وحوش بشريه

البارت19

#البارت التاسع عشر
#وحوش بشريه
#روزايه

يجي وكت العتب واتعاتب وياك
واخليهن بديك ذنوبك وياي
انا الشلتك جمر تحرك بالجفوف
واظل خايف عليك يلوحك الماي
اثر سهم المضة منك اداويه
ومحضرلك مكان لسهمك الجاي
اتلكة الحزن منك واهم بيك
ويا ملكة اليسرك مثل ملكاي
مثل صبير اموت من العطش موت
اشرب دمعتي وما خسرك الماي
وكل روحي صبر واتحمل جروح
اجرح لا تخاف اتحمل هواي
صبيرة وصديقي العطش يفلان
حسبالك اذل من تكطع الماي
هينة شما شفت منك اجازيك
اردهة ضعاف الك دكاتك وياي
شجرة اني واكيد تردلي فد يوم
تكلك الشمس وتدور فياي
تاخذ يسرتي ساعتهة يفلان
كل زين الألك منطيتة يمناي
نتحاسب اني وياك الجرح بثنين
اعوف الراح الك بس اخذ الجاي
....

فضه: ها يمه بشر ناجحه لولا؟؟؟
ضرغام: اي ناجحه مبروك شمامه البطله معدلج88

فضه: يا بنيتي يافرحتج شكبرهه مبروك حبيبتي ربي يوفقج ويعوضج وما يشمت بيج اعدائج..

شمه: مخليه راسي على الكاونتر واسمع ضرغام اي فرحه بداخلي ماكو اي ردة فعل ماكو

حققت حلم وخسرت حلم ثاني حققت نجاحي وخسرت رافد بسبب طيش مراهقه...

بس الدموع تنزل من عيني اتذكرت رافد
من كال ارفعي راسي وادرسي ولا تخليهم يشمتون بيه ...

اتذكرت من كال الج هديه مامتوقعتهه

اي صدوك ماتوقعت هديتك وهي طلاقي يافرحتي الناقصه ليش مامكتوبلي الفرحه كامله

باركتلي عمه وضرغام واني اي شعور ماعندي بس امسح بدموعي

عبالهم دموع الفرح مايدرون بالغصه الي بكلبي

اتمنى اشوف حال رافد وهو يسمع نتيجتي
بنظره اني فاشله وحته ما اصلح اكون اسره

كال عليه متوحشه شلون تربي جهالي وشلون يأمن على بيته ويروح ...

عمه فضه بيومهه سوت عشا ووزعت لعلاهن وشكم بيت بالقريه كالت هذا شكر لوجه الله على نجاحج

حسيتهم عائلتي الحقيقيه والفرحه واضحه عليهم

بليل اجتي علاهن عبالي تريد تبارك وفرحانه بيه

تالي طلعت جايه تهدد خاف اكمل دراسه وصوتهه شعلوه حته مابيه حيل اجاوبهه ولاعندي طاقه اتعارك

جانوا الولد طالعين وبس اني وعمه فضه واكلتنه حاصل فاصل بلسانهه وراحت

ما اهتميت لكلامهه لان مستحيل اخلي احد يوكف بطريقي ويكسروني مره ثانيه

ادافع عن مستقبلي بكل ما املك قوه ولو اعرف يتبرون مني ولا اسمحلهم يذبحون حلمي.....

ثاني يوم كعدت وتقريبا اكو فرحه او مرتاحه نوعا ما لان حققت شي قليل من حلمي وكدرت اسكت الشمات