ورود شائكة

البارت الثامن

البيوت اسرار ...لانعرف مايدور داخلها ...
فهناك خفايا لا يعلمها الا اصحابها...
همس ليل
جنت المم اشيائي من المكتب واسمع حجي ام حيدر
_احنة تفاجأنا من سمعنا الخبر...
ليش شصار...جنة نشوفكم ماكو هيج متفاهمين
_ام حيدر كلشي قسمة ونصيب
_حبيبتي خاف وحدة لافت عليه ...
ليش استعجلتي..
_ام حيدر اكو شغلات ما تنحجي ...اعذريني
دخلت هبة ...
_هي ها هية كتلتي نفسج واخذتي ...وتالي ماطولتي سنتين وياه...لازم عرفج علة حقيقتج
عبير...عيب هبة شنو هالحجي
هبة...ما كلت شي ...مو سوت المستحيل حتى اتجره
ام حيدر...ماشفنا منها هالشي...بالعكس اكو غيرها كتلوا نفسهم
هاجر...عوفيها ام حيدر مالي خلك لها
اقتربت من ام حيدر الي وكفت...
هاجر...اشوفج بخير...ابريني الذمة
ام حيدر جاوبتني وبعينها دمع...والله مكانج راح يصير فارغ ماشفنا منج الا كل خير
بوستها ورحت لعبير الي ما حجت بس دموعها عبرت عنها...
شلت اغراضي ومن وصلت لهبة...
هاجر...تهني بيه كدامج
عفتها وطلعت...مامريت على باقي القسم...
ما اريد.اشوف بعيونهم الشماتة...
كلهم متهميني بالبطرانة لان جانوا يشوفوه شلون مداريني...
بس مايدرون احساس المرأة من تلزم رجلها يخونها
وعلى فراشها ...
ولا مو اي خيانة...ابشع خيانة...
جنت ملتهية بأفكاري ما انتبهت له وهو واكف اباب الاستعلامات يباوع علية الا من صرت مسافة عنه
انتبهت له...
باوعت عليه الي يشوف كشخته وطوله يكول هينالها
وفعلا جنت اتباهة بيه...
بس هسة نزل من عيني...كمت ما اشوفه مثل قبل
شفت القذارة الي بداخله
سبحان الله من اتشوف حقيقة انسان القبيحة ...
يفقد ذلك الجمال الي جنة نشوفه بيه
من وصلت يمه
_خلي اوصلج للبيت...حاجاني
_ميحتاج هسة اخذ تاكسي
ردت اجاوزه...بس وكفني
_عيب منة الموظفين...تبقين ام ابني
ردت اجادله...اريد اكوله ما اتحمل قربي منك
بس مثل ما كال لخاطر ابني ما اريد اكسره
هزيت راسي وطلعت كدامه...
صعدت قبل ما يفتحلي الباب...
صعد هو وساق بدون مايحجي...
_ماجان اكو داعي تنقلين
_الوضع هيج ما يرهم...
وياريت ماتعيد اي حجاية...
_بينا طفل هاجر لا تنسين...
يعني لازم بينا حجي
_حدود حجينا حوله مازاد ماكو داعي له...
كل الي ينحجي وينكال كلناه
_ماصورتج بيوم هيج قاسية
_واني ماصورتك بيوم...
سكتت ردت اكوله قذر بس تراجعت...
درت وجهي على الشباك
_كملي شنو ردي اتكولين
_عفية اترك هالموضوع
_ وين اتبقين عمر  من ادومين
_بيبيتي وماما تفكرتطلع تقاعد
_اها...الحجية خاف ماتكدرله
_ماعرف عود ارتب وضعي
_اخذي اجازة واي شي تحتاجين اني اوفره
التفت عليه...
_خالد انتة حاليا خارج حياتي...لا تنسى هالشي ...الي يربطنا بس عمر...
لا تحاول تفرض رأيك
سكت فترة...
_اعرف...ماجنت افرض رأي...جنت اقترح وهم حول ابنا
_ترتيب حياتي مايخصك ...
وصلنا للبيت....وكف...ومن ردت انزل
_حاول ماتنسى اي اتصال يكون بس لعمر لا تحاول ترة تعبت منك
سديت الباب بقوة...
دخلت للبيت متوترة...من شافتني امي
جانت شايلة عمر...بسته
_منو وصلج شو صوت باب انركع
_خالد
_واكيد تلاغيتي وياه....
والله يا ماما
قاطعتها....حفظت الكليشة لا تعيديها...
