ورود شائكة

البارت العاشر

يسعد مساؤكم...عذرا للتأخير...بس ظروف...
اقدارنا لا نصنعها بنفسنا...
واحيانا القدر يجعلنا نرضخ لامور لم نفكر لحظة او يوما ان نتقبلها...
همس ليل
من انقلت وبديت اداوم لان خلصت اجازة الامومة
جانت اصعب فترة بحياتي...
الدائرة الجديد هية فرعية ولكيت ملخص عن حياتي واصللهم قبل ما اوصل اني...
والنفسيات ولله الحمد هواي صايرة زبالة حشاكم
يعتقدون مادام مطلقة وصغيرة فاكيد اكون صيد سهل لهم...
الي يدخل من باب اللطافة والكياسة وهو الرجل المناسب...
والي يدخل من باب الخوف عليج ويريد ينصحج...
والي يذب حجي مباشر...
والي والي...اشكال نشوف ونعيش
والنسوان ذني بحث اخر...
طبعا الفضول قاتل ...بيهن من تريد تعرف كل صغيرة وجبيرة عنج
وبيهن من تريد تعرف سبب طلاكج
والي زوجها وياج هاي صرت غريمتها قبل ما تعرفني شنو...
صح ما نكدر نعمم هم اكو ناس مالها شغلة بغيرها
بس ما اتعرضله هو يعم عندي...
لحد ما وكفت كل واحد عد حده تعبت كلش
وتعبت نفسيتي....
مر ست اشهر بهالدائرة يلا عرفوني شنو...
رجعت حياتي لروتينها الاول...
دوام وبيت ونضاف لها شي جديد غير من الروتين القديم ...عمر ابني الي عمره حاليا سنة وثمن اشهر
خالد يجي مرات ياخذه ساعة ويرجعه يودي لاهله
بس امي تنطياه وامي تستلمه...
ومن يطلع ادك على ام فهد تراقبلياه من باب صغير
اتخيلوا ام تبقى قلقة على ابنها من ابوه...
شكد صعب هالشعور....
نور مضى على زواجها تقريبا سنتين بدون اطفال وعيالها بدوا يعيرون بيها...
وخاصة زوجها جبير عمره ٣٥ وهية هم مو صغيرة كملت ٣٢ سنة فبدت بعد السنة تراجع وتاخذ منشطات
ويوم رجعت من الدائرة ...لكيت نور يمنا فرحانة
وبيبي وامي مكيفات
_ها خيروكم فرحونة وياكم...
سلوى ...نور حامل
هاجر...صدك...الف مبروك حبيبتي...
شبكتهافرحانة...
خلي اصعد ابدل وانزل احجيلي
نور...لا اصعد وياج
سلوى ...شعدجن...ماتشبعن سوالف
هاجر...شعدنة قابل...عموري وينه
سلوى...نام بعد ماشلع كلبنا
صعدت ونور وياي
_شسوة احمد من سمع
_يوووه...من طلعت نتيجة التحليل....سجد بالمختبر
_مممم...هو لو مستعجل جان هسة ابنكم بطولكم
_وج انتي لازم اطلعين عيب بيه
_ماينزلي من زور ابد
_هههه...الگلوب سواجي
جنت انزع بملابسي وهية كاعدة على الجرباية...
_يعني شنو
_هو هم مهلكد يجرعج
_ليش يمة شمسويتله
_ماعرف...من اساله...يكول بنت اختج وكحة
_هو وين شايفني وهيج ماخذ نظرة عني
بس اني اكولج هو متربي على المرة تصير تحت ايدهم....
_هههههه...اتوقع اذا تتكابلون تتمالخون
_الله لا يجمعني بيه
_هسة عوفج...شلون بالدائرة
_احسن...كلمن لزم حده...والبنات على كد شغل وحجي عادي...
_وخالد
_عفية شجاب القرف هسة
_يعني اقتنع وسكت
_صار ثمن اشهر...لازم يقنع...
دك تلفونها...
