ورود شائكة

البارت الرابع

يسعد يومكم....المتابعين الي يسألون عن وقت النشر...ماكو وقت محدد كل ماخلص بارت انزله..
واي تأخير يصير استمحيكم العذر لان مرات الظروف تجبر الشخص على التأخير....تحياتي
همس ليل
مانحن عليه الان هو نتاج الماضي والحاضر ....
كثير من الاحداث التي نمر بها تحفر عميقا في داخلنا
واحيانا بعض المواقف تخلق منا انسان جديد وتلغي داخلنا الكثير من المشاعر.......

سمعنا صوت يمنا التفنا شفنا علي
خالد راسا تركني بس حسيت صرت بنص هدومي
علي...ما اعتقد الي دسووه صح..
خالد...فهمت الموضوع غلط
علي...شلون يعني
اني ماتحملت نظرة علي...
عفتهم ودخلت امشي سريع ويمكن جنت اركض
ورحت للحمامات...لزمت المغسلة واباوع على ايدي ترجف...
عقلي وكف عن التفكير...
اباوع على وجهي بالمراية...مانزلت دمعتي
ابد ما تنزلي دمعة لو شكد ما انقهر...
طلعت من الحمام ورحت للماما...
_وين جنتي شو تأخرتي
_يلا ماما خلي نروح
_شبيج امي صار شي
_لا بس داحس نفسي كلش تعبانة
طلعنا وبطريقنا خابرنا الولد الي جابنا..
انتظرنا شوية واجى اخذنا...
بالطريق دك تلفوني باوعت خالد...
رفضته وسويته ناصي...
_منو دك عليج
_رقم غريب انطيته رفض...
درت وجهي على الجامة اباوع بس تفكيري بعالم ثاني
لحد ماوصلت للبيت يمكن ٢٥ مكالمة...
ودازلي مسج...وين رحتوا...
جاوبيني خلي افهمج...
ماجاوبته...
ثاني يوم جمعة هم ظل يدك علية واني ماجاوب اخر شي قفلت التلفون..
طبعا من رجعت وشافتني نور حست اكو شي
صعدت وراي للغرفة...
_هاجر شصار
_مصار شي...
جنت واكفة مقابيل ميز التواليت انزع بشالي واشمر الدنابيس على الميز
_شلون مصار شي وانتي هيج عصبية
ماجاوبتها...
_زين ليش رجعتوا من وكت...اكيد اكو شيةضوجج
_اهوووو...مو كتلج مصار شي ليش تلحين
_براحتج
عافتني وطلعت واني متأكدة راح تنزل لامي تسألها
نزعت الفستان وشمرته...
ومسحت المكياج من وجهي...قفلت تلفوني وتمددت بجربايتي واني افكر...
شراح اطش حجاية بالدائرة ....
اكيد راح يتغنون بيها...دائرتي واعرفها...
مايصدكون يلكولهم سالفة ....
ثاني يوم ماجان لي خلك لاي واحد شكد حاولت وياي نور وماما بس جانت حجايتي وحدة مصار شي وعندي صداع...
واخر شي لجأت لغرفتي وتمددت بفراشي
فتحت موبايلي واجت المسجات تهلهل
كلها...جاوبنيني خلي افهمج...
ليش ماتردين...ماجنت قاصد الي صار والله
وج بابا اني زعطوط هيج تسوين وياي
غير المكالمات الفائتة...اخر مسج كاتب
وعزة جلال الله اذا ماجاوبتيني اليوم بالليل اجيكم
ولا تعتقدين مااسويها
كلت خاف صدك يسويها...
جاوبته بمسج....شدريج استاذ...تسببتلي بفضيحة
راسا جاوبني...ليش قافلة تلفونج...وبعدين فضحتيش...
ترة موقف عابر مو اكثر وشرحتله للولد وتفهم
_شتفهم هذا حجي...الاحد راح ينطي الحدث لواحد عود صديقه وهذا راح يوصلها لغيره وهكذا
_شصار مو لهدرجة
راح ادك عليج جاوبيني...
