هيامي وعشقي

البارت الخامس

يوسف
اني شاب عمري ٣٠ سنه طويل نوعا ما ورياضي مواظب على ممارسة الرياضة يومية .....محبوب من الجنس الاخر ...وانا اعشق النساء ...الطويلة القصيرة ...والشكرة والسمرة و الحنطية حياتي ماتخلو من العلاقات
العابرة ....واحب الكلاب هواية عندي كلبين بالبيت ...والدي مسؤول كبير بالدولة ...ومن تخرجت من الهندسة اسست لي شركة مقاولات وعن طريق الوالد كدرت اكبره عايش بشكل منتقل بين فيلا والدي والفيلا الخاصة اللي املكها حياتي كلها عايش برفاهية ...اسافر والهو واعيش حياتي بالطول والعرض وماحد يتحكم بحياتي .حتى بالبيت كلمتي ماشية على الكل .
والكل يحسبلي حساب حتى والدي كوني اكبر اولاده وبعدي يجي مصطفى وبعدين سرى وبعدين اخر العنقود حلا بصف رابع اعدادي .
جربت اتزوج مرة وحدة تحت ضغط من امي وجانت البنية دكتورة من عائلة غنية ومعروفة وماتحملت نبقى سويه اكثر من ست اشهر واتطلكنا لان ماكدرت تتحمل نزواتي لان اني كلش مزاجي ....وفد يوم رحت اجيب اختي من الكليه لان الحرس والحماية جانو ويا والدتي ....رحتلها للكلية وشفت اختي واكفة ويا مجموعة بنات بس اني اللي لفت نظري ابنية شعرها احمر وعيونها ملونه ....وبشرتها بيضة صافية ...جذبني شكلها اول مرة حسيتها نار وشرار وشعلت كلبي ......تكررت زياراتي للكلية حتى اشوفها ....وتعرفت عليها عن قرب وشفتها اشكد بريئة وخجولة وطفولية ومثل كل مرة عزمت على ان تكون الية بكل الاحوال ....

ولمان خلصت السنه الدراسية اشتاقيتلها وخليت سرى ترتبلنا الموعد بالمطعم ....ردت اجس نبضها بالبداية وعرضت عليها علاقة بحجة نتعرف على بعض ماتوقعت ردها صدمني ماتوقعت هالكلام اسمعها منها زاد اعجابي وتمسكي بيها وصممت اكثر حتى تكون الية .
وبديت اخطط وافكر حتى اخليها ترضخ لي وترفع الراية البيضة لان بحياتي كلها ماكو وحدة رفضتني ....وصممت اجيبها للدرب .
رجعنا اني وسرى للبيت سالتني سرى
_ يوسف ليش دزيتلي رساله بالمطعم تطلب اعوفك وحدك وياها ...حسيت بهيام متضايقة
يوسف _ لاتشغلين بالج طلبت منها نتعرف على بعض وبس
سرى _ حبيبي يوسف لاتخليني بموقف محرج ترا هيام خوش ابنية وعاقلة وخلوقة وهي صديقتي كلش ماريدك تفشلني وياها اروحلك فدوة عوفها ...
يوسف _ اشبيج خايفة ...ومرعوبه محسستني اني وحش وراح اريد اكلها ...على العموم ارتاحي هي رفضت عرضي
سرى _، هالحجي تكوله لوحدة غيري ماتعرفك ....عفية صديقاتي عوفك منهن
يوسف _ ماشي ماشي دفووتي فوتي جوا هسة

*********
سرى
اني اخت يوسف طالبة بالكلية ويا هيام وهي احب صديقاتي اللي اتعرفت عليها من الكلية احنا شلة صديقات بس اني احس هيام اقرب وحدة اليه هادئة وخجولة مثلي ...بس من اخويه اتعرف عليها حسيت بيه عجبته هيام والصراحة هذا الشي صار يقلقني ويأرق منامي لانه اني
اعرف اخويه من يخلي وحدة براسه ......خوفي زاد لمان طلب مني يعزمنا اني وهيام على الغدا وخلاني افهمها بانه اني عازمتها حتى يضمن موافقتها على الطلعة .....وهناك دزلي مسج كاللي روحي للحمام وشوية طولي ....قلقي زاد وعرفت نية اخويه شنو ....وبالبيت حجيت وياه صراحة ..وتوسلت بيه حتى يعوفها ....بس اني اعرف كل الحجي مايفيد .
دخلت غرفتي واني افكاري مشتته وماما ماكو بالبيت كالعادة لو تتسوك لو طالعة ويا صديقاتها ....عدها شلة نسوان يطلعون ويسوون كعدات كل مرة ببيت وحدة ..ماما من يوم اللي صار بابا بمنصبه اتغيرت هواية صرنا نادرا مانشوفها عايشة بعالم خاص بيها وصارت تباوع للناس وتتصرف وياهم بخشم يابس ...حتى اقاربها واقارب بابا صار تعاملها هيجي وياهم ...مااعرف ليش صرت مرات افتقد ماما اللي جانت كلها حنية علينا .
اني صرت احس بالوحدة والفراغ ...احب اصير مثل البنات العادية اللي ينعجب بيها الشباب وتعجب بيهم بس اني ....غير عن البنات احس الشباب داتخاف تتقربلي او تتقدم لي لاني بنت مسؤول واكيد راح يخافون من طلباتنا .
عندي اخت وحيدة هي حلا اخر العنقود هي هم عدها عالمها الخاص ..ملتهية ٢٤ ساعة بالنت ومواقع التواصل الاجتماعي رغم هي بعدها مراهقة اخاف عليها ..وماما كالعادة هاملتها
وصلت غرفتي خابرت هيام ردت اتطمن عليها

سرى _ الو هيام اشلونج ؟
هيام _ الحمدالله سراوي
سرى_ هيام حبيبتي اريد اسالج سؤال ....يوسف خو ماضايقج بشي شفتج ضايجة من رجعت من الحمام
هيام _ لا عادي حبيبتي لاتاخذين ببالج هو عرض عليه شي ورفضته ماصار شي لا تضوجين عفية سراوي من نتشاوف عود احجيلج كل شي اوكي
سرى _ اوكي حبيبتي يلة باي