت مكياج قوي بحيث رسمت عيني وظل وحمرة شفاه غيرتها لون وردي طوخ
طلعت غير شكل عن كل يوميا...حتى نور تفاجأت
_لج هاي شنو....
_حلوة
_تخبلين عمري
_لا عاد لا تبالغين
_لا والله مو مبالغة
اخذنا تاكسي جيرانة ...من وصلنا جانت الحفلة بادية
دخلنا وكعدن على ميز بالخلف يعني ماصرنا بالواجهة
دائما جو الافراح تاخذك لغير عالم...
وتخلي مشاعرك بنشوة غريبة ...
ظليت اتفرج على الكل...ولمحت هبة...ابتسمت واني اشوفها لابسة شبه بدلة بس جانت ميديم وكصيفة كلش...والمكياج جدا مبالغ بيه...
بس اكون صريحة طالعة حلوة...توقعت اتكون قريبة جدا من ميز خالد...
دورت بعيوني وفعلا شفته كاعد وية مجموعة من الولد الي ويانة...
بس شنو من كشخة القاط النيلي والقميص الابيض والرباط ماروني...فد شي طالع...
ويمه علي الي عيونه مانزلها من على هبة وهو يتابعها
خالد عيونه ادور على شي عبالك...
_ماما راح اسلم على عبير....
كمت اتهادى بمشيتي وصعدت الستيج سلمت على عبير ووائل...
بس ابد مارفعت عيني وباوعت لاحد...
اخذت صورة وياهة...ورجعت لمكاني...
وبعد اقل العشر دقايق سمعت صوته يسلم علينا
_ماما اقدملج استاذ خالد...وكيل رئيس قسمنا
استاذ...ماما
_متأكدة امج مو اختج
امي ضحكت...طبعا عمرها مايجاوز ٤٥ وماتشبهني ابد هية بيضة بعيون عسلي وساع وملامحها مرسومة رسم لذلك بابا كتل نفسه عليها...
_اهلا استاذ...مابقى شي اطلع تقاعد شلون اختها
_يا مابقى شي بعد ١٥ سنة يجوز نطلع سوة جاوبت اني
خالد...وين تشتغلين ...شا اكولج ماترهم خالة
سلوى...لا.. ترهم...اني معلمة
خالد...شو ماجان عدنا هيج معلمات
هاجر....احم احم ...شنو استاذ جنك تغازل امي
رفع ايده علامة الاستسلام...لا ربي يعلم نيتي
سلوى...استريح استاذ
خالد...ممنون بس وية جماعتي...من رخصتكم
اجت بعدها ام عبير عرفتها على امي كعدت تسولف وياهة واني رحت للحمام اعدل مكياجي وادري اذا مراقبني راح يلحكني...
وفعلا بس طلعت من الحمام حسيت واحد كمشني من ايدي وبسرعة جرني للحديقة...جان الباب مال الخروج قريب من الحمامات...
من وصلنا للحديقة جريت ايدي
_شبيك تخبلت شنو هالتصرف
وكف مقابيلي...ما اعتذر عنه...لان ادري بغير هالطريقة ماتجين وياي
_يعني شنو بغير هالطريقة ...
اتصنعت العصبية...
_لو كايلج تعاي للحديقة احجي وياج جان قبلتي
_وليش نطلع...نشاوف بالدائرة واسال الي تريده
_يا دائرة...اذا اربع وعشرين ساعة اكو مراجعين
وانتي ساعة قريبة وساعة احسج ابعد من السما
_الظاهر العرس مأثر عليك
ردت امشي حسيته جرني من ايدي...
بس ماجنت متوازنة ردت اوكع ومد ايده حول خصري يسندني...
صرت كلش قريبة منه هية لقطة سريعة بس
وية ماصارت سمعنا صوت يمنا....
وللحكاية بقية.....