ورود شائكة

البارت الرابع عشر

مساء الخير...متابعيني الاعزاء...في بداية نشري للقصة وضحت النشر بين يوم ويوم...
وكلت بوقتها الي ماعنده صبر خلي يعوفها تكمل يلا يقرأ...
بعد مسألة طولتي بالنشر...ونسينا الاحداث شنو معناها...
اني هاي ظروفي وملتزمة بالنشر وياكم.....
الي ينسى الاحداث خلي تكمل ويقراها
والي مستعجل على النهاية هم نفس الشي
القصة اكتبها براحتي بدون استعجال...
والنشر اعيد حجايتي بين يوم ويوم
....تحياتي

ليس كل ما نتمنى نناله...فكم امنيات ضاعت في مهب الايام...وبقيت منها فقط الذكريات لشي لم يتحقق....
همس ليل
تفاجأت بصوت مو غريب علية
_عاش من شافج...هاي وين مختفية كل هالمدة
رفعت راسي شفت هبة كدامي
_هلو هبة شلونج
_الحمد لله...انتي شلونج .
_الحمد لله
_شو فد مرة اختفيتي...لا حس ولا نفس
_الحياة تلاهي
_صح والله...تدرين خالد...اقصد استاذ خالد صار رئيس القسم
_يستاهل هو شاطر بالشغل
_فعلا يستاهل...منو وياج
ماجنت اريدها تعرف شي عن حياتي...
لكن مجبورة لان اعرف لسانها مايسكت
خليت ايدي بجيب سترتي...ناسية الحلقة
من سالتني يلا اذكرتها
_خطيبي
_ها...ماشاء الله...شبسرعة طلكتي وانخطبتي
_هبة من رخصتج احنة واكفين بنص الطريق
وهم تأخرت على الولد
_اي تفضلي حبيبتي...
وخرت على صفحة...
واني مشيت للحمامات...
اليوم بوجه منو مصبحة...كلها مغثة بمغثة
باوعت لنفسي بالمراية...هسة شراح يخلص
هالكعدة...شنو الي جابرني...
غسلت واستعذيت من الشيطان ورجعت لمكاني
اول ما كعدت ...جريت كلاص المي اريد اشرب
_هاجر ليش مالابسة حلقتج
رفعت الكلاص شربت المي ورجعته
_لان جبيرة وتوكع من ايدي
_مو كتلج نبدلها
_كرار داتشوف صار مجال
_طبعا ملتهية
جريت نفس...اريد اهدى حتى اجاوب بدون انفعال
_باوع كرار...ترة اني عندي طفلة عمرها سبع اشهر تعرف شنو يعني سهر ليل وبالنهار تريد اهتمام
وضيف ابني قريب الاربع سنوات...
يعني مثل ماكلت ملتهية وماعندي وكت هواي...
_شنو قصدج
_داوضحلك الصورة
_ابنج جبير تقريبا...والصغيرة ترجع لابوها
عدلت كعدتي من كال هيج
_شنو ترجع لابوها...منو كال هالحجي
_طبعا ترجع لابوها...شسوين بيها..
ترة هية بنت خالتج...مو بنتج ولا حتى بنت اختج وتتمسكين بيها...
واحنة نريد نبدي حياة جديدة سوة...
قاطعته
_فاهم خطأ...نور بنتي ربت على ايدي...
وللعلم اني ماقبلت الا من كالت بيبي ابوها قابل يبقيها يمج...
_ما ادري بهالحجي...وما اصور هالشي مناسب
اصلا بناتي عد امهم ...اجيب بنية واربيها
خوب اخذ بناتي احسن
_لعد ابني مو راح يجي...لو عبالك انطي لابوه
_ابنج هذا ما كلت شي...بس بنت خالتج
ابوها اولى بيها
_ترة هذا ابن عمك هم...وهذا هم شرطي لو تلاثتنا
_لو شنو
_لو بلاها
التفت يسرة يباوع على الشباك...
