ورود شائكة

البارت التاسع

عجبي على هذا الزمن...اصبحنا نرة ونسمع ما لا يصدقه عاقل ولا يستوعبه عقل...
همس ليل
بقيت دقيقة واكفة بالباب...
امد يدي اريد افتح الباب وارجع ابعدها
دقيقة بس كانت دهر كامل تمر علية...
اشكال الصور تمثلت كدامي...
بس ماجان وحدة من هالصور ببشاعة ماشفته من فتحت الباب...
بقيت مصدومة من الموقف....
شي صعد من رجلي لراسي....
خلاني جامدة بمكاني....
جان خالد وية صديقه ولد اسمه عامر...
بس وحدهم مو مثل ماصورت اكو وحدة وياهم...
منظر قبيح جدا...اعجز عن وصف قذارته
انتبه خالد لوجودي وكمز سد الباب بوجهي..
اني جنت صنم بس النفس يصعد وينزل...
طبت الباب مثل الي وعتي....وصوت عمر من كام يبجي...
رحت للهول كعدت على القنفة مدهوشة...
وباوعت على ابني ...رحت له وشلته...
واتجهت للمطبخ احاول اسكته لان كام يبجي حيل
احس عقلي توقف عن التفكير...
معدتي كامت تكلب من القرف...
سمعت صوت الباب الخارجي انطبك عرفت صديقه طلع...ثواني ودخل خالد...
جان لابس بجامة بس...
زاد لعبان النفس من شفته...
كمت ارجع ليورة وهو يتقدم علية...
لحد ماصار ظهري للسنك...
حظنت عمر حيل...
_هاجر خلي افهمج...
لا تخافين مني بس اسمعيني...
ماجاوبته...
_على كيفج الولد خنكتي...
جيبي...مد يده يريد ياخذه
حظنت ابني حيل...حسيته قذر مو لازم يلزمه
_عوفي راح يختنك...
خلاص ما اخذه ...بس تعاي افهمج الوضع
هزيت راسي...
_بس خل نكعد حبيبتي واشرحلج
اشرت بيدي...روح اغسل احسك قذر
_اذا اغسل نتفاهم
جان يحاجيني عبالك طفلة صغيرة..
ماعرف شكلي المصدوم مال واحد مايستوعب الحجي
_اي...
_هسة ثواني..
راح من سمعت باب الحمام انطبك...
باوعت على ميز الطعام...من دخلت خليت عليه مفاتيح البيت...
وجزداني والشال وجنطة ملابس عمر...
بسرعة جريت المفاتيح والشال والجزدان
كلها ابيد وحدة...طلعت وقفلت باب المطبخ...
حتى بين مايدور مفتاح الباب...
طلعت اركض واني الف الشال...
باوعت الشارع بعيد مالحك اوصله...
دخلت بفرع قريب...كلت منه اطلع للشارع العام
الجو جان كلش بارد...نهاية شهر الثاني
والدنيا ليل...من اجينة بسيارة زوج نور تدفئة ما حسيت...
بس هسة واني ملابسة غير بس عباية جتف وتراك
ثلجت بس ماطولت من بديت اركض عركت
جنت احضن عمر لصدري حيل واركض...
حسيت سيارة طبكت بصفي...
خفت وابتعدت ..سمعت صوت ولد..
_خيتي بيج شي...الطفل بي شي...
التفت عليه...هزيت راسي لا
_اوصلج لمكان...
_اي
صعدت ركض...عمر يبجي واني احاول اسكته
وشفت الولد يباوع علية بالمراية...
ماعرف عباله خاطفته...لو بية شي
شوية وحسيت معدتي كامت تغلي
_عفية اوكف...
وكف قريب الرصيف...
بس فتحت الباب على كعدتي انداريت وبديت اتقيء
ومن خلصت مد ايده بكلينس...
اخذته وشكرته..جنت مخلية عمر بصفي...
_تريدين اوديج للمستشفى....
