ورود شائكة

البارت الحادي العشر

فقدان احباب لنا يجعلنا نشعر بالتعاسة...
وشي اخر يطغي على افكارنا ويشوشها...
اهو الحنين لهم..ام الرغبة في القاء الوم على شخص
لنفرغ مابداخلنا من غضب الفراق...
همس ليل
جانت الاصوات لامي وخالي والصوت الغريب من وضح جان صوت احمد الي يحجي بعصبية وعنتكة
فهمت من الحجي يريد ياخذ نور...بقيت عمر بالهول وفتت عليهم ...
جان خالي وامي كاعدين على القنفة مقابل الباب
وهو بالقنفة الثانية مقابيلهم....
من فتت سكت والتفت على الباب يريد يشوف منو دخل...
راسا بدون حجي وجهت كلامي له واني واكفة يم الباب
_اريد افهم ليش دصيح ...ديحجون وياك بهدوء ليش هالصوت العالي...
فتح عينه متفاجأ...
ورجع التفت على خالي كانما يريد منه يردني..
بس اني كملت حجايتي...
_شتريد ...بنتك عمرها شهرين من يداريها من تأخذها...
شو جبتها ريحتها تكتل محد مكلف نفسه وغاسللها
فوك مامداريها
قاطعني وهو يوكف ...
_احتراما لخالج ما اجاوبج ...
_ليش مجاوبني مو كد مقام حضرتك...
مصعب..هاجر كافي عاد
_هو شنو الكافي....
شنو السالفة خالو...نسيت اختك...
مو الدكتورة نفسها كالت صوجهم اخروا العملية
احمد...مصعب اسحب بنت اختك...
فوتتلها هوسة المستشفى...بس اي حجاية زيادة ما اقبلها...
_لا والله...مو تايهة لك...
تقدم خطوة...بلحظتها وكف خالي
_احمد شنو السالفة
_لم بنت اختك والحجي يصير وياك مو وية النسوان
_وشبيها النسوان...امك مو مرة ومشت حجايتها عليك وموتوا البنية لو محسوبة على الزلم
هالمرة صدك تقدم علية وخالي صار بينا
صاح خالي بية...اطلعي منة هاجر
_راح اطلع بس مو لان حضرته راد...
بس لان اني مايشرفني احجي وياه...
مصعب...سلوى جري بنتج
امي جانت واكفة يمي من طبيت عرفتني راح احجي
وطول الوكت تحاول اتسكتني...
جرتني هالمرة تريد اطلعني برة الصالة..
طلعت خطوة ورجعت عليه
_خلي يكون بعلمك...نور بنتنا هم ولو اعرف احاربك بكل المحاكم اخذها منك اخذها...
ها ولا تنسى تقارير المستشفى وشهادة الدكتورة
الا افضحكم بالمحاكم...
بهاللحظة جرتني امي بقوة وسدت الباب
ماشفت ردت فعله...
بقت اجر بية ودفعتني على القنفة بالهول...
كعدت واني اتنفس بقوة من العصبية
_شبيج تخبلتي....شنو هالاسلوب
_اني تخبلت...لو انتو خانعين كلش...
ولا عبالك بنتكم راحت بعز شبابها
مو سمعتي الدكتورة شكالت...
_لا تحجين شي ماتعرفي..
_لا اعرفه لان قبل يومين من العملية ...هية اجت هنا وكالت..
ماقبلوا يسويلي العملية الا نتاكد ما اجيب طبيعي
طلعت بيبتي من الغرفة...الجلطة خلتها اغلب الوقت نايمة
_شبيكم صوتكم عالي
امي من شافتهة هدت...واصلا امي اعصابها جدا باردة...ماتتعصب بسهولة
سلوى...ماكو شي ماما
اني سكتت اخاف عليها...
ام مصعب...هذا مو صوت احمد
سلوى...اي هو ومصعب جوة
ام مصعب...خلي اشوفه
راحت تمشي على كيفها...من دخلت التفت امي علية
_ارتاحيت هسة سويتي مشكلة...