بس دك رفعت التلفون
_شلونج هاجر...ليش قفلتي التلفون غير تخليني افهمج
_شتفهمتي رحمة لاهلك....هو هذا هم موقف تخليني بيه
_مو كتلج فهمته لعلي
قاطعته...شو انتة تحجي عبالك جديد على الدوائر
ليش ماتعرف الحجاية تنطش لان ناس تسر ناس
وكل واحد يوصي صاحبه لا تحجي وهكذا
_ترة الموقف مايستاهل كل هذا
_ها يعني سمعة بنات الناس هيج سهلة عندك
_اني مقصدت هيج...تنهد بقوة حسيته عجز عن تفسير الموقف
_هاجر...ثقي بالله نيتي خير وياج وهذا الي ردت اكوله لج بالحديقة...
بس انتي مانطيتيني مجال...
جنت اريد اعرف ظروفج شنو ...
وهسة مستعد بكل الاحوال اذا يرضيج باجر الصبح
اجيب امي بس اشرحيلي وضعج
_انتة تزيد الطين بلة
_شلون يعني
_تحسسني اني اطالبك تصحح موقف وتتقدملي
تعصب بين من صوته...
_ماافهم شلون تفسرين الامور ...
_ماتحتاج الامور تفسير...وحدة ماتعرف عنها شي شلون تتقدملها
_مثل كل شاب عجبته بنية...
ترة عدنا اهم شي اخلاق البنية...
وبعدين صار اربع اشهر اعرفج ومراقبج...
وماصرنا اجانب حتى نحتاج نتعارف فترة يلا اجي اخطبج
تبسمت بداخلي حسيته راد يكول غير كلمة بس استحى مبين من تردده من وصل كلمة تعارف
_هم ارجع واكولك ماتعرف عني شي...
يجوز من تعرف تغير رأيك
_عمي باجر عطلة تريدين اجي لبيتكم وتترخصيلي من اهلج وفهميني الوضع
واذا هالشي صعب ويحرجج اطلعي باجر ونتقابل بمطعم واحجيلي..
ها شو ساكتة....
_موقف شهامة بس ماكو داعي له
_مو شهامة...دكولج هاي نيتي من البداية
_فكر افضل لك...
من رخصتك...
سديت التلفون ...بعد مادك علية...
ولحد الاحد روتيني العادي بالبيت...
بس جنت افكر شنو راح يصير الاحد
واخيرا قررت ماداوم واخذ اجازة
لان صار فترة مماخذة...
خابرت ام حيدر اتقدملي اجازة...
والظهر دزلي مسج...ليش ماداومتي...
جاوبته تعبانة...
وبنفس اليوم خابرت عبير تسألني ليش طلعنا قبل العشى
بس حسيت وراها حجاية...
_عبير انتي بياحال جنتي وتعرفين منز اتعشى ومنو لا
صاير شي
سكتت شوية ...صراحة تعرفين علي صديق اياد
و...
_وحجاله على الموقف الشافه...واياد ماقصر اجى حجالج...
وباجر الكاها منطشة بالدائرة
_لا هاجر فهمتي غلط...
اياد مو من هالنوع...وعلي ماجان قصده بس جان يريد نصيحة على شغلته وية هبة...
واني حبيت انبهج لان اعرف اخلاقج شنو
_اشكرج...باي
راسا دكيت على خالد
_هلو هاجر...شعجب داكة علية
_داكة عليك حتى اكولك رحملله والديك...
صار تلث سنوات محد كدر يجيب طاريي بالدائرة وبفضلك صرت سالفة هسة
_على كيفج ليش هالاعصاب فهميني الصار
_لا عمي ماصار شي بس خليت الي يسوة ومايسوة يسولف بية ....مشكور يا ابن الناس ماقصرت...
وسديت التلفون...
ظل يدك وماجاوب...
الاثنين داومت واحس بنظرات الكل استفهام..
رغم ادري بعد وكت لطشت السالفة لان اياد مجاز هو وعبير...
وعلي مالحك ينشرها...وماعرف شكاله خالد لان افتهمت من عبير ما راح يحجي موصيه...
بس هذا حجي هيج...وهم ردت استغل الموقف خاف يبرد...
بيومها ماطلعت من الغرفة وام حيدر كل شوي تسألني شبيج...
ب١٠ تقريبا دخل خالد...صباح الخير...ست  هاجر ممكن تجيني للمكتب
طلع ...وراه بشوية رحتله...دكيت الباب ودخلت
_شنو معنى الي سويتي البارحة...
غير تفهميني السالفة قبل ماتتهجمين...
_ليش السالفة جديدة وماتعرفها...
