ورود شائكة

البارت الخامس عشر

يسعد مساؤكم...سنة خير وسعادة عليكم...عذرا للتأخير ...بس ضيوف من الصبح لسة كوة كتبت...
حتى بدون ما اراجع الي كتبته...يعني غلسوا على السحكات ...تحياتي
ليس بيدنا حيلة لما تضعه الظروف في طريقنا...
واحيانا نفقد حتى حق الاختيار...
ونكتفي بهزة من راسنا لما يفرض علينا.
همس ليل

مر يومين ماكو شي...اصلا ماطلعت من البيت
لان كلشي عندي...
حتى الخبز جنت مخلية وجبة بالمجمدة...
صح الجهال ماخذين كل وقتي طول اليوم..
بس من ينامون اضوج لان ابقى وحدي
احمد هم تقريبا يخابر يومية يطمن
بس مايجي على نور...يمكن راعة اني وحدي
ثالث ليلة...كعدت على ونة نور...
لزمت كصتها ..نار...راسا خليتلها تحميلة
وبقيت اسويلها كمادات...
نور جانت مناعتها كلش ضعيفة بسهولة
تتمرض...وحرارتها اتكون قوية...
بقيت ساعة انتظر اتفك الصخونة...
نزلت شوية ورجعت صعدت...
ومافادت الكمادات...والاكثر حسيتها تريد تنشمر
نزلتها ركض خليت رجليها بالمي...
رغم الجو بارد...وظليت حايرة شسوي بهالليل واني وحدي...
اخر شي دكيت على احمد...هو ابوها لازم يكون موجود...
شوية تأخر يلا جاوب...صوته من اجاني مال واحد نايم
_خير ام عمر...صاير شي
_اي عفية نور صايرة نار...تعال نوديها للمستشفى
حسيته راسا وعى ...
_هسة جاي حظري نفسج...
لفيت نور بطانية...ورجعت على عمر خطية جان نايم
لبسته فوك ملابسه...
ربع ساعة ودكلي بالموبايل
نزلت وفتحت الباب...واني شايلة نور...
فتحت باب السيارة ..خليت نور لكدام
ورجعت للبيت شلت عمر...ونزلت خليته ليورة
ورجعت صعدت لكدام واني اشيل نور واخليها بحظني...
هذا كله بدون اي حجاية بينا...
ومن الارتباك ماسلمت...
ساق احمد وبالطريق حاجاني...
_هاي ليش هيج تصعد صخونتها
_ماعرف...بس اصور مناعتها ضعيفة...
جانت نور هيج...قصدت امها
شفته سكت...بس باوعت على ايديه...
جان يضغط حيل على الستيرن...
يمكن اني الوحيدة الي جنت ما اجنب ذكر نور
بالعكس اتعامل وية الوضع عبالك هية مسافرة
ما اريد ينسي ذكرها...
حتى لو كان ذكرها مؤلم...
وصلنا للمستشفى...اني شلت نور...وهو شال عمر
من دخلنا للاستعلامات
_ابقي هنا وخلي عمر يمج خطية اشكال الامراض جوة
_تشلع گلبك
_فوتي واني ابقى  هنا
دخلت نور على الدكتورة...ضربتها ابرة
وكالت هاي بلاعيمها محملة جراحة...
خلتني انتظر لحد ماتنزل حرارتها يلا طلعتني...
واحمد جان كل ربع ساعة ايدك علية...واول سؤال جان دكتور لو دكتورة يمج...
لحد مانزلت حرارتها طلعت عليهم...
اول ماشافني اجيت وكف وهو شايل عمر
_شو تاخرتوا
_لحد ما نزلت حرارتها
_خطية هذا الطفل شبع برد...
شفته نازع سترته ومغطي بيها عمر
_ملبسته هواي
طلعنا للسيارة ومن رجعنا بالطريق..
_ترة غلط هذا الوضع...
التفت عليه ...ياوضع
_وضعج...
ماجاوبته...جنت كلش تعبانة ونعسانة
شوية وخليت راسي على الجامة وغفيت
كعدت على صوته ...
_هاجر...هاجر
فتحت عيني مستغربة...شوية يلا استوعبت الوضع
_انطيني المفتاح خلي افتح الباب الخارجي
انطيته المفتاح...نزل فتح الباب...
رجع فتح الباب من ناحيتي واخذ نور لحد مانزلت
اخذتها منه وخليتها على جتفي حتى افتح باب المطبخ...