واخذله صفنة....ورجع باوع علية
_باعي اني ماعندي اعتراض على الطفلة
احمد اكثر من اخ...
بس اريد اوصلج ترة باي لحظة ابوها يقرر ياخذها
ليش تتعلقين بيها
_خلي توكف على رجليها وتصير شوية جبيرة وياخذها
_زين شلون تكدرين ترتبين وضعج ويانة وعندج دوام
اقصد بعد الزواج طبعا
_حاليا مأخذة سنة بدون اجازة...
وبعدها اسجلهم حضانة روضة
_ماكو مشكلة ...المهم ما يأثرون علينا
_بعد شغلة...
_شنو
_نبقى ابيت جدي
_عندي طابق وية اهلي مفصول...
يعني ما تكعدين وية عيال
_مو هذا القصد...
بس مهما يكون ذولة مو اطفالهم...
يجوز يتنحسون من حركتهم من صوتهم
_ماعرف...انطيني فرصة افكر
_اخذ وقتك
_شوكت نعقد
_بعد وكت ليش مستعجل
_شلون بعد وكت...اريد نطلع براحتنا
اخذ راحتي وياج
من كال هيج فد شي صعد من معدتي
لبلعومي...ردت اتقيء وصورة الموقف صارت كدامي
_من رخصتك
كمت على السريع للحمامات...
صدك اتقيئت...شلون لعد راح ازوج
من رجعت وكعدت بمكاني
_خيرج شو وجهج اصفر
_ماكو شي...يلا نرجع
بالرجعة...هو يسولف عن شغله والمواقف الي اتصادفه واني بغير عالم...
هو عنده مكتب دلالية بيع وشراء بيوت واراضي
بس ذبني بدون ما اكوله تفضل سلمت ونزلت
دخلت المطبخ تلكتني امي
_ها حبيبتي شلونج
باوعت لها نفسي اكلها عن وضعي...
بس شحجي...
_خابريلي احمد هسة
_ليش ماما...
_اريد اعرف هو اتفاق لو لعب جهال
_شنو ياماما فهميني
_بس خابري
دكت عليه...شوية ورفع الموبايل
بس كالت الو ماما جريت التلفون منها
وسمعت صوته
_شلونج ام هاجر
_اريد اعرف هو حجاية رجال لو شنو
امي تأشرلي بمعنى عيب
_ضبي لسانج واحجي عدل...
شكو شصاير
_انتة مو اتفقت وية بيبتي نور ما تاخذها اذا قبلت بأبن عمك
_ابن عمي اسمه كرار وهو خطيبج...
وماعرف بيبيتج شكايلتلج...
اني كتلها اذا الولد ما اعترض على نور...
اخليها عدها...
خابريها وأسالي
وراسا سد التلفون بوجهي
سلوى...شنو الموضوع...ماما اسلوبج ماحلو وية الولد
هاجر...لان ما التزم بحجايته
سلوى...ماما...نور بنته...لا تنسين هالشي
وبعدين ترة ماربيتج هيج..
صايرة هواي هجومية...
عافتني وراحت...
صعدت لغرفتي...البيت سنطة اكيد الجهال نايمين
بدلت وتمددت بجربايتي...
هسة اشجابرني على هالوضع...
طز بالمجتمع ...ما اريد ازوج عندي راتبي
وعندي بيت وعندي اطفالي...
رجال شراح يقدم لو يأخر ...بالعكس
راح يزيدلي هم...يريد اهتمام وتفرغ...
بس شسوي لبيبيتي عبالها من ازوج خلاص تخلص مشاكلي واستقر...
كمت نزلت جوة سويتلي جاي وطلعت جبن
كل الي اتغديته فرغته من تقيأت...
بيومها كرار ما خابر بالليل...واني هم كلت بعد احسن
ثاني يوم نفس روتين حياتنا...
بس قبل الظهر سمعت دكت الباب...
