الخطيئة

الجزء 16

كم يوم مشت وفقنا من صدمة براءة ورفضها ل احمد..

بالرغم من الحصل دا شايفة ابوي مبسوط منها وسبب بدون سبب يجيب ليها في البسكويت ويسألا اكلت شربت عايزة شنو..

براءة سوي لي شاي،، جيبي لي موية

بقت عندو البت المفضلة بينا..

حتي هي زاتها لا خلت صاحباتها لا بنات اهلها ما حكت ليه انو العريس جا اتقدم ليها تاني وهي رفضتو بمزاجها..

نفسياتها اتحسنت احسن من اول...

رانيه من يومها غامضة انا بسميها الغتيتة هي اختنا الوسطانية لكن رزينة اكتر مننا..

بتعرفي عنها الحاجة فجأة.. شخصيتها اقوي مننا مع انها عندها روح الاجرام برضو...

حياتنا الحمدلله ماشة مستقرة ولو حصلت مشكلة بتكون عادية .. ماف بيت ما بخلو من المشاكل ...

*وزي ما بقولو طول العشرة بتكشف الزول علي حقيقتو..

زهراء : شهاب اجازتك قربت تنتهي،،

وانا لسه ما طلعت الجواز ارح معاي الليلة.

شهاب : اااا اي كدي خليه بكرا انا هسي عندي مشوار مهم كدا..

زهراء : مشوار شنو؟

شهاب : امس مشيت اسحب قروش من البنك والبطاقة قفلت هسي ماشي البنك اشوف الحاصل...

زهراء : انا عندي قروش ما فرقت..

شهاب : قلت ليك لي بكرا

زهراء : ولشنو بكرا انا عندي قروش خلينا ما نضيع وقت قوم البس..

شهاب : ياالله انتي ما بتفهمي ما قلت بكرا وخلاص شنو زانة لي في الموضوع دا من الاسبوع الفات ولا اقول ليك هو الجواز دايرة تطلعي لشنو؟؟

زهراء : عايزة اطلعو لشنو انت جادي في كلامك دا..

شهاب : اي جادي

زهراء : يعني انت ما حا تسوقني ولا شنو ما تقول لي حا تخليني وراك تمشي وتجيني في السنة مرة..

شهاب : اها البيت دا زاتي خاليه ليك بقيتي جنك نقة انتي دي عيشة شنو دي

(وطلع منها)

شهاب ضرب تلفون

الووو كيفك يا شاب وينكم انتو انا خلاص فاض بي الليلة اللمة وين..

-يازول من يوم مشيت ما اتلمينا تاني احوالنا زي الزفت والايجارات غالية بقت ما لاقيين بيت عديل نتلم فيه..

شهاب : والله هسي يعني كدي بيت ناس حمادة داك تتزكرو. ماف طريقة فيه..

- اهلو جو استقرو فيه بقي ما براه،، انت ماف طريقة تجيبنا عندك.. وزع مرتك بيتهم نجي نقضي الليلة معاك..