الخطيئة

الجزء 01

جيت جارية من الاوضة سامعة الجوطة جاية من المطبخ لقيت اولادي قالبينو فوق تحت ومليانيين دقيق بدون احس طلعت الشبشب وجيت عليهم بقيت اكورك..

زفته منة قومي سريع زحي من يزن وعلي الحمام ولا ثانية ولا ثانية ما اشوفك قدامي انتي فاهمة يلا طيري سريع،، واااي انا خلاص حيلي اتهدا اليوم كلو جارية وراكم انا... تعال يزوني انضفك احيي شوف البت دي ملتك دقيق كيف...

في اللحظة دي جا عمر داخل (راجلي) ومعاه منة بتبكي جا جايط وهاج فيني

ﺭﻳﻢ انا مليون مرة مش قلت ليك ما تعاقبي منة علي حساب يزن وتجوطي فيها...

عاين انت ما تجوط ساي وانت ما عارف الموضوع ورفعت الشبشب انتي اصبري لي الليلة وكمان بتكضبي.. جريتها من يدها وهي قعدت تبكي يا بابا يابابا...

طاااخ عمر ضربني كف ودفرني.. اوعك يا ريم تضربيها انت فاهمة..

انصدمته طبعا اول مرة عمر يضربني...

رفعت صوتي عليه وقعدت ابكي شنو الايامات دي بقيت عصبي احسن تراجع نفسك والليلة وصلت للضرب يا عمر خلاص عادي تمد يدك علي.. ياتو يوم كنت بتدخل فيني وفي شفعي بعرف اربيهم براي ..

انا الولدتهم غالبني اربيهم يعني...

الله الله والله بقي عندك صوت كمان وتردي علي والله اضربك واكسر راسك كمان.. اصلك اهلك ما عرفو يربوك انا بربيك من اول وجديد... وساق منة ومشي اسمع ليك كرووو صوت الباب قفل شديد شكلو طلع..

قعدت في الارض واتفقعت بالبكي الحصل علي عمر شنو فجأة اتغير علي،، ما كان كدا.. انا الخليت قرايتي عشانو وما كملتها عشان بحبو موووت،، لي هسي اتغيرت علي،، الناس كانو بضربو بينا المثل من شدة ما متفقين وباين الحب فينا... استغفر الله العظيم،..

ماما انتي بتبكي عشان ابوي ضربك معليش انا بكرا اكبر وبضربو اذا ضربك..

اتخلعت من كلام يزن القالو وبدل اقول ليه كدا حرام وما صاح زرعت فيه الكراهية في ابوه..

اي انت ولدي وسندي بكرا تكبر وتحميني منو لو ضربني اوعي يا يزن تخليني انت فاهم ومسكتو علي وقعدت ابكي..

اتزكرت عمر لما اتقدم لي وجاني عن طريق واحدة معرفتنا هو اخوها... كلمتني انا اول وقالت لي هو كان بحب ليه بت خمسة سنوات بينهم علاقة مع بعض ولما كون نفسو واتقدم ليها اهلها رفضوه عشان جنسهم ما واحد،، البت اهلا متعصبين في الحتة دي بالذات... قالت لي ما تقولي لي اهلك دا كلام بيني وبينك بس عشان تكوني عارفة.. وقتها انا قلت ليها عادي ما بهمني ماضيه انا بكون الحاضر بتاعو وكل شي..

ما بنسي اسمها (عبير)

المهم عمر اتقدم لي واهلي وافقو عليه وتم الزواج..