دخلت نور وخليتها بغرفة ماما...
ورجعت اخذ عمر...لكيته شايله وواكف بالطرمة
اخذته منه...
_باجر نحجي عود
هزيت راسي...وصلته للباب وقفلته وراه
ورجعت لغرفة ماما...لين ما نزعت عمر ملابسه
وغيرت لنور...
نمت بعدها وماحسيت ثاني يوم الا من كعدوا الجهال ب١١ يمكن...
كمت ريكتهم والتهيت وياهم للظهر اندكت الباب...
فتحته بعد ما سألت منو....
شفت وحدة عرفتهة راسا لان شايفتهة بعرس نور
وبالفاتحة...جانت اخت احمد
مرة لابسة عباية رغم هية مو جبيرة
وحجاب ووجها خالي من اي مكياج...
يطلع عمرها بالتلاثينات...
والعباية زايدتها كشخة وهيبة...
باوعت عليها متفاجاة...ورجعت باوعت على الشخص الي وراهة...جان احمد
السلام عليكم ...حاجتني
_وعليكم السلام
احمد...ام عمر...اختي ام كرار...
هاجر...اهلا وسهلا
ام كرار...بيها مجال اضيفينة...
هاجر...اكيد...تفضلي
فسحت مجال اتفوت وياهة احمد...
عفتهم ورحت فتحت باب الصالة...
دخلتهم وترخصت لان جنت طالعة بالتراك ولابسة شال فوكه...
رحت بدلت ملابسي على السريع ...
رجعت وياي نور بالحجلة وعمر...
اول مادخلنا احمد كام شال نور
_هلو باباتي ...شلونج
باسها ونطاها لعمتها...بس راسا بجت
رجع اخذها وكعدها بحظنه...
كعدت مقابيلهم وعمر يمي
_هذا ابنج ...
جاوبتها اي
_ماشاء الله...الله يخليه
عمر جان يشبه ابوه ...
_نور مامتعلمة علينا...ردت من احمد اخذها بس ماقبل كال بيبيتها متعلقة بيها
بس هزيت راسي واني اباوع لاحمد..
جان اكو خوفة لا جاي ياخذ نور
احمد...شلون صارت ...هم رجعت صخنت
_لا احسن هسة
_هسة اوديها للدكتور العصر...
اني جبت ام كرار وياي....لان واكفة اجي وحدي
_اهلا وسهلا بيها
ام كرار...وبيج حبيبتي...شلون بيبيتج صارت
_،بعده ما طلعوها من العناية بس اتكول ماما
كعدت وينتظرون تستقر حالتها يلا يطلعوها
_عدها العافية....ماتخافين وحدج كاعدة
_وياي الحجية هاليومين تجي
احمد...زين ليش ماترحين لبيت خال امج لحد ماترجع
_مايحتاج هية يومين...
_ميخالف بس كلشي يصير...غلط تبقين وحدج
هسة من رجعنا وبالليل وشافونا الجيران
ماتخلصين من لسانهم
ام كرار....صح حجي ابو نور
هاجر...شسويلهم...مابيدي شي
ردت اكوم اقدم ضيافة...بس همة راسا ترخصوا وطلعوا...
والعصر خابر علمود يجي ياخذ نور كتله عدها علاج وصارت احسن...
لليل خابرت امي...ومن عرفت الي صار
_شكتلج ماما...من هاي اخاف ابقيج وحدج
_هسة ماصار شي ماما
_لج امي طفلة واتخربطت..اذا انتي شلون
منو للجهال...
سكتت واني اشوف حجايتها صح
الصبح دكت علية ام فهد...كالت خالد يريد يجي ياخذ عمر...
كتلها خلي ياجلها يومين
ماقبل...بس ماكتلها لان وحدي...
وصدك ساعة واجى اخذه...
من دك الجرس لبست عباية جتف وشالي وطلعت عمر...
اول ما طلعت وفتحت الباب وشافني
_شلونج هاجر
_الحمد لله...عود لا تاخره
_واذا تاخر...نسيتي اني ابوه
_ما انسيت...بس اني ما أمن عليه يمك
جر عمر مني وراح....
وعبالك سواها عناد...للعصر وماجابه...
وكل ما ادك على ام فهد اتكلي هسة يجيبه
لحد المغرب طكت روحي خابرت على ولد خال امي
وجان جوابهم عادي ابوه مايسويله شي
دكيت عليه...مايرفع التلفون...
