ورود شائكة

البارت السادس

مساؤكم خير وعافية...اكو ملاحظة راح انزلها واتمنى تقرؤها....تحياتي

لا يغرنكم المظاهر الخارجية والاشكال ...
فما هي الا اغلفة لباطن قد يكون صالح وقد يكون طالح...
همس ليل
يوم الخميس كعدت نشطة اليوم اداوم واعلن خطوبتي...
لبست بنطرون وسترة سودة رسمي وقميص ماروني وحجاب مشجر...
ومكياجي جان اقوى من كل مرة...
واعتنيت كلش بمظهري...
نزلت وماما تصلي على النبي...
_صلاوات ماما ...شلون طالعة
نور...طبعا لبس البوزة على كولة المصريين
طلعت لساني اعيبلها...
سلوى...لا يمة شبيها جنها وردة
هاجر...على عنادج
نور...من يحمد العروس
ام مصعب...ماتبطلن نكرة عبالك رويسية انتن
هاجر...بيبي كوليلها...غير هية جبيرة تصير اعقل من هيج
نور...مو على اساس انتي نقة
سمعنا الهورن
هاجر... اجى خالد
سلوى...تريكي ماما ما اكلتي
نور...الفرحة شابعتها
هاجر...ماما وين الجكليت...
انطتنياه وطلعت...لكيت خالد واكف يم سيارته
هو البارحة خابرني يعتذر لان وصلنا وراح
كال جان عندي موعد مهم...
واتفقنا اليوم هو يجي يوصلني....
_صباح الخير خالد
_ياصباح الورد....لك هاي شنو طالع الكمر مالتي
تبسمت وهو يفتحلي باب السيارة...
من تقدمت وردت اصعد دنك علية وهمس
_ماتجيبين بوسة التصبيح...
_عيب خالد احنة بالشارع...
صعدت بالسيارة سد الباب ولاف يصعد ...
من صعد...يعني لوما الشارع عادي تنطيني
ضحكت...تأخرنا يلا
_الله عليج امشي نروح مكان نص ساعة ونرجع
باوعت عليه...شلون يعني خالد ...كولي يا الله من الصبح
شغل السويج...يا الله من الصبح...هية شكلها راح نخلصها يابسة...
شنو هاي العلاكة وياج
_جكليت
_شسوين بيه..
_الي يجي يهني شتقدمله
_ماعرف ...غير تكولين حتى اجيب
_ماما حسبت حسابك
_الله يخليها لخالتي...
تستاهل اشوفلها عريس..
التفت عليه...شنو هاي خالد
_شبيج...حلوة وبعدها صغيرة وانتي راح تزوجين شعليج
_ما احب هذا الشقة
_شنو غرتي عليها
ماجاوبت...بس بداخلي ضجت كلش...
هية بس باقيتلي وخلصنا العمر سووة
وصلنا للدائرة ونزل فتحلي الباب..
وكاد ايدي...خالد عيب ندخل هيج للدائرة
_هو كلشي عيب...غير مخطوبين
دائرئتنا الدخلة اتصير للاستعلامات وبعدين الاقسام الفنيةيلا الحسابات...
من دخلنا بهالشكل حسيت الانظار كولها علينا...
اتلوكنا ولد يعرفونه...
_مبين وكعت
كلش دغتني الحجاية عبالك اجت على الجرح
عفته يباركوله...ورحت فتحت غرفته..وخليت
سلة جكليت وطلعت للغرفتنا...
جانت بس ام حيدر...من دخلت وصبحت رفعت عينها
وقبل ماتردلي السلام...هاي شنو...لا ...لا اتكولين انخطبتي...
مديت ايدي الي بيها الحلقة
_لج جذب...منو
غمزتلها ....منو تتوقعين
صفنت علية...الله عليج
_شنو
_خالد
بأبتسامة عريضة ...طبعا
_ايا لوتية...وج شلون ...شوكت..اشو كلشي ماندري
اوكفي خلي اهلهل وبعدين احجي التفاصيل
صدك هلهلت ...ثواني وبنات باقي الغرف يمنا
_شكو ...منو نخطب
ام حيدر...هاجر...واحزروا منو....استاذ خالد
طبعا الوجوه بين انعقجت وبين فرحت ومن ديباركولي...