هواي زلم اتخون بهالوكت واذا كل مرة ماتتحمل
جان الكل اطلك....
تدرين ليش يخونون لان يدرون نسوانهم راح تسامحهم ...
لان هواي اهل مايسندون البنية ..على عيب المرة تتطلك....
لان مجتمع ذكوري فاشل ينطي حق للرجل ويرفعه عن الغلط...
حتى بالطلاك محد عايش حياتهم ويدري شنو الرجال ابيته...شلون اخلاقه وية مرته....
بس الناس اول ماتلوم تلوم المرة....
ترة حتى بالاسلام مايرضى الزنى...
مو لو مو ...مو الزاني يجلد واذا كان مزوج فعقوبته
اشد....
عاد لو زاني ب...
وعيت على نفسي...ردت افضح كلشي...
_غير تفهميني وية منو لكيتيه وهيج مامستعدة تعذريه ولا تسمعين من احد
_يجوز ما ملتزمة بلبسي ولا ديني بصورة صحيحة
بس ربيتيني على الاصول...والعيب
والاصول اتكول هذا ابو ابني لازم ما اشوه صورته
باجر عكبة يتعير بيه...
واني عشت هاي الحال ...وما اريد لابني يعيشها
عفتها وصعدت لغرفتي ابدل...
احس راسي راح ايطك....
بدلت وكعدت على الجرباية...
باوعت لجرباية نور فارغة...جانت الوحيدة الي تفهمني...
وهم الوحيدة الي تعرف سري....
جريت نفس....نزعت الساعة وفتحت المجر مال الكوميدي  اريد اخليها...
شفت صورة لي ولخالد واني طالعة من المستشفى
بوقتها اخذتها نور بموبايلهة وسحبتها بالاستوديو
بس ماقبلت اخذها لان شكلي كلش تعبان
جريتها اباوع للتفاصيل شفته شلون لازم يدي ومحاوطني بحنية وجهه كلش فرحان يباوع للطفل الي شايلته امي
واخذتني الذكريات لقبل سنتين واكثر....
اذكرت شلون قنعني يبقى العرس بنفس موعده
وهو يوعدني هاي اخر تدخل لام فهد...
بس ماكان صادك...لان بالحنة واني جامعة اقاربي
انتظر يجي...وتفاجأت من اجت نور كالت ام فهد خابرت تعتذر اتكول مانكدر نجي لان عدنا هواي ضيوف...
متت قهر بس مابينت....خلصت الحفلة وهواي اتصل خالد ماجاوبته
دزلي مسجات ...والله حبيبتي اصدقائي ما عافوني الا بالوحدة بالليل...
هم ماجاوبته...
كمت من مكاني وطلعت البوم العرس كلبت بيه
اباوع جنت طالعة كلش حلوة ومن شافني جان فرحان...
الحفلة جانت حلوة ...كل الدائرة معزومة...
ركصنا واستمتعنا بيها...جنت متباهية بيه
ومن زفونا للمشتمل بس انسد الباب علينة
ضحكت واني اذكر حجايته
_يلا فضيها...زفة وصارت...
_شفضها شبيك خالد
هذا الحجي اني كاعدة على التخم بالهول وهو واكف كبالي
_ها شكو...هم كولي عيب
_ماكو اني زعلانة ...ليش ما اجيت البارحة
_صدك ذكرتيني ليش ماجاوبتيني ...شكد دكيت عليج
_لعد هية هاي دكة اسويها بية
_هسة شلون من اول ليلة نتعارك
_اي...نتعشى... انت نام هنا واني بالغرفة
_خاف ماتقبلين
وكفت...لا اقبل مادام هيج سويت بية
مشيت باتجاه الغرفة ما حسيت الا اني طايرة بالهوى
شالني...ايد جوة ركبي وايد جوة راسي
جلبت بركبته اخاف اوكع
_نزلني خالد عفية لا اوكع نزلني
_لا انتي الظاهر ماتجين الا بالعين الحمرة
_يمعود نزلني...
كمت اضحك...وصلنا للغرفة...دخل وبرجله دفع الباب
وشمرني على الجرباية...
واني ميتة ضحك
_اضحكين مو...من اول يوم تريدين انام بالهول
بالتالي شلون...
لا لازم اذبحلج البزون...
عدلت نفسي على الجرباية واني اشوفه ينزع السترة والرباط ويبدي يفتح القميص
_راح اجيب البزونة وانت مصلخ
_يا بزونة...خليها بعدين هسة عندي الاهم...