طلعت ماما تفتح.....الصوت الي انرفع خلاني
اطلع...لان ميزته...هذا صوت خالد
_شكو شصار
التفت علية بعد ماجان يحجي وية امي بصوت عالي
_شرفت العروسة...
عالخير الخطوبة...
غير اتكولين حتى نجي نبارك
جان واكف يم الباب الخارجي...
واني يم باب المطبخ...
_الخير للجميع...يوم لك
جاوبته ابرود
_شو سكتة مسويتها
_هسة شرايد
_يا ام ابني اريد الولد
من كال هيج هبطت...
بس ماخليته يبين علية
_شنو سمعني...ياولد
_عمر...نسيتي ابنج
_لا ما ناسيته...بس عمر بحضانتي
_جان...مادام راح تزوجين...مابقي يم رجال غريب
_ههههه...ضحكتني...يم الرجال الغريب أمن من يكون يمك
سكت شوية وجاوبني...
_ابني تنطينياه قبل ماتزوجين
_واذا ماقبلت
_غصب عنج تقبلين...والا المحاكم بينا
_هذيج المحاكم وروح عليها..
عود لا تنسى اتكلهم عن حالتك
_ماعندج دليل...واخذه لعمر اخذه
ركع الباب وراح...
دخلت جوة وامي وراي...
طبعا ماما من يصير صوت عالي تخرس
كلشي ماتحجي...
كعدت على الكرسي وسندت راسي بيدي
سلوى...ولا اتوقعت يطلع من خالد هيج
_لا توقعي كلشي...شكل جميل وداخل قذر
_شلون ماما هسة شراح تسوين
_اروح اسال محامي...
_ابن عمي محامي خابري وشوفي
_عندج رقمه
_اوكفي خلي اشوفه
لكته وخابرت وحجيت وياه...
بس كلامه غثني وزاد همي اكثر
كال...مادام راح تزوجين من حقه يسحب ابنه
خاصة وضعه زين ماديا وموظف وسمعته زينة
كلت بگلبي الي بالخافي اعظم...
يعني فرصته جبيرة...وتبقى قناعة القاضي
اشكرت منه ...
بقيت الوب شسوي...
سلوى...خابري كرار خلي يجي واحجيله بلكت يكدر يسوي شي
اني حالي حال الغركان يتعلق بقشة
دكيت عليه...كتله عندي موضوع تعال
من اجى وكعد وامي ضيفته...
وظلت كاعدة يمنا
_خير هاجر صاير شي
حجيتله كل الي صار...
تعصب...هذا شلون يتهجم عليكم وانتو نسوان وحدكم...
اذا ما اشعل عشيرته هالناقص هذا
_كرار...اني ما اريد تشعل عشيرته
اريد تلكيلي حل
_خلي نشوف محامي
_خابرت ابن عم امي محامي...
كال من حقه لان راح ازوج
سكت شوية...خلي يوصلها للمحاكم وهناك نتفاهم
_واذا نحكم لصالحه
_بوقتها نشوف
_يعني شنو
_لكل حادثة حديث...
سكتت...وهو ترخص وراح...
لليل واني افكر بحل...ما اعتمد على المحكمة
صح بعدني ما ازوجت...
بس خوما انتظر لحد ما الفاس توكع بالراس
ويجوز يخليني وبعدين يسويها ويسحب الطفل
بهالاثناء دك تلفوني
شفته رقم غريب...
رفعته...اجاني صوته
_بشنو احسن مني هالاجلح هذا
_مو بالشكل...هاي انتة شكلك حلو...
بس اخلاقك فاسدة
_لازم معرفتج بيه قوية...
لو هم تراهنتي عليه
جريت نفس وكلت بگلبي تستاهلين
_شتريد مخابر
_اريد اذكرج...تزوجين اخذ عمر
للعلم قبل ماتكملين اكدر اجيب شهود
بسوء اخلاقج ...
_ليش هيج محيطك منحط بحيث يشهدون زور
_ليش الرهان على رجال مايعتبره القاضي فساد اخلاق...