وبيبتج تعبانة...
الولد بقى نور علمود بيبتج ومن سمع من مصعب نريد نسافر اعترض وراد بنته
حاول مصعب يقنعه والولد حقه بنته وهو حر بيها
_لا مو بس بنته...وبعدين من كاللكم اريد اسافر
_اهووو...لج انتي ليش راسج ناشف
بهالاثناء طلعت بيبتي وراها خالي
مصعب...لج انتو شنو مالج جبير...
اني ماردت اكسر بيج كدامه...
بس اذا تعيدها ماتلومين الا نفسج
هاجر...اريد افهم ليش انتو هيج متساهلين وياه
مصعب...شبيج انتي شنو متساهلين وياه
هو كلشي بالعرك...شخلينة للهمج لعد
ام مصعب...بيبي صح حجي خالج...
الولد ماشفنا شي مو زين
هاجر...والله راح تخبلوني
عفتهم وصعدت لغرفتي...
فات كم يوم مانعاد فتح الموضوع بس گلبي ما مطمن...
امي وخالي كم مرة طلعوا من الصبح...
وكم مرة اخذوا بيبتي للدكتور تجيك...
اني جنت شبه مقاطعتهم....بس من يودون بيبي
اسالها ...
جان الدنيا ليل نيمت الصغار وماما صاحتني..
نزلت لكيتهم هية وخالي كاعدين ...
كعدت وياهم...
مصعب...شوفي خالوا اني نهاية الاسبوع لازم اسافر...
جايني انذار من شغلي...
وماكدر اسافر اذا ما اطمن عليكم...
هاجر ...سافر خالوا الله وياك...
احنة ماعلينا شي
مصعب...بنتي الله يرضى عليج اريد تريحيني
هاجر...كول خالوا تامرني
طبعا ماما  ساكتةعبالك متفقين على شي
_اريد تخلصين جوازاتكم وتلاكوني بتركيا
_خالوا ماريد اسافر...ليش اعوف كلشي ونهج
_هسة شراح تعوفين...الناس تتمنى اتسافر وانتي تريدين تبقين...
شتلكين بالعراق ماتكوليلي...
_ مو كل الناس...وبعدين ماكدر اعوف نور...
امها وصتني عليها...
بس هية بقت من ريحتها...
شيصير بيها لو عفناها
_خالوا نور اول وتالي ابوها ياخذها
_ميخالف على الاقل تكبر شوية...
وبعدين ابوها اكيد يريد يزوج بعد فترة
_ازوجيه انتي وتبقى يمج
وكفت من سمعت الحجاية...
_شتحجي خالوا...شلون ازوج رجل خالتي..مو حرام
_اكعدي خالوا ...هذا يسمو محرم وقتي ...مثل زوج الاخت في حالة الطلاق او الموت يحل عليج
رجعت كعدت...حتى لو مستحيل ازوجه
وبعدين هذا شنو من بشر بعد زوجته ماقبطت تلث اشهر يريد يزوج
_هو الرجل ما كال هالشي...ولا كال اريد ازوج
بس انتي كلتيها...اول وتالي يزوج
_يطبه مرض خلي يزوج شسويله
صاحت ماما....عيب هاجر شنو هالحجي
مصعب...انتي مو تريدين تربى عندج
هذا الحل الوحيد
_لا مو حل هذا...اكيد زوجته الجديد ماتريد طفلة صغيرة اول زواجها...
اني اقدمله فرصة يزوج براحته
_هذا مو حجي...هو هسة معند يريد بنته
ومن حقه مانكدر نلومه...
قاطعته...خالوا شيل هالفكرة من راسك...
لو تنطبق السما على الارض ما ازوج هالعكرة
_خلص انطي بنته وحظري نفسج للسفر
_شنو خالوا تريد تلوي ذراعي ...
