غلطة مراهقتين

،،،، غلطة مراهقتين  ،،،،

الحلقة الأولى 

تنويه  ... القصة فيها مقاطع جريئة لكن هي رسالة لكل الآباء والأمهات ان يتابعوا بناتهم وابنائهم  ...  الأحداث حقيقية  ولكن هناك إضافة  خيال مني ... اتمنى ان تنال إعجابكم  ورضاكم 

لا شيء  أسوء من أرتكابك  غلطة  تستهين

بها  لتصبح  الحبل  الذي لففته حول عنقك

بلحظة ضعف طائشة غير مبالي بعواقبها  ...

أن تخطأ فهذا ذنبك ولكن من الصعب أن

تمحي هذا الخطأ من عقول من هم حولك

وكأنك تسبح عكس التيار  تلاطمك الأمواج

العالية  لتتذكر من أنت وما أقترفت لتصبح

وصمة عار على جبينك تلاحقك أينما كنت  ...

تدور أحداث القصة حول شقيقتين  اقترفتا غلطة  أودت  بهما إلى ما لا يحمد  عقباه 

كلللوووش صلاوات ما شاء الله  بردت عيون الحارة ...

شبيج يمرة تسودنتي  فضحتينا  منا الجيران ...

اي اتسودنت  يحجي  أبشرك  وأخيراً لكيت مرة  لعادل  ...
الحجي ... هاااا  احلفي  تحجين صدك  ...

اي اي والله جا اني يايوم  شفتني مجذبة عليك ياابو عادل ...

الحجي ... هسة اكعدي واحجيلي  منين بت

منو ... شنهو وضعهم  ... زين هي تدري بعادل وضعه  قبلت بيه ...

حرام علينا  نظلم بت العالم ...
ام عادل  ... يبوووو  شبيك يحجي  اخذتني

حاصل فاصل ... شو تتعال  احجيلك  ...

جارتنا  ام أركان هي اللي دلتنا  عليها وقبل جم يوم فتحت وياي الموضوع  ...

الحجي ... وليش ماكلتيلي 

ام عادل  ... والله يحجي  اتوقعت مثل كل

مرة نخطب بيها  يعرفن وضع عادل ويرفضنة 

بس هالمرة الله سهلها  وهاي جيتي منهم ...

ابو عادل ... هاي الاخبار الحلوة هسة احجيلي

كطعتي كلبي فلك طر النسوان ويكلك  منين يجي الضغط والسكر

ام عادل  ... ياااا  جا اني زعلت منك هيج اني

صرت بعد هذا العمر اجيبلك الضغط والسكر

جا وهذا البيت منو لازمة لك منو اللي خلفتلك  هالولد والبنات 

ابو عادل  ... خايبة شبيج زعلتي بسرعة ...

فدوة اروح لخدوج  الحمرة جا غير اول

ماشفتهن  دكيت رجل الا  اتزوجها  لو اعرف اكتل العشيرة علمودها 

ام عادل ... غير جنت اضوج منك  وأكرهنك

وبيوم  كالت عمت عيني المرحومة  امي سعد

جاي يخطبج  اني كلتلها  مااريدة  بكبر  ابوي

كالت ولج يمة  اني مادايمة الج وهذا سعد

الكل تحلم بيه يخطب مو بناتها  وافقي

واسكتي شتردين بعد  يدللج  ويعزج  حالج

من حال مرته نديمة  هي صدك خبلة ولسانها

  شطولة بس سعد يستاهل تتحملين  اني مو

مطولة  عمر وياج انت وخواتج  اخذي واسكتي ...

ابو عادل  ...  اي  وهسة شنهي  بطلتي  ماتحبيني  ينجمة  ...

ام عادل  ... خايب  شمالك  بسرعة تصير

بارود  جا غير اعشك يبعد هلي وكل طوايفهم

الف رحمة على روحج  يمه من قنعتيني اتزوجه

ابو عادل  ... خايبة شو تعاي  ...
ام عادل  ... يااا يااا عيب حجي بنياتك منا

ابو عادل  ... اي هسة سولفيلي بخطبة عادل هيج الله وتتم على خير

ام عادل  ... شوف حجي  هي البنية يتيمة

وفقيرة  حال ولسان  عايشة عد اختها دخلت

سلمت وقدمت ماي وكعدت شوية يمنا

وأختها كلتلها  يلة روحي خلينا وحدنا ...

البنيةما اهيسها  ( احسها)  الا حمامة  وطارت

اختها كالت فقيرة مثل ماشفتيها  ...

اني كلتلها  عن الحلال والحرام  ترى أبني

عندة عوق  برجلة  يعني أعرج حتى مااظلم

البنية  ولا باجر عكبة  تكولون غشيتونا إذا

موافقين وماعدكم مشكلة نكمل  على بركة

الله  من حق الطرفين يسألون على بعض

وهذا عنوانا  واحنا من عشيرة ******* ابني

عادل يشتغل بمحل هو وصديقة والحمد لله

  ماشي حالة خاف عبالكم  العوق مأثر على

حياتة ياريت لو يتشاوفون  حتى يتعرفون

على بعض ويشوفها وتشوفه هم من حقهم

هذا عمر راح يخلصونة وية بعض  ... 

كالت هذا هو ماعدنا اي طلبات واختي فقيرة

مايهمها الشكل اهم شيء رجال يصونها

ويحترمها   يومين ان شاء الله نسأل عليكم ونرجعلكم الخبر وية ام أركان

ابو عادل ... اكلج انت حجيتي وية البنية  خاف خرسة  لو لسانها ثكيل  طرمة  ...

ليش بهالسرعة تكولين وافقن 

ام عادل  ... والله يحجي  البنية بس قدمت

لنا الماي وسلمت وكعدت سكتة بس كلامها

مابية شي  واللي فهمتة  اختها تريد تزوجها

يجوز تحسها  حمل عليها وتريد تخلص منها

لان هي متزوجة وهاي يتيمة  محد لها ...

وهذا عنوانهم  روح واسأل عليهم وان شاء الله  إذا اكو نصيب يصير ... يتبع

سوف يكون النشر على حسب التفاعل

#كهرمانة