جنت واكفة يم ميز ام حيدر ..دغتني من جوة الميز
التفت عليها شفتها اشرت بعينها على الباب
التفت شفت هبة...ما لاحظتها لان البنات حولي اسألتهن ما تخلص...شوكت وشلون وشجابلج
باوعت لهبة وجهها اصفر...
من شافتني لاحظتها اتقدمت وباركت...
داتبوسني شاورتها...كدها لو لا
مجاوبت...بس حسيتها تغلي
بعدين التهيت وية البنات الي يجون ...
للعشرة مجموعة تروح ومجموعة تجي...
اخر وجبة طلعت...
جانت هبة خارج الغرفة...
ام حيدر...هاجر ترة استاذ خالد دك عليج من جانوا البنات هنا وكال من يطلعون خلي تجيني
_صدك
_اي يولي صارت الساعة ب ١١ دشوفي خاف مامتريك...
_هسة اروحله...
لعد هبة وين
_هية ماكعدت بالغرفة بس اتحومي
طلعت اتمشى وصلت لغرفته دكيت الباب
وفتت مبتسمة...شلون الاستاذ
باوع علية بوجه جامد...جيبي جنطتج وتعاي
_ليش
_بدون ليش بسرعة
جان يحجي بحدية...
ماجادلته...رحت للغرفة...داخذ جنطتي
ام حيدر...ها وين
هاجر...ما اعرف ...شو كال راح نطلع
ام حيدر...اي عيني بلشنا...بس باجر تحجيلي التفاصيل
هاجر...الله كريم...باجر جمعة
طلعت شفته واكف بالباب يباوع بالساعة..
من وصلت يمه...ليش تأخرتي
_ترة بس جبت الجنطة
_يلا
مشى كدامي على السريع...
هذا شبيه....حجيت وية نفسي...
لحد ما وصلنا للسيارة...فتحلي الباب من صعدت طبكه حيل جفلني...
من صعد ساق سريع
_خالد ...شكو صاير شي
_اسكتي هسة خلي اسوق ...
باوعت لكدام...واني افكر...معقولة راحتله هبة وحجتله...
لا مستحيل...قابل تعرض نفسج للحجاية ...
بيها عيوب هواي بس مو مال تفضح نفسها
لعد شنو الموضوع...شصار
جنت اباوع عليه بين لحظة وثانية...
اشوفه يباوع كدامه ووجه جامد...
ما انتبهت من لاف من جسر الجدارية لمدينة الاعراس...
طبك السيارة وطفاها...
_ليش اجينة هنا
_حتى تحجيلي
_عن شنو غير افتهم
_اني اريد افتهم الي كالوا صح
_هو شنو
التفت علية بعصبية وجر ايدي يضغط عليها بقوة
جفلني وارتبكت من عصبيته
_شنو موضوع الرهان
صفنت بوجه مصدومة...يعني معقولة راحت كالتله
ما اكول ماجان وارد هالشي...
بس مو بهالسرعة....فكرت بهواي احتمالات بوقتها
وجنت مستعدة لها...
ما احتاج بس ثواني ارتب افكاري...
خرب بعرضج هبة ...على الاقل انطيني وقت
_شو صافنة بوجهي
_اخ ايدي خالد...فهمني يارهان...
زاد ضغطه...بحيث صحت من الالم
_توجعج...لعد شلون احساسي هسة
_يا احساس...فهمني شنو وصلك...شلون اجاوبك وانتة داتأذيني
_اني مشتعل نار هسة ...شتفهميني
جريت ايدي بقوة منه...وظليت افرك بيها
صارت حمرة حيل...
جاوبته بألم...
_خلص لعد رجعني للبيت...
انتة جاي تفرغ غضبك على شي ماعرفه
ومو جاي تفتهم مني...
_هيج ما اهمج...
_شبيك خالد...شنو ماتهمني....
انتة حكمت واخذت قرارك بدون ماتسمعني...
شتريد مني بعد
_برري...كوليلي ماكو هيج شي...