وانتي كاعدة وحدج وية امج...ولج الحساب
_لك شكد قذر لخاطر الله
سديت التلفون بوجهه...
وين حشرت نفسي...
لا اكدر احجي ولا اكدر اسكت...
الليل كله مانمت...اباوع للجهال...
كل يوميا واحد مهددني يسحب واحد
بس اني مامجبورة على هذا الوضع...
وخالد اذا ما واحد يسكته مايفيد بالمحكمة
يروح يفضحني ماعنده مانع
كعدت الصبح اخذت تلفون ام فهد من امي
ودكيت عليها...
_شلونج ام فهد...
_هلو هاجر...شلونج حبيبة
_الله يخليج...
اكول ام فهد اريد رقم ابو فهد
_اي حبي صار...بس ليش صاير شي
_لا...ردته بشغلة
ردته لي...سديت التلفون ودكيت على ابو فهد
وامي اتحوص حولي...ساعة اتشيل
نور...ساعة اسكت عمر
_الله يساعدك ابو فهد
_هلا خوية شلونج
_الحمد لله
ابو فهد ردتك بشغلة
_أمري خوية
_تقبلها خالد يجي يتهجم علينة ويهدد
_يخسى...اكسر راسه...
شصار خوية ويمتى هالحجي
حجيتله بس من سمع اني انخطبت تغيرت لهجته
_خوية حقه ...ابنه ومن حقه ياخذه...
عجل يخلي الغريب يربي له
من كال هيج عرفت ماكو فايدة الحجي وياه
سديته بعد ماسلمت عليه ...
باوعت لامي
_ها شكال
_شيكول قابل...ماعندي بس حل واحد
رجعت دكيت على كرار...
كتله من تخلص شغل مر علية
الظهر اندك الباب وماما فتحته ودخلت كرار للصالة
دخلت واني شايلة نور واكود بعمر...
ردت اشوفه وضعي...السمع غير الشوف
شفته مثل انعقج...
كعدت وخليت نور بحضني وعمر يمي
_صاير شي
_اي...خالد رجع يهدد...واريد تشوفلي حل
_شنو يهدد غير اهجمها على راسه
يريد موجودة المحكمة...غير هيج اخلي دمه بطوله
_بس اني ما اريد توصل للمحكمة...
تدري كل زين راح ينتظر نزوج يلا يشتكي
ويصير من حقه ياخذ عمر...
_هو تريدين الصدك من حقه...
ابنه ويجوز مايريد رجال غريب يربيه
جنت اتمنى يكول غير هالحجي...
_اذا هو من حقه ...واحمد اكيد من حقه يسحب بنته
سكتت اريد اشوف جوابه
_طبعا هاي بنته...شكو بيها هاجر...نبدي وحدنا..
وابنج اكيد ابوه يراعيه...
وباجر عكبة يصير عدنا اطفال وتلتهين وياهم
باوعت على امي ...فهمت نظرتي واشرت براسها
_تعرف كرار...جنت اتمنى اسمع منك غير هالحجي
وجان من باجر نعقد ونزوج...
بس للاسف...
_شنو قصدج...
كمت خليت نور بحظن امي....
وطلعت صعدت لغرفتي جبت الذهب مالته
ونزلت ..جان كاعد وكدامه طبلة...
خليت العلبة على الطبلة
باوع عليها...شنو هاي
_نيشانك...مالنا نصيب سوة
تعصب...شنو هو لعب جهال
_لا مو لعب جهال...لان الزواج مو لعبة وونسة
الزواج مسؤولية اذا مو كدها لا تلعبها
_عيب هالحجي...التفت على امي وهو يوكف
عاجبج هالحجي خالة
_امي مالها شغلة...ونصيحة...اذا تريد تتزوج
شوفلك وحدة خالية ما وياهة احد
اما اني فما ابدل جهالي بكنوز الدنيا...
اخذت نور وعمر وطلعت...
رحت للهول خليت الجهال بالكاع وكعدت على القنفة واني احس هم وانزاح عن گلبي...
