الخطيئة

الجزء 12

تاني يوم

زهراء : صلاح انا عايزة اتكلم معاك في موضوع كدا..

صلاح : قولي

زهراء : نحن لازم نطلق

صلاح : قلتي كدا يابت الناس...

زهراء : اي انا ما قادرة اعيش معاك وانت عارف كدا

صلاح : خير

(صلاح مع انو راجل بس هو النوع المسكييين،، زهراء كانت مستغلة فيه الحتة دي مودياه يمين وشمال بمزاجها)..

(بلغتنا الدارجية الرجال بقولو ليه ياخ دا تكيسة ساي)

صلاح اتصل ب طه

طه : الووو صلاح كيفك

صلاح : (صوتو مفخم كدا وبتكلم ب عوارة وبجر الكلام)

طه اسمعني انا قبل اكون راجل زهره انا ود عمها سترها وغطاها ولو ما كدا ما كنت صبرت عليها السنين دي كلها بي صعوبيتها دي وانت عارف اختك كويس.. الليلة قالت يطلقوها وانا حا اطلقها.. ياخ انا اختك دي زاتي فترت منها

يا طه الناس زاتهم اكلو وشي بي سببها لو ما رابط الدم والله ماف شي بخليني اصبر عليها.. امي زاتها كل يوم بتجيب لي سيرة الولادة وانا ما قادر اقول ليها زهره الما عايزة تلد .. بس قلت اكلمك عشان تكون عارف اااا

طه : طيب خير يا صلاح خليني اصل البيت اول نتكلم.

جا البيت واتصل بي زهراء تجي

كلم امو علي الحصل من زهراء

امي : انا اختك دي يوم حا تقتلني ماف زول بقدر اوقفا.. اصلو ما بتخت عقلا في راسها دا.. لكن دي كلو من امنية من جاتها امس يتوسوسن ساعتين ما بعرف بقولو في شنو ياها بتكون حرشتها علي صلاح..

طه : انا مش حزرتها من امنية دي اللماها تاني معاها شنو ،، دي واحدة فلتانة ما مربية ولا في زول رقيب عليها وسمعتها زي الزفت موطية راسنا زاتنا،،

غلطت حياتي انا يوم عرستها يا امي ندمان عليها لي هسي...

امي : بري ياولدي اختك انا ما بقدر اسألا ،،اذا اتكلمت معاها ساي بتطير لي في حلقي قليلة الادب من يوما..

الصبر يا طه الصبر دا ربنا ودي ارادتو تسوي شنو عاد.

(نرجع ل زهراء)

طلعت الشارع وشغالة تاكل ليها في لبانة( طق طق طببق) احيي انا الجو سخانة ونار (وماسكة طرف التوب تقش في عرق وشها) دي بلد شنو دي الله يجيبك يا شهاب تعرسني وتفكني من الفقر الانا فيه دا.. عاد بكرا ابقي زوجة مغترب الغيرة تقتلا تقتلا التقعد في سودانا دا...

(تلفونا ضرب)

( دا رقم سوداني 🤔)

زهراء : الوو اااي منو؟