قاطعته رغم صوته عالي وحاد
_ابرر لشي ماعرفه...اذا تريد اشرح... اهدى وفهمني
شنو سمعت
ضرب الستيرن بيده بقوة...بحيث فزيت..اهدى...تريديني اهدى...
مسويني زوج وتريديني اهدى...
شكو تبرير او شرح جان ابالي طار من عصبيته...
بس مابينت هالشي...بالعكس اظاهرت بالقوة
_رجعني للبيت هسة
_ما نتحرك منة اذا ماتحجيلي كلشي
فتحت باب السيارة ونزلت...
مشيت...هو اجى براي وجرني من زندي
_وين رايحة...
_رايحة للبيت ومن تهدى عود تعال نتفاهم
جرني بقوة للسيارة وفتح الباب ودفعني بيها
_راح ارجعج لان ممكن ارتكب بيج جريمة
بطريق الرجعة...جان يسوق سريع...
لحد ماوصلنا نزلني بدون اي حجاية وعافني وراح
فتحت الباب وفتت...
جانت ماما مبينة هسة جاية من الدوام لان واكفة تغسل وجهها على المغسلة...
من سمعت الصوت التفت علية
_هاي شنو...شو جاية من وكت
_وصلني خالد
_وينه
_راح عنده شغل
صعدت قبل ما تسال اكثر...
طبيت للغرفة لكيت نور تبدل
_هلا بالعروسة
_هلو
شمرت الجنطة على الجرباية
_شبيج
_ماكو شي
_لعد شكو كالبة خلقتج...وليش راجعة من وكت
ماجاوبت فتحت الكنتور اطلع ملابسي
_هاجر شكو...احجي
لا تكولين هبة راحت فتنت
باوعت عليها...انتي ظليتي وراي تنقين لحد ما حجت
_لا....وشلون شسوة خالد...وانتي شنو جاوبتي
_هو تعصب...واني ماجاوبت خلي يهدى واحجيله
_شكد حجيت وياج ونصحتج ما اتسمعين بس الصوت الي براسج
_دروحي يمعودة انصحي نفسج اول
سكتت ...جريت نفس وعرفت جفصت وياه
ذبيت سترتي واقتربت منها
_نور مو قصدي
_هاجر ...انتي مو بس بنت اختي وتعرفين هالشي
واتحمل منج كلشي لان اعرف داخلج طيب...
بس حاولي لا تستعملين طريق تجريح الاخرين وسيلة دفاع لج
_ها رجعنا للتحليل...
ترة مالي خلك
هزت راسها وعافتني وطلعت...
اتمددت بفراشي افكر...شكد يحتاج وقت حتى يرجع يريد يفهم...
سمعت صوت امي اتصيحني على الغدة
نزلت وكعدت يمهم واني بغير عالم...
_هاجر مو احجي وياج
_ها ماما
_شبيج
_ادري شبية شفتوني املخك بنفسي
سكتوا ...عفتهم وصعدت...احسن شي انام
كعدت على صوت نور تهز بية
_خير شبيج
_خطيبج جوة يريدج
كعدت راسا وفركت عيوني
_شنو
ضحكت...خويلد جوة...بدلي بسرعة لا يروح يخرط لامج كلشي
كمزت من فراشي..باوعت الساعة بالخمسة العصر....لبست بنطلون حينز...وقميص ردن
وجريت الشال اريد البسه
وبعدين اذكرت...رجعت نزعت القميص ولبست
تي شرت كيمونة...مشطت شعري رفعته بشكل نازل منه خصل
وخليت مكياج خفيف...وتعطرت ونزلت
من دخلت سلمت..جاوب بثكل...
سلوى...راح اسويلكم جاي
هاجر....بيبي لعد وين
سلوى...دصلي
كعدت مقابيله....باوعت عليه
_ما كلفتي نفسج حتى ترفعين تلفون
_ردتك تهدى وافهم شنو تهمتي...
وماترهم بتلفون...
_على الاقل اطمني علية وصلت لو لا
سكتت...
_ماعندج عذر مو
_تريد اكذب عليك...ترة اكدر واطلعلك مية عذر وعذر هسة...
بس اني هذا طبعي ما احب اتصنع ...