_لا بس وصلني لاهلي
_اذا تحتاجين اي مساعدة اني اخوج كولي
_تسلم ماتقصر
دليته وصلني لباب بيتنا...
ومن نزلت ردت انطيه كروة ماقبل....بقى واكف لحد ماطلعت ماما وفتحتلي الباب
_شبيج ماما شجابج بهالليل...
اخذت عمر مني...
دخلت تلكتني بيبي
_اسم الله يمة شجابج بهالبرد...
وليش وجهج اصفر...
ماجاوبت مشيت لحد الهول وكعدت على اقرب قنفة
ماما خلت عمر يم صوبة كهربائية...
واقتربت مني
_احجي امي شبيج...تعاركتي وية خالد
كعدت يمي ومدت ايدها على ايدي
_عزة ايدج ثلج...
راحت جابتلي بطانية...وجرت الشال من راسي
ولفتني بالبطانية...
هية واكفة واني على كعدتي شبكتهة وبجيت
صار سنيين ما نازلة دمعتي...
_لج ماما فتيتي گلبي ..شبيج...
ام مصعب...بيبي ريحي امج...احجيلنا شصاير
ضاربج خالد...متعارك وياج
_ماما يخوني وعلى فراشي...
وشلون خيانة قذرة....ماما طلع نكس
نكس...
شبكتها حيل ابجي واحجي
_فهميني ما دافهم عليج...
منو... خالد...شفتي وية وحدة
بهالاثناء اندك الجرس...
راسا جفلت
_ماما عفية ما اريد اشوفه...
عفية ..كوليله مو هنا
جنت ارجف واحجي
_على كيفج امي...لا تخافيني
طلعت تريد تفتح الباب...اني راسا اخذت ابني ودخلت للغرفة وقفلتها
سمعت صوت...بس مو واضح...
بعدين بدة يوضح واقترب...كمت اخاف...
جان يكول وينها هاجر...
مايصير هيج اضمون مرتي وابني
سلوى...الي مايصير الي سويته...
مرتك اجت مهزومة بهالليل ليش...غير صار شي
خالد...معليكم...اني وياهة نتفاهم
ام مصعب...شنو معلينة غير بنتنا...
والتفاهم مايصير بالتهجم...
سلوى...تفضل بالصالة خلي نفهم
ابتعد الصوت...بس بقى مرات يعلى
جريت تلفون امي جان على الشحن ودكيت على نور
من فتحت خط...
_نور لحكيلي...
_هاجر...شبيج حبيبتي..شصار
_تعاي نور اجى يتهجم علينة
_منو هذا انتي مو ابيتج
_لا يم اهلي...
_هسة جاية...
بيت عيال نور نفس منطقنا دقايق وسمعت صوت الجرس....
شوية وسمعت باب الغرفة اندكت..
_هاجر افتحي الباب اني نور
فتحت وبس طبت رجعت قفلته
_لج.شصاير...بالباب ونسمع صوت خالد
_نور مصيبة...
كعدت على الجرباية وخليت ايدي على وجهي
_شصار فهمني
_شفته وياه بغرفتي وعلى فراشي...
لج ابيتي...نكس...قذر
_وية منو ...وحدة تعرفيها
_وية عامر..
_عامر صديقه الي جنتي تحجيلي عنه
شنو جايبين وحدة وياهم
رفعت راسي...لا
همة سوية...
_عزة...صدك تحجين...خاف متوهمة
_لج شفتهم بعيني...شنو متوهمة
كعدت يمي...عزة العزاج...
هاي شلون مصيبة...
كلتي لامج
_لا ما كلت مالحكت....راسا اجى
_لا تحجين لاحد...بينا هالشي...
كولي لكيته وية وحدة
مالحكت اجاوبها...سمعنا عياط صار بين اثنين
كمزت من مكاني...هاي شنو
_اكيد احمد تعارك وياه...خلي يولي
هسة شلون ...شراح اتسوين
_شمدريني....شمدريني...
كلشي اصورت الا هالشي
الا يطلع هيج نكس...
لطمت على وجهي...