كمت اطك...وفكري يودي ويجيب...
خابرت على ماما
_شلون تخلي يجي وانتي وحدج
_مايدري واردت اكله خفت
_والله يا امي شكلج...اتورطت وسافرت
_هسة مو وكت لوم...شسوي
_ماكو غير احمد...خابري
_لا شنو احمد...شدخله
_لعد شسويلج ماما انتظري بلكت يجيبه هسة
لليل...حسيت جواية جمر...ماكدر اكعد بس افتر
من دك الجرس..ماصدكت جريت الشال وطلعت ركض...
فتحت الباب...راسا حسيت واحد شبك رجلية
شلته واني حاظنته...
باوعت على خالد
_مو كتلك لا تأخره
_ما اخذ امر منج...
امج مسافرة...
انصدمت مين عرف...
_شعليك
_شلون تبقين وحدج
_هم شعليك...
_لا علية من يكون ابني بالموضوع...
وهذا يارجال امبقية عمر يمه
باوعت على عمر...اعرف عمر يحجي...
لان عمره اربع سنوات...
بس معقولة مستجوبة
_رجال ماينفعك
ردت اسد الباب...راسا دفره
واتقدم علية واني ارجع ليورة...
بحيث صرنا بنص الطرمة...
_لازم ينفعج لج
_اخلاقي مو مثل اخلاقك
_شو ماجنتي اتكولين هيج من تراهنتي وكتلتي نفسج علية
_ما جنت اعرف خياسك
جرني من زندي...وعمر خاف وشبكني حيل...
بحيث خنكني...وماعرفت ابعد ايدي عمر...
لو ايد خالد...
_هسة اعلمج خياسي شلون...
جرني بأتجاه المطبخ...وصلنا تقريبا لنص المطبخ هو يجر واني احاول افك ايدين عمر الخانكني ...
من الخوف...بيد واليد الثاني شايلة عمر...
الي من ثكله يكوم شوية ينزل من ايدي...
ومن يحس بنفسه راح يوكع يزيد اتجلب بيه
حسيت برعب حقيقي...
جنت اتمنى بس انزل عمر حتى اضرب خالد باي شي
الوحه....
ومن ديجر بية وكع شالي بالطرمة
سمعت صوت من الباب ...
_ام عمر...ام عمر
عرفته احمد...رفعت صوتي اريد احجي
بس ماطلع بس صيحة...هي جانت ثواني هالموقف
لكن جانت عمر من الرعب مرت علية
لحظة وشفت احمد دخل...عيوني تعلقت بيه
عبالك تطلب منه ينقذني...
اتقدم بسرعة وجر خالد...
الي تفاجأ بيه...
الي صار بعد ذلك كله بسرعة بس اكدر اصوره
احمد اتولى خالد ضرب بوكسيات...
وخالد بالبداية جان متفاجا...بعدين صار الضرب متبادل...
احمد...مو عيب عليك تتهجم على مرة ياعار
خالد...وانا شدخلك بالموضوع...
وصار لغوة بينهم...اني نزلت عمر وطلعت وراهم
لان احمد جان يجر بخالد لبرة...
من الباب شفت اكو جوارين طالعين يتفرجون
صاح احمد ادخلي جوة...
سديت الباب الخارجي...ورجعت شلت شالي من الكاع...وسديت باب المطبخ
واخذت عمر ورحت للهول خليت ابني بحظني
وكعدت صافنة...الهبطة اكلت من حيلي....
لو ماجاي احمد جان شسوة هذا النكس
بس احمد شجابه هسة...
ماعرف شكد ظليت كاعدة بس دكت الباب وثكل عمر بحظني صحاني...باوعت عليه نام
كمت خليته بالغرفة...صار كم يوم انام بغرفة ماما
وطلعت مترددة افتح لو لا...
صحت ...منو
_اني خالتج ام علي
طلعت فتحت الباب هاي جيرانة
_ها خالة هلا بيج
_يمة شنو هالهوسة يمكم...امج وين
ظليت صافنة بوجههة شكول
_ها...امي بالحمام..
_بهالبرد والهوسة
_من الهبطة
_ها خوش لعد...ماكلتيلي خالة هاي شنو الهوسة
نعرف انتوا وحدكم...
الولد كالوا خاف يحتاجون شي...
ماعرف شجاوبهة...بس اني شفت اكو ولد من الجيران اجوي فاككوهم...