_يعني من تخافين علية يكون تصنع
_مو هيج قصدي...اني خفت منك ومن عصبيته
لذلك ماخابرت...
لان لو راد بنفس العصبية جان حتى ماحاولت بعد ابررك لو مهما صار
جر نفس...يعني فوكاها اني الغلطان
_الغلط من تسمع حجاية من غيري وماتسمع مني
_هسة جاي اسمع ...حتى ما اضلمج باي تصرف...
من كال هيج حسيت هو ماخذ قراره وجاي
_غير اول اعرف شنو وصلك
_الرهان بينج وبين هبة
هزيت راسي
شفته تعصب ...يعني ماتنكرين
كمت من مكاني وكعدت بصفه بشكل كلش قريب
جريت ايده جانت ترجف من العصبية...كلبتها
وفتحتها...وجريت الحلقة من اصبعي..وخليتها بجفه
وخليت ايدي عليها...
_باوع اول شي ...طويت اصبعه الاول...
صار اربع اشهر وهذا الخامس من اجيتنا...
شفتني يوم اجيت لغرفتك....
شفتني فد يوم حاولت اتقرب منك
طويت اصبعه الثاني...ثانيا ..اجيت اربع ايام اشتغلت ويانة...شفتني تموعت وادلعت وحاولت اتقربلك لو غيرت لبسي بهالايام حتى اعجبك....
طويت الثالث...طول هالاشهر هم فد يوم جبتلك ريوك خاص...حاولت فد يوم اخذ تلفونك واخابرك
طلبت يوم توصلني..عدا مرة وحدة وانتة عرضت
طويت اصبعه الرابع...خمس اشهر...سمعت حجاية علية...شفت عندي علاقة باحد غير غرفتي...
عرفت عني افتر بين الغرف...
خامسا...طوت ايده على الحلقة ولزمت ايده
مو انتة اتقربتلي...مو حاولت خلال هالاشهر تعرف اخباري ...كم طلبت مني احجيلك عن نفسي...
منو كال كوة حصلت تلفونج...منو الي تحارش بمنو بالحفلة...
ترة الي حاول يقترب من الثاني انتة مو اني...
لو متراهنة جان على الاقل حاولت بأي طريقة اتقربلك
كمت من يمه....وكفتني حجايته...
_كالت ممكن شهد عبير وام حيدر...
التفت عليه...خلي اتشهدهم...الاحد عبير اداوم وشوف حجيها...
شقة صار من اجيت انتة وكالت اكدر وقللت من شاني
كتلها اني هم اكدر لو ردت...ونسيت الموضوع
اذا هية اخذت الامر بجدية مو مشكلتي
عموما حلقتك عندك ...اذا متوقع متراهنة واريد الخطوبة لهلسبب
وكف ...خلاص حققتي رهانج وانتهى الموضوع
_شتريد بالضبط...
اتقدم علية...اريد اشوف تستحقين لو لا
مافهمت الا من جرني لحظنه...
ايده لفت خصري ...وايد الثاني ورة راسي
وشفايفه طبعت على شفايفي...
رفعت ايدي لصدره احاول ادفعه...
من حس بهالشي لزمني بقوة...
اني هم استغليت الموقف واقتربت منه
واحتضنته...بس مثلت اني متفاعلة وياه
بالحقيقة جانت ماكو ذاك المشاعر القوية
بس من حسيت ايده بدت تستكشف ...
سحبت نفسي منه...
باوع علية ....وما حجى شي...
عافني وطلع...
كعدت على القنفة واني اجر نفس...
رفعت ايدي اعدل شعري من سمعت الباب الخارجي ينسد...
خفت لا امي تجي...
وفعلا دخلت ماما
_لعد وين خالد
رفعت راسي اباوع لباب الصالة المفتوح...
جان بيها بابين...باب على داخل البيت وباب على الطرمة
_طلع
كعدت يمي...ماما صاير شي...بعدكم بسم الله
_ماصاير شي
_ليش ما تحجيلي
خليت ايدي على ايدها...
_ماما لا تخافين...بداية خطوبة كل واحد يريد يفرض رايه مو اكثر
عفتها وصعدت لغرفتي...