انتظر يومين واتكوم تسمع الحجي بأذنك
جر نفس مال واحد يريد يسيطر على اعصابه
_انتي ليش هيج صعبة....انطيني مجال اصلح الي صار....واذا ماعاجبج شوفي الحل الي يناسبج
_حليش هية انلاصت اي حل مالها
_زين انتي رافضتني...
دنكت واني ساكتة...
_خلص يعني ماعندج اعتراض علية...
اختاري طريقة نكعد نتفاهم...
_خلي اشوف ماما واردلك خبر...
من رخصتك
باقي اليوم ماشفته ...من رجعت على الغدة انجمعنا
_عندي خبر واريد اخذ رأيكم
ام مصعب...خير ان شاء الله
هاجر...ماما تذكرين استاذ خالد...يريد يتقدملي
سلوى...شكو بيها حبيبتي مبين خوش ولد
ام مصعب ...مين مامين
هاجر...ماعرف كل ظروفه ولا شرحتله ظروفي
سلوى ...شبيها ظروفج
هاجر...مابيها شي بس ابوية شمرنا وبدون مايسأل
ام مصعب.. امج مو اول وحدة مطلكة وبنتها عدها
_صح بس مو طليقها تبرى حتى من بنته ولا عمام عدها ولا عشيرة
سكتوا
_عموما لازم اشرحله الوضع وماكدرت بالدائرة...
اذا بيها مجال يجي هنا ونشرحله
سلوى...انطي موعد
هاجر...راح اكوله اليوم العصر...
عفتهم وكمت...وطول الكعدة نور جانت نظراتها متسألة...
وفعلا راسا اجت وراي...
اني جنت اكلب بتلفوني كاعدة على جربايتي
_هاجر...هذا مو نفسه الولد الي اتراهنتوا عليه
_اي ...جاوبت وعيني على التلفون
_مو كلتي تركت السالفة
_يا سالفة
_الرهان
_وشجاب الرهان هسة...داكول يريد يخطبني
_غير كملتي اللعبة...ترة تاليتها مو زين
ممكن صاحبتج تروح تفتن عليج...
وتسويلج مشكلة
كمت وكفت وتقدمت على الكنتور... طلعت جنطتي
ورجعت لمكاني ادور بيها
_مو داحجي وياج
_واني دافكر بكلامج...
يعني مثلا تروح اتكوله ...
استاذ اني تراهنت وية هاجر منو توكعك..
كل عقلج ليش شبيها تخبلت
_ليش اتخبلت
_لان الحجاية تمسها ...
وبعدين اني مراح اكول على الخطوبة الا بعد مانعقد
_وشنو الفرق
_الفرق هية بنية واكيد راح تخاف على سمعتها
واني اكدر اقنع خالد مو صحيح الكلام
_شلون بلة
_لان عمري ماحاولت اتقربله بالعكس هية جانت اتحاول...
وثانيا هو اختارني  وماقبلت بسهولة...
يعني اذا كالت راح تلتف السالفة عليها
_اول مرة احس ماعرفج....
لج احنة عمرنا ماتعاملنا بهيج اسلوب...
مين جبتي هالتفكير ...شو امج كلش فقيرة
رفعت راسي لها...
_لو ما فقيرة جان كدرت تثبت نفسها وية ابوية ...
ومجان شمرها هيج...
وانتي هيانج عمرج ٣٠ وبعدج تنتظرين الفندي يقنع اهله حتى يزوجج...
مو كل الاوقات يفيد الفقر...المهم ما اتنازل عن سمعتي
_مين جبتي كل هالمكر
_اني نتاج اثنين فا اكيد اخذ شي من الطرف الثاني الي يكولون عنه ابوية...
اسكتي هسة اريد اخابر...
بقت تباوع علية...حسيتها خافت مني...
بس نور اقرب لي من اي انسان اختي الي ماجابتها امي...
لذلك كل الي بداخلي اطلعه كدامها بدون تحفظ
دكيت على خالد...وراسا جاوبني
_شلونك استاذ
_الحمد لله ...شنو هالرسميات...
_متعودة...ماما اتكول تكدر تتفضل العصر يمنا حتى تفتهم الوضع
_صار تأمرين انتي وامج
حسيت اكو فرحة بصوت
_مع السلامة..
سديته واني خايفة واكو غصة بكلبي...