_لا ماكو شي...هذا طليقي وهذا رجل خالتي
_ها...الله يرحمها....شبيهم ليش تلازموا
_خالة من رخصتج...الجهال وحدهم
_وامج
_مو كتلج بالحمام
راحت وسديت الباب...خلاص انفضحت بالشارع
هو هم حظ ...الله لا يوفقك خالد
رجعت للهول...سمعت تلفوني...
رحت شلته...طلعت ماما
_لج ماما شصار...
_شبيج ماما من كالج
_يعني صاير شي
_مافهمت ليش خابرتي لعد
_دكيت عليج قبل ساعة شكد مارفعتي...ردت اعرف خالد رجع عمر ...
ظل بالي خابرت احمد كتله يطمن عليكم
هسة عرفت ليش اجى حجيت وية نفسي
_شكولج...جيت احمد بوكتها...
كعدت على القنفة واني احجي وياهة
_ليش يمة شصار
_خالد جاب عمر وتهجم علية لوما احمد يجي جان الله يعلم شسوة
سكتت ماما...
_ماما وياي انتي...حاجيتها
_راح احجز واجي...
سدت التلفون بدون ماتسمع مني
كلت بكلبي..شراح ايفيد انفضحنا والي كان كان
سديته وبنفس اللحظة دك موبايلي مرة ثاني
باوعت احمد..جريت نفس وفتحت خط
اجاني صوته يهلهل بحيث بعدت الموبايل عن اذني
_ويامن جنتي تحجي صار ساعة
_وية امي
_اريد اعرف انتي شلون تفتحين الباب وانتي وحدج
_جان ديرجع عمر
_اصلا جان اجلتي روحة الطفل لحد مايجي احد يمج...
شارعكم كله تفرج على الصار...
تعرفين شراح يصير حجي وتاويل عليج
جان يحجي بحدة وعصبية...
جريت نفس ...ما اريد اجاوب خشن...
ما انسى السواه
_اشكرك للي سويته...بس لهنا وكافي تتدخل
_وعلي الكرار...انتي يرادلج واحد يكسر راسج
سد التلفون بوجهي
خليت الموبايل على الميز ورحت اسوي كهوة
احس راسي انسطر....
واني داضيف البن للمي دك تلفوني...
_اهوووو...اليوم شكو
رحت راسا فتحت خط ...
_لج ساقطة...هذا صاحبج الا اني اعلمه
تبعين شرف براسي...
اذا ماعلمتج...
سديت التلفون بوجهه واني ارجف
شلون اليوم شراح يعديها...
سديت النار عن الكهوة...واتأكدت من الباب
وكعدت واني اظم رجلي لصدري..
صدك حسيت بالخوف...
ردت اخابر امي...لكن شتكدر اتسويلي وهية بعيدة
اقلقها فقط...
كعدوا الجهال عشيتهم...وخليتهم يلعبون لحد ماتعبوا رجعت نيمتهم..
بس عيني ما اخذت نوم ...النوب ليل شتى يعني طويل...
غفيت وجه الصبح..
ومثل كل يوم هوسة الجهال وروتين البيت...
بالي جان مشغول...شراح يسوي خالد
ادري بيه ناقص كلشي يطلع منه...
طبعا محد خابر ولا احد اجي...
واعرف امي ماتخابر خوالها تخاف لايسوون شي
ثالث يوم من الصبح كعدنا على دك الباب...
توقعت الحجية جابوها...بس كلت البارحة خلصت السبعة
معقولة تجي اليوم...كمت من فراشي
سبع ايام صار بيها اشكال...
اذا ابقى شهر وحدي شيصير...
فتحت باب المطبخ وصحت منو...
اجاني صوت ما متوقعته ابد...
طلعت ركض فتحت الباب...
_خالو...
حظنته بقوة...
_شلونج خالوا
_الحمد لله...
بعدين صفنت بوجهه...امي البارحة ماخابرت
_خالو...صاير شي
_خلي افوت ...تعبان
فتحتله مجال...دخل للهول وشاف نور واكفة بكريكوتها تهوس...
راح راسا شالها ...ورجع للهول كعد وهو يبوسها
_الله عليك خالوا...ماما بيها شي...لو بيبتي
كعد نور بحظنه...
_مابيهم شي..امج حجتلي  الصار...
واخذت اجازة يومين واجيت اشوف حل
_مو على اساس امي تجي
_بيبتج وضعه بعده مو تمام...
ومن تكعد تسال عليها...ونخاف تنتكس
فمخليتها تجي...
