وحوش بشريه

مشهد

#مشهد
#وحوش بشريه
#للكاتبه 《 روزايه》

انا حقآ فخوره فيكي يا انا
لعد حاربتي وعاركتي وتعبتي
لقد كنتي الشجاع المحارب القوي
نعم انتي الان منهكه من الحروب
لذا عليكي بهدنه معي
انا افخر بكي يا انا لانك عندما تعرضتي الى الظلم
توجهتي الى الله
وعندما مررتي بالمشكله
سارعتي الى ربك
انا افخر بك لأنك آن خروجك من الحرب
قررتي تضميد جراحك ولملمت نفسك
انا حقا اريد تقبيلك
لقد عانيتي الكثير ولم يسأل عنك احد
ولم تحاولي التكلم لاحد بس سمعتي لنفسك

..........

طلعت من الغرفه واني عباره عن كتله مال نار امشي وارتب بالكلمات براسي شلون راح اواجوهم واحجي وادافع عن نفسي
كل اعضائي ترعش مدري من العصبيه مدري من الخوف لازم اخلي حد لهاي المهزله

نزلت ووكفت كدام الشيخه علاهن
مجرد مااشوفهه ابلع لساني كاعده بكل اريحيه ومشكله الجنكال الذهب بشيلتهه الف دكه بوجهه وعلامات الكبر والتجاعيد ماخذه حقهه شناشيل الشيله نازله على وجهه وكاعدين عمامي التحف العارات داير مدايرهه وعبالك يخططون على اقتحام دوله وهم كلهم من يسمعون حرامي طب للبستان يضمون روسهم حرامات محسوبين شيوخ وولد شيوخ

حجيت بكل قوتي كتلهه بيبي حرام الي جاي تسوونه اني ما اذنبت وما مستعده ارتبط بهيج انسان لو يبقى اخر يوم بعمري
واني ماسويت شي ادورين حجه حتى تخلصين مني الله مايرضى بالظلم شلون تزوجوني لانسان عقله موتمام

بعدني احجي اجاني صوت عمي محسن ولج بنت الكلب واكفه بطولج وجاي تحجين وتعلين صوتج كدام شيوخ لا اجي اكسر راسج ساقطه

حجيت بكلبي ( شيوخ جيس روبه)

حجت عجوز البين عوفهه محيسن هاي يرادلهه كتله زينه اشوفهه حليب امهه
ولج بطول القندره واكفه كدامي تعلين صوتج والله اذا ما اكسر راسج وادوس عليج انتي وامج ما اكون الشيخه علاهن
فوك كسره وجهج وتالي ادافعين احمدي ربج ما ذبحناج وغسلنه عارج

ما اتحملت كلامهه رغم خوفي من تهديده بس ما ادري منين جبت القوه وحجيت
كتلهه انتي اكبر ظالمه وربج ماراح ينساهه الج بس اصبري ولا عبالكم اسكت والله اخلي الناس تحجي بسالفتكم وخلي هذيج الساعه بحسبولكم حساب مدامني بريئه راح ادافع بكل قوتي
حرام عليكم اتهموني بتهمه باطله
يمهه طاسه كزاج بيهه مي شمرتهه عليه اجت بالحايط لو واكعه براسي جان اجت بالمخيخ
بهاي اللحظه مدري منين جبت الوكاحه والعرامه

كتلهه ماتخوفيني حتلو اتسلخين جلدي اذا ما اخذ حقي منكم ما اكون اسمي شمه
بس شنو احجي وارجف

صوتهه يلعلع ولا عبالك عجوز
خاييه من كون غمه الغمتج ولكم كوموا لزوموهه الي الا اجويهه على حلكهه ماتكدرولهه هاي الساقطه بنت ام الرجوله عليمن اطلعين اكيد على امج الي طفشت ابني من ديرته

شفت عمي كام يريد يهد عليه واني متحظره وواكفه على الدرج شلتهه ركضه خليت بس دخانتهه وراي طبيت للغرفه وقفلت الباب وكلبي يدك الف
اسمع صوته يهد ويفلت عليه بس كلهم عارات يخافون من امهم امداكم وامده امكم السعلوه
ماكدرو يكتلوني لان يخافون من خالو سلمان
كالهم اذا اجت كاتليهه الله مايخلصكم

بس والله ما اخليهم يزوجوني لهذا الوسخ ابو الدشداشه الربع لو يبقى اخر يوم بعمري
هاي تاليتي اصفه لهذا ابو تك اذن
ومايعرف يحجي وعقله نص ونص وين مايجي يشيل ملابسه

لهنا وبس ياعلاهن اذا ما احاربج حرب وما اخليج تنفذين مخططج ما اتسمه بأسمي
بس بلأول لازم اطلع منا لان اكيد عجوز البين ماتخليني اذا ما احصل كتله ودكول تجاوزت عليه

تقربت على الشباك فتحت البرده شفت بستان بيت جدو اهل ماما كدامي واشوف الجهال تلعب
اووف ياربي ساعدني اخلص من علاهن الي حاكمتني حكم النمرود
فوك كل هذا تهمتني بتهمه تكسر الظهر واذا سمع خالو سلمان اكيد يوافقهم براي ويزوجوني غصب عني ياربي ساعدني

ليش المراءه دائما يريدوهه تنفذ كل الي يطلبوا ؟؟ ليش دائما يحثوهه تتحمل كلشي بسبيل ترضى المجتمع الفاشل؟؟
ليش هي مو انسانه وعباره عن كتله من المشاعر والاحاسيس شلون هيج يذولهه..

اني بعد ما اتحمل لازم ادافع عن نفسي انتفضت بكل قوتي واحس اعضائي تتراعش لازم اوكف بوجوهم ماتمثلني عاداتهم وتقاليدهم زمن الجاهليه انتهى كلشي وين وصلت الناس واحنه تحت رحمه هالعادات الفاشله مثل عقولهم المريضه

ما اخضع وراح اواجهم واحد واحد حتلو نهايتي على ايدهم بس كافي ظلم مستقوين علينه لان بنات وماعدنه معين
بس لابد مايجي يوم وينجلي كل هذا الظلام لان ابد ما ادوم للظالم وعلاهن وعمامي وحوش بشريه ربي المعين وحده
....

حبايب كلبي اشتاقيتلكم رجعت وياكم بقصه جديده من اهلنه من الانبار
حبيت انزل مشهد منهه لان تاكل وتشرب وياي وشاغله كل تفكيري
هالمره القصه تتكلم عن المرأه وحقوقهه وشلون راح تنظلم من العادات والتقاليد الباليه
طبعا لاول مره اكتب قصه عشائريه بس احداثهه مختلفه واواجه صعوبه بكلماتهم وكلساع اركض على مسره اترجملي شكم مصطلح

اريد دعمكم ولاتنسوني بالتعليقات والتصويت اريد القصه توصل لاكبر عدد ممكن
انتظروني بس اكتب شكم بارت انزل ونرجع للاثاره والتشويق
احبكم❤❤