الخطيئة

الجزء 10

رانيه: اها تمي لي باقي الموضوع اتفقتو علي شنو؟

براءة جات قعدت جمب اختها واتربعت وورتها اتفقو علي شنو...

ريم بقت ماشة وجاية متوترة والصداع داير يكسر راسها بسبب التفكير وخايفة تحكي لي طه يفهم غلط ويفتكرها لسه بتفكر في عمر ومراقباه لانها عارفاه غيور ولما يعصب ما بفكر ولا بتفاهم كويس..

جاتها فكرة في راسها وقررت تضرب عصفورين بي حجر وتنتهي من القصة دي لانها تعبت من كترة البلاوي الملازمة حياتها...

تاني يوم إتصلت ب اريج قلت ليها ماشة السوق بغشاها تمشي معاي..

فعلا طلعنا واخدنا لفتنا ومشينا لينا مطعم اكلنا وقعدنا نتونس..

ريم : انتي يا اريج زهراء دي ما مشت دكتور تشوف موضوع تأخير الحمل دا من شنو؟

حسيت اريج اتوترت شوية من السؤال زي اتضايقت..

اريج : والله ما عارفاها

ريم : مفروض تمشي انا بتكلم معاها امكن ماف زول شجعها علي الموضوع..

اريج : لالاا (ب خلعة قالتها) اوعي تجيبي ليها سيرة الحكاية دي..

ريم : لي في شنو يعني عادي ،، انا زاتي بمشي معاها

اريج : ما كدا يا ريم بس زهراء هي الما عايزة تحمل من راجلا..

ريم : 😮😮😮😮

اريج : ريم احسن نقفل الموضوع دا

ريم : انا اسفة ما فضول، مني بس زهراء لي ما عايزة تحمل وتلد في زول برفض الحاجة دي..

اريج : والله هي حياتها حرة فيها

ريم : الله يعين

سكتنا تاني ومن جواي الشمار عايز يقتلني بس اتحرجته اسأل اريج ودي اختها امكن تمشي تحكي ليها ومهما كان ما بترضي تحكي لي عنها ...

ما عندي حل الا براءة

بعد رجعنا البيت

براءة وين انتي

براءة : ايوااا

دخلت الاوضة لقيتها مع رانية بتوسوسو في شنو ما عارفة قاعدات جمب بعض وداخلات جوه التلفون..

ريم : الله الله ماشاءالله اتلم المتعوس علي خايب الرجا،، من بتين الصحبة دي..

براءة ورانيه : 😒😒😒

جيت قعدت معاهم وحكيت ليهم الحصل مع اريج

ريم : براءة بي قلاصتك دي عايزاك تعرفي من احمد قصة زهراء شنو؟

براءة : كيف يعني ما فهمتك؟

ريم : يابت انا مش هسي حكيت ليكم كلامي مع اريج،، يلا انا شاكة انو ورا قصة عدم ولادة زهراء دي في موضوع بالذات لما اريج قالت لي هي براها ما عايزة تحمل منو؟