غلطة مراهقتين
الحلقة الخامسة
بقلم كهرمانة
دخلنا للبيت ... شوية ورحت لأمي بغرفتها اريد اعرف شكو صار يم الدكتورة
شافتني أمي وكالت تعال يمة عادل ادخل وسد باب الغرفة وراك
كعدت يمها ... كالت اكلك يمة الدكتورة تكول لازم تعرضوها على طبيب نفسي
البنية مو طبيعية بعد الموقف اللي سوته بالدكتورة
سألت أمي.. ياموقف يمة ؟
يمة الدكتورة رادت تفحصها شو هاي رئسا
اكرصي الدكتورة وتفلي بوجها ...
هااا عود صدك تحجين يمة
ام عادل ... اي يمة والله هذا الصار والدكتورة خايفة الله وراعت حالتها النفسية
وكالت حجية اعرضوها على طبيب نفسي لازم تستعجلون ترى أعصابها مبينة تلفانة و هسة حامل الحالة راح تزيد
عليها واحتمال تبدأ تضربكم وتأذيكم
بقيت مذهول شنو طبيب نفسي شنو تأذيكم يعني اني هسة اكعد احرس استغفر الله ربي
مر على حمل خولة ٤ شهور ولازم تراجع طبيب نفسي ... اخذتها ورحنا على اول
جلسة واني ادعي بكلبي لاتسويلي موقف كعدت والدكتور يسألها ويسألني بعدين
كام وطفى ضوء خولة رئسا صرخت لاتخنكيني والله مااعيدها والله مااسويها
لااااا افتحي الباب افتحيلي الضوء فدوة الله يخليج لاا تجويني وكامت تزيد بالعياط
بعدين مااحس الا خولة عضتني حيل بأيدي ركض الدكتور فتح ضوء الغرفة وخولة
ماعافت ايدي الا وهي مطلعة الدم بعدين بقت ترجف خافت مني اضربها واني الم كلبي جان اقوى من عضة خولة إلي
كال تعال أكعد يمي قريب مثل مااتوقعت
زوجتك حالتها تعبانة وهي هسة حامل حتى
مااكدر انطيها علاجات لان تسبب تشوه للطفل ومثل ماتعرف هيج علاجات قوية
تريد جسم يتحمل وتريد إنسان يساند المريض ويكون قوي المشاعر مو بس قوي
البنية يتحمل كل اللي راح يصير بمرور الوقت الوضع مايبشر بخير ترى هرمونات الحمل راح
تغير كل شي وتزيد الطين بلة كونوا مستعدين لأي شيء أنت الشخص اللي راح
يتحمل العبء الأكبر وعائلة تراعي هذه الحالة النفسية
وبصراحة حتى مااخفي عليك لان اني مهنتي إنسانية ولازم اوضحلك بعض الأمور سبب وصول زوجتك لهذه الحالة هو
بسبب العنف الأسري والظاهر معنفة ومضروبة ومعاقبة بأشد العقوبات وهي
طفلة ... والطفل اللي بطنها راح يطلع بيه من مرض والدته بنسبة ٤٥ بالمئة
أنت تقرأ
غلطة مراهقتين
ChickLitتدور أحداث القصة حول شقيقتين اقترفتا غلطة أودت بهما إلى ما لا يحمد عقباه ... فما هي تلك العواقب تجاه غلطة مراهقة طائشة 🔞🔞🔞