_هذا احمد كال من ادكلج اطلعي
_ليش شوكت اجيتي
_قبل ساعة
_شدعواه لعد
كامت باستني....يشتاقلي
راحت واني بگلبي اكولها الله يسعدج....
بعدها لاشهر ماكو اي تغيير بحياتي...
من الدائرة للبيت...وبالبيت بين ابني والتنظيف
وامي وبيبتي...
لحد يوم اجت نور...جنت لاعب عمر بالهول وامي تسوي عشى...
وبيبتي يم امي....
_هلو هجورة
_هلو حياتي ....
كمت ابوسها...
_شيلي هذا الحلو خلي ابوسه
شلت عمر لها لان هية طبت بشهرها وبطنها جبيرة ماتكدر ادنك
كعدت على القنفة واني عفت عموري يلعب وكعدت يمها...
_بعدج ما تعلمتي طبخ ....خطية امج بس تطبخ
_المطبخ يكرهني كما اكرهه..
ضحكت بس حسيتها مضايقة
_نور حبيبتي شبيج
_خايفة هاجر...الدكتورة اتكول بعد يومين عمليتي
وكلش خايفة
_كولي ياالله ان شاء الله سهلة وخفيفة...
هسة مو كدامج سويت عملية
_الجارة عندي متقدمة حيل...
اليوم رحنا للدكتورة...رادت نحظر بطالت دم...
اتكول احتمال يصير نزف
_هنة الدكتورات يهولن الامور...
اني هم جنت خايفة ...
_ماعرف...عندي شعور غريب...
_عاد ماكو احد خويف بكدج....عود اني اجي وياج واصورج من اطلعين من العمليات...
واشوفج شتخربطين وبعدين اخليها ذكرى
اشوفها لبنتج
_لا ...اريد سلوى تجي...اخذي اجازة وابقي يم امي وعموري
_جذب بابا ما صورج ...بس هم ادري تطمنين لماما...
هم يجون عيالج
_اي عمتي...
سكتت شوي...ومدت ايدها لزمت ايدي وضعطت عليها...
_هاجر..اذا صارلي شي وصيتج بنتي...
مديت ايدي على حلكها
_انجبي لا تحجين هيج
نزلت ايدي...لا هجورة ...اعرفج شكد ماتحاولين تمثلين القوة وعدم المبالاة...
بس داخلج طيبة وحنينة...وماكو احن منج عليها
نزلت ادموعها...
_شبيج نور...صاير شي وية احمد
_انتي مرة كلتيها...ماتعرف الانسان الا تعاشره
ما اكول هو مو خوش انسان...
_لعد شنو
_ما اعرف شكول...شغلات ما تنحجي...
بسيطة بس تجمع ...
ابسط شي الدكتورة حددت موعد للعملية...
وامه ماقبلت كالت خلي ننتظر كم يوم بلكت اجيب طبيعي...
وصار يومين مبهذلتني ياموديتني للقابلة يا مرجعتني...
_شكد كوية امه لخاطر الله.
عموما تحجين عليه  لان خايفة...هسة بس اجيبين ماتكملين اسبوع تحوصين تريدين ترجعين يمه
_لا ما اجي هنا...مايقبل يكول ابقي ابيتج وامي اتساعدج
ردت احجي عليه...بعدين شفت وضعها ما يسمح ازيد
_اكيد يريدج قريبة منه
هزت راسها...يلا اروح لازم احظر تحاليل
وغراضي...
_جهزنا اني وامي شغلات تجنن مال بنوتات
باستني بدون ماتكول شي...
بقيت اليومين التالية مشغولة لان عمر بلاعيمه
واخذت اجازة بيوم عمليتها...
بس ماكعدت الصبح لان سهرانة وية ابني...
من كعدت بيبتي كالت صعدتلج باست وانتي نايمة
للظهر كل مادك على ماما اتكول بعد مادخلوها...
بعدها ماما كامت ماتجاوب على التلفون...
كلش ظل بالي...وبيبتي كامت تصلي وتدعي
اخر شي العصر دكيت على ماما جاوبتني...