شوية وسمعت الباب انطبك...
وامي اجتني...باوعت عليها
_ماعرف شكولج ماما...ماعندج حظ وية الزلم
_ان كان علية ماريد ازوج ولا اريد رجال بحياتي
_ادري ماما ...بس هاي سنة الحياة...
_مو سنة الحياة...لكن كولي مجتمع فاشل يدور ورة البنية ويراقبها...
وهسة شنو المزوجة خلصانة منه....
هم وراهة وراهة...بعد ليش اهتمله
_لان هاي عادات هالمجتمع وانتي عايشة بيه
اذا خالفتيه تصيرين شاذة عن قاعدته
للمغرب اندكت الباب اني جنت فوك...
ربع ساعة وصاحتني امي...
باوعت عليها من فوك المحجر مال الدرج
_نعم ماما
_بدلي وتعاي احمد يريدج
كلت هذا شيريد جاي هسة...
لبست بنطلون وقميص وخليت الشال على راسي ونزلت واشايلة نور...
من دخلت وسلمت رفع راسه احمد لان جان مخلي عمر بحظنه ويحاجيه
كعدت مقابيله...
سلوى...ماما ابو نور جاي يحجي وياج
التفت عليه
_خير ان شاء الله...
نور خبصت نفسها تأشرله بيدها...
كامت امي اخذتها من حظني واخذت عمر...
وعافت باب الصالة مفتوح...
خلت نور بالحجلة ورجعت يمنا...
_عرفت من كرار مرجعة نيشانه...
_ما كالك ليش
_يكول فهمت الموضوع غلط
_وهم اكولك ماكالك يا موضوع
_سمعت منه وجاي اسمع منج
ردت اكوله مايخصك...بعدين تراجعت
_شوف ابو نور...بيبتي من رادت مني اوافق
كالت احمد حمد بالولد ...
وجانت واثقة من كلمتك...
ويوم وافقت جنت اريد رجال يصير لي سند
اتجي عليه بوقت الضيك...
لان مامحتاجة لا لاحد يصرف علية...
ولا مكان اكعد بيه...
بس ابن عمك طلع مو كدها...
من اول مشكلة تخلى ..
_هو الصار شنو
_اسأله.....
كمت اريد اطلع...
_خلي نتفاهم ام عمر...
_ماعندي حجاية ثانية ..
بس سمعت امي اتسولف وياه...
ماطول وطلع...اجت ماما
_ليش ما حجيتيله الصار
_ماكو داعي...اصلا باي صفة يداخل
مر يومين والثالث ودك تلفوني
عرفته الرقم خالد...
ردت ما ارفعه بعدين كلت خلي اشوف شيريد
فتحت خط
_خير شرايد
_يعني بطلتي ماتزوجين
_شي مايخصك
-لا يخصني مادام ابني عندج
وبعدين هذا شنو دازته يهدد
_منو هذا
_سوين نفسك غشيمة
_ماتولي
سديت التلفون...
بقيت بحيرة معقولة كرار راح عليه
بنفس اللحظة دك تلفوني...شفته كرار
فتحت خط
_الو..
_شلونج هاجر
_الحمد لله
_عفتج تهدين يلا خابرت...
اريد نتفاهم
_كرار ماكو تفاهم بينا...
اني اخذت قراري خلص
_شو عبالك بايعتني كلش
_ماصار بينا ذيج العشرة حتى ابيع واشتري
ماتوالمنا خلاص
_على الاقل انطيني فرصة
_شوف يا ابن الناس...اني بركبتي اثنين جهال...
وانتة تريد وحدة تتفرغلك...
كلتلك سابقا واعيدها شوفلك وحدة خالية...
والا رجع مرتك احسلك...
واتمنى بعد ما تتصل....
سديت التلفون...المسالة ماخلصت لحد هنا
ثاني يوم اجت اخته...
