غلطة مراهقتين

الحلقة السادسة
بقلم كهرمانة

كلماتها الأخيرة حجتهن بثقل كوة تفتح عيونها استسلمت للنعاس ونامت اباوع

عليها واباوع على حالنا ... منو المظلوم اني لو أنت لو اللي راح يجي ثالثنا

غطيتها وبقيت ضوء خفيف بالغرفة وهي نايمة مثل الطفل وكأنه اول مرة

احس بيها تنام مرتاحة بوستها بكصتها ونمت

لاااا لاااا لاتخنكيني فدوة الله يخليكم ظلمة مااشوف اخاف من الجريذي عاصم افتحلي الباب ... بابا بابا وينك اخاف جيب ماما وتعال افتحولي الباب

عادل .... وماحسيت الا واني اشمر كلاص المي عليها كعدت بشهكة قوية

انت ليششش ليششش وياهم شسويتلك اني انت مثلهم شرير اكرهكم كلكم

كرفصت على نفسها وخلت راسها بين ركبها وتبجي وشعرها منفوش من أثر الكابوس اللي شافته

وتاكل بأظافرها ... وتهز برجليها امشي مااريد اشوف وجهك

اهدي اهدي بس شوية هاج هذا المي اشربي وارتاحي

اخذته مني بقيت امسح على شعرها الا ان كلتلها يلة تمددي وغطيتها ...

عفتها وطلعت لكيت باكيت جكاير الوالد فوك المبردة ناسيهن وكعدت بالحديقة

وبقيت أدخن واني حسبة تجيبني وحسبة ترجعني اشلون ياربي لا هو يوم

لا هو يومين هذا عمر إذا اني مو يمها واجتها هيج حالة اكيد تأذي نفسها لو تأذي

احد ثاني .. اشلون اذا اجه الطفل احرس عليها على نفسي لو على الطفل

صفنت وبقيت اراجع كل كلماتها واللي لفت انتباهي دائماً تصيح لاتخنكيني

يعني تقصد مرة ... اني لازم اعرف اللغز واللي وصلها لهاي الحالة وعدم ثقتها

بنفسها ولا بالناس شنو بلكي اكدر اساعدها وتشفى وانقذ زواجي ومصير الطفل الجاي ...

بس اتذكرت كلام الطبيب لما كال الطفل راح يكون حامل نسبة من مرض امه

قطع صفنتي والدي ... ها بوية خير اشوفك هنا كاعد وليش كل هاي جبال

الهم والحزن على وجهك اذكر الله وليدي ربك من يخلي الداء يخلي الدواء

بس احنا البشر دومنا متسرعين يبقى تركيزنا بس على الداء ونكعد ننوح

ونتأفف ونتشكى من قدر رب العالمين ليش بس اني وليش اني مو مثل الناس ...

خليها بالك وليدي الامتحان مو بس بالمدرسة... لا الامتحان موجود بكل امور الحياة

مرة تمتحن بصبرك ... مرة تمتحن برزقك ... مرة تمتحن بخلفتك ... ووووو هواي ياوليدي

بس الحكيم واليحسبها صح مايكعد يركز بس على الامتحان وهو ماتعب نفسة بالجواب ... لا