تبجي وتعيط...الحكي هاجر نور ماتت
_شنو...شبيج ماما شتحجين...
بس ما اجاني جواب غير بس صوت بجيها...
لبست عباية على جتفي وشال بسرعة
وطلعت اركض حتى بدون ما اكول لبيبي
او اوصيها على عمر....
اخذت تاكسي للمستشفى...
احس جسمي كله يرجف ...وگلبي من كد مايخفق
احس راح يوكف...هذا كله ومانزلت دموعي
وصلت للمستشفى ماعرف شكد شمرت كروة على السايق...
دخلت اركض...لكيت هوسة بالمستشفى...
جانت اهلية ...وظلت اعيوني ادور بين الناس...
شفت امي بركن كاعدة بالكاع...
ركضت عليها وكعدت كبالها...
_شنو ماما شبيها نور
رفعت راسها وعيونها صايرات جمر...
_لج ماما ماتت...ماتت
_شلون...هية داتجيب شلون اتموت
_صار عدها نزف وماتلاحكولها....
امي تحجي واني صافنة عليها...
عقلي مايستوعب...شلون تموت وحدة داجيب
سمعت صوت عركة وناس اتهدد...
التفت شفت زوجها يتعارك وية مرة ورجال
عرفت المرة الدكتورة...
جانت ادكوله صوجكم...
صار يومين من حددت وكتلكم هسة ندخلها الجارة لاطشة على المثانة....
وصارت لغوة بينهم واجى واحد سحب احمد من شكله مبين اخوه...
جان التلفون بيدي دكيت على خوال امي وعمامها
حتى يجون للمستشفى...
وقبل مايجون اتقدمت لاحمد وامه واخوه جان واكف
_يعني ما كافي شتلتها سنوات وضيعت عمرها
ما كافي خليتها سنتين تاخذ ادوية وترجع ليورة
حتى ترضي اهلك...
النوب اتموتها...ليش ماسويتلها العملية من وكت
ليش...كمت اصيح عليه...
امي اجت تسحب بية...
عوفيني...الله ينتقم منك ياظالم...
الله مايضيع حقها ويطلع حوبتها بيك وبأمك ...
ظلام ماتخافون ربكم ...
استكويتوا على مرة...
هو شفته عصب...بس اخوه لزم
وامه جاوبت...
_عيب عليج تحجين هيج...هية هم بنتنا
هم محروك كلبنا عليه
_الله يحرك گلبج من صدك وتشوفين لوعتنا
اتقدم احمد علية...
بس بلحظة اكو شخص وكف بينا...
_شنو تريد اتمد ايدك على مرة
باوعت شفت ابن عم امي جاي...
هو رجال جبير يطلع عمره بالخمسينات
شوية
بقوا يتلاغون وامي سحبتني...لان المستشفى امتله اشي من اهل امي واشي من اهله...
بس طبعا ماقبلوا ينطونة الجثة لثاني يوم...
رجعنا ولد خال امي للبيت...ولكينة بيتنا هوسة
بنات عم امي وعماتها والخالات...
طبينا لكيت بيبتي لازمة سبحتها تسبح  ودموعها اتصب...
وابني طاك بجي ابيد وحدة من بناتنا...
اخذته وعفت الكل وصعدت لغرفتي...
اريد تطلع دموعي گلبي نار....
من البجي عمر نام...واني سمعت صوت جوة...
نزلت اركض...لكيت عم امي يحجي وية بيبتي
يكولها زوجها مايقبل يكول ادفنها بالنجف
_جاوبته...ليش هو بكيفه
جاوبني...عمو ماكو فرق
اني جنت اعاند من ضيم گلبي...وبعدين حسيت
مو من حقه يفرض علينا
امي ساكتة وادموعها ادير....
_اذا ماكو فرق شكو معند...
خلي ينطينا بنتنا ...كل واحد حر بمعتقده
جاوبني...والله عمو صارت مشكلة بالمستشفى بينا وهوسة...
بعد بكيفكم...