لزمتني نور...على كيفج...بعدج نفسة وعمليتج خضرة
_لو ميتة ولا اشوف هالمنظر
حسيت شي نزل علية
لزمت ايد نور....
_شبيج هاجر
_ماعرف
وكفت واباوع لنور اخترعت ...لج هاي شنو
فايضة بالدم...
كامت ركض فتحت الباب واتصيح
سلوى...سلوى
اجت ماما...من شافتني
_يمة بنيتي شبيج
_خلي نوديها للدكتور
هاجر...ماما راح
_اي نكشر
اقتربت مني تبدلي لان حسيت اعصابي ارتخت
نور...سلوى اني واحمد ناخذها للمستشفى
ابقي يم الصغير
سلوى...شلون اعوفها
هاجر...ماما مابية شي..بس ديري بالج على ابني
رضعي ممة...
بالسيارة خليت راسي على الجامة...
احس كصتي نار...كمت اشوف السيارات مثل الخيال
من وصلنا وفتحت الباب اريد انزل...
احس الكاع تهتز جوة رجلي...بحيث اريد اثبت رجلي
ما اكدر...
حاولت اوكف...بس مثل واحد انسحب البساط من جوة رجله...
وكعت...واني اسمع صوت نور اتصيح...
حسيت اكو احد رفعني بالهوى...
وبعد ما اعرف شصار...
من فتحت عيني جانت نور يمي...
شافتني اجت لزمت ايدي
_ها حبيبتي شلونج
_شصار
_غير هبطينا...من نزلتي من السيارة وكعتي من طولج...
واحمد شالج ركض...طلع ضغطج هابط...
_المغذي ديأذي ايدي
_يمعودة اكو وحدة تسوي سوايتج...
صارلج شهر من مسوية عملية...
وبعدج نفسة اطلعين ركض...
صار عندج نزف ..وربج الدكتورة لحكت عليج
خلي اصيحها ...
شوية واجت الدكتورة....
_شلون صرتي
_الحمد لله...بس احس بدوخة بس ارفع راسي
خلت الجهاز تفحص ضغطي
_احمدي الله دكتورج جانت بعدها ماطالعة من جابوج
ولحكت عليج...
بس اريد افهم شمسويةوهيج يصير نزف...
غير اديرين بالج
_صارت دكتورة
_عموما دكتورة سجى استاذتي وصتني عليج
وعرفت اصلا انتي عندج فقر دم من جنتي حامل
وجايبة عملية...اكيد يصير عندج ضعف
كتبتلج على مقويات وابر حديد...
حاولي تاكلين زين...وابتعدي عن العصبية ...
بعده رحمج مالم....
عافتنا وطلعت...
_نور خابري على ماما شوفي عمر شلونه
_هية خابرت تطمن عليج...وعمر مابي شي مرضعته ونايم...
_شوكت نطلع
_الصبح...دزيت احمد يجيبلج ملابس من اهلج
هزيت راسي...وغمضت عيوني تعبانة...
بس كل ما اسد عيني يرجع المشهد كدامي...
احس معدتي ترجع تغلي ...
طلعنا الصبح للبيت...لكيت ماما ماخذة اجازة
وصلت اتجى على نور....
ماما من شافتني ظلت تبجي....
اليومين الاولى جانت صحتي تعبانة...
بس حاولت اقوي نفسي واوكف على رجلي
ما اريد شي يكسرني...
هاي جانت واجهة...بداخلي جنت مكسورة حيل...
نور يوميا تمر تطمن علية وتضربني ابرة
_هسة احسن
_الحمد لله
عدلت نفسي بفراشي من دخلت نور...
حاليا انام بغرفة امي جوة...
كعدت يمي على الجرباية...
_سلوى اتكول خالد اجى مرتين...
_ادري...وجاب تلفوني بس قفلته
_هاجر اول وتالي لازم تتواجهون
_اكيد ...اريد استعيد صحتي واكدر اواجهه
_كلتي لامج
_شكول...بلحظتها جان نفسي افضحه كدام كل الدنيا
بس هسة لا...
