هيامي وعشقي

البارت الاول

انا اسمي هيام  عمري ١٨ سنه كملت السادس وراح ادخل على الكلية عائلتي كبيرة نوعا ما امي وابوية و٤ اخوان وثلاث بنات اني اصغر اخواني واخواتي مثل مايكولون اخر العنقود اخواني محمد متزوج ومستقل واحمد متزوج وكاعد يمنا بالطابق الثاني  واياد ضابط شرطة وعلي بكلية الهندسة بعدهم مامتزوجين اما اخواتي هيفاء متزوجة من ابن عمي عماد وهند تدرس بكلية الطب بعدها مامتزوجة وكلش شاطرة وبعدهم كلهم .
اني واختي هيفاء نشبه امي اني شعري احمر على برتقالي طبيعي يعني صهباء وشعري مجعد وطويل عيوني ملونه وبشرتي بيضة حيل كطن على شوية حمار وبشرتي كلش صافية مع وجود شوية نمش الكل يكولون عني تشبهين الاجانب حلوة كلش بس اني اضوج من تعليقات البعض من يوصفوني بالحمرة او بالملونه او ام الشعر الاحمر .
كملت اوراق القبول المركزي ويا اخوية علي قدمت على كلية التربية قسم انكليزي .
حالتنا المادية متوسطة ابوية متقاعد وامي ربة بيت عائلتنا محافظة بس ابد مايجبرونا على الحجاب او على الزواج منطين البنات كامل الحرية والثقة واحنا الحمدالله راعينا هالثقة واني رغم انه مو محجبة بس ملتزمة بصلاتي وبطريقة لبسي مالبس قصير كلش ولا شي ضيق يطلع مفاتني .
رجعنا اني وعلي واحنا كلش هلكانين وتعبانين دخلت المطبخ بوست ست الحبايب .
هيام _حبيبتي ماما اشطابخة اليوم راح اموت من الجوع حتى مامتريكه الصبح
ام محمد _ مسوية تبسي بيذنجان باللحم ويا التمن روحي بدلي ملابسج حتى نصب الاكل ابوج هم جوعان داينتظركم .
هيام _ اوكي ماما عشر دقايق وجاية .
كملنا الاكل وغسلت المواعين ورتبت المطبخ 
ودخلت غرفتي اني وهند مشتركات بغرفة وحدة  وطلعت موبايلي ودخلت جوا الفراش وتصفحت شوية على النت الى ان غفيت .
العصر كومتنا ماما اني وهند جانت مسوية جاي وطلعنا كلنا للحديقة الجو جان يخبل اني وهند وعلي وبابا وماما شربنا الجاي احمد وزوجته تمارا جانوا ويا ابنهم هيثم  طالعين سفرة للشمال اربيل ودهوك راح يبقون اسبوع .
جنت احس اني اسعد وحدة بالعالم لان خلصت من السادس رغم انه معدلي ماجان عالي كلش بس حسيت هم وانزاح من على صدري هسة اكدر اتصفح النت والفيسبوك براحتي واباوع للتلفزيون واساعد ماما براحتي ماكو شي يقيدني ابد .
اليوم ماما خبرتنا بانه احنا معزومين يوم الخميس بعرس ابن عمي عمار اخو عماد زوج اختي هيفاء .كيفت هواية واتفقت ويا هند نروح نشتري ملابس واكسسوارات لزوم الحنه والعرس
طلعنا للسوك واختارينا ملابس على كد ميزانيتنا وهلكد افترينا كامت رجلي توجعني بعد مااكدر امشي بالاخير لزمنا تاكسي ورجعنا .
ومن رجعنا كمنا نقيس ونلبس الشغلات اللي اشتريناها وكضيناها ضحك وسوالف لحد الليل .

بيوم الحنه جنت مشترية ثوب بسيط وحلو  لونه ماروني ورداناته كيبور وصدره كيبور وشعري هو كيرلي بطبيعته وهو احمر خليته مفتوح ونازل وخليت مكياج خفيف وحمرة مارونية ولبست حذاء كعب عالي وجنا متفقين ويا هيفاء اختي انه اني وهند نبات ببيت عمي حماها وهي همين تجي لان بيت عمي جبير وحتى نساعد البنات همين احنا البنات جنا ملتمين بالاستقبال والولد بالصالون والعروسة جانت كلش حلوة طالعة وهم سووا الحنه ببيت العريس لان بيت العروسة كلش صغير كامن البنات يشغلن الديجي ويركصن اني كلش احب الرقص بس استحي . حسيت بروحي عطشانه ردت اروح للمطبخ وموبايلي بيدي مشغولة بيه حسيت بروحي اصطدمت بفد شي قوي رفعت راسي وباوعت شفت شاب اسمر وعيونه وساع ومبين بالثلاثينات تقريبا جان ضخم باوعلي بنظرات حسيتها جريئة حاولت اتدارك الموقف
_اني اسفة جنت مشغولة بالموبايل
_ لا ولايهمج
وبسرعة تركته ودخلت المطبخ شفت هيفاء اختي شربت ماي وسالتها
_  هيفاء كوليلي منو هذا الشاب اني ماشايفته كبل
_ هذا لؤي يصير ابن خال عماد زوجي بس هو من الحلة جديد استقر ببغداد واسسله مشروع هنا .

خلصت الحنه والمعازيم كل واحد ورجع لبيته والعروسه همين وصلها عمار ويا خواتها
صعدنا اني وهند وهيفاء دخلنا غرفة ومددنا فراشنا حتى ننام جنا كلش تعبانين بس اني النوم جافاني لان اني متعودة انام على سريري ومااحب اغير مكاني حسيت بالخنكه فتحت شباك الغرفة الهوا الطيب دخل صدري باوعت الدنيا ظلمة والهوا بدا يداعبني ويحرك بشعري حسيت برجفة خفيفة سديت الشباك وردت انزل المطبخ حتى اشرب شي او اكل شي واني باخر الدرج سمعت همسات اثنين يحجون ويا بعض بس الكلام مامفهوم   نزلت وكفت بباب المطبخ باوعت بس ياريتني اصلا مانزلت شفت لؤي الولد الاسمراني واكف ويا اميرة بنت عمي انصدمت هو جان لازمها من ذراعاتها وكانه حاظنها اميرة جانت ظهرها عليه ماشافتني بس لؤي شافني بس ماتحرك ولا سوا نفسه شايفني وماهي الا لحظات حست اميرة واندارت علية وبسرعة من فشلتها طلعت بسرعة من المطبخ بقيت واكفة جسمي كله يرجف من الخوف والخجل  اقترب هو من عندي وهو منخزر وكلما يقترب اني ابتعد وصلت للحائط وهو واكف مقابيلي ....ونطق
_ اللي شفتيه هسة تنسيه خلاص .....اني مااخاف من احد ...ومايهمني احد بس علمود اميرة بنت عمج ....تسكتين مفهوم .....
_   م....فه...وم
كلتةكلمتى ووخرته من يمي وطلعت بسرعة وصعدت فوك .

بقلم الكاتبه lawyer saber