ببيتي جاوبت...اني اخابره...اريدها يم اخوها حتى اكدر ازورهم...
غريبة هالمرة عليها صبر عجيب...
وفعلا بس خابرته...استحى وكال براحتكم
بيومها مانمت للصبح...ابد ماغمض جفني لو لحظة...
اتخيلها بمكانها...
اتذكرت شلون جنة نشكي وحدة للثانية...
جانت اختي وصديقتي وخالتي...
عائلة كاملة لي.......
الصبح امي ماقبلت اتروح...كالت مالي گلب
كتلها اني اروح وية بيبتي...
من رادوا يغسلوها...دخلت وياهم...
ردت اودعها...بس ماكدرت اكمل...
طلعت ركض...واني اكول لنفسي
شكد گلبج جلد وقاسي ...
مرت تلث ايام علية واني بنفس مكاني اخذ ركن
اشوف النسوان من تجي تاخذ من خاطر بيبتي
الي ماتركت السبحة من ايدها....
جانوا جوارين يجون يستغربون عليها...
بس هو هذا طبعنا نعلك قرأن ويبجون بسكوت
وية نهاية الفاتحة اجى خالي
طبعا زوجها ابيته هم سوة...
بجيته بيبتي نهارت وتلكته شابكته وتبجي...
وما حسينة الا وكعت بين ايدنا...
ضربتها جلطة...بقت كم يوم بالمستشفى وامي وياهة
يوم رجع خالي من المستشفى...
_هاجر
_نعم خالوا
_احمد زوج المرحومة اجى اليوم للمستشفى
وعاتبني علي سووه عمامي
_خلي يولي ...لو بي خير ما جان السبب بموتتها
_لا خالوا استغفر الله...هذا قدر ربنا...
كل واحد وساعته
_عموما خالوا هسة شيريد
_ما يريد زار بيبتج...وبيبتج طلبت منه بنت المرحومة
_خالوا ليش اتكول المرحومة...كول نور عفية
دنك...جنت مقدمة له جاي...
شفت دموعه وكعني بالاستكان...
ومن جاوب جان مخنوك...
_والله ياخالوا صعبة علية...
ماجاوبته...كلهم يبجون ويرتاحون الا اني
من طلعت بيبي من المستشفى...
كالت راح يجبون بنت نور...
امج ملتهية وياي...تكدرين اداريها
_بس خلي يجبوها...احطها بعيني...
مصعب...انتوا شعجب ما شايفيها الطفلة
سلوى...هو من صارت الهوسة بالمستشفى
ام ابوها اخذتها وماقبلت تنطيها لنا...
مصعب...خاف ماعرفتوا تتفاهمون وياهم...
سلوى...لا عبالك صارت مسالة عناد...
مصعب ...هسة مو قبل الرجال ما كال شي
سلوى...اكيد محد كدر يتحملها...لان امه جبيرة بالعمر
ونسوان اخوانه عدهن اطفال...
ثاني جان اول يوم اداوم بالدائرة بعد عشر ايام
رجعت للبيت تعبانة تلكاني عمر
_ماما...عنونة...تعاي تعاي...دابوها عنونة..قصد جابوها
يجر بيدي...عمره بهالوكت سنتين ونص
دخلت للهول...شفت بيد امي طفل مكمط
بقيت واكفة بمكاني...
سلوى...شوفيها هاجر تشبه نور
نسخة منها...
حجتها وصوتها مبحوح من كد ما باجية
اقتربت منها ومديت ايدي للطفلة...
صدك جانت تشبه امها...من شلتهة تمللت بين ايدي
اذكرت وصية نور...
دنكت اشمها...وبوكتها يلا نزلت دموعي...
ماعرف جنت مامستوعبة....
لو مجذبة نفسي....
_شسماها
_نور...على اسم امها راده
ضميتها لصدري ودموعي ماتوكف...
اخذتها وصعدت لغرفتي وعموري وياي
_عموري...هاي العنونة اختك...دير بالك عليها
_اييي..ماما..