وكفت مقابيل المراية...
معقولة باردة المشاعر اني...الي صار تمثيل مني
ردت اعلقه بية بس شو ما حسيت مثل ما اقرأ بالروايات...
باوعت على وجهي احمر من لحيته رغم هستوة طالعة لان دائما يزينها...
زين هسة شنو...معقولة يسحب نفسه...
شنو موقفي كدام الدائرة...
دخلت نور...راسا نسحبت احاول ابدل
_شصار
_رحمة لوالديج لا تكوليلي نصحتج
_يعني مانحلت....وين حلقتج
باوعت ليدي...صدك وينها اخر شي خليتها بيده
يعني اخذها وطلع...
ماجاوبت....بدلت ورحت للحمام اتهرب من سؤالات
نور...
ورجعت لكيتها نازلة جوة...
دخلت بفراشي رغم الدنيا المغرب...
بس ما حبيت اواجه احد....
ظلت افكاري مخربطة....
اتخيل شماتة مال هبة والبقية اذا عرفوا
زين شقدم عذر فسخت الخطوبة وبعد يومين من اعلانها...
هو صوجي استعجلت ...كان المفروض اسوي الكعدة مال المهر  واثبت نفسي وياه يلا اعلنها بالدائرة
بس هو استعجل...
مايفيد الحجي...
باوعت للموبايل لا دز رسالة ولا خابر...
دزيتله مسج...اذا مو كد الالتزام...وماعندك ثقة بية...ليش تقربت ...
لو حسيت نفسك تورطت ولكيت حجة....
بالمناسبة اذكر انسان كال انطيني الثقة...ومراح تندمي...
بس الندم اجاني اسرع مما جنت اتوقع...
مشكور وماقصرت...
سديت التلفون...ومن كد ما انقهرت والافكار تعبتني
نمت....
وصحيت نص الليل شابعة نوم...
باوعت نور نايمة بجربايتها...
جريت تلفوني اريد اشوف اكو جواب منه
شفت المسج طالعة مرئي بس مامجاوبني
يعني معقولة خلص انتهى كلشي...
بقيت للصبح ماغمضت عيني ...
ومن كعدت نور سويت نفسي نايمة...
وفعلا غفيت...من كعدت جانت الساعة بالعشرة
نزلت غسلت ورحت للمطبخ لكيتهم كاعدين من شافوني سكتوا
خليت الجاي على النار...وطلعت جبن وصمون
من الثلاجة...ومن كعدت على الميز
سلوى...شوكت نروح لعد
هاجر...وين
سلوى...مو معزومين ابيت خطيبج
سكتت ووكفت اللكمة ابلعومي...
باوعت على نور...
ام مصعب....شبيج بيبي ..شوضعج ما عاجبني
هاجر....مابية شي بس ماكو روحة
سلوى...ليش
هاجر ...ماعرف
سلوى...يعني شنو ماتعرفين
هاجر...يعني ماعرف
عفت الاكل وكمت...وكفني صوت امي الي صاحت
سلوى...هاجر...وين رايحة
هاجر...فوك
سلوى...ترجعين هنا وتفهمينة شنو الوضع
شصاير...مو طراطير احنة
هاجر...حشاكم...مامسوية شي من وراكم
سلوى...لعد شنو ماكو روحة...هو لعب جهال لو شنو
هاجر...ماما هسة شتريدين...داكولج ماعرف
نور...كامت من مكانها من شافت ماما تعصبت
سلوى عوفيها هسة افتهم منها...
اخذتني وصعدنا فوك
نور...شنو فسخ الخطوبة...
هاجر...ما اعرف نور
نور...اكولج اشو كله ما اعرف...خابري يلا
هاجر...ما اسويها...
نور...لا تسويها...الزمي تلفونج وخابريه
اذا عنده نية يفسخ يجي كدام اهلج
ماتحركت من مكاني...جنت كاعدة على طابورية ميز التواليت...
مشت نور للميز الي يم جربايتي...
واخذت تلفوني...واجت يمي مدت ايدها وبيه التلفون
_هاج خابري..
بقيت عين على التلفون وعين على نور...
جنت خايفة من جوابه....
...وللحكاية بقية