وحاولت تشرح وتبرر...اني عدت نفس الحجي
كتلها مرته عده اطفال اثنين واني هم...
خوب يرجع مرته احسن....
ورجعت كلت لامي خابري احمد وكليله خلي يكله يسد الموضوع وبعد لا يخابر...
وانسد فعلا الموضوع لنهاية الاسبوع
نزلت لكيت امي تبجي...
_خير ماما شكو....
_بيبتج متخربطة ولازم يسوولها العملية
وخابرتني تريدني...
ماكتلها انتي فسختي وما اكدر اعوفج
كعدت يمها...
_احجزي ماما وروحي...هية شهر شهرين وترجعين
_وانتي شلون ابقيج وحدج
_ما علية شي...توكلي على الله...
_لا امي...مستحيل اعوفج وحدج...
واذا بيبتج درت شيخلصني منها
_لا تكولين لها...
_لا ماما
_زين عندي حل...باجي ماجدة مو عدها عمة مامزوجة...
وجبيرة بالعمر...خليها يمي لحد ماترجعين
_ومنو يكول تقبل ...
_لا يقبلون .....روحيلهم وشوفي...
صدك راحت عليهم...وخطية ما كالوا شي
راسا اجت وياهة...
التهت امي بحجز الطيارة والترتيب...
واحمد جان يجي ياخذ نور من الباب ...
ساعة ويرجعها...
وهو حجز لماما...
مرة رجعت من السوك...
_هاي مليت الثلاجة والكاونتر واي شي تحتاجيه
خابري احمد
_شنو ماما طفلة كدامج ما اكدر اطلع اجيبلي كم حاجة من السوك
_لا ماما بس صعبة تجرجين بالجهال
_والي عدها تلاثة واربع جهال شلون ادبرها
لا تهتمين ماما...
روحي وارجعي بالسلامة...
سافرت ماما...والبيت خلى بعد اكثر علية
حجية سعاد الي اجت كعدت وياي يطلع عمره بالخمسينات...مكضيتها صلاة...
وما هلكد تحب الجهال...واضوج من دوختهم
بس اتحمل كلت كم يوم تفض...
احمد كل مايجي ياخذ نور...
يسال اذا محتاحين شي...
جنت يوميا احجي وية ماما وبيبتي سوت العملية
بس جانت بالعناية لان عمليتهة خطرة
وية نهاية الاسبوع الثاني...
اهل الحجية خابروها...واحد من اخوتها مات
واجوا اخذوها...من راحت...
كلت لنفسي...هو الفكر على الجمل وعضه الجلب
يلا خليتها سكتة...
شريد اكول...
لليل خابرت امي...
_ها ماما...شلون بقيتي وحدج
جان صوته مال واحد يلوب
_شمدريج
_غير الي مات عم ماجدة من خابرت كالولها
وعرفت راحت الحجية
_ميخالف ماما هية كم يوم وترجع
_اني غلطت عفتج وحدج...راح احجز وارجع
_حتجزين يمعودة بيبي بالعناية....
هسة منو يدري احنة وحدنا...
سديته وياهة....
بين ما عشيت الجهال ونيمتهم...
دك تلفوني...باوعت صح ماسجلته
لكن ميزته...فتحت الخط
_شلونج ام عمر
_هلو ابو نور
_خوما محتاجين شي
_لا سلامتك..
_تخافون وحدكم...
خرب ...هاي امي ما اضم ...
_لا عادي ماكو شي
_يمج رقمي دكي علية اذا احتاجيتو لاي شي
_الله كريم
سديت ودكيت على مامامن فتحت خط
_هلو ماما...ادري ليش راسا رفعتي تلفون على احمد
_حبيبتي هو اقرب واحد عليج...وبنفس منطقتنا
والولد مايقصر على الاقل عينه عليكم
_ترة هو يبقى غريب....باي صفة اخابره
_غير اخاف عليج يا امي...
_لا تخافين ان شاء الله ماكو شي..
ولكن القدر يضعك في طريقك ماليس بالحسبان...