اذكرت من دخلت الجامعة...
بوقتهة جنت بعدني ماعرف البشر...
وخالي عبد الرحمان جان بعده عايش...
نصحني ما احجي عن وضعي لاحد...
ومن سألته كال الوكت مو زين ...
واكتفى مافهمني اكثر...
والتقيت ببنية صارت صديقتي...
لحد نهاية الكورس الاول ماحجيتلها شي
وبالكورس الثاني...عود صارت قريبة مني
ووثقت بيها حجيتلها ...
وتماشت وياي بس من راد ولد ويانة يتقدملي
واجى كالي واني مامانعت لان خوش ولد
واخذتله موعد وية خالي...
بس اجى اعتذر كال ماكدر حاليا...
راح أجلها...وبدى يتهرب وبعدين تفاجات خاطب غير بنية...
الموقف صدمني ...بس صدمتي جانت اكبر من واجهته وكتله ليش
كال سمعت عن وضعج
_شبيه وضعج
_انتي اعرف
_لا مااعرف...
_لا تزعلين...اذا ازوجنا وصار عدنا اطفال شتكولين لهم عن جدهم...
لو شكول لاهلي منو ابوج
_شنو هذا الحجي...ابوية مسافر...
_منو يصدك واحد تارك بنته بطوله ولا يسأل عليها
_شتقصد
_الحجي الطالع ابوج مزوج امج بالسر...
وبعدين عايفها وما معترف بيج
ماعرف شكد جرحتني الكلمة وماحسيت الا ايدي نزلت على وجه...
حسيت يقصد.غير شي...
هو تفاجأ بالراشدي....
وهمزين ماجان اكو احد قريب...
ورغم حسيته ممكن يردلي الضربة...
بس العصبية والقهر بساعتها عمتني
_امي اشرف منك...على الاقل عرفت تربيني
الباقي على مامتربي وماالتزم بكلمته كرجال
عفته قبل مايحجي وطلعت اركض خارج الكلية
اخذت تاكسي واول مرة اسويها...
ومن وصلت كبل لغرفتي...شكد صاححوا براي
ماجاوبت...بجيت لمن كلت بس...
بجيت لاب ما سأل عني...بجيت لصديقة غدرتني وشيعت علية....
وبجيت لان جنت عمية ووافقت على واحد طلع مو رجال...
صح ماحبيته بس تأملت بيه ...
دخلت نور...ومن لحت علية..
حجيتلها..
_ربج رايدلج الاحسن وبين على حقيقته من البداية
المفروض ماتنقهرين ....
هيج نموذج حرامات بيه الدمعة....
هاي كانت اخر مرة ابجي بيها....
بعدها گلبي قسى صار مو من السهولة يتعاطف وية الاخرين
ومن هاي اللحظة ابد ماقربت احد من حياتي
كل علاقاتي صارت سطحية ....
قطع صوت امي ذكرياتي...
_نعم ماما...
باوعت عليها من المحجر مال الدرج
_بيش الساعة يجي الولد
_ما اعرف كتله العصر..
_غير تاخذين موعد محدد وياه
_شعدنا شوكت مايجي خلي يجي
رجعت لغرفتي طلعت بنطلون جينز وعليه قميص طويل وخليت مكياج خفيف ...
ايدي جانت ترجف...خوف بداخلي خاف يرفض
ومايعجبه الوضع ...
شنو موقفي.....وبنفس الوقت شنو ذنبي ابوية طلع
نذل...
اي نذل اكولها بصوت عالي...
اذكر من جنت صغيرة ويجينا يكوم يحجي على امي ليش ما دزيتيها لاهلج مو تدرين جاي ..
_ادري مو بنتك ماتريد اتشوفها
_يعني هسة اجيج كم ساعة اريد ارتاح...
لو اخلصها بهوسة الجهال
_يا جهال حرام عليك هية بس هالبنية
وهادئة صوتها مايطلع
_باعي ملخص مفيد من اكولج جاي كم ساعة
ادزيها لاهلج
عود من اجي كم يوم بقيها...
جنت اسمع نقاشهم اني ابجي احسه مايريدني
اروح اوكف كدام المراية اباوع لنفسي
اكول ليش ابوية مايريدني..
خاف موحلوة....ابقى خاتلة بغرفتي ومااطلع صوت
علمود ما اضوجه بلكت يحبني....عقل طفلة
ومن جان يريد يروح ويصيحني..