ترة احنة صار سبع سنيين عايشين وحدنا شنو الجديد
_الجديد وضع البلد مو امان وانتو نسوان
سكت
_كتله كملها مطلقات
_خالوا الناس ماترحم وما اكدر اعوفجن وحدجن
_بيبتي ويانة
_امي راح اخذها...راح اسافر وارتب مستشفى ودكتور واخذها
_ليش شبيها بيبي...
_يرادلها تبديل صمام....ومن اخذها احتاج امج
وياهة...
بقى بكيفج تريدين تجين وياهم تعاي
تريدين تبقين كدامج خيارين...
لو ترجعين لطليقج لان اكثر من مرة اجى حجى وياي
يريد يرجعج
لو تزوجين احمد وتبقين بالبيت
_شنو هاي...مرتبين وضعكم...ومتفقين واني شنو
مالي موقع من الاعراب...
لو مامعترفين بوجودي...
التفت على ماما...شنو ماما استغنيتي عني
سلوى...لا ماما شنو هالحجي...بس انتي ماتسهلين شي ومصعبة المسالة...
كلام خالج صح...بعد مالنا كعدة وحدنا
والاهم من هذا بيبتج تحتاج عملية
_هو شنو الي مصعبته...ترة انتو شابجين الامور
كام خالي...شوفي ملخص الحجي تختاري شي
انتي جبيرة وما اريد افرض عليج...
بس لا توصليني لهيج مرحلة
_رجعة لخالد لو تنطبك السما على الارض ما ارجع
_خلص لو السفر لو احمد
_اكيد السفر ولا احمد
كمت من يمهم واني افور...
ماتحتاج المسالة كل هذا...
بس السفر اهون الشرين...
بقت بس هاي ازوج هالمتخلف...
لنهاية الاسبوع سافر خالي ...
جان عنده بيت بغير منطقة...
سوى وكالة لامي حتى تبيعه...
وبنفس الوقت عرضوا هذا البيت للبيع...
كال ناخذ مشتمل صغير نبقي هنا...
والفلوس اتفيد بيبتي بالعملية...
وهم تنفعنا نبدي بيها بتركيا...
لحد مايكدر يسحبنا يمه...يجوز نطول سنوات
اني جنت اكعد متأخرة لان ابقى سهرانة وية نور
واجازتي بقالها شهر وتخلص...
امي قدمت تقاعد...فخطية داتمشي
بكل المعاملات وحدها....
كعدت اليوم من وكت ونزلت اني وكفشتي ولابسة شورت تقريبا فوك الركبة وفانيلا...
احنة نلبس اسود لحد الاربعين..بعدها لابسنا نيلي طوخ
بيبي ماقبلت...
نزلت للمطبخ ..ادري بس بيبي بالبيت واكيد نايمة..
طبيت واني رافعة ايدي فوك راسي اتمغط...
ومغمضة عيني...
من فتحت عيني بطبتيزللمطبخ...
اباوع احمد كدامي صافن علية...
حسيت النار صعدت لراسي
صحت بيه...شبيك تباوع...ماتستحي
رفع تك حاجب...هو منو الي مايستحي...
باوعلي من فوك لجوة
حسيت على نفسي...ردت الكاع تنشك وتبلعني
والله صعدت ركض...
بس ظلت اعصابي تغلي...شجابه من الصبح
وليش كاعد بالمطبخ...
طول اليوم اشتغل وادردم لحد مارجعت ماما...
انفجرت اول مادخلت
_هذا شجابه وكاعد بالمطبخ...
خلت جنطته على الميز...وعليكم السلام...شبيج فايرة
ومنو هذا
_العكرة احمد
_لج عيب ماما...لو ادري ليش اضوجين منه
ترة خوش ولد
_خوش على نفسه...كوليلي شعنده من الصبح
بالمطبخ
كعدت على الميز...ماما الولد يمشي وياي بمعاملة البيت ...خلف الله عليه...فوك مايساعدني
_لا خلف الله عليه...
