الخطيئة

الجزء 19

وصلت مطار القاهرة لقيت احمد منتظرني قال نمشي الشقة اول مع اني اعترضته الا امشي المستشفي طوالي...

احمد : انتي جنيتي بي ولدك دا رضيع يادوب عايزة تمشي بيه كيف..

زينب قاعدة في الشقة منتظرانا خلي ليها الولد ونمشي..

(زينب كنت دايرة انفجر فيه لكن ما وقتو،، زينب دي منو هو و طه في سيرتها).

وصلنا الشقة ودخلنا..

السلام عليكم

وعليكم السلام اكيد انتي ريم حمدالله علي السلامة والف مبرووك البيبي.

ريم : الله يبارك فيك

(من شفتها غرت الصراحة منها)

دخلت ارضع ولدي وزهجانة من جواي عليك الله البت الما بتستحي دي هسي لابسة بجامة بدون طرحة ولا توب وحايمة قدام احمد كدا..

ما تكون قاعدة معاهم كمان في الشقة...

استغفر الله العظيم بس

(اتمليت فل)

نومتو وقمت استحميت ولبست عبايتي وجيت طالعة

لقيتهم قاعدين وبتونسو وبضحكو

(من جواي البت دي ما حبيتها قليصة كدا)

ريم: احمد انا جاهزة ارح

(طلعنا مسافة الشارع وصلنا المستشفي)

احمد : اقيفي هنا برجع ليك هسي

ودخل

بقيت منتظره مساااافة وبعاين للناس اتخلعت من الكمية العندهم كانسر ربنا يشفيهم يارب

صحي البشوف مصيبة غيرو بتهون عليه مصيبتو..

احمد : ريم تعالي ما بنقدر نقعد كتير معاه عندو جرعة كيماوي هسي..

كنت ماشة في الارض وحاسة بضربات قلبي خايفة اشوفو وهو راقد ما قادرة اتخيل منظرو بقي كيف.. بطمن في نفسي وبشجع فيها زي ما وصاني احمد ريم اوعي تبكي او تضعفي قدامو خليك قوية وشجعيه اكتر انتي فاهماني..

دخلنا

عيني جات فيه كان مغمض من حسه بينا فتح عيونو

اللحظة الشوية المغمض فيها انا شفت ملامحو الاتغيرت كلها ..

مسكت روحي وجيت عليه بي شوق حضنتو قووووي وسلمت عليه في راسو ويدو

قعدت اضحك حبيبي وحشتني والاولاد مشتاقين ليك شديد وبراءة وامي ورانيه وابوي كلهم بسلمو عليك وقالوا ليك سريع تعال لينا منتظرنك..

وطه كمان..

طه : (بتعب) حمدالله علي السلامة ياريم معليش ما قدرت اكون جمبك في الفترة الاخيرة اتحملتي تعب الحمل والولادة براك...