اروحله واني خايفة ومرتبكة...
هو ينطيني فلوس ويكلي خلي ماما تشتريلج العاب
جنت اباوع عليه ...
شكله جان يخوف شواربه سود ثخان
وهو طويل بضخامة....
ومع ذلك جنت اتمنى يحضني او يكلي شلونج بالمدرسة..
مرات من يطلع اسمع صوت ماما تبجي بالغرفة
ادخل اسألها ليش تبجين....
تخليني بحضنها...مابية شي لا تخافين
منظرها هواي يتكرر من يجي جية سريعة ويروح
هالشي جان يزيد من حقدي عليه...
وكبرت وكمت افهم واميز...
بالوقت الي يخابر يكول راح اجي كم ساعة
بدون نقاش ادخل ابدل وبس يوصل اسلم عليه
واركب وية سايقه يوصلني لبيت جدي..
زين اذا سألني عن عمامي شكوله...
هذا السؤال جان محيرني...
عمامي جانوا يدرون بابوية مزوج...
ومرة لحيت عليه اريد اروح وياك من كال لامي
عدنا عرس ابن اخوية...
ردت اشوف بيت جدي....
اشوف اخواني من ابوية....
ورحت اذكر جان عمري ثمن سنوات....
جنت لابسة بدلة بيضة واصريت على امي تفتح شعري...
بس من دخلت لبيتهم حسيت بالغربة...
الشخص الوحيد الي استقبلني....
بيبتي ام ابوية...
اخواني شفتهم شباب لان كلهم اكبر مني...
اصغر واحد بالاول متوسط.....
عندي اربعة اخوان من ابوية....
جان الكل يسمعني حجي من النسوان
الي اتكول هاي بنت الك....
والي اتكول هم امج لها عين وادزج....
واخوية الصغير اتعمد يوكعني...
اخر شي طكيت بجي....
وابوية كام يصيح علية...
ليش اجيتي...
رجعني وية السايق...
واول مادخلت للبيت ركضت لحضن امي
ماما ليش يكرهونة...
ماعرف حبيبتي...مو كتلج لا ترحين
خاف لان ماربيت يمهم...ليش ماجنتي دزيني
عدهم من صغيرة
سكتت ماجاوبت...
بس من كبرت اكثر...
عرفت ابوية كم مرة ماخذ امي لهم ويرجعوها
تبجي....
ومن اجيت للدنيا هم كم مرة موديني...
وارجع بعضات واثار على جسمي...
لذلك امي ماقابلة بعد اورح...
اثاري عمامي ماخذين الاخوات...
وكلهن يتكاتفن وية مرت ابوية...
هاي جانت اخر مرة اشوفهم...
وعيت من الذكريات على جرس الباب...
نزلت لكيت بيبتي وامي مستقبلين خالد
وكاعد يسولف وياهم...
طبيت سلمت وكعدت...
امي ترخصت وراحت جابت الضيافة
وبيبتي كالت اكوم اصلي
سلوى...نورتنا استاذ خالد
خالد...اشكرج عمة....ان شاء الله اتكونين هيج
طبعا من زمان جان نفسي اجي واتعرف...
بس بنتج شلعت گلبي...
باوعت عليه...يوم عن يوم اكتشفه جريء
امي ضحكت...هية شوية عنودية
_شوية قصدج هواي...فوكاهة حايطة نفسها بغموض غريب
_يجوز من تسمع ظرفها تعذرها...
من رخصتكم...
_اول مرة اشوفج ضمن محيطج...
هسة اريد اسمع السر الغامض بحياتج
ارتبكت من وصلت لهاي النقطة
_مو سر غامض بس هية حياة شخصية مو شرط الناس كلها تعرفها
_اول مرة اشوفج مرتبكة...
تعرفين من الشغلات الي عجبتني بيج
ثقتج بنفسج....
جان كاعد مقابيلي....
_راح احجيلك وانتة حر بعدها اذا ماعجبك الوضع
وحجيتله كل وضعي طبعا بدون التطرق لحادثة الكلية...او الاحداث الصغيرة الاخرى
حجيتله وضعي العام...
جنت احسه من احجي مرات يتعصب....
لحد ماخلصت شفته تعصب كلش...
دنك ووطول يلا جاوبني....
وللحكاية بقية....