_ليش
_لخاطر ابني...من يكبر يتعير بيه...شنو ذنبه
_وانتو شنو ذنبج ...هواي راح يلوموج
_اني طول عمري متحملة وكبرت على هالشي
خلي على الاقل ابني لابني مستقبل مختلف
ما اريده يشعر بنقص...
ولا تنسين الشغلة جبيرة مو صغيرة
_اوووف...شلون وكت...هسة انتة شناقصك
بس لو جان يصلي جان منعته صلاته
_هواي ناس اتصلي وهم ترتكب الحرام
_لا هاجر...اذا صلاته صحيحة ومخافة الله موجودة
راح يمنعج من هواي امور حرام...
شوفي من ازوجت وعاشرت عيالي...
فهمت شنو الدين..شنو الصلاة
_احنة هم بس نصلي ونصوم ...بس ماسوينا شي غلط ولا ارتكبنا الحرام
_صح...لان اهلنا علمونا هالشي عيب...
واخذناها من هالباب...
مو من باب الحلال والحرام...
بدليل هواي امور ماموجودة بالدين...
بس هية من عادات مجمعنا...
_صح..
نور اني غلطت بشي
جرت نفس...واخذت ايدي بين ايديها
_اي هاجر...ماكول انتي استعجلتي..
بس بديتي غلط...
_شلون استعجلت....لنفترض هو مو وياي بالدائرة
واتقدم زواج تقليدي...
ماجان واجهت نفس الشي....شمدريني داخل البيت شنو...
_مو هنا المشكلة....المشكلة بديتي زواجج برهان
ونصحتج هواي
_اني ماسويت شي...ولا لعبت عليه....
جنت اريد بس احس اكو انسان ياخذني لنفسي
بدون مايباوع لماضي ابوية...
ماكدر افهمج الي بداخلي...
_فاهمتج.....وادري شعورج شنو...
لكن طريقتج جانت خاطئة
وهسة مايفيد الحجي...
اوكفي على رجليج...واخذي قرار صح...
لان هذا مو مستقبلج وحدج...عندج شخص مسؤول منج
هزيت راسي....
مر عشر ايام واكثر....يلا قررت اشوف خالد
وكلت لماما خلي يجي...
بيومها من وصلت لباب الصالة مالتنا...
جنت اقدم رجل واخر رجل...
مو خوف لا...لكن احس نفسي جدا مقرفة منه
دخلت...هو من شافني وكف...
جانت ماما كاعدة ...راسا عافتنا وطلعت
كعدت على القنفة مقابيله...
_هيج بدون سلام..
دنكت ما اريد اباوع بوجهه
_هاجر باعيلي
_ما اكدر
_ليش
_احس بالقرف
_انتبهي لحجيج
رفعت راسي
_هم لك عين تحجي....
_انتي فتهمتي الموضوع غلط
وكفت...باوع اذا جاي وناوي اتشككني بلي شفته
انتة غلطان...
اني بقيت الفترة الكافية اتفرج عليكم وشفت الوضع كله...
مابي اي مجال للتشكيك
_منو يصدكج
_اني مصدكة نفسي...
_اكعدي خلي نتفاهم
رجعت كعدت...
_ماكو اي تفاهم...طلكني
_شنو....تخبلتي...شنو اطلكج صارلنا سنة بس من ازوجنا
_هية هنا المشكلة...بالمدة...اكو ناس من اول شهر تطلك
_لا مو قصدي...هاجر فكري بأبنا...
_هو اني افكر بيه...شمدريني من يكبر ما تعتدي عليه
_لا اكيد انتي تخبلتي...
وكف...
_لا ما تخبلت هذا واقعك...
_واذا كتلج ما اطلك
_بينا المحكمة...
_وشراح اتكولين
_كلشي
_ارجع واكلج محد يصدكج
_مو مشكلة ابقى ارفع قضية ورة قضية
_اطلبج ابيت الطاعة
_ما اجيك لو تطلع نخلة براسك
_تعرفين شنو معناه...تعتبرين ناشز...