_شنو
غمزلي...وجرني وكفني يمه...
_انتي حبيبتي...بدة يبوس وايده تتلمس لحد ماوصل لسحاب البدلة فتحها وجرها وية شهكة مني
_خالد...راح تنشك البدلة
_اششش...يطبها مرض...
جرني للجرباية....جانت لمساته نوعا ما عنيفة
من كعدت الصبح اسبح...باوعت بالمراية مال الحمام
جسمي كله مطكع
من طلعت لكيته كاعد على التخم يكلب بالموبايل
_صباح الخير
رفع راسه مبتسم...
_صباح الفل عروسة...
_تفوت تغسل
_اي بين ماترتبين الريوك
_منو جاب
_ام فهد قبل شوية من جنتي بالحمام
هم ام فهد...سكتت...
بس تريكنا اجو اخواته وامه وام فهد يباركون لان جانوا بايتات من العرس
باقي الاسبوع ماشفت احد....جنة نكعد الظهر بين مانتريك ونغسل ونبدل صارت العصر...
يروح لاهله يسلم ونطلع لليل يلا نرجع...
ونكمل سهرتنا للفجر نغسل واصلي ونام
طبعا لاحظته مايصلي...كتله كال تاركها وهسة ارجعلها...
ماركزت بهالموضوع لان اصلا اني يدوب اصلي
لحد يوم قبل السبعة...
كتله باجر السبعة...كال اهلي محضرين كلشي عليج
بس ترحين للصالون...
ما اهتميت من باب عروسة وهمة يتكفلون
وبيوم السبعة تفاجات بعدد بنات خاله وعمامه
بالعرس هوسة ماعرفتهم...
جنت الوحيدة الغريبة بيهم...
طبعا اهلي هم اجو...
خلص السبعة وبدى خالد يداوم بس اني اجازتي بعدلها اسبوعين...
جنت ابقى بالبيت.. الفترة الي بعدها لحد ماداومت خلصت بين عزومات اهلي واهله...يعني خواله وعمامه...
وبيها اخذت جانب الصمت من نروح لان العزومة تشمل بيت اخوه هم...
وام فهد جانت تستلم مبادرة المجاملة من باب هية اقاربهم...
مرات اضوج ومرات اكول شعلية ما اشوفهم بس بالمناسبات
الي جان يزعجني تصرفاتها دائما تحشر نفسها بكلشي...
من عاشرتهم فهمت همة كلهم معتبريها جبيرتهم
وشلون نكول الام الروحانية...
لان حتى اخواته يستشيرهنة...
وهية من ناحية الضيافة ابد ماتتعاجز من وحدة من تجي...
بس الغريب بالموضوع ماجان يحاولن يتقربن مني...
جنت افسرها لان اني بالدوام اغلب النهار
والجمعة يم اهلي اكضي...
حاولت اتعلم اطبخ ... مرات محاولاتي فاشلة
جان مايذمر خالد بس يروح لبيت اهله يجيب غدة من ام فهد
_خالد عيب شنو يومية راح اجيب غدة منهم
_شكو بيها...اريج من تطبخ تحسب حسابنا
انتي هم حاولي تتواصلين وياهم
_ادري حبي هو صارلنا شهر ونص من زوجنا...
اول شهر شو خلصناه عزومات...
وهالاسبوعين دادشوف من الدوام ظهر حصتك والعصر يدوب الحك على شغل البيت من تطلع وية اصدقائك
_ميخالف حاولي نص ساعة...
فعلا بعدها كمت العصر اروح فد نص ساعة
امه جانت قليلة الكلام بس تحسسج بالترحاب من تكعد يمج وتستمع لج...
ام خالد...يمة حاولي تسويلج طفل
ام فهد...اي هاجر ترة خالد يحب الاطفال
هاجر...بعدنا ماقبطنا شهرين ...الله كريم
من رجعت ظلت الحجاية ابالي...شمدريها يحب الاطفال
مرة من دنروح للدوام سألته...
_خالد تحب الاطفال
_اكو واحد مايحبهم...وياريت نسوي طفل بسرعة
_هو بيدي ...غير رزق الله
_هسة كملنا شهرين اذا هالشهر ماكو راجعي دكتورة
وفعلا بالشهر الثالث طلعت حامل...ومن كتله اريد احلل واخذني للمختبر وطلعت النسبة ايجابية
جانت فرحته جبيرة...
اول ماوصلنا راح طاير لاهله...وسمعت هلاهل اريج..