وشكو يمشي وياج...ليش تحتاج المعاملة احد وياح
_اي امي...يندل الدوائر...وخطية مكلف نفسه
وعايف شغله حتى يخلصلنا شغلتنا
_محد عاتب عليه...
جان كلتيلي اني اروح وياج...
ترة مايرادلها شي
_وزعاطيطج وين تبقيهم...وبيبتج منو يداريها
سكتت شوي
_حتى لو...شكو كاعد بالمطبخ...
_سويتله ريوك...وبعدين شمدريج كاعد بالمطبخ
ارتبكت شوي...
_ليش مايسمم ابيتهم
كامت...لو بس ادري شبيها اعصابح اربع وعشرين ساعة اتفور...
اني الحيت عليه بين ما ابدل لان كعدت متأخرة
ماراد يكلفني اجى بالمطبخ
_مايصير ماما...يبقى رجال غريب...
مانخلص من حجي الناس
_ها...ومن كلنا هاي الحجاية ..كلتي معلينا بالناس
عافتني وطلعت
بقيت افور ابودي اذا شفته اركعه بشي...
ادري ليش هيج اهلي متساهلين وياه...
طبعا هو دائما يجي يشوف نور...
بس ادزها بيد امي...
خلصت اجازتي وبديت اداوم...بعد ماشفته
ونور وعمر يبقون يم امي...
من يصير عدها مراجعة بذاك اليوم اخذ اجازة
يوم خطنا عطل...
ولد ويانة عرض يوصلنا لان نفس منطقتنا...
وصلنا احنة تلث بنات...
اني جنت اخر وحدة يوصلني...
مادخلني بالفرع...ماردت اكلف الولد نزلني براس فرعنا...
بس خطيت خطوتين...طبكت سيارة يمي..
التفت شفت احمد...
عفته ومشيت رجع اتقدم بصفي...ودنك فتح الباب من جهتي
_اصعدي
طبكت الباب...ما احتاج مثل ماتعرف بيتنا قريب
عفته ومشيت...
بس ما حسيت الا واحد صار كدامي...
_امشي اصعدي داحجي وياج
_ترة انتة مالك حكم علية...فلا تستخدم صيغة الامر
جان واكف كبالي...
اني طويلة بس كدامه حسيت نفسي قصيرة
جنت رافعة راسي اباوع عليه
_عيب من الناس...اصعدي ولا تخليني اتصرف غير شكل
_العيب من تعترض طريقي...فنزاح عن طريقي افضلك
وخرت عنه وردت امشي...
ما حسيت الا واحد جارني بقوة من ايدي...
فاجاتني الحركة ومالكيت نفسي الا مدفوعة
بالسيارة والباب ينطبك بقوة
لاف وصعد قبل حتى ما احاول انزل
التفت عليه...شبيك انتة خبل باي حق هيج تسوي
شغل السويج وحرك..
_لو عندي حق ..وعلي الا اكص لسانج
_من تعرف مالك حق شكو جبرتني اصعد
_نصي صوتج وسدي حلكج
لج شنو هالعرامة الي شايلتها لخاطر ربج
_احترم نفسك
_وعلي الكرار اذا ماراح تتأدبين وسكتين الا اشوفج
الي عمرج ماشايفته
جان يحجي بعصبية...
بداخلي خفت...لان بسيارته...وماعرف شممكن يسوي
وبنفس اللحظة وصلنا للبيت
نزلت قبل مايطفي السيارة...
وطبكت الباب بقوة...
فتحت باب البيت ودخلت وردت اسده بس هو دفعه
_هية هاي اخلاقج
_كتلك احجي عدل واحترم نفسك
راسا لزمني من زندي بقوة...
_واني كلت لاتجاوزين..
انفتح باب المطبخ وطلعت امي...
هو من شافها هدني...
بس لزمته اذتني حيل...
_خير شبيكم تتناكرون...
_ام هاجر افتحيلنا باب الصالة...اريد احجي وية ام عمر
لويت حلكي شكد مؤدب..عبالي حجيتها وية نفسي
_شكلتي
التفت عليه...مو وياك
دخلنا للصالة...