تعاي احجيلي الي صار
حجيتله...
_هذا شكد عار...
اني اعلمه...عباله تايهة له
_مبين عليك تعبان...كوم اغسل بين ما اسويلك ريوك
ونام لك سوية...
عفته يغسل وريكت الجهال...
ومن كمل اتريك ونام...
سمعت تلفونه دك...جاوب...شوية وطلع من غرفة
بيبتي...
_سويلنا جاي...احمد جاي هسة
رحت خليت القوري على النار...وسمعت باب اندكت
وخالي فتح باب الصالة وطلع فتح الباب الخارجي
سمعت صوتهم وهم يدخلون الصالة...
كملت الجاي ودكيت الباب عليهم...
طلع خالي اخذ صينية الجاي ورجع دخل...
بس كعدتهم طولت...
رحت للهول على الجهال...
اجى خالي...فزيت على صوته
_شبيج خالوا مو تدرين بية موجود
_ماسمعت صوتكم من طلعتوا
اني من العركة اقل صوت كام يجفلني
_اصبلك غدة
_لا ...غدي الجهال ونيميهم وتعاي نحجي
ياستار...حجيتها وية نفسي
غديت الجهال ونيمتهم واني بالي مشغول
شراح يحجي خالي...
اجيت لكيته كاعد على ميز الطعام ومسوي كهوة
_هذا فنجانج تعاي...
كعدت مقابيله...
_شوفي خالوا...اني لو محصلج فيزة...حتى لو بفلوس ما ابقيج لحظة هنا...
وحتى لو سويتلج سياحية...
شلون اطلعين ابنج...اكيد ابوه ما يعوفه
هزيت راسي اريد اعرف تاليتها
_المفروض اصلا ما اخلي امج تجي
بس شنسوي لبيبتج عباله ازوجتي واستقريتي
جنت اريد اكولج ارجعي لطليقج...
بس بعد السواه ما أمن عليج يمه
_اصلا لو اموت ما ارجعله
_اعرف خالوا...والله ردت اعلمه...
بس احمد كال اني اعرف تدبيرلي وياه
_خالوا احمد شعليه...ليش تحشروه
_راح اجيج بالحجي..
خالوا...مثل ماتشوفين كل الحلول مسدودة
وهذا العار خالد...مراح يعوفج بحالج
احسن شي تزوجين
_خالوا الله يخليك هسة واكفين سرة على الباب
وكايلين لا...
كلتها هيج مو قاصدتها  وكملت
وحتى لو وافقت ياخالوا...
مو يكدر ياخذ ابني
_اذا على العريس موجود...
ومايكدر ياخذ ابنج منج لو يموت
_ياعريس واني بركبتي اثنين...
_احمد
غصيت بالكهوة وكمت اكح بقوة...
وخالي كام دك على ظهري وجابلي مي
_اسم الله ...شبيج شكتلج
_صدك تحجي
رجع لمكانه
_اي خالوا...هم بنته تربى بحظنه
وماتروح بعيد عنج...
وهم هو يكدر يوكف بوجه خالد
_بس سابقا ماقبل من كالتله بيبتي
كال ما اريد ازوج
_هسة غير...
_لا خالوا مستحيل
_لا تعصبيني...مو تريدين نور
هزيت راسي ب اي
_خلص...الولد يريد بنته...وانتي وضعج مثل ما تشوفين...
والولد خوش ولد ومايتفوت
_شلون عنده گلب يزوج ومامر غير بس ثمن اشهر على نور
_اول وتالي لازم يزوج ...
ردت احجي قاطعني
_بابا فكري بوضعج الحالي...
ليش عبالج الهوسة الصارت سهلة
وماراح يخلي اليسوة والمايسوة يحجي عليج
يعني حتى فرصتج بالزواج قلت
ولا تنسين عمرج هم...
احمد انسب خيار
جان واكف من يحجي
_هيج صرت حمل بس تفكرون شلون تخلصون منه
_خالو لا تفكرين هيج...
احنة نريد مصلحتج...نريد تستقرين وية شخص مناسب
عندج لليل فكري الولد راح يجي يحجي وياج لان عنده شروط
_فوكاها...
واهله...
_مالج علاقة...اصلا راح يأجرلج مشتمل وحدكم
عافني حايرة...
لا بية ارفض ولا بية اقبل
اصلا ما عندي اي حل لوضعي...
لا والنوب عنده هو شروط...
خلي اشوف شروطه وبعدين احدد....