وتبقين معلكة عشر سنوات
_مايهمني....ليش الي شفته يخلي عندي رغبة ازوج بعد
اجى يمي وركع يم رجلية...
_هاجر....غلطت...وهذا مرض...ساعديني حتى اتعالج
مستعد لكلشي...
_هو شنو مرض...شنو اساعدك تتعالج...
انتة تعرف سوايتكم هاي يهتز له عرش الرحمن
_اكسبي بية اجر وساعديني
_هذا الحجي لو جنت مراهق...بس انتة عمرك ٣٣ يعني كامل الوعي...
_سبحان الي مايغلط...
_خالد من شوكت هالشي عندك
سكت
_احجي
_من جنت بالاعداية
كمت راسا من مكاني
_الله اكبر...وجاي اتكول اتعالج
ما تعالجت سابقا...
انتة ماتصيرلك جارة ...اكثر من عشرين سنة
شنو هالقرف...
وكف مقابيلي...اذا وكفتي بجانبي ممكن اتعالج
_لك ياجانبك...
تدري تحس معدي تغلي واريد اتقيء من قرفك
شهالعبان النفس...
شلون تريدني أمن واربي ابني بحظنك
منو يدري من اهلك...لو مايدرون
_محد يدري...بس
_بس منو
_امي
_وماحاجتك
_حجت وحلفت لها بطلت
_ماعرف اني شلون لازمة اعصابي واحجي وياك
خالد طلكني بدل الفضايح
طلعت ركض وعفته قبل مايحجي...
حاولت ماما تعرف شي...
وهو حاول يقنعها حتى تقنعني...
بس جان موقفي ثابت ...
اجت ام فهد اتحاول وياي...
_خالتي من سمعت تريدين تتطلكين مريضة
كلش...
خيتي كولينا شنو السبب...شو جنة نشوفكم مثل الورد
شصار...
_ام فهد كلشي قسمة ونصيب..
واكو امور ماتنحجي
_يجوز اتكولين ادخل هواي...
اني من دخلت لبيتهم عمري ١٤ سنة...ربيت وياهم
وكبرت على اني وحدة من اخواتهم...
وزوجت كل البنات على ايدي...
عمر خالد جان عشر سنوات....
احسبه مثل فهد ابني...
ما اكدر اشوف بيته ينهدم وابقى ساكتة
_بيته هدمه بيده...
اسألي له
كامت تريد تطلع...بس نقهرت صح هواي تحشر نفسها...
بس جانت لها وكفات حلوة وياي
_ام فهد ابريني الذمة...ماصار وكت نتعارف بشكل صحيح
رجعت علية باستني
_احنة مقهورين لان ماشفنا منج شي محلو
ماقبل يطلك ودز خواله وعمامه لخوال امي
الي ادخلوا...ومن عرفوا السبب خيانة عبالهم وية مرية...
كالوا...يتوب ومايعيده وناخذ عليه تعهد
بس اني جنت قافلة...اخر شي شالو ايدهم...
كل الاطراف جانت تريد تقنعي اخذ عليه اي تعهد وارجع لخاطر ابني...
بس شخص اكثر من عشرين سنة عايش بهيج قذارة
شلون يتوب...صح ربنا قبل التوبة...
احنة بشر.....واني ما مستعدة اعيد نفس المشهد
رفعت قضية...وجانت كل مرة تتأجل لو يحولونة للباحثة الاجتماعية....
وبعد سنة...وما اريد اشرح معاناتي بالمحاكم
حصلت على الطلاق...بيومها طلعت من يم القاضي
ماعرف ابجي...ماعرف افرح...
بس شفت خالد وهو دموعه اتصب...
اقترب مني...
_ليش هاجر...عمري ماحبيت احد مثل ماحبيتج
يمكن گلبي رق شوية...
بس من اذكرت المشهد رجع قسى...
رجعت من ذكرياتي واني اسد باب الكنتور...
مثل ماسديت الستارة على حياتي الماضية
وناوية ابدي من جديد...