جرحنى ولكنى احببته...بقلم فاطمة البربرى

الحلقة السابعة

الحلقة السابعة

رواية جرحني ولكنى أحببته بقلم فاطمة البربرى

الطب الشرعي قال إن المجنى عليه مات مخنوق وطبعا مفيش اي بصمات لان الجانى كان لابس جوانتى وفضل حسام هو المتهم الوحيد وظل محبوس واستمرت القضية

_سلمى وعادل واقفين مع بعض في مكتب سلمى ودخل ابراهيم

ابراهيم: صحيح ياسلمى اللى سمعته ده عن حسام

سلمى بحزن:ايوه الحمد لله على كل حال

عادل بصوت عالي: وأنت مالك أنت شاغل بالك ليه

ابراهيم تجاهل كلام عادل: سلمى تعالى كده دقيقه عايزك في كلمة

_سلمى راحت معاه وعادل كان متغاظ جدا من كدة

ابراهيم:خدى ياسلمى الفلوس دي معاكي يمكن تحتاجيها

سلمى: شكرا يا ابراهيم معايا والله الحمد لله ولومحتاجة حاجة اكيد انت أول واحد اطلب منه

ابراهيم:طب خلى بالك على نفسك ياسلمى وماتفتحيش باب شقتك لحد نهائي

سلمى: حاضر

_عادل قطع حديثهم: والله؟وانت بقى خايف عليها أوى كدة انت ايه يابنى جبلة ماعندكش دم ماتبعد عنها بقى يااخى وسيبها في حالها مش بعيد تكون أنت اللى قتلت الرجل عشان تخلص من حسام

ابراهيم:انت انسان سفيه اساسا وماتستاهلش أن أرد عليك

سلمى ابتسمت لابراهيم:روح انت شوف شغلك يابراهيم سيبك منه

*في شقه منى*

الأم/انتى جيتى من الشغل اخيرا ابنك تعبان من الصبح وزهقنى

منى: معلش يا ماما تعباك معايا

الأم/وانتى ان شاءالله كده هتسيبى جوزك للغندورة دى تاخده منك

منى:قصدك طليقى ياماما وجوزها هى

الأم/يابت.....يابت بطلى هبل بقى انتى هتفضلى عبيطة كده لحد امتى ده جوزك انتى قبلها وعندك منه عيل رابطه بيكى يعني من حقك انتى شوية دلع كدة ع الرجل هترجعيه ليكى بصباع رجلك الصغير

منى:انسى ياماما حسام عمره ماحبنى وعمرنا ماتفقنا مع بعض لكن هو بيعشق سلمى واتجوزنى انا عشان يكيدها لانى صاحبتها لكن ماقدرش يكمل معايا وطلقنى هى دى الحقيقة ياامى اللى ماكنتش بحب اقولها

الأم/يبقى السكة الوحيدة للموضوع ده هى امه وهي اللى هتقدر تأثر عليه

منى:امه ازاي يعني مش فاهمه حاجه

الأم/ماتشغليش بالك سيبى الموضوع ده على وبعدين انتى ازاي سايباه كده روحي قوليله انا محتاجه فلوس وابنك تعبان خليه يحس أنه أب مرة ياختى

منى:حاضر ياماما

_سلمى راحت زيارة لحسام وراح معاها ابراهيم لأن هو اللى جابلها اذن الزيارة

حسام:سلمى(ومسك ايديها)ازيك يا حبيبتى وحشتيني اوي (وبص لابراهيم): ازيك يا هيما اخبارك ايه

ابراهيم:انا بخير اهم حاجة انت

سلمى: ابراهيم هو اللى جابلى اذن الزيارة

حسام: متشكر اوي يا دكتور أنت جدع اوى يا ابراهيم

ابراهيم: أنت اخويا وحبيبي ياحسام أنا هسيبكم مع بعض شوية بقى سلام

"ابراهيم مشى

_حسام حضن سلمى جامد: وحشتيني اوي يا روح قلبي

سلمى:وانت كمان يا حبيبي

حسام:ماتزعليش ياسلمى بإذن الله أزمة وهتعدى

سلمى: يارب تعدى على خير

_عدى فترة والقضية شغاله ومفيش جديد وجلسة الحكم على حسام قربت

*والد حسام نزل من السفر وماكانش يعرف اللى حصل,دخل الفيلا وكان الكل منتظره داليا وجوزها وزياد ومروة مراته واميره بنت اخوه

خالد:ازيكم وحشتوني جدا عاملين ايه امال فين حسام ومراته مايعرفوش انى نازل ولاايه رنيت ع حسام كتير تليفونه مقفول هو كويس

داليا: حسام ده شكله هيجيبلنا العار يا بابا ماكتفاش أنه اتجوز واحده مش من مستوانا لأ وكمان بقى مجرم

خالد:انتى بتقولى ايه ابنى ماله ايه اللي حصل؟؟؟

اميره: حسام متهم بقتل سامي طليق داليا ياأونكل وحكوله اللى حصل

خالد: أنا رايح مشوار وجاى

مروة: دلوقتى طب استريح شوية والصباح رباح

خالد:محدش ليه دعوة بى سلام

*سلمى في شقتها جالها تليفون من رقم غريب

سلمى:الو مين معايا

.....: أنا حنان ممرضة في عياده دكتور حسام

سلمى:خير في حاجة

حنان: أنا عندي اللى يثبت براءة د حسام بس مش عايزه سيرتى تيجى في الموضوع نهائي ولا تعرفى اى حد

سلمى:انتى بتتكلمى جد

حنان: أيوة بتكلم جد انتى ممكن تيجي العياده وكانك جاية تطمنى ع الشغل وانا هاقابلك واعطيكى الدليل

ياترى الكلام ده حقيقي ولا ايه

توقعاتكم