بين ليالي العشق(الجزء الاول من سلسلة اقدار متشابكة)

الفصل السادس عشر

《عزيزتى ليلى...

لما تفتحى الجواب مش هكون معاكي،هكون فى مكان احسن يا حبيبتى.

عايزاكى تعرفى انى بحبك جدا وانى اعتبرتك زى بنتى وعمرى ما ندمت انى ربيتك،بالعكس انا كنت هندم لو انتقامى عمانى يوميها و استغليتك علشان اخد حقى.

يوم ما عزة والدتك انا كنت معاها،عزة كانت حاسه دايما انها هتموت ومش هتقدر تربيكي وهو ده اللى حصل

بعد ما اتولدتى جسم عزة كان ضعيف و مقدرتش تستحمل وروحها طلعت بين ايديا بعد ما امنتنى عليكى وقالتلى أنتِ بنت مين..

بنت ممدوح العزمى.

لعنة حياتى وحياتك وحياة امك وحياة ناس كتير،حتى ابنى قيس.

انا جميلة العزمى..عمتك يا ليلى

انا اللى اخويا جوزنى وانا عندى 18 سنة،وانا مراهقة مش فاهمة حاجة كل اللى كنت عاوزه انى افضل مع الانسان اللى بحبه،صاحب ممدوح..جمال.

ممدوح كانت عينه على الورث اللى ورثته من بابا والطريقة الوحيدة اللى كان هيقدر يخده منى انى اتنازل عنه وده اللى اتفق عليه هو وجمال.

باع اخته زى فتيات الهوى لصاحبه مقابل أن صاحبه يمضينى على التنازل وانا وقعت فى الفخ ده زى الهبلة.

وبعدها بدأ جمال يزهق،مهو اخد مزاجه بقا وكان عاوز يخلع،بس القدر خلانى احمل فى قيس ابنى رغم موانع الحمل اللى جمال كان بيجبرنى اخدها.

لما جمال اكتشف ده كان عايز يخلص من الطفل بس ممدوح منعه،وقتها افتكرت ان قلبه حن اخيرا عليا بس ممدوح شيطان اهم حاجة عنده مصلحته.

قيس اتولد وفضل فى حضنى سنة،كانت من أجمل سنين حياتي،وهو بيكبر بين ايديا وانا براقب ملامحه اللى فيها كتير منى.

لكن فجأة لقيت نفسي فى السجن وقيس بيتاخد منى بالاجبار،بس وقتها ممدوح اللى اخده مش جمال،جمال اتخلى عنى وعن ابننا وسافر بعد ما طلقني.

بعد ما خرجت من السجن عرفت ان ممدوح بقى عقيم،يعنى مش هيقدر يخلف تانى،علشان كدة اخد ابنى انا ونسبه ليه.

وعرفت انه طلق خديجة مراته واخد منها بنتها عشق،وقتها قدرت اوصل لعشق،وشوفت هالة وهى بدأت تخرج عن طوع ممدوح وبدأت تحب ماهر

فستغليت الموضوع

قلتلها ان بالصندوق ده رقبة ممدوح فى اديها

وأنا ضامنة ان فى الحالتين قيس هيعرف الحقيقة.

لو الجواب ده وقع فى ايدك فأكيد أنتِ وصلتى لقيس وهو معاكى دلوقتى وبيقرأ الجواب...

قيس ابنى سامحنى علشان مرجعتكش لحضنى تانى بعد ما خرجت من السجن.

صدقنى انا حاولت بس ممدوح مكنش سهل حد يقف قصاده ابدا ومع ذلك عمك حسن كان دايما بيروح يشأر عليك ويسأل عن حالك ويجى يطمن قلبى.