سلوى...خير شصاير...
احمد ...اذا مابيها زحمة شوية مي
راحت ماما اتجيب مي
_خير شرايد
_عدلي اسلوبج...
منو هذا الي وصلج بالسنتافية
التفت عليه مصدومة
_شنو..شنو...عيد الي كلته...
وانتة بأي حق تتدخل وتسال..ها
_بحق هذا بيت عيالي...
بحق خالج وصاني عليكم...
_هذا كله ماينطيك حق...
مشيت اريد اطلع ...وبعد لا تعيده وتحشر نفسك
_نور مابقيها عندج بعد
التفت عليه....شنو...وشعليها نور
_ما مستعد اخلي بنتي يم وحدة مشكوك باخلاقها
ماعرف شلون بخطوتين صرت يمه ...
رفعت ايدي اريد اضربه...
والي ماتوقعته من لزم يدي بسرعة ولواها ورة ظهري
_اذا مسويتها قبل لاحد فهذا مو رجال وسمحلج
بس اذا فكرتي مجرد تفكير تعيدها....
اعتبري الله ما خلقج...
هد ايدي ودفعني وطلع...
بقيت مجمدة بمكاني...شصار...
ليش تصرفت هيج...صح استفزني...
لكن طريقتي هم خطأ...ليش لعد انتقد غيري
طبت امي...شراد منج احمد
_لان حضراتكم دخلتوا بنصنا...اعتبر من حقه
يدخل نفسه بكل صغيرة وجبيرة
عفتها وصعدت لغرفتي...
من نزعت ملابسي مكان لزمته من زندي زركة
شكد همجي لعد...
من نزلت ماما نطتني نور بين ما اتصب غدة وعمر يلعب يمي...
باوعت لنور راح يصير عمرهة خمس اشهر...
كامت تناغي وتضحك وتسوي حركات...
وهية بيضة ومدنفشة وعيونها صفر...
كلش صارت تشبه امها...
دمعت عيني واني اذكر امها...
شلون جنتي عايشة وية هيج انسان...
بعدها بيومين الي بقيت بيهن قلقة لا صدك يجي ياخذها
حيل تعلقت بيها عبالك بنتي...
بالليل كعدت على صوت امي...
نزلت اركض...
_شبيج ماما
_خابري احمد بسرعة...
_ليش شكو...
_بيبتج متخربطة
_خلي اخابر بيت عمج
_لج مو وكتها احمد اقربلنا دقايق ويجي
باوعت بيبتي كوة اتجر نفس...
دكيت عليه من تلفون امي...
من جاوب...اول شي ترددت...
_خير ام هاجر صاير شي
_بيبتي متخربطة امي اتكول بلكت يجينة
_هسة دقايق
صدك بينما امي لبست دك الجرس
وصلت لباب المطبخ اريد افتحه...
وبعدين اذكرت شلابسة...
رجعت لبست على السريع اول دشداشة شفتها
وخليت شال على راسي وطلعت
_شبيها الحجية...
_ماادري تختنك
دخل وياي...
_السلام عليكم ...شبيها عمتي
سلوى...ماعرف احمد خلي ناخذها للمستشفى
ردت اسندها وية امي...
_لا عوفوها ...خلي اشيلها
صدك دنك رفعها على كيف
طلع بيها واني وامي وراه
نزلها بالسيارة وسد الباب...
وامي صعدت يمها ..
هو رجع علية...طبي جوة وقفلي الباب...
ولا تفتحون لاي احد
هزيت راسي...
راحوا واني بقيت على نار...
شوية اصعد اشوف الجهال وشوية انزل جوة اظل افتر...
بعد ساعة دك تلفون بغرفة بيبي...
رحت شفت تلفون ماما...
اكيد نسته من طلعت...
باوعت احمد يتصل...
شلته وايدي ترجف اخاف اسمع شي...