بقيت للصبح اباوع عليها وابجي...
هاي هية نور بعد ماشوفج...شحصلتي ...
هاي بنتج بقت وحدها....
لا مو وحدها لو اعرف شماسوي مااعوفها
اخذت اجازة اربع اشهر من الدائرة...
وبقيت اداريها عبالك بنتي...
بس تفاجأت من خالي مرة كاعدين على العشى
طبعا الاكل تسوي امي...
ينصب يدوب نذوكه...
محد عنده نفس...والبيت كله كابة وحزن...
بيبتي اغلب وكتها بفراشها....
مصعب...باجر اتفقت وية ولد صديقي راح يسهلي شغلة الجوازات...
سلوى...وعمر شلون
مصعب ...اني اخابر ابوه واتفق وياه يسويله
سلوى...من ايكول يقبل
مصعب...كولوله اجازة نطلع تغير جو...
ومن اتروح لتركيا الله كريم
هاجر...اوكفوا ...اوكفوا...شنو السالفة
مصعب...خالوا انتو بعد ماعدكم كعدة هنا...
بيبتج اكدر اسحبها...بس انتوا لا
رتبتلكم وضع بتركيا وقتي...
وهناك اتقدمون على يو ان ...واني اساعدكم
هاجر....وبيبتي تقبل
سلوى...بيبتج هم يحتاجلها علاج ولازم نشوفلها دكتور هناك...
هاجر....وليش نهج....بيتنا ...وظائفنا
قاطعني مصعب...خالوا بيبتج وضعه تعب...
وماكدر ابقيكم وحدكم
هاجر...طول عمرنا وحدنا
مصعب...الوضع تغيير
هاجر...شلون يعني....
مصعب...يعني وضع داعش وغيره وماتعرفين شيصير باجر وماكو رجال وياكم
سلوى...اذا تخافين خالد مايقبل على طلعة عمر لا تكولين راح نستقر هناك
هاجر...خالد منو...ابنه بس بالجنسية ولا اهتم شيكول...
بس خاف ابو نور يعترض
سكتوا...
_شبيكم...شو سكتوا
مصعب...حبيبتي...ابوها يريدها...
كمت وكفت...شنو يريدها...تحجي صدك
عمرها شهرين هسة...
جابها عمرها عشر ايام...ريحتها تكتل...محد دايرلها بال....
وهسة من ربت وصارت يريدها
مصعب...خالوا هو كم مرة اجى يريد ياخذها
وبيبتج توسلت بيه...
غير مسوي تقدير لنا وعايفها
هاجر...منو عنده يداريها...
سلوى...مانكدر نكوله هالشي...عيب
هاجر....ليش احنة مالنا حق ...هاي هم بنت بنتنا
غير نعرف وضعها...
اني ماعوفها...هاي وصية نور ...
لو تنكلب الدنيا ماعوفها...
كمت اريد اطلع حاجاني خالي
مصعب...خالوا لا تصعبين الامور علية...اني عايف شغلي وبيتي صار شهرين...
علمود ارتب وضعكم...الناس تتمنى تطلع هسة
وانتوا يوميا وحدة تحجج بشي
هاجر....سافر خالوا الله وياك...احنة كضينا كل ذيج السنوات وحدنا...
مابقت على هالكم سنة...
صعدت لغرفتي..شلت نور من جربايتها وشكبتها
لو اموت ماعوفج...انتي ريحة حبيبتي..
باوعت عليها من كامت تتملل...
سبحان الله يوم عن يوم ايزيد شبهها بامها...
باوعت لعمر وهو يجر بجامتي
_ها حبيبي
_ثيليني
خليتها بمكانها وشلته
_مو انتة صرت كبير مايصير اثيلك
_لا مو تبير...اني عنوني مسل نور
ضحكت...يمة الدودة يمة...دتعال خلي انيمك
بعد يومين بعد ماغسلت لنور ونيمتها...
كدت ابني ودانزل جوة ...
سمعت صوت يهدد...وصوت ثاني يهدي بيه..